Read KO E TOH TAPU KATOA TONGA KO TEUTALŌNOME 27 Bible Online

KO TEUTALŌNOME 27 - KO E TOH TAPU KATOA TONGA bible

KO TEUTALŌNOME 27

¹PEA na‘e fekau ‘e Mōsese mo e kau mātu‘a ‘Isileli ki he kakai, ‘o pehē, Tauhi hono kotoa ‘o e tu‘utu‘uni ‘oku ou feia atu he ‘aho ni.

²Pea ka faifai pea mou a‘a atu ‘i Soatani ki he fonua ‘oku foaki kiate koe ‘e Sihova ko ho ‘Otua, ko e taimi ko ia te ke fokotu‘u ai ha‘o ngaahi maka lalahi, ‘o vali lahe:

³pea te ke tohi ki ai ‘a e ngaahi lea ‘o e lao ni ‘i he hili ho‘o a‘a atu, koe‘uhi ke ke hū ki he fonua ‘a ia kuo foaki kiate koe ‘e Sihova ko ho ‘Otua, ko e fonua ‘oku mahutafea ‘i he hu‘akau mo e honi, ‘o hangē ko e tala‘ofa ‘a Sihova ko e ‘Otua ‘o ho tupu‘anga kiate koe.

⁴‘Io, ka faifai pea mou a‘a atu ‘i Soatani, te mou fokotu‘u ‘a e ngaahi maka ni, ‘a ia ‘oku ou fai tu‘utu‘uni ai kiate kimoutolu he ‘aho ni, ‘i he mo‘unga ko ‘Īpale, pea te ke vali ‘aki ‘a e lahe.

⁵Pea te ke langa ai ha ‘ōlita kia Sihova ko ho ‘Otua, ko ha ‘ōlita langa maka: ‘e ‘ikai te ke apo ha ukamea ki ai.

⁶Ko e ngaahi maka tekanoa te ke langa ‘aki ‘a e ‘ōlita ‘o Sihova ko ho ‘Otua: pea te ke feia ai ha ngaahi feilaulau-mōifua kia Sihova ko ho ‘Otua:

⁷pea te ke fai mo e ngaahi feilaulau-‘ofa, mo kai ‘i he potu ko ia; pea te ke fakafiefia ‘i he ‘ao ‘o Sihova ko ho ‘Otua.

⁸Pea te ke tohi ‘i he ngaahi maka ‘a e ngaahi lea ‘o e lao ni, ‘o tohi ke lelei.

⁹Pea lea ‘a Mōsese mo e kau Līvai taula‘eiki ki ha‘a ‘Isileli kātoa, ‘o pehē, ‘E ‘Isileli, longo ā mo fakaongo mai; ko e ‘aho ni kuo ke hoko ko e kakai ‘a Sihova ko ho ‘Otua.

¹⁰Ko ia te ke fakaongo ki hono le‘o, pea te ke fai ‘ene ngaahi tu‘utu‘uni mo fekau, ‘a ia ‘oku ou feia atu he ‘aho ni.

¹¹Pea tu‘utu‘uni ‘e Mōsese ki he kakai ‘i he ‘aho ko ia, ‘o pehē,

¹²Ko eni ia ‘e tu‘u ‘i Mo‘unga Kelisimi ke tāpuaki ‘a e kakai, hili ho‘omou a‘a ‘i Soatani; ko Simione, mo Līvai, mo Siuta, mo ‘Īsaka, mo Siosifa, mo Penisimani.

¹³Pea ko eni ‘e tu‘u ‘i Mo‘unga ‘Īpale ki he fakamala‘ia; ko Lūpeni, ko Kata, mo ‘Āseli, mo Sepulone, ko Tani, pea mo Nafitalai.

¹⁴Pea ko e kau Līvai ‘e tali, pea te nau lea ki he tangata ‘Isileli kotoa ‘o le‘o lahi, ‘o pehē.

¹⁵Mala‘ia ā ka ko e tangata ‘oku ne ngaohi ha tamapua pe ‘īmisi ukamea, ko e me‘a ‘oku fakalili‘a ki ai ‘a Sihova, ko e ngāue ‘a e nima ‘o e tufunga, ‘o ne fokotu‘u ‘i ha lilo. Pea ‘e tali ‘e he kakai kotoa, ‘o pehē, ‘Ēmeni.

¹⁶Mala‘ia ā ka ko ia ‘oku ne fakatakataka ‘aki ‘ene tamai mo ‘ene fa‘ē. Pea ‘e pehē ‘e he kakai kotoa, ‘Ēmeni.

¹⁷Mala‘ia ā ka ko ia ‘oku ne hiki ‘a e kau‘ā ‘a hono kaungā‘api. Pea ‘e pehē ‘e he kakai kotoa, ‘Ēmeni.

¹⁸Mala‘ia ā ka ko ia ‘oku ne takihee‘i ‘a e kui mei he hala. Pea ‘e pehē ‘e he kakai kotoa, ‘Ēmeni.

¹⁹Mala‘ia ā ka ko ia ‘oku ne piko‘i ‘a e fakamaau ‘o e muli, ‘o e tamai mate pea mo e uitou. Pea ‘e pehē ‘e he kakai kotoa, ‘Ēmeni.

²⁰Mala‘ia ā ka ko ia ‘oku mohe mo e ‘unoho ‘o ‘ene tamai; he ko ‘ene tatala ‘a e vala ‘o ‘ene tamai. Pea ‘e pehē ‘e he kakai kotoa, ‘Ēmeni.

²¹Mala‘ia ā ka ko ia ‘oku ne mohe mo ha taha ‘i he fa‘ahinga manu. Pea ‘e pehē ‘e he kakai kotoa, ‘Ēmeni.

²²Mala‘ia ā ka ko ia ‘oku ne mohe mo hono tuofefine, pe ko e ‘ōfefine ‘o ‘ene tamai, pe ko e tama ‘a ‘ene fa‘ē. Pea ‘e pehē ‘e he kakai kotoa, ‘Ēmeni.

²³Mala‘ia ā ka ko ia ‘oku mohe mo e fa‘ē ‘a hono ‘unoho. Pea ‘e pehē ‘e he kakai kotoa, ‘Ēmeni.

²⁴Mala‘ia ā ka ko ia ‘oku ne taa‘i fufū hono kaungā‘api. Pea ‘e pehē ‘e he kakai kotoa, ‘Ēmeni.

²⁵Mala‘ia ā ka ko ia ‘oku ne tali ha koloa ke tāmate‘i ha tangata ta‘ehalaia. Pea ‘e pehē ‘e he kakai kotoa, ‘Ēmeni.

²⁶Mala‘ia ā ka ko ia ‘oku ‘ikai ke fakapapau ‘a e ngaahi lea ‘o e lao ni ke fai ki ai. Pea ‘e pehē ‘e he kakai kotoa, ‘Ēmeni.