Read KO E TOH TAPU KATOA TONGA Sioné 12 Bible Online

Sioné 12 - KO E TOH TAPU KATOA TONGA bible

Sioné 12

¹PEA ‘i he toe ono ‘a e ‘aho pea fai ‘a e Pāsova, pea ha‘u ‘a Sīsū ki Pētani, ko e potu na‘e nofo ai ‘a Lasalosi, ‘a ia ne fokotu‘u ‘e Sīsū mei he pekia.

²Pea nau fai ai ma‘ana, ha kātoanga ‘i he potu ko ia; pea na‘e tauhi tēpile ‘a Mā‘ata: ka ko Lasalosi ko e taha ia ‘iate kinautolu na‘e fetākoto‘i mo ia ‘i he kai.

³Pea to‘o ai ‘e Mele ha pāuni lolo tākai, ko e na‘ati mo‘oni pea mahu‘inga lahi, ‘o ne tākai ‘aki ‘a e va‘e ‘o Sīsū, mo ne holoholo hono va‘e ‘aki hono lou‘ulu: pea na‘e fonu ‘a e fale ‘i he ngangatu ‘o e lolo.

⁴Ka ko Siutasi ‘Isikāliote, ko e toko taha ‘o ‘ene kau ako, ‘a ia ‘oku ene ke lavaki‘i ia, na‘a ne pehē,

⁵Ko e hā na‘e ‘ikai fakatau ai ‘a e lolo ni, ‘o ma‘u ai ha tēnali[26] ‘e tolungeau, ‘o foaki ki he masiva?

⁶Ka ko ‘ene lea ko ia, tala‘ehai ko e pehē na‘e mamafa ‘a e masiva kiate ia; ka koe‘uhi ko e kaiha‘a ia, pea ko e me‘a ‘i he ‘iate ia ‘enau puha pa‘anga na‘a ne fa‘a ‘ave ‘a e ngaahi me‘a na‘e lī ki ai.

⁷Pea me‘a ai ‘a Sīsū, Tuku pē ‘a e fefine ke ne tauhi ia ki he ‘aho ‘o hoku tanu.

⁸He ko e me‘a ki he masiva te mou feangai ai pē mo kinautolu; ka ‘e ‘ikai te mou feangai ai pē mo au.

⁹Pea ‘ilo ‘e ha tokolahi ‘o ha‘a Siu ‘oku ne ‘i he potu ko ia, pea nau ‘alu ki ai; ‘o ‘ikai koe‘uhi ko Sīsū pē, ka koe‘uhi foki ke nau mamata kia Lasalosi, ‘a ia kuo ne fokotu‘u mei he pekia.

¹⁰Ka ka puleaki‘i ‘e he hou‘eiki taula‘eiki ke tāmate‘i mo Lasalosi foki;

¹¹koe‘uhi ko e me‘a ‘iate ia na‘e mole ai ha tokolahi ‘o ha‘a Siu, ‘o tui pīkitai kia Sīsū.

¹²Pongipongi hake, ko e fu‘u kakai kuo ha‘u ki he kātoanga, ‘i he‘enau fanongo ‘oku me‘a mai ‘a Sīsū ki Selusalema,

¹³na‘a nau to‘o ‘a e ngaahi va‘a paame, ‘o nau hū ki tua‘ā ke fakafetaulaki kiate ia, ‘o nau kalakalanga, Hōsana! Hoto ‘ofa kiate ia ‘oku hoko mai ‘i he huafa ‘o e ‘Eiki: ‘Io, ki he Tu‘i ‘Isileli!

¹⁴Pea kuo ma‘u ‘e Sīsū ha ‘asi mui, na‘a ne heka ki ai; ‘o hangē ā ko ia ne tohi, Si‘i Saione, ‘oua ‘e manavahē:

¹⁵ko eni ho Tu‘i ‘oku me‘a mai kiate koe, ‘oku heka ki ha ki‘i ‘asi.

¹⁶Ko e ngaahi me‘a ko ia na‘e ‘ikai mahino ki he‘ene kau ako ‘i he kamata‘anga: ka ‘i he hoko ‘a e fakalāngilangi‘i ‘o Sīsū, pea nau toki manatu, tā ne tohi ‘a e ngaahi me‘a ko ia ma‘ana, pea kuo nau fai pehē kiate ia.

¹⁷Pea na‘e fakahaa‘i ia foki ‘e he kakai na‘e ‘iate ia ‘i he‘ene ui mai ‘a Lasalosi mei he fonualoto, mo fokotu‘u ia mei he pekia.

¹⁸Ko hono ‘uhinga foki ia na‘e fakafetaulaki kiate ia ‘a e fu‘u kakai, koe‘uhi kuo nau fanongo kuo ne fai ‘a e fu‘u mana ko ia.

¹⁹Ko ia na‘e fepehē‘aki ‘a e kau Fālesi, ‘Oku mou tokanga koā ‘oku ‘ikai te tau mafohi ha me‘a? Vakai ange; kuo hiki fu‘u ‘a māmani, ‘o muimui kiate ia.

²⁰Pea na‘e ai ha tu‘unga me‘a Kalisi ‘i he kakai na‘e ‘alu hake ke fai ‘enau lotu ‘i he kātoanga:

²¹pea ‘alu ‘a e kau siana, ko ia kia Filipe, ‘a ia na‘e mei Petesaita ‘i Kāleli, pea nau kole kiate ia, ‘o pehē, ‘Eiki, ‘oku mau fie fe‘iloaki mo Sīsū.

²²Pea ha‘u ‘a Filipe ‘o tala kia ‘Anitelū: ha‘u pē ‘a ‘Anitelū ia, mo Filipe, ‘o tala kia Sīsū.

²³Ka ka tali ‘e Sīsū kiate kinaua, ‘o pehē, Kuo hokosia ‘a e taimi ke fakalāngilangi‘i ‘a e Fanautama ‘a Tangata.

²⁴Ko au ē, ko au ē, ‘oku ou tala atu, Kapau ‘e ‘ikai tō ki he kelekele ‘a e tenga‘i uite ‘o mate, ‘oku teka taha ai pē ia: ka ‘o kapau ‘e mate, te ne fua lahi.

²⁵Ko ia ‘oku ‘ofa ki he‘ene mo‘ui, ko ‘ene tuku ia ke mole; pea ko ia ‘oku ne fehi‘a ki he‘ene mo‘ui ‘i he maama ko eni, ko ‘ene tauhi ia ‘o a‘u ki he mo‘ui ta‘engata.

²⁶Kapau ‘e tauhi au ‘e ha taha, ke ne muimui kiate au; pea ko e potu ‘oku ‘i ai au, ‘e ‘i ai foki ‘eku sevāniti: kapau ‘e tauhi au ‘e ha taha, ‘e fakahīkihiki‘i ia ‘e he Tamai.

²⁷‘Ē, kuo takatu‘u ‘eni ‘eku mo‘ui; pea ko e hā ai ‘eku lea ‘e fai? ‘Alā Tamai, fakahaofi au mei he houa ko eni: ‘Ā, ka ko hono ‘uhinga e na‘a ku hoko mai ai ki he houa ni.

²⁸‘Alā Tamai, ke ke fakalāngilangi‘i ho‘ou huafa. Ko ia na‘e hoko ha le‘o mei he langi, ‘o pehē, Kuo u fakalāngilangi‘i ia, pea te u toe fakalāngilangi‘i foki.

²⁹Pea ko e kakai na‘e tu‘u ai ‘o fanongo, na‘a nau pehē kuo mana: pea pehē ‘e ha ni‘ihi, Ko e lea ‘a ha ‘āngelo kiate ia.

³⁰Ka ka tali ‘e Sīsū, ‘o ne pehē, Na‘e ‘ikai koe‘uhi ko au ‘a e hoko mai ‘a e le‘o ni, ka koe‘uhi ko kimoutolu.

³¹‘Ē, kuo hoko ‘eni ‘a e fakamaau ‘o e maama ko eni: ‘ē, ‘e kapusi ki tu‘a ‘eni ‘a e ‘eiki ‘o e maama ko eni.

³²Pea ko au, kapau ‘e hiki au ki ‘olunga mei he kelekele, te u tohoaki ‘a e kakai kotoa pē kiate au.

³³Ka na‘a ne lea pehē ko ‘ene fakatātā atu ‘a e anga ‘o e mate‘anga te ne pekia ai.

³⁴Ko ia na‘e tali ki ai ‘e he kakai, Kuo mau fanongo mei he Lao, ‘oku nofo ‘a e Mīsaia ‘o ta‘engata: pea fēfē ai ho‘o lau ‘a‘au, tokua kuo pau ke hiki ki ‘olunga ‘a e Fanautama ‘a Tangata? Ko hai tū ‘a e Fanautama ‘a Tangata ko ia.

³⁵Pea folofola ai ‘a Sīsū kiate kinautolu, ‘Oku kei toe ha ki‘i taimi ‘o e ‘i homou lotolotonga ‘a e maama. Mou laka ho‘omou ma‘u ‘a e maama, ke ‘oua na‘a lapasi kimoutolu ‘e he po‘uli: pea ko ia ‘oku hā‘ele ‘i he po‘uli ‘oku ‘ikai te ne ‘ilo pē ko ‘ene mole ki fē.

³⁶‘I ho‘omou ma‘u ‘a e maama, mou tui pīkitai ki he maama, koe‘uhi ke mou hoko ko e fānau ‘a e maama. Na‘e pehē ‘ene folofola ‘a Sīsū, pea ne hiki mei ai, ‘o ne fufū meiate kinautolu.

³⁷Ka neongo kuo tuva pehē ‘a e ngaahi faka‘ilonga kuo ne fai ‘i honau ‘ao, ka na‘e ‘ikai te nau tui pīkitai kiate ia:

³⁸koe‘uhiā ke fakamo‘oni ki he folofola ‘a e palōfita ko ‘Aisea, ‘a ia na‘e pehē ‘ene lea, ‘Eiki, ko hai kuo ne tui ki he‘emau ongoongo? Pea kuo fakahā kia hai ‘a e nima ‘o e ‘Afiona?

³⁹Ko hono ‘uhinga ia na‘e ‘ikai te nau lava ke tui, koe‘uhi ko e toe lea ‘a ‘Aisea ‘o pehē,

⁴⁰Kuo ne fakakui honau mata, mo fakafefeka honau loto: koe‘uhi ke ‘oua te nau sio ‘aki honau mata, pe ‘ilo ‘aki honau loto, pea tafoki mai, ka u fakamo‘ui kinautolu.

⁴¹Na‘e lea pehē ‘a ‘Aisea koe‘uhi na‘a ne mamata ki he lāngilangi ‘o‘ona, pea na‘e kau ‘ene lea kiate ia.

⁴²Ka neongo ia, ka na‘a mo e hou‘eiki na‘e tui pīkitai kiate ia ha tokolahi: ka na‘e ‘ikai te nau fai fakahā ia telia ‘a e kau Fālesi, na‘a hifo kinautolu mei he falelotu.

⁴³He na‘e lahi ‘enau manako ki he fakahīkihiki‘i ‘e he tangata ‘i he fakahīkihiki‘i ‘e he ‘Otua.

⁴⁴Ka ko Sīsū na‘a ne kalanga ‘o pehē, Ko ia ‘oku ne tui pīkitai kiate au, ‘oku ‘ikai ko au ‘oku ne tui ki ai, ka ko ia na‘a ne fekau mai au.

⁴⁵Pea ko ia ‘oku ne siofia au, ‘oku ne siofia ‘a ia na‘a ne fekau mai au.

⁴⁶Kuo u ha‘u au ki māmani ko e maama, koe‘uhi he ‘ilonga ha taha ‘oku tui pīkitai kiate au, pea ‘oua te ne kei nofo ai pē ‘i he po‘uli.

⁴⁷Pea ka ai ha taha ne fanongo ki he‘eku ngaahi lea, ka kuo ‘ikai lehilehi‘i, ‘oku ‘ikai te u fakamāu‘i ia ‘e au: he na‘e ‘ikai te u ha‘u ke fakamāu‘i ‘a māmani, ka ke fakamo‘ui ‘a māmani.

⁴⁸Ko ia ‘oku ne fakatale‘i au, ‘o ‘ikai tali ‘eku ngaahi lea, ‘oku ‘i ai ha toko taha ‘oku fakamāu‘i ia: ko e tokāteline kuo u lea‘aki, ko e me‘a ia te ne fakamaau ‘a e tangata ko ia ‘i he ‘aho fakamui.

⁴⁹Koe‘uhi na‘e ‘ikai meiate au ‘eku lea; ka ko e Tamai na‘a ne fekau mai au, na‘e fai mai ‘e ia hoku tu‘utu‘uni ki he me‘a te u tala mo e lea te u fai.

⁵⁰Pea ‘oku ou ‘ilo ko ‘ene tu‘utu‘uni ko e koto mo‘ui ta‘engata ia: ko ia ko e ngaahi lea ‘oku ou fai ‘e au, hangē tofu pē hono folofola‘aki mai ‘e he Tamai kiate au, ‘oku pehē ‘eku lea‘aki.