Read KO E TOH TAPU KATOA TONGA Sioné 11 Bible Online

Sioné 11 - KO E TOH TAPU KATOA TONGA bible

Sioné 11

¹Ka na‘e ai ha toko taha na‘e mahaki‘ia, ko Lasalosi ‘i Pētani, ‘a e vilisi ‘o Mele mo hono tokoua ko Mā‘ata.

²(Pea ko e Mele ia na‘a ne tākai ‘a e ‘Eiki ‘aki ‘a e lolo, mo holoholo hono va‘e ‘aki hono lou‘ulu, ko e fefine ia kuo puke hono tuonga‘ane ko Lasalosi.)

³Ko ia na‘e fekau atu ai kiate ia ‘e hono ongo tuofefine, he‘ena pehē, ‘eiki, ke ke mea‘i ko e siana ‘oku ke ‘ofa ai ‘oku puke.

⁴Ka ‘i he fanongo ki ai ‘a Sīsū na‘a ne pehē, Ko e mahaki ko eni kuo ‘ikai hoko mai ke ne pekia ai, ka ko hono ‘uhinga ko e lāngilangi ‘o e ‘Otua, koe‘uhi ke fakalāngilangi‘i ai ‘a e ‘Alo ‘o e ‘Otua.

⁵Pea ko eni na‘e ‘ofa ‘a Sīsū kia Mā‘ata, mo hono tokoua, pea mo Lasalosi.

⁶Ko ia ‘i he‘ene fanongo leva ‘oku ne puke, na‘a ne kei nofo pē ‘i he potu na‘a ne ‘i ai, ‘o ‘aho ua.

⁷Kae hili ia, pea ne pehē ki he‘ene kau ako, Tau toe ō ki Siutea.

⁸Pea pehē kiate ia ‘e he kau ako, Lāpai, na‘e toki feinga ‘e ha‘a Siu ke tolongi koe; pea ko ho‘o toe ‘alu koā ki ai?

⁹Pea tali ‘e Sīsū, ‘Ikai ‘oku hongofulu mā ua ‘a e houa ‘i he ‘aho? Kapau ‘e hā‘ele ha taha lolotonga ‘oku ‘aho, ‘e ‘ikai te ne tūkia, koe‘uhi ‘oku ne mamata ki he maama ‘o māmani.

¹⁰Ka ‘o kapau ‘e hā‘ele ha taha ‘i he po‘uli te ne tūkia, koe‘uhi ‘oku ‘ikai ‘iate ia ‘a e maama.

¹¹Na‘e pehē ‘ene me‘a: pea hili ia pea ne pehē kiate kinautolu, Ko si‘otau kaume‘a ko Lasalosi kuo mohe; ka ko ‘eku ‘alu ni ke u fafangu ia.

¹²Ko ia na‘e lea kiate ia ‘e he kau ako, ‘o pehē, ‘Eiki, kapau kuo ne mohe te ne mo‘ui.

¹³Ka na‘e kau ‘a e lea ‘a Sīsū ia ki he‘ene pekia: ka ka mahalo ‘e kinautolu ‘oku ne me‘a ki ha‘ane toka ‘o mohe.

¹⁴Ko ia na‘e hanga ai ‘a Sīsū, ‘o ne lea fakapatonu kiate kinautolu, ‘o pehē,

¹⁵Kuo pekia ‘a Lasalosi. Pea ‘oku ou fiefia ‘i he ‘ikai te u ‘i ai, koe‘uhi ko kimoutolu, koe‘uhiā ke mou tui; ka tau ō pē kiate ia.

¹⁶Pea pehē ai ‘a Tōmasi ‘oku ui ko Titimasi ki hono kaunga ako, Tau ō foki, ke tau mate mo ia.

¹⁷Pea ‘i he hoko ki ai ‘a Sīsū, na‘a ne ‘ilo tā kuo ‘aho fā mālō ‘ene ‘i he fonualoto.

¹⁸Pea ko eni, na‘e vāofi ‘a Pētani mo Selusalema, fe‘unga nai mo e maile ‘e ua:

¹⁹Pea ko e tokolahi ‘o ha‘a Siu kuo nau omi kia Mā‘ata mo Mele, ke fakafiemālie‘i kinaua koe‘uhi ko hona tuonga‘ane.

²⁰Ko ia ko Mā‘ata, ‘i he‘ene fanongo leva ‘oku ha‘u ‘a Sīsū, na‘a ne fakafetaulaki kiate ia: ka ka nofo ai pē ‘a Mele ‘i ‘api.

²¹Pea lea ai ‘a Mā‘ata kia Sīsū, ‘Eiki, ka ne ke ‘i heni pehē ne ‘ikai pekia hoku tuonga‘ane.

²²Pea na‘a mo ia, ka ‘oku ou ‘ilo, neongo pē ko e hā ha‘o kole ‘e fai ki he ‘Otua, ‘e ‘atu pē, ‘e he ‘Otua.

²³Pea lea ai ‘e Sīsū ki ai, ‘e toetu‘u ho tuonga‘ane.

²⁴Pea pehē ‘e Mā‘ata kiate ia, ‘Oku ou ‘ilo te ne toetu‘u ‘i he Toetu‘u ‘i he ‘aho fakamui.

²⁵Pea me‘a ‘e Sīsū ki ai, Ko au pē ko e Toetu‘u, pea mo e Mo‘ui: ko ia ‘oku tui pīkitai kiate au, ne ongo kuo pekia, ka te ne mo‘ui pē:

²⁶pea ‘ilonga ‘a ia ‘oku mo‘ui mo tui pīkitai kiate au ‘e ‘ikai ‘aupito te ne mate, ‘o ta‘engata. ‘Oku ke tui ki he me‘a ko ia, ‘o?

²⁷Pea pehē ‘e ia ki ai, ‘Io, ‘Eiki: kuo u tui ko e Mīsaia koe, ko e ‘Alo ‘o e ‘Otua, ko e Toko Taha ka hoko mai ki māmani.

²⁸Pea hili ‘ene lea pehē, na‘a ne ‘alu ‘o ui ange ‘a Mele ko hono tokoua, ‘o ne tala fakafufū ki ai ‘o pehē, Kuo me‘a mai ‘a e Tangata‘eiki, pea ‘oku ne fiema‘u koe.

²⁹Pea ‘i he‘ene fanongo ki ai, na‘a ne tu‘u leva, ‘o kamata ‘alu kiate ia.

³⁰Pea kuo te‘eki hū ‘a Sīsū ki he vilisi, ka ‘oku ne kei ‘i he potu na‘e fakafetaulaki ai ‘a Mā‘ata kiate ia.

³¹Ko ia ko ha‘a Siu na‘e ‘iate ia ‘i he fale, ‘o fakafiemālie kiate ia, ‘i he‘enau vakai ki he tu‘u vave ‘a Mele ‘o hū kitu‘a, na‘a nau muimui ki ai, he‘enau mahalo ko ‘ene mole ki he fonualoto ke tangi ai.

³²Pea ‘i he hoko leva ‘a Mele ki he potu na‘e ‘i ai ‘a Sīsū, ‘o ne mamata kiate ia, na‘a ne hinga atu ki hono va‘e, ‘o ne pehē kiate ia, ‘Eiki, ka ne ke ‘i heni, pehē ne ‘ikai pekia si‘oku tuonga‘ane.

³³Pea ‘i he me‘a ‘a Sīsū kiate ia ‘oku ne tangi, mo kinautolu na‘e ha‘u mo ia, ‘a ha‘a Siu, ‘oku nau tangi, na‘a ne ‘ita ‘i hono laumālie, mo ne fakatekelili,

³⁴pea ne pehē, Kuo mou telio ia ‘i fē? Pea na pehē ange, ‘Eiki, ke ke me‘a mai, ‘o me‘a ki ai.

³⁵Na‘e tutulu ‘a Sīsū,

³⁶pea pehē ai ‘e ha‘a Siu, Vakai ā: ta na‘e lahi ‘ene ‘ofa kiate ia!

³⁷Ka ka pehē ‘e honau ni‘ihi, ‘Ikai ne mei lava ‘e he siana ni na‘e faka‘ā ‘a e mata ‘o e kui, ke ngaohi mo e toko taha ko ia ke ‘oua te ne pekia?

³⁸Pea toe ‘ita ai ‘a Sīsū ‘i hono finangalo, ‘o ne ‘alu atu ki he fonualoto. Pea ko e ‘ana ia, pea tu‘u ki ai ha maka.

³⁹Folofola ‘a Sīsū, To‘o ‘a e maka. Pea lea kiate ia ‘a e tuofefine ‘o ia kuo fai, ‘a Mā‘ata, ‘o ne pehē, ‘Eiki, kuo namuhāhā; he ko hono ‘aho fā mālō ‘eni.

⁴⁰Pea me‘a ‘a Sīsū ki ai, ‘Ikai na‘a ku tala atu, kapau te ke tui, te ke mamata ki he lāngilangi ‘o e ‘Otua?

⁴¹Pea nau to‘o ai ‘a e maka. Pea tāngaki hake ‘e Sīsū hono fofonga, ‘o ne pehē, ‘Alā Tamai, ‘oku ou fakafeta‘i atu koe‘uhi na‘a ke ongo‘i au.

⁴²‘Io, kuo u ‘ilo pē ‘e au ‘oku ke ongo‘i au ma‘u ai pē: ka ko ‘eku lea koe‘uhi ko e fu‘u kakai ‘oku tutu‘u ni, koe‘uhi ke nau tui ko koe kuo ke fekau mai au.

⁴³Pea hili ‘ene folofola pehē, pea ne kalanga le‘o lahi, Lasalosi, tu‘u mai kitu‘a.

⁴⁴Pea hū kitu‘a ‘a e pekia, kuo ha‘i hono ongo va‘e mo hono ongo nima ‘aki ‘a e ngaahi no‘o; pea ko hono fofonga na‘e takai ‘aki ha holoholo. Pea folofola ‘a Sīsū kiate kinautolu, Vete ia, pea tukuange ke ne ‘alu.

⁴⁵Ko ia ko e tokolahi ‘o ha‘a Siu, ‘io, ‘a kinautolu kuo ha‘u kia Mele, pea mamata ki he me‘a kuo fai ‘e Sīsū, na‘a nau tui pīkitai kiate ia.

⁴⁶Ka ko e ni‘ihi ‘o e fa‘ahinga ko ia na‘a nau ‘alu ange ki he kau Fālesi, ‘o nau tala kiate kinautolu ‘a e ngaahi me‘a kuo fai ‘e Sīsū.

⁴⁷Ko ia na‘e hanga ai ‘a e hou‘eiki taula‘eiki mo e kau Fālesi, ‘o nau fai ha fakataha, ‘o nau pehē, Ko e hā mu‘a ‘oku tau fai? he ko e tangata ni ko e me‘a ngei ‘ene fai mana.

⁴⁸Kapau te tau tuku ia ke fai pehē ai pē, ‘e tui pīkitai kiate ia ‘a e kakai kotoa pē, pea ‘e ha‘u ‘a e kau Loma, ‘o ‘ave hotau fonua mo hotau pule‘anga fakatou‘osi.

⁴⁹Ka ko honau toko taha, ko Kaiafasi, ‘a ia na‘e Taula‘eiki-Lahi ‘i he ta‘u ko ia, na‘a ne me‘a kiate kinautolu, ‘o pehē, Tā ko e kakai kimoutolu ‘oku ‘ikai te mou momo‘i ‘ilo ha me‘a;

⁵⁰pe te mou fakakaukau, ‘oku lelei mu‘a kiate kimoutolu ke mate ha fo‘i tangata ‘e toko taha koe‘uhi ko e fa‘ahinga tapu, pea ‘oua na‘a ‘auha ‘a e pule‘anga kotoa.

⁵¹Ka na‘e ‘ikai meiate ia ‘a e lea ko ia: ka ko e me‘a ‘i he‘ene Taula‘eiki Lahi ‘i he ta‘u ko ia, ko ia na‘a ne palofisai ai, ‘oku ene ‘a Sīsū ke pekia koe‘uhi ko e pule‘anga;

⁵²‘o ‘ikai koe‘uhi ko e pule‘anga pē, ka koe‘uhi foki ke fakatahataha ‘a e fānau ‘a e ‘Otua kuo movetevete.

⁵³Ko ia, hili ‘a e ‘aho ko ia na‘a nau puleaki‘i hano tāmate‘i.

⁵⁴Ko ia na‘e ‘ikai ke kei fakafe‘iloaki ‘a Sīsū mo ha‘a Siu; ka ka ‘alu ia mei ai ki he tuku‘uta, ‘o afi ki he toafa, ki ha kolo na‘e hingoa ko ‘Ifalemi, ‘o ne nofo ai mo ‘ene kau ako.

⁵⁵Pea faifai pea panaki ‘a e Pāsova ‘a ha‘a Siu: pea ‘alu ha tokolahi ki Selusalema mei he tuku‘uta ‘i he te‘eki ke hoko ‘a e Pāsova, koe‘uhi ke nau fakama‘a.

⁵⁶Pea nau fekumi ai kia Sīsū, ‘o nau fetalanoa‘aki ‘i he‘enau tutu‘u ‘i he Temipale, ‘o pehē, Ko e hā ho‘omou poa? ‘Oku mo u pehē ‘e ‘ikai ‘aupito te ne ha‘u ki he kātoanga?

⁵⁷Pea ko eni, kuo fai tu‘utu‘uni ‘e he hou‘eiki taula‘eiki mo e kau Fālesi, ka ai ha taha ‘oku ne ‘ilo pē ‘oku ne ‘i fē, ke ne fakahā; koe‘uhi ke nau puke ia.