Read KO E TOH TAPU KATOA TONGA KO TEUTALŌNOME 32 Bible Online

KO TEUTALŌNOME 32 - KO E TOH TAPU KATOA TONGA bible

KO TEUTALŌNOME 32

¹FOKOTU‘U telinga mai, ‘a langi ka u lea atu; Pea fakafanongo ‘a māmani, ki he ngaahi lea ‘a hoku ngutu:

²‘E tō ‘eku akonaki hangē ko e ‘uha, Pea mokulu hangē ko e hahau ‘eku lea; Hangē ko e taumosi ki he musie toki tupu, Mo e lōvai ki he mohuku:

³He te u fanongonongo ‘a e huafa ‘o Sihova: Mou tuku ‘a e mā‘olunga ‘o hotau ‘Otua.

⁴Ko Makatu‘u ia — ‘oku haohaoa ‘ene ngāue; Ko ‘ene ngaahi founga kotoa ‘oku fakakonisitūtone: Ko e ‘Otua ‘o e Mo‘oni, pea ta‘eha‘ane hala,

⁵Kuo nau fai kākā ki ai (tala‘ehai ko ‘ene fānau, ko honau mele pē);[29] Ko e to‘utangata fāsi‘a mo angakehe.

⁶‘Oku pehē koā ho‘omou totongi ‘a e ‘Eiki, ‘A e kakai vale mo ta‘e‘atamai? ‘Ikai ko ho‘o tamai ia na‘e ma‘u koe? Kuo ne ngaohi koe, mo fokotu‘u koe?

⁷Manatu‘i ‘a e ngaahi ‘aho mu‘a, Fakakaukau ki he ta‘u ‘o e ngaahi to‘utangata: Fehu‘i ki ho‘o tamai, pea te ne tala kiate koe; Ki ho kau mātu‘a, pea te nau lea kiate koe.

⁸‘I he vahe tofi‘a ‘e ‘Elioni ki he ngaahi pule‘anga, ‘I he‘ene tufaki ‘a e hako‘i tangata, Na‘a ne hunuki ‘a e kau‘ā ‘o e ngaahi kakai, ‘O fakatatau ki he lau ‘o ha‘a ‘Isileli.

⁹He ko hono kakai ‘a e ‘inasi ‘o Sihova; Ko Sēkope ko e kinikini ‘o hono tofi‘a.

¹⁰Na‘a ne ‘ilo ia he fonua toafa, ‘I he fonua mamate mo ‘u‘ulu mo lālāfua‘a; Na‘a ne kāpui ia, na‘a ne nofo‘aki lama, Na‘a ne tauhi ia hangē hono tama‘imata.

¹¹Hangē ha ‘īkale ‘oku ue‘i hono pununga, ‘O ne puna mo hono fānganga mei ‘olunga,[30] Pehē ‘ene folahi hono kapakau, ‘o kilala ia, ‘I hono funga fulufulu ‘oku ne fua:

¹²Na‘e taki ia ‘e Sihova toko taha pē, Pea na‘e ‘ikai ō mo ia ha ‘otua kehe

¹³Na‘a ne tuku ke ne fakateka ‘ene sāliote ‘I he ngaahi potu mā‘olunga ‘o e fonua, Pea ne kai ‘a e tupu ‘o e ngoue‘anga; Pea ne tuku ke ne misi honi mei he makatu‘u, Mo e lolo mei he maka hangē ha makahunu;

¹⁴‘a e pota ‘o e pulu, mo e huhu‘a ‘o e sipi, Mo e ngako ‘o e fanga lami, Mo e sipi tangata faka-Pēsani, mo e fanga kosi, Mo e ‘elito‘i uite; Pea mei he toto ‘o e kālepi na‘a ke inu uaine.

¹⁵Ka ‘i he sino leva ‘a Sesuluni, pea ne ‘aka — Kuo ke sino, kuo ke nga‘eke, kuo ke putoputa! — Pea ne toki li‘aki ‘a e ‘Otua na‘e ngaohi ia, ‘O ne va‘inga‘aki hono makatu‘u fakamo‘ui‘anga.

¹⁶Na‘a nau fakafua‘a‘i ia ‘aki hani kehe, Na‘a nau fakatupu ‘ene houhau ‘aki ha koto fakalielia pē.

¹⁷Na‘a nau feilaulau ki hani fa‘ahikehe ‘ata‘i ‘otua, Koni ‘otua na‘e ‘ikai te nau ‘iloa, Koni fo‘ou toki tupu ni, Na‘e ‘ikai vavana ai ho‘omou ngaahi kui.

¹⁸Kuo ngalo ‘a e Makatu‘u na‘e fakatupu koe, Pea kuo ke fakatukutuku‘i ‘a e ‘Otua na‘e fā‘ele‘i koe.

¹⁹Pea ‘afio‘i ‘e Sihova, ‘o ne fakalili‘a ki ai, He ko ‘ene fānau tangata mo fānau fefine kuo nau fai fakamamahi.

²⁰Pea ne folofola, Te u hanga kehe pē, Ka u vakai pe te nau iku fēfē: He ko e to‘utangata fulikivanu ena,

²¹Kuo nau fakafua‘a‘i au ‘aki ha ‘ata‘i ‘Otua; Kuo nau fakamamahi au ‘aki ‘enau ngaahi muna: Ko ia ko au te u fakafua‘a‘i kinautolu ‘aki ha ‘ata‘i kakai; Ko e pule‘anga vale te u fakamamahi ‘aki.

²²He kuo tupu ha afi ‘i he‘eku tuputāmaki, Pea ‘oku vela ‘o a‘u ki he takele ‘o Hētesi, Pea ‘oku ne keina ‘a māmani mo hono fua, Pea ‘oku tutu ai ‘a e tefito ‘o e ngaahi mo‘unga.

²³Te u pae atu ‘a e kovi kiate kinautolu: Te u faka‘osi ki ai ‘eku ngaahi ngahau.

²⁴Ka vaivai ‘i he honge, pea ‘osi‘osi ‘i he mofi, Mo e faka‘auha kona‘ī‘ī, Te u toki fekau atu ‘a e nifo ‘o e fanga manu, Mo e huhu‘a kona ‘o e ngaahi me‘a ‘oku totolo ‘i he efu.

²⁵‘I tu‘a, ‘e fakaeve ‘e he heletā, Pea fai ‘i loki ‘e he ilifia; Ko e fatutangata mo e tāupo‘ou fakataha, Ko e kei huhu mo e ‘ulu hinā.

²⁶Na‘a ku pehē, Te u ifi‘i kinautolu, Te u fakangata mei he kakai honau manatu:

²⁷Ka ne ‘oua ‘eku manavahē ki he manuki ‘a e fili, Na‘a ma‘u hala ‘e honau kau fakamamahi; Na‘a nau pehē, Ko hotau nima ne mālohi, Pea ‘oku ‘ikai ko Sihova kuo fai ‘a e fu‘u me‘a ni.

²⁸He ko e pule‘anga ia ta‘eha taha ke fale‘i, ‘Oku ‘ikai ‘iate kinautolu ha ‘atamai.

²⁹Taumaiā ke nau poto, ke nau ‘ilo ki he me‘a ko ē, Ke nau fakakaukau ki honau mole!

³⁰‘O tuli fēfē ha afe ‘e ha toko taha, pe langa‘i ha mano ‘e ha toko ua, Ka ne ‘ikai fakatau kinautolu ‘e honau Makatu‘u, Pea ko Sihova kuo ne li‘aki atu?

³¹He ‘oku ‘ikai tatau honau makatu‘u mo ho‘otautolu ni, Na‘a mo hotau ngaahi fili te nau fakamo‘oni ki ai.

³²He ko ‘enau vaine ‘oku mei he vaine ‘o Sōtoma, Pea mei he ngaahi ngoue ‘a Komola; Ko e kālepi ‘ahu ‘a ‘enau kālepi na, Ko e ngaahi fuhinga ifo kona.

³³Ko ‘enau uaine ko e me‘a kona ‘a e fanga ata.

³⁴‘Ikai ‘oku fufū ia mo kita, ‘O sila‘i ‘i hoku ngaahi falekoloa?

³⁵‘Oku ‘a‘aku ‘a e sauni, mo e ‘atu hono tuha, ‘I he taimi ‘oku heke ‘a e va‘e ‘onautolu na: He kuo ofi ‘a e ‘aho ‘o honau mala, Pea ‘oku fakato‘oto‘o mai honau nunu‘a.

³⁶He ‘e fai ‘e he ‘Eiki ‘a e fakamaau ‘o hono kakai, Pea te ne lolou telia ‘ene kau tamaio‘eiki; Pea ‘oku ‘ikai kei toe ha mo‘ua pe ha tau‘atāina.

³⁷Pea te ne pehē, Koma‘ā honau ngaahi ‘otua, ‘A e makatu‘u na‘a nau hūfanga ki ai mu‘a.

³⁸‘A ia na‘a nau kai ‘a e ngako ‘o ‘enau ngaahi feilaulau, ‘O inu ‘a e uaine na‘e lilingi mo‘onautolu? Ke tu‘u mu‘a kinautolu, ‘o tokoni atu, Ke hoko kinautolu ko honau fakamalumalu.

³⁹Uē! vakai, ko au, ko au pē ia, Pea ‘oku ‘ikai ha ‘otua mo kita: Ko au ‘oku ou fai ‘a e tāmate, pea u fai mo e fakaola, Kuo u tā, pea u faito‘o ‘a e lavea; Pea ‘oku ‘ikai ha taha te ne fakahaofi mei hoku nima.

⁴⁰He ‘oku ou hiki ki langi hoku nima, Pea u pehē, Tangi ‘eku mo‘ui ‘o ta‘engata.

⁴¹Kapau te u faka‘alo ‘eku heletā fetapatapaki, Pea ala ki he fakamaau hoku nima ni, Te u toki fai sauni ki hoku ngaahi fili, Pea u ‘atu hono tuha kiate kinautolu ‘oku fehi‘a mai.

⁴²Te u ‘ai ke mākona ‘eku ngaahi ngahau ‘i he toto, Pea ko ‘eku heletā te ne kai kakano — ‘a e toto ‘o e mate mo e ‘ave pōpula — ‘a e kakano mei he ‘ulu ‘o e hou‘eiki ‘o e fili na.

⁴³Mou fiefia, ‘a e ngaahi pule‘anga, fakataha mo ho‘ona kakai: He te ne sauni ‘a e toto ‘o ‘ene kau tamaio‘eiki, Pea te ne ‘atu ‘a e tuha ki hono ngaahi fili, Mo fai fakalalo ma‘a hono kelekele, ma‘a hono kakai.

⁴⁴Pea ha‘u ‘a Mōsese, ‘o ne ‘a‘au ‘a e ngaahi lea ‘o e ta‘anga ni ‘i he telinga ‘o e kakai, ‘e ia mo Hosea ko e foha ‘o Nuni.

⁴⁵Pea ‘i he ‘osi ‘e Mōsese ‘ene lea‘aki ‘a e ngaahi lea ni ki ha‘a ‘Isileli kotoa.

⁴⁶Na‘a ne pehē kiate kinautolu, Mou ‘ai homou loto ki he ngaahi me‘a ‘oku ou fakapapau atu he ‘aho ni, ‘a ia te mou tu‘utu‘uni ki ho‘omou fānau, ke tauhi mo fai ‘a e ngaahi lea kotoa ‘o e lao ni.

⁴⁷He tala‘ehai ko e me‘a ma‘ama‘a ia kiate kimoutolu; he ko ho‘omou mo‘ui‘anga, ‘io, ko e me‘a ni ‘e fakalahi ai homou ngaahi ‘aho ‘i he kelekele ‘oku ke ‘amanaki a‘a ‘i Soatani ke ma‘u.

⁴⁸Pea folofola ‘a Sihova kia Mōsese ‘i he ‘aho pē ko ia, ‘o pehē,

⁴⁹‘Alu hake ki he mo‘unga ‘o ‘Apalemi ni ko Nipo, ‘a ia ‘oku ‘i he fonua ‘o Moape ‘o hanga ki Sielikō; pea ke mamata ai ki he fonua ko Kēnani, ‘a ia ‘oku ou ‘atu ki ha‘a ‘Isileli ke tofi‘a ‘aki:

⁵⁰pea ke pekia ‘i he mo‘unga ‘oku ke ‘alu hake ki ai, ka ke ului ai ki ho kakai; ‘o hangē na‘e pekia ho ta‘okete ko ‘Ēlone ‘i mo‘unga Hoa, ‘o ne ului ai ki hono kakai.

⁵¹Koe‘uhi ā na‘a mo fai hala kiate au ‘i he lotolotonga ‘o ha‘a ‘Isileli ‘i Vai-Mēlipa ‘i Kētesi, ‘i he Toafa ‘o Sini; koe‘uhi na‘e ‘ikai te mo fakatāpuhaa‘i au ‘i he lotolotonga ‘o ha‘a ‘Isileli,

⁵²he te ke mamata tonu ki he fonua; ka ‘e ‘ikai te ke hū ki ai, ki he fonua ‘oku ou foaki ki ha‘a ‘Isilel.