Read KO E TOH TAPU KATOA TONGA KO TEUTALŌNOME 34 Bible Online

KO TEUTALŌNOME 34 - KO E TOH TAPU KATOA TONGA bible

KO TEUTALŌNOME 34

¹PEA ‘alu hake ‘a Mōsese mei he ‘Alapā ‘o Moape ki he mo‘unga ko Nipo, ko e tumu‘aki ‘o Pīsika, ‘a ia ‘oku ‘i he hāngai ki Sielikō.

²Pea fakahā kiate ia ‘e he ‘Eiki ‘a e fonua kotoa ‘o Kiliati, ‘o a‘u ki Tani; mo Nafitalai kātoa, mo e fonua ‘o ‘Ifalemi mo Manase, mo e fonua kotoa ‘o Siuta, ‘o a‘u ki he tahi lulunga:

³mo e feitu‘u ko Tonga, mo e Seakale ‘o e tele‘a ‘o Sielikō ko e kolo paame, ‘o a‘u ki Soa.

⁴Pea folofola ‘a e ‘Eiki kiate ia, Ko e fonua eni na‘a ku fuakava ai kia ‘Epalahame, kia ‘Aisake, pea kia Sēkope, ‘o pehē, Ko ho hako te u foaki ki ai; kuo u tuku ke ke sio ki ai ‘aki ho mata, kae ‘ikai te ke ‘alu ki ai.

⁵Ko ia na‘e pekia ‘i he potu ko ia ‘a Mōsese ko e Sevāniti ‘a Sihova, ‘i he fonua ‘o Moape, ‘i he funga ‘o e folofola tonu ‘a Sihova.

⁶Pea na‘a Ne tanu ia ‘i he tele‘a, ‘i he fonua ‘o Moape, ‘o hanga ki Pete-Peoli: ka ‘oku ‘ikai ‘ilo ha taha ki hono fa‘itoka ‘o a‘u ki he ‘aho ni.

⁷Pea kuo teau mā uofulu ta‘u ‘a Mōsese ‘i he‘ene pekia, kuo ‘ikai nenefu hono mata, pe taumatala hono ivi.

⁸Pea na‘e tēngihia ‘a Mōsese ‘e ha‘a ‘Isileli ‘i he ‘Ālana ‘o Moape ‘o ‘aho tolungofulu: pea toki ‘osi ‘a e ngaahi ‘aho tēngihia ‘i he me‘a faka‘eiki ‘o Mōsese.

⁹Pea ko Siosiua ko e foha ‘o Nuni na‘a ne fonu ‘i he laumālie ‘o e poto; he kuo hilifaki nima ki ai ‘a Mōsese: pea na‘e fakaongo kiate ia ‘e ha‘a ‘Isileli, ‘o nau fai ‘o hangē ko e tu‘utu‘uni ‘a Sihova kia Mōsese.

¹⁰Pea talu ai kuo ‘ikai tupu ‘i ‘Isileli ha palōfita hangē ko Mōsese, ‘a ia ko ‘ena fe‘iloaki mo Sihova ko e femātaaki;

¹¹‘i he ngaahi faka‘ilonga mo mana na‘e fekau ia ‘e Sihova ke fai ‘i ‘Isipite kia Felo, pea ki he‘ene kau tamaio‘eiki, pea ki hono fonua kotoa:

¹²pea ‘i he ngaahi tā mālohi mo e fu‘u fakangeingei, ‘a ia na‘e feia ‘e Mōsese ‘i he ‘ao ‘o ‘Isileli kātoa.