Read KO E TOH TAPU KATOA TONGA KO TEUTALŌNOME 30 Bible Online

KO TEUTALŌNOME 30 - KO E TOH TAPU KATOA TONGA bible

KO TEUTALŌNOME 30

¹PEA ka hoko ‘a e ngaahi me‘a ko ia kiate koe, ‘a e monū mo e mala kuo u tuku ‘i ho ‘ao, pea ka faifai pea ke fakamanatu ki ai ‘i he ngaahi pule‘anga kuo fakahee‘i koe ki ai ‘e Sihova ko ho ‘Otua,

²pea ke foki kia Sihova ko ho ‘Otua, mo fakaongo ki hono le‘o ‘i he ngaahi me‘a kehekehe kuo u tu‘utu‘uni atu he ‘aho ni, ‘e koe mo ho fānau, ‘o fai‘aki ‘a e kotoa ‘o ho loto mo e kotoa ‘o ho laumālie;

³pea ‘e toki liliu ‘e Sihova ko ho ‘Otua ho‘o nofo pōpula, pea te ne ‘alo‘ofa kiate koe, pea te ne foki ‘o tānaki koe mei he ngaahi kakai na‘e fakamovetevete ai koe ‘e Sihova ko ho ‘Otua.

⁴Neongo ‘oku ai ha ni‘ihi ‘o ho kau fakahē ‘oku ‘i he taupotu ‘o e langi, ka ‘e tānaki koe, ‘o ‘omi mei ai ‘e Sihova ko ho ‘Otua:

⁵pea ‘e fakahū koe ‘e Sihova ko ho ‘Otua ki he fonua na‘e ma‘u ‘e ho‘o ngaahi kui, pea te ke ma‘u ia, pea te ne fai lelei kiate koe, mo fakatokolahi‘i koe ke hulu atu ‘i ho‘o ngaahi kui.

⁶Pea ‘e kamu ho loto ‘e Sihova ko ho ‘Otua, mo e loto ‘o ho hako, ke ‘ofa kia Sihova ko ho ‘Otua ‘aki ‘a e kotoa ‘o ho loto, mo e kotoa ‘o ho laumālie, koe‘uhiā ke ke mo‘ui.

⁷‘E ‘ai ‘e Sihova ko ho ‘Otua ‘a e ngaahi mala ni ki ho ngaahi fili, pea kiate kinautolu ‘oku fehi‘a kiate koe, ‘a kinautolu na‘a nau fakatanga‘i koe.

⁸Ka ko koe te ke foki ‘o fakaongo ki he le‘o ‘o Sihova, ‘o fai ‘ene ngaahi tu‘utu‘uni, ‘a ia ‘oku ou feia atu he ‘aho ni.

⁹Pea ‘e ‘ai ‘e Sihova ko ho ‘Otua ke ke ope ‘i he lelei, ‘i he ngaahi ngāue kehekehe ‘a ho nima, ‘i he fua ‘o ho manava, mo e fua ‘o ho‘o fanga manu, mo e fua ‘o ho kelekele: he ‘e foki ‘a Sihova ki he‘ene fiefia ke fai lelei ma‘au, hangē ko ‘ene fiefia ‘i ho‘o ngaahi kui:

¹⁰kapau ā te ke fakaongo ki he le‘o ‘o Sihova ko ho ‘Otua, ke tauhi ‘ene ngaahi tu‘utu‘uni mo fekau, ‘a ia kuo tohi ‘i he tohi lao ni; ‘io, kapau te ke foki kia Sihova ko ho ‘Otua ‘aki ‘a e kotoa ‘o ho loto mo e kotoa ‘o ho laumālie.

¹¹He ko e tu‘utu‘uni ko eni ‘oku ou feia atu he ‘aho ni ‘oku ‘ikai faingata‘a fau ia kiate koe, pea ‘oku ‘ikai mama‘o.

¹²Tala‘ehai ‘oku ‘i he langi, ke ke pehē ai, Ko hai te ne ‘alu hake ki he langi ma‘atautolu ke ‘ohifo kiate kitautolu, ‘o ‘ai ke tau fanongoa, ka tau fai ia?

¹³Pea tala‘ehai ‘oku ‘i he tu‘a tahi, ke ke pehē ai, Ko hai ‘e laka atu ki he tu‘a tahi ma‘atautolu, ‘o ‘omi ia kiate kitautolu, ‘o ‘ai ke tau fanongoa, ka tau fai ki ai?

¹⁴Ka ‘oku ofi ‘aupito ‘a e folofola kiate koe, ‘oku ‘i ho ngutu, pea ‘oku ‘i ho loto, ke ke fai ia.

¹⁵Vakai, kuo u tuku ‘i ho ‘ao he ‘aho ni ‘a e mo‘ui mo e lelei, pea mo e mate mo e kovi;

¹⁶he‘eku fekau koe he ‘aho ni ke ‘ofa kia Sihova ko ho ‘Otua,[28] ke fou ‘i hono hala, pea ke tauhi ‘ene ngaahi tu‘utu‘uni, mo fekau, mo konisitūtone, ka ke mo‘ui mo tupu, pea ke tāpuaki‘i koe ‘e Sihova ko ho ‘Otua, ‘i he fonua ‘oku ke ‘alu ki ai ke ma‘u.

¹⁷Ka ‘o kapau ‘e hanga kehe ho loto, ‘o ‘ikai te ke fakaongoongo, kae tohoaki koe, mo ke lotu ki ha ngaahi ‘otua kehe, mo tauhi ki ai;

¹⁸‘oku ou fakapapau kiate kimoutolu he ‘aho ni te mou mātu‘aki mole ai; ‘e ‘ikai fakalahi homou taimi ‘i he kelekele ‘oku mou a‘a ‘i Soatani, ke hū ki ai ‘o ma‘u.

¹⁹‘Oku ou ui ni ki langi mo māmani ke hopo he ‘aho ni mo kimoutolu, ke fakamo‘oni kuo u fokotu‘u ‘i ho ‘ao ‘a e mo‘ui mo e mate, ‘a e monū mo e mala: ko ia ke ke fili ki he mo‘ui ka ke mo‘ui, ‘a koe mo ho hako,

²⁰ke ‘ofa kia Sihova ko ho ‘Otua, ke fakaongo ki hono le‘o, pea ke pīkitai kiate ia: he ko ia ia ho‘o mo‘ui‘anga, mo e lōloa‘anga ‘o ho ngaahi ‘aho: ka ke nofo ‘i he kelekele na‘e fuakava ai ‘e Sihova ki ho tupu‘anga, kia ‘Epalahame, kia ‘Aisake, pea kia Sēkope, ke ‘atu mo‘onautolu.