Read KO E TOH TAPU KATOA TONGA KO TEUTALŌNOME 31 Bible Online

KO TEUTALŌNOME 31 - KO E TOH TAPU KATOA TONGA bible

KO TEUTALŌNOME 31

¹PEA ‘alu ‘a Mōsese, ‘o ne fai ‘a e ngaahi lea ko eni ki ‘Isileli kātoa.

²Pea ne pehē kiate kinautolu, Kuo u teau mā uofulu ta‘u he ‘aho ni; ‘oku ‘ikai te u kei lava ke hū atu mo hū mai: pea kuo folofola kiate au ‘e he ‘Eiki, ‘E ‘ikai te ke a‘a ‘i Soatani na.

³Ko Sihova ko ho ‘Otua ko ia ia ‘oku hā‘ele mu‘omu‘a ‘iate koe; te ne faka‘auha ‘e ia ‘a e ngaahi kakai ni mei ho ‘ao, pea te ke ma‘u kinautolu; ko Siosiua pē te ne taki koe, ‘o hangē ko e folofola ‘a Sihova.

⁴Pea ‘e fai kiate kinautolu ‘e Sihova, ‘o tatau mo ‘ene fai kia Sīhoni, pea kia ‘Oki, ko e ongo Tu‘i ‘Āmoli, pea ki hona fonua, ‘a ia na‘a ne faka‘auha.

⁵‘Io, ‘e tuku atu kinautolu ‘e Sihova ‘i homou ‘ao, pea te mou fai kiate kinautolu ‘o tatau mātē mo e tu‘utu‘uni kuo u feia atu. Mou lototo‘a, ‘o tu‘u kalikali, ‘oua te mou manavahē, ‘oua te mou teki kiate kinautolu:

⁶he ko Sihova ko ho ‘Otua ko ia ia ‘oku hā‘ele mo kimoutolu; ‘e ‘ikai te ne fakatukuhāusia‘i koe, ‘uma‘ā ha‘ane li‘aki.

⁷Pea ui ange ‘e Mōsese ‘a Siosiua, ‘o ne pehē kiate ia ‘i he ‘ao ‘o ‘Isileli kātoa, Ke ke lototo‘a, mo tu‘u kalikali: he ko koe te ke hū mo e kakai ni ki he fonua ne fuakava ai ‘e Sihova ki honau tupu‘anga, ke ‘ange kiate kinautolu; pea te ke fakatofi‘a‘i ai kinautolu.

⁸Pea ko Sihova ko ia ia ‘oku hā‘ele mu‘omu‘a ‘iate koe; te ne ‘iate koe ‘e ia, ‘e ‘ikai te ne fakatukuhāusia‘i koe, ‘uma‘ā ha‘ane li‘aki: ‘oua ‘e manavahē, pea ‘oua ‘e lotosi‘i.

⁹Pea na‘e tohi ‘e Mōsese ‘a e lao ko ia, ‘o ne ‘ange ki he kau taula‘eiki ko e hako ‘o Līvai, ‘a kinautolu na‘a nau fua ‘a e ‘A‘ake ‘o e kovinānite ‘a Sihova, pea ki he kau mātu‘a ‘Isileli:

¹⁰pea tu‘utu‘uni ‘e Mōsese kiate kinautolu, ‘o pehē, ‘I he faka‘osi ‘o ha fitu‘i ta‘u, ‘i he taimi tu‘utu‘uni ‘i he ta‘u ‘o e tukuhifo, ‘i he Kātoanga Fale-lou‘akau,

¹¹‘i he ha‘u ‘a ‘Isileli kātoa ke fakahā kinautolu ‘i he ‘ao ‘o Sihova ko ho ‘Otua, ‘i he potu te ne fili ki ai, pea te ke lau ‘a e lao ko eni ‘i he ‘ao ‘o ‘Isileli kātoa, ke nau fanongo ki ai.

¹²Fakataha ‘a e kakai, ‘a e kau tangata, mo e kau fefine, mo e tamaiki, mo ho‘o muli ‘oku nofo ‘i ho kolo, koe‘uhi ke nau fanongoa, pea koe‘uhi ke nau ma‘u akonaki, mo ‘apasia kia Sihova ko homou ‘Otua, pea ke nau tokanga ke fai ‘a e ngaahi me‘a kehekehe ‘o e lao ni;

¹³pea ke fanongo ‘e he‘enau fānau ‘a ia ‘oku ‘ikai te nau ‘ilo ia, pea ke nau ako ke ‘apasia kia Sihova ko homou ‘Otua, lolotonga ‘oku mou nofo ‘i he kelekele ‘oku mou a‘a ‘i Soatani ke ma‘u.

¹⁴Pea folofola ‘a Sihova kia Mōsese, Ko eni ‘oku ‘unu‘unu mai ‘a e taimi ke ke pekia: ui mai ‘a Siosiua, ‘o mo tutu‘u kimoua ‘i he Tēniti Fe‘iloaki‘anga, ka u feia ha tu‘utu‘uni kiate ia. Pea ō ‘a Mōsese mo Siosiua, ‘o na tutu‘u ‘i he Tēniti Fe‘iloaki‘anga.

¹⁵Pea hā ‘a Sihova ‘i he Tēniti ‘i ha pou ‘ao: pea tu‘u ‘a e Pou-‘ao ‘i he matapā ‘o e Tēniti.

¹⁶Pea folofola ‘a Sihova kia Mōsese, Ko eni te ke toka mo ho‘o ngaahi kui; pea ‘e tu‘u ‘a e kakai ni, ‘o tango ki he ngaahi ‘otua kehe ‘o e fonua ‘a ia ‘oku nau ‘alu ke nofo ai, pea te nau li‘aki au, ‘o maumau ‘eku kovinānite ‘a ia kuo u fai mo kinautolu.

¹⁷Pea ‘e langa‘i ‘eku ‘ita kiate kinautolu ‘i he ‘aho ko ia, pea te u li‘aki kinautolu, pea te u hanga kehe meiate kinautolu, pea ‘e tuku kinautolu ke keina, pea ‘e mo‘ua kinautolu ‘i he ngaahi kovi mo e faingata‘a lahi; ko ia te nau pehē ‘i he ‘aho ko ia, ‘Ikai kuo mo‘ua kitautolu ‘i he ngaahi kovi ni koe‘uhi ‘oku ‘ikai ‘i hotau lotolotonga ‘a hotau ‘Otua?

¹⁸Pea ko au ē te u hanga kehe ‘i he ‘aho ko ia, koe‘uhi ko e kovi kotoa kuo nau fai, he‘enau hanga ki he ngaahi ‘otua kehe.

¹⁹Ko ia mo tohi ma‘amoutolu ‘a e ta‘anga ni, pea te ke ako ia ki ha‘a ‘Isileli: ‘ai ia ki honau ngutu, ke hoko ‘a e ta‘anga ni ko e fakamo‘oni ma‘aku ki ha‘a ‘Isileli,

²⁰he ka u ka ‘omi kinautolu ki he kelekele ne u fuakava ai ki honau tupu‘anga, ‘oku mahutafea ‘i he hu‘akau mo e honi: pea kuo nau kai ke mākona, pea nge‘enge‘e; pea te nau toki hanga ki ha ngaahi ‘otua kehe, ‘o tauhi kiate kinautolu, pea te nau ta‘etoka‘i au, ‘o maumau ‘eku kovinānite.

²¹Pea ka faifai pea hoko kiate kinautolu ‘a e ngaahi kovi mo e faingata‘a lahi, pea ‘e toki lea hake ‘a e ta‘anga ni ‘i honau ‘ao ko e fakamo‘oni: he tala‘ehai ‘e ngalo ‘i he ngutu ‘o honau hako; he ‘oku ou ‘ilo ‘enau ngaahi filio‘i ‘oku fai ni, ka kuo te‘eki ke u fakahū kinautolu ki he fonua na‘a ku fuakava ai.

²²Ko ia na‘e tohi ‘e Mōsese ‘a e ta‘anga ni ‘i he ‘aho pē ko ia, pea ne ako ia ki ha‘a ‘Isileli.

²³Pea ne feia ha tu‘utu‘uni kia Siosiua, foha ‘o Nuni, ‘o ne pehē, Ke ke lototo‘a, mo ke tu‘u kalikali: he ko koe te ke fakahū ‘a ha‘a ‘Isileli ki he fonua na‘a ku fuakava ai kiate kinautolu: pea ko au te u ‘iate koe.

²⁴Pea ‘i he faifai pea faka‘osi ‘e Mōsese ‘ene tohi ‘a e ngaahi lea ‘o e lao ni ‘i ha tohi ke ‘osi‘osingamālie.

²⁵Pea toki tu‘utu‘uni ‘e Mōsese ‘a e kau Līvai na‘e fua ‘a e ‘a‘ake ‘o e kovinānite ‘o Sihova, ‘o pehē,

²⁶To‘o ‘a e tohi lao ni, ‘o tuku ‘i he tafa‘aki ‘o e ‘A‘ake ‘o e kovinānite ‘o Sihova ko homou ‘Otua, ke nofo ai ko e fakamo‘oni kiate koe.

²⁷He ‘oku ou ‘ilo ho‘o angatu‘u mo ho‘o kia kekeva: vakai, lolotonga ‘oku ou kei mo‘ui, ‘o tau feangai he ‘aho ni, ka kuo mou angatu‘u kia Sihova; kae huanoa hili ‘eku pekia.

²⁸Fakataha mai kiate au ‘a e kau mātu‘a ‘o homou ngaahi matakali, mo homou kau ‘ōfisa, ka u ‘a‘au ‘i honau telinga ‘a e ngaahi lea ni, ‘o ui ki hēvani mo māmani ke fakamo‘oni kiate kinautolu.

²⁹He ‘oku ou ‘ilo, ka hili ‘eku pekia te mou mātu‘aki fakaka‘anga kimoutolu, pea te mou afe mei he hala kuo u tu‘utu‘uni atu; pea ‘e fakafetaulaki mai kiate kimoutolu ha kovi ‘i he ngaahi ‘aho ‘amui; koe‘uhi ko ho‘omou fai ‘a e me‘a ‘oku kovi ‘i he ‘ao ‘o Sihova, ke fakatupu ‘ene houhau ‘i he ngāue ‘a homou nima.

³⁰Pea ‘a‘au ‘e Mōsese ‘i he telinga ‘o e fakataha kātoa ‘o ‘Isileli ‘a e ngaahi lea ‘o e ta‘anga ni kotoa, kae‘oua ke ‘osi.