Read KO E TOH TAPU KATOA TONGA KO TEUTALŌNOME 5 Bible Online

KO TEUTALŌNOME 5 - KO E TOH TAPU KATOA TONGA bible

KO TEUTALŌNOME 5

¹PEA ui ange ‘e Mōsese ‘a ha‘a ‘Isileli kātoa, ‘o ne pehē kiate kinautolu, Fanongo mai, ‘a ‘Isileli, ki he ngaahi fekau mo konisitūtone, ‘a ia ‘oku ou ‘a‘au ‘i homou telinga he ‘aho ni, ke mou ako ai, ‘o tokanga ke fai ia.

²Ko Sihova ko hotau ‘Otua na‘a ne feia ha fuakava mo kitautolu ‘i Hōlepi.

³Na‘e ‘ikai ko ‘etau ngaahi tamai na‘a ne fai ai ‘a e fuakava ni, ka ko kitaua pē, ‘a kitautolu ‘oku fehaofaki mo‘ui he ‘aho ni.

⁴Ko e fefolofolai ‘a Sihova mo kimoutolu ‘i he mo‘unga mei he loto afi ko e femātaaki.

⁵Na‘a ku tu‘u ‘i he vaha‘a ‘o Sihova mo kimoutolu ‘i he taimi ko ia ke fakahā kiate kimoutolu ‘a e folofola ‘a e ‘Eiki: he na‘a mou manavahē ‘i he ‘ao ‘o e afi, ‘o ‘ikai te mou ‘alu hake ki he mo‘unga; pea ne folofola mai:

⁶Ko au ko Sihova ko ho ‘Otua, ‘a ia na‘a ku ‘omi koe mei ‘Isipite, mei he fale pōpula.

⁷‘Oua na‘a ai hao ‘Otua kehe, ‘o ua ‘aki au.

⁸‘Oua te ke ngaohi ma‘au ha tamapua, ha momo‘i fakatātā ‘o ha me‘a ‘o e langi ‘i ‘olunga na, pe ‘o māmani ‘i lalo ni, pe ‘o e tahi ‘i lolofonua:

⁹‘oua te ke hū ki ai, pea ‘oua te ke tauhi ki ai: he ko au Sihova ko ho ‘Otua ko e ‘Otua fua‘a au, ‘oku ou ‘eke ‘a e kovi ‘a e mātu‘a ki he fānau, ‘o a‘u ki he tolu mo e faa‘i to‘utangata, ‘a kinautolu ‘oku fakafili mai;

¹⁰ka ‘oku ou fai meesi ki he afe‘i to‘utangata,[6] ‘a kinautolu ‘oku ‘ofa kiate au, mo tauhi ‘eku ngaahi fekau.

¹¹‘Oua te ke takuanoa ‘a e huafa ‘o Sihova ko ho ‘Otua: he ‘e ‘ikai lau ‘e Sihova ‘oku ta‘ehalaia ia ‘a ia ‘oku ne takuanoa hono huafa.

¹²Tokanga ki he ‘aho Sāpate ke tauhi ia ke tapu, ‘o hangē ko e tu‘utu‘uni koe ‘e Sihova ko ho ‘Otua.

¹³Ko e ‘aho ‘e ono te ke ngāue, ‘o fai ai ho ngaahi nafa kehekehe;

¹⁴ka ko hono ‘aho fitu ko e Sāpate ia ‘a Sihova ko ho ‘Otua; tapu ha‘o fai ai ha momo‘i ngāue, ‘a koe mo ho‘o fānau tangata pe fānau fefine, ko ho‘o tamaio‘eiki pe ko ho‘o kaunanga, pe ko ho‘o pulu, pe ko ho‘o ‘asi, pe ha taha ‘o ho‘o fanga manu, pe ko ha ‘āunofo ‘oku ‘i ho kolo; koe‘uhi ke mālōlō ‘a ho‘o tamaio‘eiki mo ho‘o kaunanga ‘o hangē ko koe.

¹⁵Pea te ke manatu na‘a ke nofo koe ko e tamaio‘eiki ‘i ‘Isipite, pea na‘e fakahao mai koe ‘e Sihova ko ho ‘Otua ‘aki ha nima mālohi mo ha nima kuo hiki tā: ko hono ‘uhinga ia na‘e tu‘utu‘uni koe ‘e Sihova ko ha ‘Otua ke tauhi ‘a e ‘aho Sāpate.

¹⁶Faka‘apa‘apa ki ho‘o tamai mo ho‘o fa‘ē, ‘o hangē ko e tu‘utu‘uni koe ‘e Sihova ko ho ‘Otua: koe‘uhi ke lahi ho ngaahi ‘aho, pea koe‘uhi ke ke tu‘umālie ‘i he kelekele ‘oku foaki kiate koe ‘e Sihova ko ho ‘Otua.

¹⁷‘Oua na‘a ke fakapō.

¹⁸Pea ‘oua na‘a ke tono ‘unoho.

¹⁹Pea ‘oua na‘a ke kaiha‘a.

²⁰Pea ‘oua na‘a ke tu‘u ko e fakamo‘oni loi ki ho kaungā‘api.

²¹‘Oua te ke holi ki he uaifi ‘o ho kaungā‘api; pea ‘oua te ke mānumanu ki he fale ‘o ho kaungā‘api, ki hano ‘api, pe ki ha‘ane tamaio‘eiki, pe ki ha‘ane kaunanga, ki ha‘ane pulu, pe ki ha‘ane ‘asi, pe ki ha me‘a ‘e taha ‘oku ‘a ho kaungā‘api.

²²Ko e ngaahi lea ko ia na‘e folofola‘aki mai ‘e Sihova ki ho‘omou fakataha kātoa ‘i he mo‘unga, mei he loto afi, mei he loa mo e po‘uli matolu, ‘o le‘o lahi: pea ‘ikai ha‘ane toe folofola. Pea ne tohi ia ‘i ha ongo makatohi, ‘o ‘omi kia au.

²³Pea ‘i he ‘iloange na‘a mou fanongo ki he le‘o mei he fakapo‘uli, kae vela ‘a e mo‘unga ‘i he afi, na‘a mou ‘unu‘unu mai kiate au, ‘a e hou‘eiki ‘o homou ngaahi matakali, mo homou kau mātu‘a; pea na‘a mou pehē,

²⁴Ko eni, ko Sihova ko hotau ‘Otua kuo ne fakahā mai hono lāngilangi mo hono fotu, pea kuo mau ongo‘i hono le‘o mei he loto afi: kuo mau mamata he ‘aho ni tā ‘oku fefolofolai ‘a e ‘Otua mo e tangata ka ne mo‘ui pē.

²⁵Pea ko eni, kae‘uma‘ā ke mau mate he keina kimautolu ‘e he afi lahi ni? kapau te mau toe fanongo ki he le‘o ‘o hotau ‘Otua pea te mau mate.

²⁶He ko hai ‘i he kakano kotoa pē kuo ongo‘i ‘a e le‘o ‘o e ‘Otua Mo‘ui ‘oku ne folofola mei he loto afi, ‘o hangē ko kitautolu, ka ne mo‘ui?

²⁷‘Unu‘unu atu koe, ‘o tali ‘a e me‘a kehekehe ‘oku folofola‘aki mai ‘e Sihova ko hotau ‘Otua, pea ke ‘a‘au mai kiate kimautolu ‘a e ngaahi me‘a ‘e fakahā kiate koe ‘e Sihova ko hotau ‘Otua; pea te mau fanongo fie fanongo, ‘o fai ki ai.

²⁸Pea na‘e ongo‘i ‘e Sihova ‘a e le‘o ‘o ho‘omou ngaahi lea ‘i ho‘omou fai kiate au, pea ne folofola mai, Kuo u ongo‘i ‘a e le‘o ‘o e lea ‘a e kakai ni, ‘a ia kuo nau fai kiate koe: ‘oku lelei kotoa ‘a e lea kuo nau fai.

²⁹Pehēange mai kuo pehē honau loto ma‘u pē, ke nau ‘apasia kiate au, mo tauhi ‘eku ngaahi fekau, koe‘uhi ke nau tu‘umālie mo ‘enau fānau foki, ‘o ta‘engata!

³⁰‘Alu ‘o tala kiate kinautolu, Mou foki ki homou ngaahi tēniti.

³¹Ka ko koe, ke ke tu‘u heni, ‘o taka ofi kiate au, pea te u ‘a‘au kiate koe ‘a e ngaahi tu‘utu‘uni mo lao mo konisitūtone, ‘a ia te ke ako‘i kiate kinautolu, ke nau fai ‘i he fonua ‘oku ou foaki kiate kinautolu ke ma‘u.

³²Ko ia ke mou tokanga ke fai ‘o fakatatau ki he tu‘utu‘uni ‘a Sihova ko homou ‘Otua kiate kimautolu: ‘e ‘ikai te mou afe ki he to‘omata‘u pe ko e to‘ohema.

³³Ko e hala kotoa kuo tu‘utu‘uni ‘e Sihova ko homou ‘Otua ma‘amoutolu, te mou fou ai; koe‘uhi ke mou mo‘ui, pea ke mou tu‘umālie, pea ke lahi homou ngaahi ‘aho ‘i he fonua te mou ma‘u.