Read KO E TOH TAPU KATOA TONGA Sioné 14 Bible Online

Sioné 14 - KO E TOH TAPU KATOA TONGA bible

Sioné 14

¹‘OUA na‘a tuku ke puputu‘u homou loto: tui pīkitai[29] ki he ‘Otua, tui pīkitai foki kiate au.

²‘I he ‘api ‘o ‘eku Tamai ‘oku lahi ‘a e ngaahi nofo‘anga: ka ne ‘ikai, pehē kuo u tala kiate kimoutolu,[30] he ko ‘eku ‘alu eni ke teuteu ha potu mo ‘omoutolu.

³Pea neongo te u ‘alu ‘o teuteu ha potu mo‘omoutolu, ka ‘oku ou toe ha‘u pē, pea te u ma‘u kimoutolu kiate au; koe‘uhi ko e potu ‘oku ou ‘i ai, ke mou ‘i ai foki.

⁴Pea ko e potu ‘oku ou ‘alu ki ai ‘oku mou ‘ilo hono hala.

⁵Pea lea ki ai ‘a Tōmasi, ‘Eiki, ‘oku ‘ikai te mau ‘ilo pē ko ho‘o me‘a ki fē; pea mau ‘ilo fēfē ai ‘a e hala?

⁶Pea folofola ‘a Sīsū ki ai, Ko au pē ko e Hala, pea mo e Mo‘oni mo e Mo‘ui: ‘oku ‘ikai ha‘u ha taha ki he Tamai ka ‘i he‘ene fou ‘iate au.

⁷Ka ne mou a‘usia ‘a e ‘ilo‘i ‘o‘oku, pehē te mou lāu‘ilo‘i[31] mo ‘eku Tamai; pea ‘oku mou kamata ‘eni ke ‘ilo ‘a ‘Ene ‘Afio, pea kuo mou mātā ia.

⁸Pea lea ‘a Filipe ki ai, ‘eiki, tuku ke mau sio ki he Tamai, pea kuo mau fiemālie leva.

⁹Pea lea ‘a Sīsū kiate ia, Ko futu ‘eku ‘iate kimoutolu, pea kuo te‘eki koā ke ke ‘ilo au, Filipe? Ko ia kuo ne mātā au, kuo ne mātā ‘a e Tamai; pea fēfē ai ho‘o pehē, Tuku ke mau sio ki he Tamai?

¹⁰‘Ikai ‘oku ke tui, ‘oku ou ‘i he Tamai, pea ko e Tamai ‘oku ‘iate au: ko e ngaahi lea ‘oku ou fai kiate kimoutolu, ‘oku ‘ikai te u lea‘aki meiate au. Ka ko e Tamai ‘oku ne fai ‘ene ngaahi ngāue, he‘ene nofo‘ia au.

¹¹Mou tui kiate au, ko au ‘oku ou ‘i he Tamai, mo e Tamai ‘iate au: pea ka ‘ikai, pea mou tui koe‘uhi ko ‘ene ngaahi ngāue.

¹²Ko au ē, ko au ē, ‘oku ou tala atu, Ko ia ‘oku tui pīkitai kiate au, ko e ngaahi ngāue ‘oku ou fai ‘e fai ‘e he toko taha ko ia foki; ‘io, te ne fai ‘a e ngaahi me‘a ‘oku hulu atu ‘i he ngaahi me‘a ni; koe‘uhiā ko ‘eku ‘alu ki he Tamai.

¹³Pea ‘ilonga ha me‘a te mou kole ‘i hoku hingoa, te u fai ia, koe‘uhi ke fakalāngilangi‘i ‘a e Tamai ‘i he ‘Alo.

¹⁴Neongo pē ko e hā ha me‘a te mou kole meiate au[32] ‘i hoku hingoa, te u fai ia.

¹⁵Kapau ‘oku mou ‘ofa kiate au, te mou tauhi ‘eku ngaahi fekau ‘a‘aku.

¹⁶Pea te u tala ki he Tamai, pea te ne foaki kiate kimoutolu ha Taukapo ‘e toko taha, koe‘uhi ke ne ‘iate kimoutolu ‘o ta‘engata; ‘io, ko e Laumālie ‘o e Mo‘oni;

¹⁷‘a ia ‘oku ‘ikai ke fa‘a ma‘u ‘e māmani, koe‘uhi ‘oku ‘ikai te ne sio kiate ia, pe fai ke ‘ilo ia: ka ‘oku mou fai ke ‘ilo ia ‘e kimoutolu; he ‘oku ne nofo ma‘u mo kimoutolu, pea ‘oku ne ‘i.[33] homou loto.

¹⁸‘E ‘ikai te u ‘alu ‘o tuku kimoutolu ke tuēnoa: ‘oku ou ha‘u pē kiate kimoutolu.

¹⁹‘Oku toe si‘i pea ‘ikai kei sio kiate au ‘a māmani; ka ka sio ai pē kiate au ‘e kimoutolu, koe‘uhi ‘oku ou mo‘ui pea te mou mo‘ui ai pē.

²⁰‘I he ‘aho ko ia te mou ‘ilo, ko au ‘oku ou ‘i he‘eku Tamai, pea mo kimoutolu ‘iate au, pea mo au ‘iate kimoutolu.

²¹Ko ia ‘oku ma‘u ‘eku ngaahi tu‘utu‘uni, mo tauhi ki ai, ko ia ia ‘oku ‘ofa kiate au: pea ko ia ‘oku ‘ofa kiate au ‘e ‘ofeina ia ‘e he‘eku Tamai, pea te u ‘ofa mo au kia ia, pea te u fakahaa‘i kiate ia.

²²Pea lea ki ai ‘a Siutasi — ka na‘e ‘ikai ko ‘Isikaliote — ‘Eiki, ko e hā kuo pehē ai, ho‘o teu fakahaa‘i koe kiate kimautolu, kae ‘ikai ki māmani?

²³Pea tali ‘e Sīsū ‘o ne pehē ki ai, Kapau ‘oku ‘ofa ha taha kiate au, te ne tauhi ‘eku lea: pea ‘e ‘ofa kiate ia ‘a ‘eku Tamai, pea te ma omi kiate ia, ‘o ma nofo‘anga taha mo ia.

²⁴Ko ia ‘oku ‘ikai ke ‘ofa kiate au, ‘oku ‘ikai te ne tauhi ‘eke ngaahi lea: pea ko e lea ‘oku mou fanongo ki ai ‘oku ‘ikai ‘a‘aku, ka ‘a e Tamai na‘a ne fekau mai au.

²⁵Ko e ngaahi me‘a ni kuo u tala atu ‘i he‘eku kei ‘iate kimoutolu.

²⁶Ka ko e Taukapo, ko e Laumālie Mā‘oni‘oni, ‘a ia ‘e fekau mai ‘e he Tamai ‘i hoku hingoa, ko e Toko Taha ko ia te ne ako kiate kimoutolu ‘a e me‘a kotoa pē, pea te ne fakamanatu kiate kimoutolu ‘a e me‘a kotoa pē kuo u lea‘aki kiate kimoutolu.

²⁷Ko ‘eku ‘alu ‘eni, ka u tuku ha fiemālie kiate kimoutolu; ko ha fiemālie ‘a‘aku ‘oku ou foaki atu kiate kimoutolu: ‘oku ‘ikai hangē ko e foaki ‘a māmani ‘a ‘eku foaki kiate kimoutolu. ‘Oua na‘a tuku ke puputu‘u homou loto, ‘uma‘ā ha‘ane manavahē.

²⁸Ne mou fanongo ki he‘eku pehē atu, Ko ‘eku ‘alu ni kau ha‘u kiate kimoutolu. Ka ne mou ‘ofa kiate au, pehē te mou fiefia ‘i he‘eku ‘alu ki he Tamai; koe‘uhi ‘oku lahi ‘a e Tamai ‘iate au.

²⁹Pea kuo u tala ni ia kiate kimoutolu ‘i he te‘eki ke hoko, koe‘uhi ‘oka hoko mai ke mou tui.

³⁰‘E; ‘ikai te u toe talanoa lahi mo kimoutolu: he ‘oku ha‘u ‘a e ‘eiki ‘o māmani, pea tala‘ehai ‘oku ‘i ai ha‘ane momo‘i me‘a ‘iate au;

³¹ka koe‘uhi pē ke ‘ilo ‘e māmani ‘oku ou ‘ofa ki he Tamai, pea hangē ko hoku tu‘utu‘uni ‘e he Tamai, ‘oku pehē ‘eku fai. Mo u tu‘u, ke tau ‘alu ‘i heni.