Read KO E TOH TAPU KATOA TONGA KO TEUTALŌNOME 25 Bible Online

KO TEUTALŌNOME 25 - KO E TOH TAPU KATOA TONGA bible

KO TEUTALŌNOME 25

¹KA ai ha me‘a ‘oku fakamāu‘i he vaha‘a ‘o ha tu‘unga me‘a, pea nau omi ki he fakamāu‘anga, pea kuo fakamaau ai kinautolu; te nau fakatonuhia ‘a e tonuhia:

²pea fakahalaia ‘a e halaia: pea kapau ‘oku totonu ke taa‘i ‘a e halaia, pea ‘e fekau ‘e he fakamaau ke ne fo‘ohifo, pea ke fai ‘i hono ‘ao hono loholoho‘i, pea ke lau ‘a e ngaahi fo‘i tā ‘o fe‘unga mo ‘ene angahala.

³Te ne taa‘i ke fāngofulu, kae ‘ikai fakalahi: na‘a hā ngali ma‘ama‘a ho tokoua na, ‘o kapau ‘e hulu atu ‘a e tā ‘i he me‘a ko ē.

⁴‘E ‘ikai te ke ha‘iha‘i ‘a e ngutu ‘o ha pulu ‘i he‘ene ‘au‘au ‘a e koane.

⁵Ka ‘oku nofo fakataha ha tautehina, pea pekia hanau toko taha ta‘ehano foha, ‘e ‘ikai mali mama‘o ‘a e finemotu‘a mo ha kehe: ko e tokoua ‘o hono husepāniti te ne ‘alu kiate ia, ‘o mali mo ia, ‘o fai ‘a e tō‘onga ‘o e tokoua ‘o e husepāniti.

⁶Pea ko e ‘uluaki tama te ne fanau‘i, te ne hoko ‘o ma‘u ‘a e hingoa ‘o e tokoua kuo pekia, ke ‘oua na‘a mate hono hingoa mei ‘Isileli.

⁷Pea kapau ‘oku ‘ikai lelei ki he tangata ke ma‘u ‘a e uaifi ‘o hono tokoua, pea ‘e toki ‘alu ‘a e finemotu‘a ki he matanikolo, ki he kau mātu‘a, pea te ne pehē, ‘Oku fakafisi ‘e he tokoua ‘o hoku ‘unoho ke fakaai ‘a e hingoa ‘o hono tokoua ‘i ‘Isileli; ‘e ‘ikai te ne fai kiate au ‘a e tō‘onga ‘o e tokoua ‘o e husepāniti.

⁸Pea ‘e ui ange ia ‘e he kau mātu‘a ‘o e kolo, pea te nau lea ki ai. Pea kapau te ne tu‘u ‘o lea ‘o pehē, ‘Oku ‘ikai lelei kiate au ke mali mo ia;

⁹pea ‘e toki ‘unu‘unu ‘a e uaifi ‘o hono tokoua ‘i he ‘ao ‘o e kau mātu‘a, pea te ne vete ‘a e sū mei he va‘e ‘o e tangata, pea te ne ‘anuhi hono mata; pea te ne tali ‘o pehē, Ko e tō‘onga ē ‘e fai ki he tangata ‘oku ‘ikai ke fie langa hake ‘a e fale ‘o hono tokoua.

¹⁰Pea ko e hingoa ‘e ‘ai kiate ia ‘i ha‘a ‘Isileli, Ko e fale ‘o e motu‘a na‘e vete hono sū.

¹¹Ka feolo‘i ha ongo tangata, pea ‘unu‘unu mai ‘a e uaifi ‘o e taha ke hamusi hono husepāniti mei he nima ‘o e taha ‘oku taa‘i ia, pea ala atu ‘a e fefine, ‘o puke ia ‘i hono potu:

¹²pea te ke tu‘usi hono nima, ‘e ‘ikai te ke mata mamae ki ai.

¹³‘E ‘ikai tuku ki ho‘o tangai me‘a fakamamafa ha fua mo ha fua, ha me‘a mamafa mo ha me‘a ma‘ama‘a.

¹⁴‘E ‘ikai tu‘u ‘i ho fale ha efa mo ha efa, ha me‘a lahi mo ha me‘a si‘i.

¹⁵‘E kakato mo totonu ho‘o me‘a fakamamafa; ‘e kakato mo totonu ho‘o efa: kae lahi ho ngaahi ‘aho ‘i he kelekele ‘oku foaki kiate koe ‘e Sihova ko ho ‘Otua.

¹⁶He ‘oku fakalielia‘ia ‘a Sihova ko ho ‘Otua ‘i he kakai ‘oku fai me‘a pehē; ‘io, ‘a kinautolu kātoa ‘oku fai kākā.

¹⁷Manatu ki he me‘a na‘e fai kiate koe ‘e ‘Amaleki ‘i he hala, ‘i ho‘omou omi mei ‘Isipite;

¹⁸he‘ene fakafetaulaki kiate koe ‘i he hala, ‘o ne taa‘i ho tukutau, ‘a ho kau vaivai na‘e fakatōtōmui, ‘i he taimi na‘a ke hela mo ongosia; ‘o ‘ikai te ne ‘apasia ki he ‘Otua.

¹⁹Ko ia ka faifai pea fakamālōlō koe ‘e Sihova ko ho ‘Otua mei he fai mo ho ngaahi fili takatakai, ‘i he fonua kuo ne foaki kiate koe ke ke ma‘u mo‘ao tofi‘a, pea te ke tāmate‘i ‘a e manatu ki ‘Amaleki mei he lalo langi: ‘oua na‘a ngalo.