Read KO E TOH TAPU KATOA TONGA Sioné 15 Bible Online

Sioné 15 - KO E TOH TAPU KATOA TONGA bible

Sioné 15

¹Ko au ko e uaine mo‘onia, pea ko ‘eku Tamai ko e tauhi ngoue ia.

²‘Ilonga ha va‘a ‘iate au ‘oku ‘ikai fua, ‘oku ne motuhi ia: pea ‘ilonga ha va‘a ‘oku fua, ‘oku ne ‘auhani ia, ke ‘āsili ‘ene fua.

³Kuo mou tafe sino‘ivai ‘eni kimoutolu, ko e me‘a ‘i he lea kuo u fai kiate kimoutolu.

⁴‘Ē, ‘ai ke mou nofo ma‘u ‘iate au, mo au ‘iate kimoutolu. Hangē ‘oku ‘ikai ke fa‘a fua ‘a e va‘a ‘iate ia pē, ‘o kapau ‘e ‘ikai nofo ma‘u ‘i he vaine; pehē foki, ‘e ‘ikai te mou lava ‘e kimoutolu, ‘o kapau ‘e ‘ikai te mou nofo ma‘u ‘iate au.

⁵Ko au pē ko e vaine, ko kimoutolu ko e ngaahi va‘a: ko ia ‘oku nofo ma‘u ‘iate au, mo au ‘iate ‘ia, ‘oku fua lahi ‘a e toko taha ko ia: he ka māvae mo au, ‘oku ‘ikai te mou fa‘a fai ha me‘a.

⁶Ka ai ha taha ne ‘ikai nofo ma‘u ‘iate au, ne li‘aki atu hangē ko e va‘a na, pea ne mae; pea ‘oku nau tānaki ‘a e ngaahi me‘a pehē, ‘o laku ki he afi, pea ‘oku vela.

⁷Kapau te mou nofo ma‘u ‘iate au, pea kapau ‘e nofo ma‘u ‘eku ngaahi lea ‘iate kimoutolu, pea neongo pe ko e hā te mou loto ki ai, mou kole, pea ‘e fai kiate kimoutolu.

⁸Ko e me‘a ko ia kuo fakalāngilangi‘i ai ‘a ‘eku Tamai, koe‘uhi ke iku ki ho‘omou fua lahi, mo ho‘omou mātu‘aki hoko ko e kau ako ‘a‘aku.

⁹Hangē ko e ‘ofa‘i au ‘e he Tamai, kuo pehē ‘eku ‘ofa‘i kimoutolu: mo u nofo ma‘u ‘i he ‘ofa ko ia ‘a‘aku.

¹⁰Kapau te mou tauhi ‘eku ngaahi tu‘utu‘uni, te mou nofo ma‘u ‘i he‘eku ‘ofa; ‘o hangē foki kuo u tauhi ‘e au ‘a e ngaahi tu‘utu‘uni ‘a e Tamai, pea u nofo ma‘u ‘i he ‘ofa ‘a‘ana.

¹¹Ko e ngaahi me‘a ni kuo u tala atu, koe‘uhi ke ‘iate kimoutolu ‘eku fiefia, pea ke kakato ‘a e fiefia ‘amoutolu.

¹²Ko eni ia ‘a e tu‘utu‘uni ‘a‘aku, Ke mou fe‘ofa‘aki, ‘o hangē ko e ‘ofa ne u fai kiate kimoutolu.

¹³Tala‘ehai ‘oku ai ha ‘ofa ‘a ha taha ‘e lahi ‘i he ‘ofa ko ē, ke ne li‘aki ‘ene mo‘ui koe‘uhi ko hono ngaahi kaume‘a.

¹⁴Ko hoku ngaahi kaume‘a ‘a kimoutolu ‘o kapau ‘oku mou fai ‘a e ngaahi me‘a ‘oku ou tu‘utu‘uni atu.

¹⁵‘Oku ‘ikai te u kei lau kimoutolu ko e kau tamaio‘eiki; he tala‘ehai ‘oku ‘ilo ‘e he tamaio‘eiki ‘a e me‘a ‘oku fai ‘e he‘ene ‘eiki: ka kuo u ui kimoutolu ko hoku ngaahi kaume‘a; koe‘uhi ‘ilonga ha me‘a ne u fanongo mei he‘eku Tamai kuo u faka‘ilo kiate kimoutolu.

¹⁶Na‘e ‘ikai ko kimoutolu na‘e fili au, ka ko au na‘a ku fili kimoutolu, pea na‘a ku fakanofo kimoutolu, ke mou ‘alu kimoutolu ‘o fua, pea ke nofo ma‘u homou fua; koe‘uhiā ke ‘ilonga ha me‘a te mou kole mei he Tamai ‘i hoku hingoa ke ne ‘atu ia.

¹⁷Ko e ngaahi me‘a ko eni kuo u tu‘utu‘uni atu, koe‘uhi ke mou fe‘ofa‘aki.

¹⁸Kapau ‘oku fehi‘a ‘a māmani kiate kimoutolu, manatu na‘e mu‘a noa pē ‘ene fehi‘a kiate au ‘iate kimoutolu.

¹⁹Ka ne ‘o māmani ‘a kimoutolu, pehē ‘e ‘ofa ‘a māmani ki he me‘a ‘a‘ana: ka ko e me‘a ‘i he ‘ikai ‘o māmani ‘a kimoutolu kae, kehe, ko e fili kimoutolu ‘e au mei māmani, ko hono ‘uhinga ē ‘oku fehi‘a ai ‘a māmani kiate kimoutolu.

²⁰Manatu he lea na‘a ku fai kiate kimoutolu, ‘Oku ‘ikai ha tamaio‘eiki ‘e lahi ‘i he‘ene ‘eiki. Kapau kuo nau fakatanga‘i au, te nau fakatanga‘i ‘a kimoutolu foki; kapau kuo nau tauhi ‘a e lea ‘a‘aku, te nau tauhi ‘a e lea ‘amoutolu foki.

²¹Ka ko e ngaahi me‘a ko ia kotoa te nau fai kiate kimoutolu koe‘uhi ko hoku hingoa, koe‘uhi ‘oku ‘ikai te nau ‘ilo ‘a ia na‘a ne fekau mai au.

²²Ka ne ‘ikai te u ha‘u ‘o lea kiate kinautolu, pehē ne ‘ikai ha‘anau angahala: ka ko eni ‘oku ‘ikai ha kofu ki he‘enau angahala.

²³Ko ia ‘oku ne fehi‘a kiate au, ‘oku ne fehi‘a ki he‘eku Tamai foki.

²⁴Ka ne ‘ikai te u fai ‘i honau lotolotonga ‘a e ngaahi ngāue ‘a ia ‘oku te‘eki ke fai ‘e ha taha, pehē ne ‘ikai ha‘anau angahala: ka ko eni kuo nau mamata pea kuo nau fehi‘a kiate au mo ‘eku Tamai fakatou‘osi.

²⁵Ka koe‘uhiā pē ke fakamo‘oni ki he lea kuo tohi ‘i he‘enau lao, Na‘a nau fehi‘a kiate au tu‘unga‘a pē.

²⁶‘Oka hoko mai ‘a e Taukapo, ‘a ia te u fekau atu ‘e au mei he Tamai, ‘io, ko e Laumālie ‘o e Mo‘oni, ‘a ia ‘oku ne ‘alu atu mei he Tamai, te ne fakamatala ‘e he toko taha ko ia kiate au;

²⁷pea ko e kau fai fakamatala foki ‘a kimoutolu, koe‘uhi kuo mou ‘iate au mei he kamata‘anga.