Read KO E TOH TAPU KATOA TONGA Sioné 17 Bible Online

Sioné 17 - KO E TOH TAPU KATOA TONGA bible

Sioné 17

¹PEA kuo fai ‘e Sīsū ‘a e ngaahi lea ko ia, pea ne tāngaki hake ki he langi, ‘o ne folofola ‘o pehē, ‘ala Tamai, kuo hokosia ‘a e taimi; ke ke fakalāngilangi‘i ho ‘Alo, koe‘uhi ke fakalāngilangi‘i ‘e he ‘Alo ‘a e ‘Afiona:

²hangē ā na‘a ke tuku kiate ia ‘a e pule ki he kakano kotoa pē, koe‘uhi ko e me‘a kātoa ne ke foaki kiate ia, ke ne foaki kiate kinautolu ‘a e mo‘ui ta‘engata.

³Pea ko eni ia ‘a e mo‘ui ta‘engata, ke nau fai ke ‘ilo koe ko e ‘Otua mo‘onia pē taha, pea mo Sīsū ne ke fekau mai ko e Mīsaia.

⁴Kuo u fakalāngilangi‘i koe ‘i māmani; he kuo u faka‘osi ‘a e ngāue na‘a ke tuku kiate au ke u fai.

⁵Pea ko eni, ‘alā Tamai, ke ke fakalāngilangi‘i au ‘e koe, he fakataha mo e ‘Afiona, ‘aki ‘a e lāngilangi na‘a ku ma‘u ‘i he te‘eki ke tu‘u ‘a māmani ‘i he‘eku feangai mo koe.

⁶Kuo u fakamahino ho huafa ki he kakai na‘a ke foaki kiate au mei māmani: na‘e ‘o‘ou ‘a kinautolu, pea ne ke foaki ‘a kinautolu kiate au: pea kuo nau tauhi ho‘o folofola.

⁷Kuo nau ‘ilo ‘eni ‘oku meiate koe ‘a e ngaahi me‘a kotoa pē na‘a ke foaki mai.

⁸He ko e ngaahi lea na‘a ke tuku mai kiate au, kuo u tuku kiate kinautolu; pea kuo nau tali ia, pea kuo nau ‘ilo mo‘oni na‘a ku ha‘u mei he ‘Afiona, pea kuo nau tui na‘e fekau mai au ‘e he ‘Afiona.

⁹‘Oku ou fakakolekole ‘e au koe‘uhi ko kinautolu; ‘oku ‘ikai ko ‘eku fai koe‘uhi ko māmani, ka koe‘uhi pē ko kinautolu ne ke foaki mai; he ‘oku ‘o‘ou ‘a kinautolu:

¹⁰(‘Io, ko ‘eku ngaahi me‘a kotoa pē ‘oku ‘a‘au, pea ko ho‘o ngaahi me‘a ‘oku ‘a‘aku) pea kuo fakalāngilangi‘i au ‘iate kinautolu.

¹¹Pea ‘oku ‘ikai te u kei ‘i māmani, ka ‘oku ‘i māmani ‘a e tu‘unga me‘a ni, pea ko ‘eku ‘alu ‘aku ki he ‘Afiona. ‘E Tamai Toputapu, ke ke tauhi ‘a kinautolu ni ‘i ho huafa, ‘a e huafa ne ke tuku kiate au,[35] koe‘uhi ke nau taha, ‘o hangē ko kitaua.

¹²Lolotonga ‘eku ‘iate kinautolu na‘a ku tauhi kinautolu ‘e au ‘i ho huafa, ‘a e huafa kuo ke tuku mai: ‘io, na‘a ku le‘ohi kinautolu, pea kuo ‘ikai mole hanau taha, ngata pē ‘i he hako ‘o mala, koe‘uhiā pē ke fakamo‘oni ki he Tohitapu.

¹³Pea ko ‘eku ‘alu atu ‘eni kiate koe; pea ‘oku ou lea pehē ‘i māmani, koe‘uhi ke nau ma‘u ‘eku fiefia ‘iate kinautolu kuo kakato.

¹⁴Ko au kuo u tuku kiate kinautolu ho‘o folofola; pea ko māmani na‘a ne fehi‘a kiate kinautolu, koe‘uhi ‘oku ‘ikai te nau ‘o māmani, ‘o hangē ko au, ‘oku ‘ikai te u ‘o māmani.

¹⁵‘Oku ‘ikai te u pehē, ke ke to‘o kinautolu mei māmani, ka ke ke ta‘ofi kinautolu mei he Fili.

¹⁶‘Oku ‘ikai te nau ‘o māmani, hangē ko au, ‘oku ‘ikai te u ‘o māman

¹⁷Fakatapu‘i kinautolu ‘i he mo‘oni: ko e folofola ‘a‘au ko e mo‘oni ia.

¹⁸Hangē na‘a ke fekau au ki māmani, ko au foki na‘a ku fekau kinautolu ki māmani.

¹⁹Pea koe‘uhi ko kinautolu, ko ia ‘oku ou fakatāpui au ‘e au, koe‘uhi ke hoko ‘a kinautolu foki ko e koto fakatapu mo‘oni.

²⁰Ka ‘oku ‘ikai ko kinautolu ni pē ‘oku kau ki ai ‘eku kole, ka ‘oku kau foki kiate kinautolu ‘e tui pīkitai kiate au ko e me‘a ‘i he‘enau malanga.

²¹Ko ‘eku kole ke nau taha pē ‘a kinautolu kotoa pē; hangē ā ‘oku ke ‘iate au, ‘alā Tamai, mo au ‘iate koe, ke pehē foki ‘enau ‘iate kitaua: koe‘uhiā ke tui ‘e māmani na‘e fekau mai au ‘e ho‘o ‘Afio.

²²Pea ko e lāngilangi kuo ke tuku mai kiate au, kuo u tuku ia kiate kinautolu, ke nau taha ‘o hangē ‘oku ta taha:

²³ko au ‘iate kinautolu, mo koe ‘iate au, koe‘uhi ke fakahaohaoa ‘a kinautolu ka nau taha; koe‘uhiā ke faifai pea ‘ilo ‘e māmani na‘e fekau mai au ‘e ho‘o ‘Afio, pea kuo ke ‘ofa kiate kinautolu, ‘o hangē ko ho‘o ‘ofa kiate au.

²⁴‘Alā Tamai, ko e me‘a kuo ke foaki mai, ko hoku loto ki ai, ko e potu ‘oku ou ‘i ai au, ke nau ‘i ai ‘a kinautolu foki mo au; ke nau siofia ‘a e lāngilangi ‘o‘oku, ‘a ia kuo ke foaki mai: he na‘a ke ‘ofa kiate au ‘i he te‘eki ke tanu pou ‘a māmani.

²⁵‘E Tamai Mā‘oni‘oni, ko māmani foki na‘e ‘ikai lava‘i ‘a e ‘ilo‘i ‘o ho‘o ‘Afio; ka ko au na‘a ku lava‘i ho ‘ilo‘i, pea ko e tu‘unga me‘a ni kuo nau lava ke ‘ilo ne fekau mai au ‘e ho‘o ‘afio.

²⁶Pea kuo u faka‘ilo kiate kinautolu ho huafa, ‘io, pea te u faka‘ilo pē: koe‘uhi ke ‘iate kinautolu ‘a e ‘ofa kuo ke ‘ofa ‘aki kiate au, pea ke u ‘iate kinautolu foki mo au.