Read KO E TOH TAPU KATOA TONGA Sioné 13 Bible Online

Sioné 13 - KO E TOH TAPU KATOA TONGA bible

Sioné 13

¹PEA ko eni, ‘i he te‘eki fai ‘a e kātoanga ‘o e Pāsova, ko e me‘a ‘i he‘ene mea‘i ‘e Sīsū kuo hokosia hono taimi ke hiki mei he maama ko eni ‘o ‘alu ki he Tamai, pea ko e me‘a ‘i he‘ene ‘ofa ki hono kakai ‘o‘ona ‘oku ‘i māmani; ko ia na‘a ne fai ‘ene ‘ofa taupotu kiate kinautolu.

²Pea ‘i he fai ha kai; pea kuo ‘osi ‘ai ‘e he Tēvolo ki hono loto ke lavaki‘i ia ‘e Siutasi, ko e foha ‘o Saimone, ‘a ‘Isikāliote;[27]

³pea ‘i he ‘ilo ‘e Sīsū, kuo tuku kiate ia ‘e he‘ene Tamai ‘a e me‘a kotoa pē ke ne fa‘iteliha ai, pea kuo ne ha‘u mei he ‘Otua pea ‘oku ne ‘alu ki he ‘Otua;

⁴ko ia na‘a ne tu‘u mei he kai, ‘o ne tuku hono ngaahi kofu tu‘a; ‘o ne to‘o ha tauveli, ‘o ne no‘o.

⁵Pea ne toki lilingi ha vai ki he kumete, ‘o ne hanga ‘o fufulu ‘a e va‘e ‘o e kau ako, mo ne holoholo ‘aki ‘a e tauveli kuo ne no‘o ‘aki.

⁶Pea ne ha‘u ai kia Saimone Pita: pea lea ia ki ai, ‘Eiki, ko ho‘o fufulu ‘e koe hoku va‘e koā?

⁷Pea tali ‘e Sīsū ‘o pehē kiate ia, Ko e me‘a ‘oku ou fai ‘oku ‘ikai te ke ‘ilo ‘e koe ‘i he taimi ni; ka ‘e faifai pea mahino ‘amui.

⁸Pea lea ‘a Pita ki ai, ‘e ‘ikai ‘aupito te ke fufulu hoku va‘e ‘o ta‘engata. Pea tali ‘e Sīsū ki ai, Kapau ‘e ‘ikai te u fufulu koe, tā ‘oku ‘ikai ha‘o kau mo au.

⁹Pea pehē ange ‘e Saimone Pita, ‘Eiki, ‘oua ‘e ngata ‘i hoku va‘e pē, kae fai ki hoku ongo nima ni mo hoku ‘ulu.

¹⁰Pea me‘a ki ai ‘a Sīsū, Ko ia kuo pālutu, koe‘uma‘ā ‘ene toe fufulu ia ngata pē ‘i hono va‘e,[28] ka kuo ma‘a hono kotoa: pea ‘oku ma‘a foki ‘a kimoutolu, ka ‘oku ‘ikai te mou pehē kotoa pē.

¹¹He na‘a ne mea‘i ‘a e toko taha ‘e lavaki‘i ia; ko ia na‘a ne pehē ai, ‘Oku ‘ikai te mou ma‘a kotoa pē.

¹²Pea kuo ‘osi leva ‘ene fufulu honau va‘e, mo ‘ene ‘ai hono kofu ‘o toe tokoto, pea ne folofola kiate kinautolu, ‘Oku mahino kiate kimoutolu ‘a e me‘a kuo u fai kiate kimoutolu?

¹³‘Oku mou ui au ko Lāpai, mo ‘Eiki; pea ‘oku totonu ho‘omou lea pehē; he ko au ia.

¹⁴Pea kapau ā kuo u fufulu homou va‘e, ‘a au ko e ‘Eiki mo e Lāpai; pea ‘oku totonu ke fai ‘e kimoutolu foki, ‘o fefufulu‘aki homou va‘e ‘omoutolu.

¹⁵He kuo u tuku hamou fa‘ifa‘itaki‘anga, koe‘uhi ke mou fai foki, ‘o hangē ko ‘eku fai kiate kimoutolu.

¹⁶Ko au ē, ko au ē, ‘oku ou tala atu, ‘Oku ‘ikai ha tamaio‘eiki ‘e lahi ‘i he‘ene ‘eiki, pe ha talafekau ‘iate ia na‘a ne fekau‘i ia.

¹⁷Kapau ‘oku mou ‘ilo ‘a e ngaahi me‘a ko ia, pea ko e toki kakai monū‘ia kimoutolu, ‘o kapau te mou fai ia.

¹⁸‘Oku ‘ikai kau ‘eku lea kiate kimoutolu kotoa pē: ‘oku ou ‘ilo pē ‘e au ‘a e anga ‘o kinautolu ne u fili: ka ko hono ‘uhinga, koe‘uhi ke fakamo‘oni ki he potu tohi, Ko ia ‘oku kai ‘eku mā kuo ne hiki hono muiva‘e kiate au.

¹⁹Ko ‘eku kamata ‘eni ke fakahā ia kiate kimoutolu ‘i he te‘eki hoko, koe‘uhi ‘oka hoko ia ke mou tui ko au ia.

²⁰Ko au ē, ko au ē, ‘oku ou tala atu, Ko ia ‘oku ne tali ha toko taha pē te u fekau, ‘oku ne tali au; pea ko ia ‘oku ne tali au, ‘oku ne tali ‘a ia na‘a ne fekau mai au.

²¹‘I he folofola pehē ‘e Sīsū, na‘e takatu‘u hono laumālie, pea ne fakapapau mai ‘o pehē, Ko au ē, ko au ē, ‘oku ou tala atu, Ko e toko taha ‘iate kimoutolu te ne lavaki‘i au.

²²Pea fesiofaki ai ‘a e kau ako kuo nau fiu‘a fili, pe ko ‘ene lau kia hai?

²³Na‘e ai ha toko taha ‘o ‘ene kau ako na‘e tokoto ‘i he ‘ao ‘o Sīsū, ko e toko taha na‘e ‘ofa ai ‘a Sīsū.

²⁴Ko ia na‘e kamo ‘a Saimone Pita ki he toko taha ko ia, ‘o ne pehē ki ai, Tala, pe ko hai ia ‘oku ne me‘a ki ai.

²⁵Pea hanga ‘a e toko taha ko ia ‘i he‘ene tokoto pehē, ‘o ne faaki atu ki he fatafata ‘o Sīsū, mo ne pehē ki ai, ‘Eiki, ko hai ia?

²⁶Pea tali ‘e Sīsū, Ko ia ia ‘a ia te u unu ‘eku konga mā ‘o ‘ange ma‘ana. Pea ne unu ai ‘ene konga mā, ‘o ne to‘o, ‘o ‘ange kia Siutasi ko e foha ‘o Saimone ‘Isikāliote.

²⁷Pea hili ‘ene ‘ange ‘a e konga mā, mo e hū leva ki he siana ko ia ‘a Sētane. Pea folofola ai ‘a Sīsū kiate ia, Fai vave ange ‘a e me‘a ‘oku ke fai,

²⁸pea na‘e ‘ikai mahino ki ha taha ‘iate kinautolu na‘e tākoto ‘i he kai pē ko ‘ene lea ki ai ke hā.

²⁹He na‘e mahalo ‘a e ni‘ihi, ko e me‘a ‘i he ‘ia Siutasi ‘enau puha pa‘anga, ko ia ko e lea ‘a Sīsū ki ai ‘oku pehē, Fakatau mu‘a ‘a e ngaahi me‘a kuo te‘eki ke tau ma‘u ki he kātoanga; pē ko e pehē ke ne ‘ange ha me‘a ki he masiva.

³⁰Pea ‘i he to‘o ‘a e konga mā ‘e he siana ko ia na‘a ne ‘alu atu leva kitu‘a: pea kuo po‘uli.

³¹Pea kuo ne ‘alu atu ki tu‘a, pea folofola ‘a Sīsū, Ko eni kuo fakalāngilangi‘i ‘a e Fanautama ‘a Tangata, pea kuo fakalāngilangi‘i ‘a e ‘Otua ‘iate ia:

³²pea ‘e fakalāngilangi‘i ia ‘e he ‘Otua ‘i he ‘ene ‘Afio, pea ‘e vave ni ‘ene fakalāngilangi‘i ia.

³³Si‘i fānau, ‘oku kei toe si‘i ‘eku ‘iate kimoutolu. Te mou kumi au: kae hangē ko ‘eku lea ki ha‘a Siu, ‘o pehē, Ko e potu ‘oku ou ‘alu ki ai, ‘e ‘ikai te mou lava ke a‘u ki ai; ‘oku pehē foki ‘eku lea ni kiate kimoutolu.

³⁴Ko e tu‘utu‘uni fo‘ou ‘oku ou tuku kiate kimoutolu, Ke mou fe‘ofa‘aki: hangē ā ko ‘eku ‘ofa‘i kimoutolu, ke pehē foki ho‘omou fe‘ofa‘aki.

³⁵Ko e me‘a ko ē ‘e ‘ilo ai ‘e he kakai kotoa pē ko e kau ako kimoutolu ‘a‘aku, ‘o kapau ‘e ai ha‘amou fe‘ofa‘aki.

³⁶Pea lea ki ai ‘a Saimone Pita, ‘Eiki, ko ho‘o me‘a ki fē? Pea tali ‘e Sīsū, Ko e potu ‘oku ou ‘alu ki ai ‘e ‘ikai te ke lava ke muimui mai ki ai ‘i he taimi ni; ka te ke muimui ki ai ‘amui.

³⁷Pea lea ki ai ‘a Pita, ‘Eiki, ko e ‘ikai te u lava ke muimui atu ki ai ‘i he taimi ni, ko e hā? Na‘a mo ‘eku mo‘ui te u li‘aki ia ma‘au.

³⁸Pea tali ‘e Sīsū, Te ke li‘aki koā ho‘o mo‘ui koe‘uhi ko au, ‘o? Ko au ē, ko au ē, oku ou tala atu, ‘e ‘ikai ‘aupito ‘u‘ua ‘a e moa, kae‘oua ke ke fakafisinga au, ‘o tu‘o tolu mālō.