Read KO E TOH TAPU KATOA TONGA KO TEUTALŌNOME 9 Bible Online

KO TEUTALŌNOME 9 - KO E TOH TAPU KATOA TONGA bible

KO TEUTALŌNOME 9

¹FANONGO mai, ‘a ‘Isileli: ko ho‘o a‘a ‘i Soatani he ‘aho ni, ke hū atu ‘o ma‘u ha ngaahi pule‘anga ‘oku lahi mo kaukaua ‘iate koe, ha ngaahi kolo lalahi, pea tau hake honau ‘a ki langi,

²ha kakai lahi mo mā‘olunga, ko e hako‘i ‘Ānaki, ‘a ia ‘oku ke ‘ilo ki ai, pea kuo ke fanongo ki hono lau, Ko hai ‘e ala mātu‘u ‘i he ‘ao ‘o e hako‘i ‘Ānaki?

³Ko ia ke ke ‘ilo he ‘aho ni ko Sihova ko ho ‘Otua, ko ia ia ‘oku hā‘ele mu‘omu‘a ‘iate koe ko e afi faka‘auha; ko ia ia te ne faka‘auha kinautolu, pea ko ia ia te ne ha‘aki kinautolu ‘i ho ‘ao: ko ia te ke kapusi ai kinautolu, mo ‘ai ke nau ‘auha vave, ‘o hangē ko ‘ene folofola kiate koe.

⁴‘Oua te ke pehē ‘i ho loto, hili honau kapusi ‘e Sihova ko ho ‘Otua mei ho ‘ao, Ko e me‘a ‘i he‘eku mā‘oni‘oni, ko ia ai kuo ‘omi au ‘e Sihova ke ma‘u ‘a e fonua ni: ‘osi, ko e fai angahala ‘a e ngaahi pule‘anga na ‘oku fai ai honau kapusi ‘e Sihova mei ho ‘ao.

⁵‘Oku ‘ikai ko ho‘o mā‘oni‘oni, pe ko e totonu ho loto ‘oku ke hū ai ke ma‘u honau fonua; ka koe‘uhi ko e kovi ‘a e ngaahi pule‘anga na, ‘a ia ‘oku fai ai honau kapusi ‘e Sihova ko ho ‘Otua mei ho ‘ao, pea koe‘uhi ke ne fakaai ‘a e folofola na‘a ne fuakava ai ki ho tupu‘anga, kia ‘Epalahame, kia ‘Aisake, pea kia Sēkope.

⁶Ko ia ke ke ‘ilo ‘oku ‘ikai ko ho‘o mā‘oni‘oni ‘oku foaki ai ‘e Sihova ko ho ‘Otua ‘a e fonua lelei ni ke ke ma‘u; he ko e kakai kia kekeva koe.

⁷Manatu, ‘oua ‘e ngalo ho‘o fakahouhau‘i ‘a Sihova ko ho ‘Otua ‘i he Toafa: talu e ‘aho na‘a ke hū ai mei ‘Isipite, ‘o fai mai ki ho‘omou a‘u ki he potu ni, ko ho‘omou fakafeangai kia Sihova ko e koto angatu‘u pē.

⁸Na‘a mo Hōlepi foki na‘a mou fakahouhau‘ia ai ‘a Sihova, pea na‘e tuputāmaki ‘a Sihova kiate kimoutolu, ‘o hangē ka ne ka faka‘auha kimoutolu.

⁹Kuo u ‘alu hake au ki he mo‘unga ke ma‘u ‘a e ongo makatohi, ‘a e ongo maka ‘o e kovinānite ne fai ‘e Sihova mo kimoutolu, pea u nofo ‘i he mo‘unga ‘o ‘aho fāngofulu mo pō fāngofulu; na‘e ‘ikai te u kai me‘akai pe inu ha vai.

¹⁰Pea na‘e ‘omi kiate au ‘e Sihova ‘a e ongo makatohi kuo tohi ‘e he louhi‘i nima ‘o e ‘Otua; pea ‘i ai kotoa ‘a e tatau ‘o e ngaahi lea na‘e folofola‘aki ‘e Sihova kiate kimoutolu ‘i he mo‘unga, mei he loto afi ‘i he ‘aho ‘o e fakataha.

¹¹Pea ‘i he faifai pea ‘osi ‘a e fāngofulu‘i ‘aho mo fāngofulu‘i pō, na‘e ‘omi kiate au ‘e Sihova ‘a e ongo makatohi, ‘a e ongo maka kovinānite.

¹²Pea folofola ‘a Sihova kiate au, Tu‘u ‘o ‘alu hifo ke vave; he ko ho kakai na, ‘a ‘ia na‘a ke fakahao mai mei ‘Isipite, kuo nau fakaka‘anga kinautolu; kuo vave ‘enau afe mei he hala na‘a ku tu‘utu‘uni kiate kinautolu, kuo nau ngaohi hanau ‘īmisi ukamea.

¹³Na‘e folofola foki ‘a Sihova kiate au, ‘o pehē, Kuo u vakai ‘a e kakai na, pea tā ko e kia kekeva ia:

¹⁴tuku au ke u faka‘osi kinautolu, mo tāmate‘i honau hingoa mei he lalo langi: ka u ngaohi koe ko e kakai kaukaua ange mo lahi ‘iate kinautolu.

¹⁵Pea u tafoki ‘o ‘alu hifo mei he mo‘unga, ‘oku vela ai pē ‘a e mo‘unga ‘i he afi; pea ko e ongo makatohi ‘o e kovinānite na‘e ‘i hoku ongo nima ni.

¹⁶Pea u vakai, pea tā kuo mou fai angahala kia Sihova ko homou ‘Otua; kuo mou ngaohi hamou kafi ukamea: kuo mou afe vave mei he hala na‘e tu‘utu‘uni atu ‘e Sihova.

¹⁷Pea u ala ki he ongo maka, ‘o pe‘ehi mei hoku ongo nima ni, ‘o u laiki kinaua ‘i homou ‘ao.

¹⁸Pea u fo‘ohifo ‘i he ‘ao ‘o Sihova, ‘o hangē ko e ‘uluaki taimi, ko e ‘aho ‘e fāngofulu mo e pō ‘e fāngofulu; na‘e ‘ikai te u kai me‘akai, pe inu ha vai; koe‘uhi ko e ‘ū angahala kuo mou fai, ho‘omou feia ‘a e me‘a ‘oku kovi ‘i he ‘ao ‘o Sihova ke fakatupu ‘ene houhau.

¹⁹He na‘a ku tailiili telia ‘ene tuputāmaki, mo e kakaha ‘o e houhau ‘a e ‘Eiki, hangē ka ne ka faka‘auha kimoutolu. Ka na‘e ongo‘i au ‘e Sihova ‘i he taimi ko ia foki.

²⁰Ko ‘Ēlone foki na‘e ‘ita ‘aupito ki ai ‘e Sihova, hangē ka ne ka faka‘auha ia: pea u hufekina ‘a ‘Ēlone foki ‘i he taimi ko ia.

²¹Pea u to‘o ho‘omou angahala, ‘a e kafi ne mou ngaohi, ‘o u tutu ‘i he afi, ‘o u tuki ia, ‘o u momosi ke momoiki kae‘oua ke efu, pea u laku hono efu ki he vai na‘e tafe hifo mei he mo‘unga.

²²‘I Tāpela foki, pea ‘i Masa, pea ‘i Kipilote-hataava na‘a mou fakahouhau‘ia ‘a Sihova.

²³Pea ‘i he fekau atu kimoutolu ‘e Sihova mei Kētesi-panea, he‘ene, pehē, Mou ‘alu hake ‘o ma‘u ‘a e fonua kuo u foaki kiate kimoutolu; ka na‘a mou angatu‘u ki he folofola tonu ‘a Sihova ko homou ‘Otua, pea na‘e ‘ikai te mou tui kiate ia, pea na‘e ‘ikai te mou fakaongo ki hono le‘o.

²⁴Ko e koto angatu‘u ho‘omou fakafeangai kia Sihova talu e ‘aho na‘a ku fua ‘ilo ai kimoutolu.

²⁵Ko ia, na‘a ku fo‘ohifo ‘i he ‘ao ‘o Sihova, ‘a e fāngofulu‘i ‘aho mo fāngofulu‘i pō na‘a ku fo‘ohifo ai; he kuo folofola mai ‘e Sihova te ne faka‘auha kimoutolu.

²⁶Pea u hū ki he ‘Eiki, pea u pehē, ‘Ātonai Sihova ē, ‘oua te ke faka‘auha ho kakai mo tofi‘a ‘a ia kuo ke huhu‘i ‘aki ho mā‘olunga, ‘a ia kuo ke fakahao mai mei ‘Isipite ‘aki ha nima māfimafi.

²⁷Manatu ki ho‘o kau tamaio‘eiki, kia ‘Epalahame, kia ‘Aisake, pea kia Sēkope; ‘oua te ke hanga ki he paongata‘a ‘a e kakai ni, pe ki he‘enau kovi mo ‘enau angahala;

²⁸na‘a pehē ‘e he fonua na‘a ke fakahaofi kimautolu mei ai, Tā ko e ‘ikai lava ‘e Sihova ke fakahū kinautolu ki he fonua na‘a ne tala‘ofa kiate kinautolu, pea koe‘uhi ko ‘ene fehi‘a kiate kinautolu, ko hono ‘uhinga ia kuo ne ‘omi ai kinautolu ke tāmate‘i ‘i he toafa.

²⁹Ka ko ho kakai kinautolu, mo ho tofi‘a, ‘a ia na‘a ke fakahao mai ‘aki ‘a e ivi lahi, mo e nima kuo hiki tā.