Read KO E TOH TAPU KATOA TONGA KO TEUTALŌNOME 6 Bible Online

KO TEUTALŌNOME 6 - KO E TOH TAPU KATOA TONGA bible

KO TEUTALŌNOME 6

¹PEA ko eni ‘a e ngaahi fekau mo lao mo konisitūtone kuo fekau ‘e Sihova ko homou ‘Otua ke ako kiate kimoutolu, ke mou fai ki ai ‘i he fonua ‘oku mou ‘alu ki ai ke ma‘u.

²Koe‘uhi ke ke ‘apasia kia Sihova ko ho ‘Otua ke tauhi ‘ene ngaahi fekau mo tu‘utu‘uni ‘a ia ‘oku ou kouna atu, ‘a koe, mo ho foha, mo e foha ‘o ho foha, ‘i he ‘aho kotoa pē ‘o ho‘o mo‘ui, pea koe‘uhi ke lahi ho ngaahi ‘aho.

³Ko ia ke ke fanongo mai, ‘a ‘Isileli, ‘o tokanga ke fai ki ai; ka ke tu‘umālie, mo ke tupu lahi, ‘o hangē ko e folofola kiate koe ‘e Sihova ko e ‘Otua ‘o ho‘o ngaahi kui, ‘i he fonua ‘oku mahutafea ‘i he hu‘akau mo e honi.

⁴Fanongo mai, ‘a ‘Isileli, Ko Sihova ko hotau ‘Otua ko e taha‘i Sihova ia:[7]

⁵pea te ke ‘ofa ki he ‘Eiki ko ho ‘Otua ‘aki ‘a e kotoa ‘o ho loto, mo e kotoa ‘o ho laumālie, mo e kotoa ‘o ho ivi.

⁶Pea ko e ngaahi fo‘i folofola ko eni ‘oku ou kouna atu he ‘aho ni ‘e fuesia ‘e ho loto:

⁷pea te ke uhu‘i ki ho‘o fānau, pea te ke lea ki ai ‘i ho‘o nofo ‘i ho fale, pea ‘i ho‘o ‘alu ‘i he hala, pea ‘i ho‘o tokoto hifo, pea ‘i ho‘o tu‘u hake.

⁸Pea te ke no‘o ia mo‘o faka‘ilonga ‘i ho nima, pea te nau tu‘u mo‘o failaketeli ‘i ho vaha‘a mata.

⁹Pea te ke tohi ia ki he ngaahi pou matapā ‘o ho fale, pea ki ho ngaahi matanikolo.

¹⁰Pea ka faifai pea fakahū koe ‘e Sihova ko ho ‘Otua ki he fonua na‘a ne fuakava ai ki ho tupu‘anga, kia ‘Epalahame, kia ‘Aisake, pea kia Sēkope, tokua te ne foaki ia kiate koe; ko e ngaahi kolo lalahi mo lelei, ‘a ia na‘e ‘ikai te ke langa,

¹¹mo e ngaahi fale kuo fonu ‘i he ngaahi lelei fua pē, ka na‘e ‘ikai ko ho‘o fakafonu, mo e ngaahi lepa tā, ka na‘e ‘ikai ko ho‘o tā, ‘a e ngaahi ngoue vaine mo e ngaahi fu‘u ‘ōlive na‘e ‘ikai te ke tō, pea ke kai ai ‘o mākona;

¹²pea ke ke toki lamasi koe na‘a ngalo ‘a e ‘Eiki, ‘a ia ne ne fakahao mai koe mei ‘Isipite, ‘a e fale pōpula.

¹³Ko Sihova ko ho ‘Otua te ke ‘apasia ki ai, pea ko ia ia te ke tauhi ki ai, pea ko hono huafa te ke fuakava ai.

¹⁴‘E ‘ikai te ke muimui ki ha ngaahi ‘otua kehe, hani ‘otua ‘o e ngaahi kakai ‘oku nofo takatakai kiate kimoutolu;

¹⁵he ko e ‘Otua fua‘a ‘a Sihova, ‘a ho ‘Otua ‘oku ‘afio ‘i ho lotolotonga; na‘a langa‘i ai ‘a e houhau ‘a Sihova ko ho ‘Otua, pea ne faka‘auha koe mei he funga kelekele.

¹⁶‘E ‘ikai te mou ala ‘aki kia Sihova ko homou ‘Otua, ‘o hangē ko ho‘omou ala ‘aki kiate ia ‘i Masa.

¹⁷Te mou tauhi ke matauhi ‘a e ngaahi tu‘utu‘uni ‘a Sihova ko homou ‘Otua, mo ‘ene ngaahi fakamo‘oni, mo ‘ene ngaahi fekau, ‘a ia kuo ne tu‘utu‘uni atu.

¹⁸Pea te ke fai ‘a e me‘a ‘oku hā totonu mo lelei kia Sihova, koe‘uhi ka ke tu‘umālie, pea ke hū atu ‘o ma‘u ‘a e fonua lelei na‘e fuakava ai ‘a Sihova ki ho‘o ngaahi kui,

¹⁹ka ne kapusi ho ngaahi fili mei ho ‘ao: ‘o hangē ko e folofola ‘a e ‘Eiki.

²⁰Ka ‘eke kiate koe ‘e ho foha ‘amui, ‘o pehē, Ko e hā ‘a e ngaahi fakamo‘oni, mo e ngaahi fekau mo konisitūtone, ‘a ia kuo tu‘utu‘uni atu ‘e Sihova ko hotau ‘Otua?

²¹Pea te ke toki pehē ki ho foha, Na‘a mau nofo ko e kau tamaio‘eiki kia Felo ‘i ‘Isipite;

²²pea na‘e fakahao mai kimautolu ‘e Sihova mei ‘Isipite ‘aki ‘a e nima mālohi: pea na‘e ‘ai ‘e Sihova ha ngaahi faka‘ilonga mo me‘a fakaofo, ko e ngaahi me‘a lalahi mo kovi ki ‘Isipite, kia Felo mo hono fale kotoa, ka mau sio ki ai:

²³pea ne fakahū mai kimautolu mei ai koe‘uhi ke ne fakahū kimautolu, ke ne foaki mai ‘a e fonua na‘a ne fuakava ai ki he‘etau ngaahi kui.

²⁴Pea na‘e fekau mai ‘e Sihova ke fai ‘a e ngaahi fekau ni kotoa, ke ‘apasia kia Sihova ko hotau ‘Otua, ma‘a ‘etau lelei ai pē, koe‘uhi ke ne fakahaofi mo‘ui kitautolu, ‘o hangē ko ia he ‘aho ni.

²⁵Pea ‘e tu‘u ia ma‘atau mā‘oni‘oni, ‘o kapau te tau tokanga ke fai hono kotoa ‘o e fekau ni ‘i he ‘ao ‘o Sihova ko hotau ‘Otua, ‘o hangē ko ‘ene tu‘utu‘uni mai.[8]