Read KO E TOH TAPU KATOA TONGA KO TEUTALŌNOME 28 Bible Online

KO TEUTALŌNOME 28 - KO E TOH TAPU KATOA TONGA bible

KO TEUTALŌNOME 28

¹PEA ‘e hoko ‘o pehē, kapau te ke mātu‘aki fakaongo ki he le‘o ‘o Sihova ko ho ‘Otua, mo tokanga ke fai ‘ene ngaahi tu‘utu‘uni kotoa, ‘a ia ‘oku ou feia atu he ‘aho ni, pea ‘e toki ‘ai koe ‘e Sihova ko ho ‘Otua ke ke mā‘olunga taha ‘i he kakai kotoa pē ‘o māmani:

²pea ‘e toki toupili mai kiate koe ‘a e ngaahi monū ni ko eni, pea te nau ma‘u koe, ‘o kapau te ke fakaongo ki he le‘o ‘o Sihova ko ho ‘Otua.

³Te ke monū‘ia ‘i he kolo, pea te ke monū‘ia ‘i he vao.

⁴‘E monū‘ia ‘a e fua ‘o ho manava, mo e fua ‘o ho kelekele, mo e fua ‘o ho‘o fanga manu, ‘a e fanafanau ‘a ho‘o fanga pulu, mo e fakahoa ‘a ho‘o fanga sipi mo kosi.

⁵‘E monū‘ia ho‘o kato mo ho‘o natu‘anga mā.

⁶Te ke monū‘ia ‘i ho‘o hū mai, pea te ke monū‘ia ‘i ho‘o hū atu.

⁷‘E tuku ‘e Sihova ‘a e ngaahi fili ‘oku tu‘u kiate koe ke te‘ia ‘i ho ‘ao: na‘a nau hū mai kiate koe ‘i ha hala pē taha, ka te nau hola meiate koe ‘i ha hala ‘e fitu.

⁸‘E tu‘utu‘uni ‘e Sihova ke ‘iate koe ‘a e tāpuaki ‘i ho ngaahi feleoko, pea ‘i he me‘a kotoa pē ‘oku ke ala ki ai: ‘io, te ne fakamonū‘ia koe ‘i he fonua ‘oku foaki atu ‘e Sihova ko ho ‘Otua.

⁹‘E fokotu‘u koe ‘e Sihova ko e kakai tāpuhā kiate ia, hangē ko ‘ene fuakava kiate koe; ‘o kapau te ke tauhi ‘a e ngaahi tu‘utu‘uni ‘a Sihova ko ho ‘Otua, mo foua hono ngaahi hala.

¹⁰Pea ‘e vakai ‘e he ngaahi kakai ‘o māmani ‘oku ui‘aki koe ‘a e huafa ‘o Sihova. Pea te nau manavahē telia ‘a koe.

¹¹Pea ‘e ‘ai ‘e Sihova ke ope atu ho lelei ‘i he fua ‘o ho manava mo e fua ‘o ho‘o fanga manu, mo e fua ‘o ho kelekele ‘i he fonua na‘a ne fuakava ai ki ho tupu‘anga ke ‘atu mo‘ou.

¹²‘E fakaava ma‘au ‘e Sihova hono falekoloa lelei ko e langi, ke ‘atu ‘a e ‘uha ‘o ho fonua ‘i hono taimi totonu, pea ke fakamonū‘ia ‘a e ngāue kotoa pē ‘a ho nima: pea te ke tali ‘a e nō ‘a e ngaahi fo‘i pule‘anga lahi, ka ‘e ‘ikai te ke nō koe.

¹³Pea ‘e tuku koe ‘e Sihova ke ke ‘ulu, ‘o ‘ikai te ke hiku; pea te ke taka ‘olunga pē, ‘o ‘ikai te ke taka lalo; ‘o kapau te ke fakaongo ki he ngaahi tu‘utu‘uni ‘a Sihova ko ho ‘Otua, ‘a ia ‘oku ou feia atu he ‘aho ni, ‘o ke tokanga ke fai ki ai:

¹⁴‘o ‘ikai te ke momo‘i afe mei he ngaahi me‘a ‘oku ou tu‘utu‘uni atu he ‘aho ni ki he to‘omata‘u pe ko e to‘ohema, he muimui ‘otua kehe mo tauhi ki ai.

¹⁵Ka ‘o kapau ‘e ‘ikai te ke fakaongo ki he le‘o ‘o Sihova ko ho ‘Otua ke tauhi mo fai ‘ene ngaahi tu‘utu‘uni mo fekau, ‘a ia kuo u feia atu he ‘aho ni; pea ‘e toki toupili kiate koe ‘a e ngaahi mala kotoa ko eni, pea te nau ma‘u koe.

¹⁶Te ke mala‘ia ‘i he kolo, pea te ke mala‘ia ‘i he vao.

¹⁷‘E mala‘ia ho‘o kato mo ho‘o natu‘anga mā.

¹⁸‘E mala‘ia ‘a e fua ‘o ho manava, mo e fua ‘o ho kelekele, ‘a e fanafanau ‘a ho‘o fanga pulu, mo e fakahoa ‘a ho‘o fanga sipi mo kosi.

¹⁹Te ke mala‘ia ‘i ho‘o hū mai, pea te ke mala‘ia ‘i ho‘o hū atu.

²⁰‘E tuku atu ‘e Sihova kiate koe ‘a e mala, ‘a e ‘ohovale mo e houhou‘ia, ‘i he me‘a kotoa pē ‘oku ke ala ki ai ke fai, kae‘oua ke ke ka‘anga, pea ‘auha vave; ko e ō ia ‘o e kovi ho‘o fai‘anga ‘i ho‘o li‘aki au.

²¹‘E tuku ‘e Sihova ‘a e mahaki faka‘auha ke piki kiate koe, kae‘oua ke ne faka‘osi koe mei he funga ‘o e kelekele ‘oku ke ‘alu ki ai ke ma‘u.

²²‘E taa‘i koe ‘e Sihova ‘aki ‘a e fakalilelila, mo e mofi, mo e kiatolo, mo e me‘a kula, mo e la‘ala‘ā, mo e mahunu, mo e kekena; pea te nau toupili kiate koe kae‘oua ke ke ‘auha.

²³Pea ‘e hoko ho langi ‘i ‘olunga na ko e kapa ‘atā, pea ko ho kelekele ‘i lalo na ko e ‘aione.

²⁴‘E ‘ai ‘e Sihova ‘a e ‘uha ‘o ho fonua ko e efu mo e efuefu: ‘e ‘alu hifo kiate koe mei langi kae‘oua ke ke ‘auha.

²⁵‘E tuku koe ‘e Sihova ke te‘ia ‘i he ‘ao ‘o ho ngaahi fili; te ke hū atu ke fai mo kinautolu ‘i ha hala ‘e taha, ka te ke hola meiate kinautolu ‘i ha hala ‘e fitu: pea te ke hoko ko e me‘a ke tekatali ‘aki ‘e he ngaahi pule‘anga ‘o māmani.

²⁶Pea ko ho ‘anga‘anga ‘e tu‘u mo‘o me‘akai ‘a e manupuna kotoa pē ‘o e ‘atā, mo e manu ‘o e fonua, pea ‘e ‘ikai ha taha ke sese‘e.

²⁷Pea ‘e taa‘i koe ‘e Sihova ‘aki ‘a e hangatāmaki ‘o ‘Isipite, pea ‘aki ‘a e ‘ulufī, pea ‘aki ‘a e pokua, mo e tāveli, ‘a ia ‘oku ‘ikai ke lava hano faito‘o.

²⁸‘E taa‘i koe ‘e Sihova ‘aki ‘a e sesele, mo e kui loto, mo e loto lelea:

²⁹pea te ke fāfā holo ho‘atā hangē ko e fāfā ‘a e kui ‘i he po‘uli, pea ‘e ‘ikai lakaimonū ho ngaahi ‘alunga: pea te ke hoko ko e koto fakamālohia mo vetea ma‘u ai pē, pea ‘e ‘ikai ha taha ke fakahaofi.

³⁰Te ke polo‘i hao uaifi, ka ko e tangata kehe ‘e mohe mo ia: te ke langa ha fale, kae ‘ikai te ke nofo ai: te ke tō ha ngoue vaine, kae ‘ikai te ke polopolo ia.

³¹‘E tāmate‘i ho‘o pulu ‘i ho ‘ao, kae ‘ikai te ke kai mei ai: ‘e ‘ave fakamālohi ho‘o ‘asi meia koe tonu, pea ‘e ‘ikai fakafoki atu: ‘e tuku ho‘o fanga sipi mo kosi ki ho ngaahi fili, pea ‘ikai hao fakahaofi.

³²‘E tuku ho‘o fānau tangata mo ho‘o fānau fefine ki ha kakai kehe, pea ‘e fakasio ho mata, ‘o vana he holi kiate kinautolu ‘i he ‘aho kotoa pē, kae ‘ikai te ke mafai ha me‘a.

³³Ko e fua ‘o ho kelekele mo ho‘o ngaahi ngāue kotoa, ‘e keina ‘e ha kakai ‘oku ‘ikai te ke ‘ilo ki ai, ka ke nofo koe ko e koto fakamālohia mo laikina ma‘u ai pē:

³⁴ko ia, te ke sesele tu‘u ‘i he me‘a ‘oku hā ma‘u ki ho mata ‘i ho‘o sio.

³⁵‘E taa‘i koe ‘e Sihova ‘aki ‘a e hangatāmaki kovi ‘i ho tui pea mo ho va‘e, ‘a ia ‘e ‘ikai lava hano faito‘o, ‘io, mei ho ‘aofiva‘e ki ho tumu‘aki.

³⁶‘E ‘ave ‘e Sihova ‘a koe, mo e tu‘i te ke fakanofo kiate koe, ki ha pule‘anga na‘e ‘ikai te ke ‘iloa, ‘e koe, pe ko ho‘o ngaahi kui, pea te ke tauhi ai ki ha ngaahi ‘otua kehe, ko e ‘akau mo e maka.

³⁷Pea te ke hoko ko e me‘a ke ofo ai, mo fakatokotokanaki ‘aki, mo luma ai, ‘e ha ngaahi kakai ‘a ia ‘e taki pōpula kimoutolu ki ai ‘e Sihova.

³⁸‘E lahi ‘a e pulopula te ke ‘ave ki he ngoue‘anga, kae si‘i ‘a e me‘a te ke utu; he ‘e keina ia ‘e he he‘e.

³⁹Te ke tō ngoue vaine mo tauhi ki ai, kae ‘ikai te ke inu hono uaine, pe te ke toli ia; he ‘e kai ‘e he tunga.

⁴⁰‘E ai ha‘o ngaahi fu‘u ‘ōlive ‘i ho ngaahi feitu‘u kehekehe, kae ‘ikai te ke tākai ‘aki hono lolo; he kaulo‘a ho‘o ‘ōlive.

⁴¹Te ke fanau‘i ha fānau tangata mo ha fānau fefine, kae ‘ikai ‘a‘au ia; he taki pōpula kinautolu.

⁴²Ko ho‘o ngaahi ‘akau kotoa, mo e fua ‘o ho kelekele ‘e ma‘u ‘e he he‘e.

⁴³Ko e muli ‘oku ‘i ho lotolotonga te ne kaka ‘iate koe, ‘o ‘alu ai pē ki ‘olunga, ka ko koe te ke ‘alu hifo, ‘o fai ai pē ki lalo.

⁴⁴Te ke nō koe kiate ia, pea ‘e ‘ikai nō ia kiate koe: ko ia pē te ne ‘ulu, ka ko koe pē ‘e hiku.

⁴⁵Pea ‘e a‘u ‘a e ngaahi mala ni kiate koe, ‘io, te nau toupili kiate koe, mo ma‘u koe, kae‘oua ke ke ‘auha; koe‘uhi na‘e ‘ikai te ke fakaongo ki he le‘o ‘o Sihova ko ho ‘Otua, ‘i he tauhi ‘ene ngaahi tu‘utu‘uni mo fekau, ‘a ia na‘a ne tu‘utu‘uni kiate koe:

⁴⁶pea ko e ngaahi me‘a ko ia ko e faka‘ilonga mo e mana kiate koe mo ho hako ‘o ta‘engata.

⁴⁷Ko e me‘a ‘i he ‘ikai te ke tauhi kia Sihova ko ho ‘Otua ‘i he fiefia mo e loto lelei, tupu ‘i he mahu ‘o e me‘a kotoa;

⁴⁸ko ia te ke tauhi ‘a e ngaahi fili, ‘a ia ‘e fekau atu ‘e Sihova kiate koe, ‘i he fiekaia, mo e fie inua, mo e telefua, mo e masiva ‘i he me‘a kotoa: pea te ne[26] ‘ai ha ‘ioke ukamea ki ho kia, kae‘oua ke ne faka‘auha koe.

⁴⁹‘E ‘omi ‘e Sihova kiate koe ha pule‘anga mei he mama‘o, mei he ngata‘anga ‘o māmani, hangē ko e muna ‘a ha ‘īkale; ko e kakai ‘oku ‘ikai te ke ‘ilo ‘enau lea;

⁵⁰ko e kakai mata fefeka, ‘a ia ‘e ‘ikai te nau toka‘i ha motu‘a, pe ‘ofa ki ha talavou;

⁵¹pea te ne kai ‘a e fua ‘o ho‘o fanga manu, mo e fua ‘o ho kelekele, kae‘oua ke ke ‘auha: ‘a ia foki ‘e ‘ikai te nau fakatoe ha‘o koane, pe uaine, pe lolo, ‘a e ‘uhiki ‘o ho‘o fanga pulu, pe ko e fakahoa ‘a ho‘o fanga sipi pe kosi, ka ne fai atu pē ke ke ‘auha koe.

⁵²Pea te ne ‘ohofi koe ‘i ho ngaahi kolo, kae‘oua ke holo ho fonua kotoa, ho ngaahi ‘ā mā‘olunga mo mālohi, ‘a ia ‘oku ke falala ki ai: ‘io, te ne ‘ohofia koe ‘i ho ngaahi kolo kotoa, ‘i he fonua kotoa kuo foaki kiate koe ‘e Sihova ko ho ‘Otua.

⁵³Pea te ke kai ‘a e fua ‘o ho manava, ‘a e kakano ‘o ho‘o fānau tangata mo fānau fefine, ‘a ia ‘oku foaki kiate koe ‘e Sihova ko ho ‘Otua; ‘i he ‘ākilotoa mo e ‘efihia ‘a ia ‘oku faka‘efihi ai koe ‘e ho ngaahi fili.

⁵⁴Ko e tangata ‘iate koe ‘oku pelepelengesi, mo fakananivi fau, te ne mata kovi ki hono tokoua, pea ki he uaifi ‘oku faaki ki hono fatafata, mo e toetoe ‘o ‘ene fānau:

⁵⁵‘o ‘ikai te ne fie ‘ange ki hanau toko taha ha me‘i kakano ‘o ‘ene fānau ‘oku ne kai; ko e ‘ikai toe ha‘ane me‘a ‘i he ‘ākilotoa mo ‘efihia, ‘a ia ‘oku faka‘efihi ai koe ‘e ho ngaahi fili ‘i ho ngaahi kolo kotoa.

⁵⁶Ko e fefine ‘iate koe ‘oku pelepelengesi mo fakananivi, ‘a ia na‘e ‘ikai te ne kākunga ke ‘ai ki he kelekele hono ‘aofiva‘e, kuo pehē fau ‘ene pelepelengesi, mo e fakananivi ‘ene mo‘ui, te ne mata kovi ki he husepāniti ‘oku faaki ki hono fatafata, pea ki he‘ene tama mo ‘ene ta‘ahine:

⁵⁷telia ‘a e fonua ‘oku ha‘u ‘iate ia, pea telia ‘ene fānau te ne fā‘ele‘i; he te ne kai fufū ia, ko ‘ene masiva ‘āngoa ‘i he ‘ākilotoa mo e ‘efihia, ‘a ia ‘oku faka‘efihi ‘ai koe ‘e ho fili ‘i ho ngaahi kolo.

⁵⁸Kapau ‘e ‘ikai te ke tokanga ke fai ‘a e ngaahi lea ‘o e lao ni, ‘a ia ‘oku tohi ‘i he tohi ni, ke ‘apasia ki he huafa lāngilangi‘ia mo manavahē‘ia ko eni, ko SIHOVA ‘ELOHEIKA (ko Sihova-ko-ho-‘Otua);

⁵⁹pea ‘e toki ‘ai ‘e Sihova ke fakaofo ho ngaahi tā, mo e tā ‘o ho hako, ko e ngaahi tā lalahi mo fuoloa.

⁶⁰Pea te ne fakafoki kiate koe ‘a e ngaahi mahaki kotoa ‘o ‘Isipite, ‘a ia na‘a ke manavahē ki ai, pea te nau piki kiate koe.

⁶¹Ka ai ha mahaki foki, pea ka ai ha tā, ‘oku ‘ikai ke tu‘u ‘i he tohi lao ni, ‘e ‘omi mo ia ‘e Sihova kiate koe, kae‘oua ke ke ‘auha.

⁶²Pea te mou iku ‘o toko si‘i; ‘osi, foki na‘a mou hangē ko e ngaahi fetu‘u ‘o e langi homou tokolahi; koe‘uhi na‘e ‘ikai te ke fakaongo ki he le‘o ‘o Sihova ko ho ‘Otua.

⁶³Pea hangē na‘e fiefia ‘a Sihova ke fai lelei kiate kimoutolu, pea ke fakatokolahi kimoutolu; pehē ‘e fiefia ‘a Sihova ke faka‘osi kimoutolu, mo faka‘auha, pea ‘e ta‘aki kimoutolu mei he kelekele ‘oku ke ‘alu ki ai ke ma‘u.

⁶⁴Pea ‘e fakamovetevete koe ‘e Sihova ki he ngaahi kakai kehekehe, mei he potu ‘e taha ‘o māmani ‘o a‘u ki he potu ‘e taha; pea te ke tauhi ai ki ha ngaahi ‘otua kehe, ‘a ia na‘e ‘ikai te ke ‘ilo ki ai, ‘e koe pe ko ho‘o ngaahi kui, ko e ‘akau mo e maka.

⁶⁵Pea ‘i he ngaahi kakai ko ia ‘e ‘ikai ha‘o fiemālie, pe ha potu ke tu‘u ai ho ‘aofiva‘e ke mālōlō: pea ‘e ‘atu kiate koe ‘e Sihova ‘i ai ha manava ‘oku toutou, mo ha mata ‘oku vaia, mo e mo‘ui ‘oku lele:

⁶⁶pea ‘e hangē ‘oku tautau ho‘o mo‘ui ‘i ho ‘ao, pea te ke ilifia po‘uli mo ‘aho, pea ‘e ‘ikai te ke tui ki ho‘o mo‘ui.

⁶⁷Pongipongi te ke pehē, Taumaiā kuo efiafi! pea ‘i he efiafi te ke pehē, Taumaiā kuo pongipongi! koe‘uhi ko e ilifia ‘oku ilifia ‘aki ho loto, pea koe‘uhi ko e me‘a ‘oku mātā ‘e ho mata ‘i ho‘o sio.

⁶⁸Pea ‘e fakafoki vaka koe ‘e Sihova ki ‘Isipite, ‘a e fononga ko ia na‘a ku[27] lea ai kiate koe, ‘o pehē, ‘E ‘ikai te ke toe sio ki ai: pea ‘e fakatau ai kimoutolu ‘i he potu ko ia ki homou ngaahi fili, ke tamaio‘eiki mo kaunanga, pea ‘e ‘ikai fiema‘u kimoutolu ‘e ha taha.