Read KO E TOH TAPU KATOA TONGA KO TEUTALŌNOME 4 Bible Online

KO TEUTALŌNOME 4 - KO E TOH TAPU KATOA TONGA bible

KO TEUTALŌNOME 4

¹PEA ko eni, ‘e ‘Isileli, ke ke tokanga ki he ngaahi tu‘utu‘uni mo konisitūtone, ‘a ia ‘oku ou ako ni kiate kimoutolu, ke fai ki ai; koe‘uhi ke mou mo‘ui, pea ke mou hū, ‘o ma‘u ‘a e fonua ‘oku foaki atu ‘e Sihova, ko e ‘Otua ‘o ho‘omou ngaahi kui.

²‘E ‘ikai te mou fakalahi, pea ‘e ‘ikai te mou fakasi‘isi‘i ki he me‘a ‘oku ou tu‘utu‘uni atu, ‘i ho‘omou tauhi ‘a e ngaahi fekau ‘a Sihova ko homou ‘Otua, ‘a ia ‘oku ou kouna atu.

³Ko homou mata na‘e māta‘i ‘a e me‘a na‘e fai ‘e Sihova ‘ia Peali-Peoli: he ‘ilonga ha tangata na‘e muimui kia Peali-Peoli kuo faka‘auha ia ‘e Sihova ko ho ‘Otua mei ho lotolotonga.

⁴Ka ko kimoutolu na‘e pīkitai kia Sihova ko homou ‘Otua ‘oku mou mo‘ui kotoa pē he ‘aho ni.

⁵Vakai, kuo u ako kiate kimoutolu ha ngaahi tu‘utu‘uni mo konisitūtone, ‘o hangē ko hoku fekau ‘e Sihova ko hoku ‘Otua, ke mou fai hangē ko ia ‘i he fonua ‘oku mou ‘alu ki ai ke ma‘u.

⁶Ko ia mou tauhi ia, mo fai ki ai; he ko ho‘omou ngali poto ia, mo ho‘omou ngali ‘atamai ‘i he vakai ‘a e ngaahi kakai, ‘a ia te nau fanongo ki he koto tu‘utu‘uni ni, pea te nau pehē, Tā ko e fu‘u pule‘anga ni ko e kakai poto mo ‘atamai.

⁷He ko e fe‘ia ha fu‘u pule‘anga ‘oku ai hanau ‘Otua ofi mai, ‘o hangē ko e ofi ‘a Sihova ko hotau ‘Otua ‘oka tau ka tautapa ki ai?

⁸Pea ko e fe‘ia ha fu‘u kakai ‘oku ai ha‘anau ngaahi tu‘utu‘uni mo konisitūtone totonu, ‘o hangē ko e lao ko ‘eni ‘a ia ‘oku ou tuku ‘i homou ‘ao he ‘aho ni?

⁹Kae sinoeme‘a ke ke tokanga kia koe, mo lamalama lahi ho laumālie ‘i he ‘aho kotoa pē ‘o ho‘o mo‘ui, na‘a ngalo ‘a e ngaahi me‘a ne māta‘i ‘e ho mata, pea na‘a mole ia mei ho loto; ka ke fakamatala ia ki ho‘o fānau, mo e fānau ‘a ho‘o fānau —

¹⁰‘a e ‘aho na‘a ke tu‘u ‘i he ‘ao ‘o Sihova ko ho ‘Otua ‘i Hōlepi,[4] mo e folofola mai ‘a Sihova, Fakataha mai ‘a e kakai kiate au, ka u tuku ke nau ongo‘i ‘eku lea, ke nau ako ai ke ‘apasia kiate au lolotonga ‘oku nau mo‘ui ‘i he funga kelekele, pea ke nau ako ‘enau fānau.

¹¹Pea na‘a mou ‘unu‘unu mai, ‘o mou tutu‘u ‘i he lalo mo‘unga; pea na‘e vela ‘a e mo‘unga ‘i he afi ‘o a‘u ki he loto langi; ai mo e fakapo‘uli, ‘a e loa, mo e po‘uli matolu.

¹²Pea na‘e folofola ‘a Sihova kiate kimoutolu mei he loto afi: ko e le‘o ‘o e ngaahi lea na‘a mou ongo‘i, ka na‘e ‘ikai te mou sio ha ‘ata‘i me‘a, ko e le‘o pē.

¹³Pea na‘a ne fakamatala kiate kimoutolu ‘ene fuakava, ‘a ia na‘a ne tu‘utu‘uni ke mou fai ki ai, ‘a e Hongofulu‘i Fekau: ‘o ne tohi ‘i ha ongo makatohi.

¹⁴Pea na‘a ne fekau au ‘i he taimi ko ia ke ako kiate kimoutolu ha ngaahi tu‘utu‘uni mo konisitūtone, ke mau fai ki ai ‘i he fonua ‘oku mou laka atu ki ai ke ma‘u.

¹⁵Ko ia, ke mou lamalama ‘aupito homou laumālie, he na‘e ‘ikai te mou momo‘i sio ki ha ‘ata‘i me‘a ‘i he ‘aho na‘e folofola mei ai ‘e Sihova kiate kimoutolu ‘i Hōlepi mei he loto afi:

¹⁶na‘a ‘iloange te mou fakalielia‘i kimoutolu, ‘o mou ngaohi ma‘amoutolu ha tamapua, ko e fakatātā ‘o ha me‘a, ko e tatau ‘o ha tangata pe fefine,

¹⁷ko e tatau ‘o ha manu ‘o e fonua, ko e tatau ‘o ha manu kapakau ‘oku puna ‘i he ‘atā,

¹⁸ko e tatau ‘o ha me‘a ‘oku totolo ‘i he kelekele, ko e tatau ‘o ha ika ‘oku ‘i he vai ‘i lolofonua.

¹⁹Pea na‘a ke tāngaki ho mata ki langi, pea ke sio ki he la‘ā mo e māhina mo e ngaahi fetu‘u, ‘a e hōsitē kotoa ‘o langi; pea na‘a tohoaki ai koe, ‘o ke lotu ki ai mo tauhia; ‘osi, ko e me‘a ia kuo vahe ‘e he ‘Eiki ko ho ‘Otua ki he ngaahi kakai kotoa ‘i lalo langi.

²⁰Ka ko kimoutolu kuo to‘o ‘e Sihova, pea kuo ne ‘omi mei he fōnise haka ‘aione, mei ‘Isipite, ke mou nofo ko hono kakai tofi‘a, ‘o hangē ko ia he ‘aho ni.

²¹Pea na‘e ‘ita foki ‘a Sihova kiate au koe‘uhi ko kimoutolu, ‘o ne fuakava ‘e ‘ikai te u a‘a atu ‘i Soatani, ‘o ‘ikai te u hū ki he fonua lelei na, ‘a ia ‘oku foaki atu ‘e Sihova ko ho ‘Otua mo‘ao tofi‘a.

²²Ka ko au te u mate ‘i he fonua ni: tokua ‘e ‘ikai te u laka atu au ‘i Soatani na: ka ko kimoutolu te mou laka atu ‘o ma‘u ‘a e fonua lelei ko ena.

²³Mou lamasi kimoutolu, na‘a ngalo ‘a e kovinānite ‘a Sihova ko homou ‘Otua, ‘a ia na‘a ne fai mo kimoutolu, ‘o mou ngaohi ma‘amoutolu ha tamapua, ko e fakatatau ‘o ha me‘a kuo tapui ‘e Sihova ko ho ‘Otua.

²⁴He ko e ‘Eiki ko homou ‘Otua ko e afi faka‘auha: ko e ‘Otua fua‘a ia.

²⁵Ka mou ka ma‘u fānau mo e makapuna, pea kuo mou fuoloa ‘i he fonua, pea kuo mou fakalielia‘i kimoutolu, mo mou ngaohi ha tamapua ko e fakatātā ‘o ha me‘a, pea mou fai kovi ‘i he ‘ao ‘o Sihova ko ho ‘Otua ke fakatupu ‘ene houhau:

²⁶‘oku ou ui ki he langi mo māmani ke hopo he ‘aho ni mo kimoutolu, ‘o fakamo‘oni te mou mātu‘aki mole ke vave mei he funga fonua ‘oku mou a‘a ai ‘i Soatani ke ma‘u; ‘e ‘ikai fakalahi homou taimi ai, ka te mou mātu‘aki ‘auha.

²⁷Pea ‘e fakamovetevete kimoutolu ‘e he ‘Eiki ki he ngaahi kakai, pea te mou iku ko e hiku‘i kakai ‘i he lotolotonga ‘o e ngaahi pule‘anga, ‘a ia ‘e fakateka kimoutolu ki ai ‘e Sihova.

²⁸Pea te mou tauhi ai ha ngaahi ‘otua, ‘a ia ko e ngāue ‘a e nima ‘o e tangata, ko e ‘akau mo e maka, ‘a ia ‘oku ‘ikai mamata, pea ‘ikai fanongo, pea ‘ikai kai, pea ‘ikai nanamu.

²⁹Ka ‘o kapau te mou kumi mei ai kia Sihova ko ho ‘Otua, te ke ‘ilo ia, ‘o kapau te ke ha‘ao ki ai ‘aki ho loto kotoa, pea ‘aki ho laumālie kotoa.

³⁰Ka hoko ‘a e mamahi kiate koe, pea mo‘ua koe ‘e he ngaahi me‘a na, ‘e fakakuokuonganoa ange ha taimi te ke foki mei ai kia Sihova ko ho ‘Otua, ‘o fanongo ki hono le‘o:

³¹he ko e ‘Otua ‘alo‘ofa ‘a Sihova ko ho ‘Otua: ‘e ‘ikai te ne li‘aki koe, pea ‘e ‘ikai te ne faka‘auha koe, pea ‘e ‘ikai ngalo ‘iate ia ‘a e fuakava mo ho‘o ngaahi kui, ‘a ia na‘a ne fakapapau mo kinautolu.

³²He ke ke fehu‘i mu‘a ki he ngaahi ‘uluaki taimi, ‘i he te‘eki ke ke ‘i ai, mei he ‘aho na‘e ngaohi ai ‘e he ‘Otua ‘a e tangata ‘i he funga ‘o māmani, pea fai mei he potu langi ‘e taha ‘o a‘u ki he potu langi ‘e taha, pe kuo ‘i ai ha me‘a hangē ko e me‘a lahi ni, pe kuo fanongo ki hano tatau?

³³Kuo fanongo koā ‘e ha kakai ki he le‘o ‘o e ‘Otua ‘oku ne folofola mei he loto afi, ‘o hangē ko ho‘o fanongo, ‘o nau mo‘ui?

³⁴Pe kuo ala‘aki ‘e he ‘Otua, ‘o ‘alu ‘o to‘o mo‘ona ha pule‘anga mei he lotolotonga ‘o ha pule‘anga, ‘aki ‘a e ngaahi ‘ahi‘ahi, mo e ngaahi faka‘ilonga, mo e ngaahi mana, mo e tau, mo e nima mālohi, mo e nima kuo hiki tā, mo e ngaahi me‘a fakailifia lahi, hangē ko e fu‘u me‘a na‘e fai ma‘amoutolu ‘e Sihova ko homau ‘Otua ‘i ‘Isipite, ‘o ke sio tonu ai?

³⁵Ko koe na‘e fakahā ki ai, koe‘uhi ke ke ‘ilo ko Sihova ko ‘Elohimi ia; pea ‘oku ‘ikai ha taha mo ia.

³⁶Na‘a ne tuku ke ke fanongo ki hono le‘o mei langi ke ne ako‘i koe; pea ‘i māmani na‘a ne tuku ke ke mamata ki hono fu‘u afi, pea na‘a ke fanongo ki he‘ene folofola mei he loto afi.

³⁷Pea ko e me‘a ‘i he‘ene ‘ofa ki ho‘o ngaahi kui, ko ia na‘a ne fili ai honau hako kimui, ‘o ne fakahao mai koe mei ‘Isipite ‘aki hono fōtunga, pea ‘aki hono fu‘u ivi;

³⁸ke kapusi mei ho ‘ao ha ngaahi kakai ‘oku lahi mo kaukaua ‘iate koe, ka ne fakahū mai koe, ‘o foaki atu kiate koe honau fonua mo‘o tofi‘a, ‘o hangē ko ia he ‘aho ni.

³⁹Ko ia ke ke ‘ilo he ‘aho ni, ‘o ke ta‘ofi ‘aki ho loto ‘a e me‘a ni, Ko Sihova ko e ‘Otua ia ‘i hēvani ‘i ‘olunga mo māmani ‘i lalo ni: ‘oku ‘ikai mo ha taha.

⁴⁰Pea te ke tauhi ‘a e ngaahi fekau mo tu‘utu‘uni ‘a‘ana, ‘a ia ‘oku ou kouna atu he ‘aho ni, koe‘uhi ke ke tu‘umālie, ‘a koe mo ho‘o fānau ‘amui, pea koe‘uhi ke lahi ho ngaahi ‘aho ‘i he funga kelekele ‘oku ‘atu ‘e Sihova ko ho ‘Otua ‘o lauikuonga.

⁴¹Na‘e toki vahe‘i ‘e Mōsese ha kolo ‘e tolu ‘i he kauvai ‘o Soatani ki he hopo‘anga la‘a;

⁴²ke hola ki ai ‘a e fakapō kuo ne tāmate‘i ha taha ‘i he fāinoa, ka na‘e ‘ikai te ne fehi‘a ki ai mu‘a; koe‘uhi ka hola ‘e ia ki ha taha ‘o e ngaahi kolo ko ia, pea mo‘ui:

⁴³‘a Pēseli ‘i he toafa, ‘i he Misoa, ma‘a ha‘a Lūpeni; pea mo Lemoti ‘i Kiliati ma‘a ha‘a Kata; pea mo Kōlani ‘i Pēsani ma‘a ha‘a Manase.

⁴⁴Pea ko eni ‘a e lao na‘e fokotu‘u ‘e Mōsese ‘i he ‘ao ‘o ha‘a ‘Isileli:

⁴⁵ko e ngaahi fakamo‘oni eni, mo e ngaahi fekau, mo e ngaahi kupu‘i konisitūtone na‘e lea‘aki ‘e Mōsese ki ha‘a ‘Isileli ‘i he‘enau hū mai mei ‘Isipite,

⁴⁶‘i he kauvai ko ē ‘o Soatani, ‘i he talalo ‘o e mo‘unga, ‘o hanga ki Pete-peoli, ‘i he fonua ‘o Sīhoni ko e Tu‘i ‘Āmoli, ‘a ia na‘e nofo ‘i Hesiponi, ‘a ia na‘e taa‘i ‘e Mōsese mo ha‘a ‘Isileli ‘i he‘enau hū mai mei ‘Isipite:

⁴⁷pea nau puke hono fonua, mo e fonua ‘o ‘Oki ko e Tu‘i Pēsani: ko e ongo tu‘i ia ‘o e kau ‘Āmoli na‘e nofo ‘i he feitu‘u ‘o Soatani ki he hopo‘anga la‘a;

⁴⁸mei ‘Aloeli, ‘a ia ‘oku ‘i he kau tele‘a ‘o ‘Alanoni, ‘o a‘u ki he mo‘unga ko Sioni[5] (ko Heamoni ia),

⁴⁹mo e ‘Alapā kotoa ki he hahake ‘o Soatani, ‘o a‘u ki he tahi ‘o e ‘Alapā, ko e talalo ‘o e ngaahi lauua ‘o Pīsika.