Read KO E TOH TAPU KATOA TONGA KO TEUTALŌNOME 3 Bible Online

KO TEUTALŌNOME 3 - KO E TOH TAPU KATOA TONGA bible

KO TEUTALŌNOME 3

¹PEA na‘a tau tafoki ai, ‘o ‘alu hake ‘i he hala ki Pēsani: pea ha‘u ki tu‘a ‘a ‘Oki ko e Tu‘i Pēsani ke fakafetaulaki mai kiate kitautolu, ‘a ia mo hono kakai kotoa ke fakahoko ‘a e tau ‘i ‘Etilei.

²Pea folofola ‘a Sihova kiate au, ‘Oua te ke manavahē kiate ia, he kuo u tuku ia ki ho nima mo hono kakai kotoa mo hono fonua; pea te ke fai kiate ia ‘o hangē ko ho‘o fai kia Sīhoni ko e Tu‘i Ha‘a ‘Āmoli na‘e nofo ‘i Hesiponi.

³Ko ia na‘e tuku ki hotau nima ‘e Sihova ko hotau ‘Otua ‘a ‘Oki foki ko e Tu‘i Pēsani, mo hono kakai kotoa: pea na‘a tau taa‘i ia kae‘oua ke ‘oua na‘a toe hano toenga.

⁴Pea na‘a tau hamu hono ngaahi kolo ‘i he taimi ko ia; na‘e ‘ikai ha kolo ne ‘ikai te tau to‘o meiate kinautolu; ko e onongofulu‘i kolo, ko e feitu‘u kotoa ‘o ‘Ākopa, ko e pule‘anga ‘o ‘Oki ‘i Pēsani.

⁵Ko e ngaahi kolo ko ia kotoa na‘e ‘ā mā‘olunga, na‘e songo ‘aki ‘a e ngaahi lau matapā mo e me‘a fakama‘u; tukukehe ‘a e ngaahi kolo tuku‘uta lahi ‘aupito.

⁶Pea na‘a tau mōifua ia, ‘o hangē ko ‘etau fai kia Sīhoni ko e Tu‘i Hesiponi, na‘a tau mōifua ‘a e kolo kakai kotoa pē, ‘a e kau fefine mo e tamaiki.

⁷Ka ko e monumanu mo e koloa ‘o e ngaahi kolo na‘a tau vete ma‘atautolu.

⁸Pea na‘a tau to‘o ‘i he taimi ko ia ‘a e fonua mei he nima ‘o e ongo tu‘i ‘Āmoli na‘e ‘i Tu‘a-Soatani, mei he tele‘a ‘o ‘Alanoni ‘o a‘u ki he mo‘unga ko Heamoni;

⁹(ko e kau Saitoni ‘oku nau ui ‘a Heamoni ko Silioni, pea ko e kau ‘Āmoli ‘oku nau ui ia ko Senili),

¹⁰‘io, ‘a e ngaahi kolo kotoa ‘o e Misoa, mo Kiliati kātoa, mo Pēsani kātoa, ‘o a‘u ki Sālika mo ‘Etilei, ko e ngaahi kolo ‘o e pule‘anga ‘o ‘Oki ‘i Pēsani.

¹¹(He ko ‘Oki ko e Tu‘i Pēsani ko e toe ia ‘i he toenga Lifaimi; vakai ko hono mohenga[2] ko e mohenga ‘aione;[3] ‘ikai ‘oku kei ‘i Lapa ‘o ha‘a ‘Āmoni? Ko hono lōloa ko e kiupite ‘e hiva, pea ko hono māukupu ko e kiupite ‘e fā, ko e kiupite ‘o tangata.)

¹²Pea ko e fonua ko ia na‘a tau huufi ‘i he taimi ko ia; mei ‘Aloeli, ‘a ia ‘oku ‘i he Tele‘a ‘o ‘Alanoni, mo e vaeua ‘o e fonua mo‘unga ‘o Kiliati, mo hono ngaahi kolo, na‘a ku tuku ki ha‘a Lūpeni pea mo ha‘a Kata:

¹³pea ko hono toe ‘o Kiliati mo Pēsani kātoa, ‘a e pule‘anga ‘o ‘Oki, na‘a ku tuku ki he vaeua ‘o e matakali ‘o Manase; ‘a e feitu‘u kotoa ‘o ‘Ākopa, ‘io, ‘a Pēsani kātoa.

¹⁴(‘Oku ui ia ko ha fonua Lifaimi. Ko Siaili ko e hako ‘o Manase na‘a ne puke ‘a e feitu‘u kotoa ‘o ‘Ākopa, ‘o a‘u ki he kau‘ā ‘o ha‘a Kēsuli mo ha‘a Ma‘aka; pea ne ui ki ai, ki Pēsani, ‘a hono hingoa ‘o‘ona, ko e ‘ū-vilisi-‘o-Siaili, pea talu ai pē.)

¹⁵Pea na‘a ku tuku ‘a Kiliati kia Mākili.

¹⁶Pea na‘a ku ‘atu ki ha‘a Lūpeni mo ha‘a Kata mei Kiliati ‘o a‘u ki he Tele‘a ‘o ‘Alanoni, ‘a e loto tele‘a mo e tafafonua ‘o a‘u foki ki Siapoki vaitafe, ko e kau‘ā ‘o ha‘a ‘Āmoni;

¹⁷mo e ‘Alapā foki, mo Soatani, mo e tafafonua mei Kineleti ‘o a‘u ki he tahi ‘o e ‘Alapā, ‘a e Tahi Māsima, ‘a e talalo ‘o e ngaahi lauua ‘o Pīsika ‘i hahake.

¹⁸Pea u fekau kiate kimoutolu ‘i he taimi ko ia, ‘o pehē, Ko Sihova ko homou ‘Otua kuo ne foaki kiate kimoutolu ‘a e fonua ni mo‘omou tofi‘a: te mou ‘ai mahafu, ‘o hā‘ele ‘i he ‘ao ‘o homou kāinga ko ha‘a ‘Isileli, ‘a e kau to‘a kotoa pē.

¹⁹Ka ko homou ngaahi uaifi, mo ho‘omou tamaiki, mo ho‘omou fanga manu (‘oku ou ‘ilo ‘oku lahi ho‘omou monumanu), te nau nofo ‘i ho‘omou ngaahi kolo kuo u ‘atu kiate kimoutolu;

²⁰kae‘oua ke fakamālōlō ‘e Sihova homou kāinga ‘o hangē ko kimoutolu, pea nau ma‘u foki ‘e kinautolu ‘a e fonua ‘oku foaki kiate kinautolu ‘e Sihova ko homou ‘Otua ‘i he kauvai ko ē ‘o Soatani: pea te mou toki foki kimoutolu takitaha ki he tofi‘a kuo u ‘atu kiate kimoutolu.

²¹Pea na‘a ku kouna ‘a Siosiua ‘i he taimi ko ia, ‘o pehē, Kuo māta‘i ‘e ho mata ‘a e me‘a kotoa kuo fai ‘e Sihova ko homou ‘Otua ki he ongo tu‘i ko eni: ‘e pehē mo e fai ‘a Sihova ki he ngaahi pule‘anga na ‘oku ke a‘a atu ki ai.

²²‘E ‘ikai ha‘amou manavahē kiate kinautolu, he ko Sihova ko homou ‘Otua, ko ia ia ‘oku ne tau ma‘amoutolu.

²³Pea u kōlenga ki he ‘Eiki ‘i he taimi ko ia, ‘o pehē,

²⁴‘Ātonai Sihova ē, ko eni kuo ke kamata ke fakahā ki ho‘o tamaio‘eiki ko au ho fotu, mo ho nima māfimafi; he ko hai ha ‘Otua ‘i langi pe ‘i māmani te ne mafakamatala ho‘o ngaahi ngāue, mo ho fu‘u mafi na?

²⁵Ka u a‘a atu mu‘a, ‘o mamata ki he fonua lelei ‘i he kauvai ‘o Soatani na, ‘a e mo‘unga lelei na mo Lepanoni.

²⁶Ka na‘e tuputāmaki ‘a Sihova kiate au koe‘uhi ko kimoutolu, pea na‘e ‘ikai te ne tali au: ka ne folofola kiate au, Ma‘u ā; ‘oua te ke toe lea kiate au ‘i he me‘a ko ē.

²⁷‘Alu hake ki funga Pīsika, pea hanga atu ho mata ki lulunga, mo tokelau, mo tonga, mo hahake, ‘o vakai ‘aki ho mata: he ‘e ‘ikai te ke a‘a ‘i Soatani na.

²⁸Ka ke fekau ‘a Siosiua, pea poupou ia, mo tokoni‘i: he ko ia ia te ne laka atu ‘i he ‘ao ‘o e kakai ni, pea ko ia ia te ne fakatofi‘a ‘aki kinautolu ‘a e fonua te ke mamata ki ai.

²⁹Ko ia na‘a tau nofo ‘i he vaha‘a mo‘unga ‘i he hāngai ki Pete-peoli.