Read KO E TOH TAPU KATOA TONGA Sioné 10 Bible Online

Sioné 10 - KO E TOH TAPU KATOA TONGA bible

Sioné 10

¹Ko au ē, ko au ē, ‘oku ou tala atu, Ko ia ‘oku ‘ikai hū ‘i he matapā ki he loto‘ā sipi, ka ‘oku ne kaka ‘i ha potu kehe, ko e toko taha ko ia ko e kaiha‘a mo fakamālohi,

²ka ko ia ‘oku hū ‘i he matapā ko ha tauhi ia ‘o e fanga sipi.

³‘Oku to‘o ‘e he le‘o matapā ki ha toko taha pehē; pea ‘oku tokanga ‘e he fanga sipi ki hono le‘o; pea ‘oku ne ui ‘ene fanga sipi ‘a‘ana ‘i honau hingoa takitaha, ‘o ne taki kinautolu ki tua‘ā,

⁴pea ka ‘osi ‘ene tuku kitua‘ā ‘ene me‘a ‘a‘ana kotoa pē, ‘oku ne ‘alu mu‘omu‘a ia ‘iate kinautolu, pea ‘oku muimui ‘a e fanga sipi kiate ia, koe‘uhi ‘oku nau ‘ilo hono le‘o.

⁵Ka ‘e ‘ikai ‘aupito te nau muimui ki ha kehe, ka te nau hola meiate ia; koe‘uhi ‘oku ‘ikai te nau ‘ilo ‘a e le‘o ‘o e kehe.

⁶Ko e fakatātā ko eni na‘e fai ‘e Sīsū kiate kinautolu: ka na‘e ‘ikai ‘ilo ‘e he fa‘ahinga ko ia pē ko e hā ‘ene lea ‘oku fai mai.

⁷Ko ia na‘e toe folofola ‘a Sīsū, Ko au ē, ko au ē, ‘oku ou tala atu, Ko au ko e matapā ‘o e fanga sipi.

⁸Ko kinautolu kotoa pē na‘e ha‘u mu‘omu‘a ‘iate au, ko e kau kaiha‘a kinautolu mo fakamālohi: ka na‘e ‘ikai tokanga kiate kinautolu ‘e he fanga sipi.

⁹Ko au pē ko e matapā: ka kuo hū ha taha ‘iate au ‘e fakamo‘ui ia, pea te ne hū atu, pea te ne hū mai, ‘o ma‘u me‘akai.

¹⁰Tala‘ehai ‘oku ha‘u ‘a e kaiha‘a ki ha me‘a, ka ke kaiha‘a pē, mo tāmate‘i, mo maumau: ko au kuo u ha‘u koe‘uhi ke nau ma‘u mo‘ui, pea ke nau ma‘u ‘o lahi ‘aupito.

¹¹Ko au ko e Tauhi Lelei, Ko e anga ‘o e tauhi lelei ke ‘atu ‘ene mo‘ui koe‘uhi ko e fanga sipi.

¹²Ka ko ia ‘oku ngāue totongi pē, pea ‘oku ‘ikai ko ha tauhi sipi, ko e toko taha ‘oku ‘ikai ‘a‘ana totonu ‘a e fanga sipi, ka sio ia ko e ulofi ‘ena ‘oku ha‘u, pea ne li‘aki ‘a e fanga sipi, ‘o ne hola: pea ‘oku pō kinautolu ‘e he ulofi, ‘o fakamovetevete:

¹³koe‘uhiā ko e toko taha ia ‘oku ngāue ki he totongi, pea ‘oku ‘ikai mamafa kiate ia ‘a e fanga sipi.

¹⁴Ko au ko e Tauhi Lelei: pea ‘oku te ‘ilo ‘a e ngaahi me‘a ‘a‘ata, pea ‘oku ‘ilo kita ‘e he ngaahi me‘a ‘a‘ata,

¹⁵‘o hangē ‘oku ‘ilo au ‘e he Tamai, pea mo ‘eku ‘ilo ‘a e Tamai ‘e au. Pea ‘oku ou ‘atu ‘eku mo‘ui koe‘uhi ko e fanga sipi.

¹⁶Pea ‘oku ai mo ‘eku fanga sipi kehe, ‘a ia ‘oku ‘ikai kau ki he loto‘ā ko eni: kuo pau ke u taki ‘a e fa‘ahinga ko ia foki: pea te nau tokanga ki hoku le‘o; pea te nau hoko ko e[24] tākanga pē taha, pea taha pē ‘a e tauhi.

¹⁷Ko hono ‘uhinga ia ‘o e ‘ofa‘i au ‘e he Tamai, koe‘uhi ‘oku ou ‘atu ‘eku mo‘ui kau toe to‘o ia.

¹⁸Tala‘ehai ko e fa‘ao ia ‘e ha taha meiate au, ka ko ‘eku ‘atu ia ‘e au. ‘Oku ou fa‘iteliha ki hano ‘atu; pea ‘oku ou fa‘iteliha ki hano toe to‘o. Ko ia ia ‘a e tu‘utu‘uni ne u ma‘u mei he‘eku Tamai.

¹⁹Pea toe hoko ha mavahevahe ‘i ha‘a Siu ‘i he ngaahi lea ko ia.

²⁰Pea na‘e pehē ‘e honau tokolahi, ‘Oku ‘iate ia ha tēvolo, pea ‘oku ne faha: ko e hā ‘oku mou tokanga ai kiate ia?

²¹Ka ka pehē ‘e ha ni‘ihi, Tala‘ehai ‘oku hoa mo ha ‘āvea ha alā lea pehē: ‘o mafai koa ‘e ha tēvolo ke faka‘ā ‘a e mata ‘o e kui?

²²Pea faifai pea hoko ‘i Selusalema ‘a e kātoanga, ko e fakamanatu ki he huufi fo‘ou ‘o e Temipale.

²³Ko e fa‘ahita‘u momoko ia, pea na‘e hā‘ele ‘a Sīsū ‘i he Temipale ‘i he falehala ‘o Solomone.

²⁴Ko ia na‘e kapui ia ‘e ha‘a Siu, ‘O nau pehē ki ai, Ko futu mo ho‘o fakamanganga homau loto! kapau ko e Mīsaia koe, pea tala fakapatonu mai.

²⁵Pea tali ‘e Sīsū kiate kinautolu, Kuo u tala atu, pea ‘oku ‘ikai te mou tui ki ai: ko e ngaahi ngāue ‘oku ou fai ‘i he huafa ‘o ‘eku Tamai, ko ia ia ‘oku fakahaa‘i au:

²⁶ka neongo ia, ka ‘oku ‘ikai te mou tui; koe‘uhi ‘oku ‘ikai te mou ‘i he fanga sipi ‘a‘ata.

²⁷Ko ‘ete fanga sipi ‘a‘ata ‘oku nau tokanga ki hoto le‘o, pea ‘oku ou ‘ilo kinautolu; pea ‘oku nau muimui kiate au, pea ‘oku ou ‘atu kiate kinautolu ‘a e mo‘ui ta‘engata;

²⁸pea ‘e ‘ikai ‘aupito te nau ‘auha ‘o lauikuonga, pea ‘e ‘ikai hamusi kinautolu ‘e ha taha mei hoku nima.

²⁹Ko ‘eku Tamai, ‘a ia na‘a ne foaki kinautolu kiate au,[25] ‘oku lahi ia ‘i he me‘a kotoa pē; pea tala‘ehai ‘e lava ‘e ha taha ke hamusi mei he nima ‘o e Tamai.

³⁰Ko au mo e Tamai ‘oku ma taha.

³¹Pea to‘o maka leva ‘e ha‘a Siu, ‘o hapai ke pe‘ehi kiate ia.

³²Tali leva ‘e Sīsū kiate kinautolu, Kuo lahi ‘a e ngaahi ngāue lelei kuo u faka‘ali‘ali kiate kimoutolu mei he Tamai; ko e fē ia ‘i he ngaahi ngāue ko ia ‘oku mou fai ke tolongi ai au?

³³Pea tali kiate ia ‘e ha‘a Siu, ‘Oku ‘ikai ko ha ngāue lelei ‘oku mau tolongi ai koe, ka ko e lea fie-‘Otua: ‘osi, ko e tangata koe, ka ‘oku ke lau fola, tokua ko e ‘Otua koe.

³⁴Pea tali ‘e Sīsū kiate kinautolu, ‘Ikai kuo tohi ‘i ho‘omou Lao, ‘o pehē, Na‘a ku lau ko e ngaahi ‘otua kimoutolu?

³⁵Kapau na‘a ne lau ko e ngaahi ‘otua ‘a kinautolu na‘e hoko ki ai ‘a e folofola ‘a e ‘Otua, (pea tala‘ehai ‘e ala tāmate‘i ‘a e potu Tohitapu ko ia)

³⁶Pea ko ho‘omou lau koā ki he toko taha na‘e fakanofo ‘e he Tamai, mo fekau ki māmani, ‘o mou pehē, ‘Oku ke lea fie‘otua, koe‘uhiā ko ‘eku pehē, Ko e ‘Alo ‘o e ‘Otua au!

³⁷Kapau ‘oku ‘ikai te u feia ‘a e ngaahi ngāue ‘a ‘eku Tamai, pea ‘oua te mou tui kiate au,

³⁸Ka ‘o kapau ‘oku ou fai ia; pea neongo ‘oku ‘ikai te mou tui kiate au, tui pē ā ki he ngaahi ngāue: koe‘uhi ke mou vakai ‘o ‘ilo, ‘oku ‘iate au ‘a e Tamai, mo au ‘oku ou ‘i he Tamai.

³⁹Pea nau toe feinga ke puke ia; ka ka mole atu pē ia mei honau nima.

⁴⁰‘O ne toe ‘alu ki Tu‘a-Soatani, ki he potu na‘e fai papitaiso ai ‘a Sione — ‘a ia ‘i he kamata‘anga — pea ne nofo ‘i he potu ko ia.

⁴¹Pea na‘e ha‘u ha tokolahi kiate ia, pea ko ‘enau lau na‘e pehē, Ko Sione na‘e ‘ikai te ne momo‘i fai ha mana ‘e taha: ka ko e ngaahi me‘a na‘e fakahā ‘e Sione ki he toko taha ni, tā ‘oku mo‘oni hono kotoa,

⁴²pea na‘e tui ha tokolahi kiate ia ‘i he potu ko ia.