Read KO E TOH TAPU KATOA TONGA Sioné 19 Bible Online

Sioné 19 - KO E TOH TAPU KATOA TONGA bible

Sioné 19

¹PEA toki puke ‘e Pailato ‘a Sīsū, ‘o ne kau‘imaea.

²Pea fī ‘e he kau tau ha kalauni talatala, ‘o ‘ai takai ki hono fofonga, pea nau ‘ai kiate ia ha kofu kulokula, pea nau holo mai kiate ia,

³‘o nau pehē, ‘Ēī, Tu‘i Siu! pea nau ‘oatu kiate ia — ha ngaahi pekalae.

⁴Pea toe ‘alu kitu‘a ‘a Pailato, ‘o ne pehē kiate kinautolu; Vakai, ‘oku ou ‘omi ia kitu‘a kiate kimoutolu, koe‘uhi ke mou ‘ilo ‘oku ‘ikai te u ma‘u ha‘ane momo‘i hia.

⁵Pea ha‘u ai ‘a Sīsū kitu‘a, kuo ‘ai kiate ia ‘a e kalauni talatala, mo e kofu kulokula. Pea me‘a ‘e Pailato kiate kinautolu; Vakai, ko ena ‘a e Tangata!

⁶Pea ‘i he mamata leva kiate ia ‘e he hou‘eiki taula‘eiki mo e kau ‘ōfisa, na‘a nau fekālanga‘i, ‘o pehē, Kalusefai ia, kalusefai ia. Pea me‘a kiate kinautolu ‘e Pailato, Pe‘i mou ‘ave ia ‘o kalusefai ‘e kimoutolu: he ko au ‘oku ‘ikai te u ‘ilo ha‘ane hia.

⁷Pea tali ki ai ‘e ha‘a Siu, Ka ‘oku ‘i ai ha lao ‘amautolu, pea ‘i he lao ko ia ‘oku totonu ke ne mate, koe‘uhi na‘a ne lau, ko e ‘Alo ‘o e ‘Otua ia.

⁸Pea ‘i he fanongo leva ‘a Pailato ki he folofola ko ia, na‘e fakautuutu ai ‘ene teteki;

⁹pea ne toe hū ki he Palasi, ‘o ne pehē kia Sīsū, Mei fē tū koe? Ka ka ‘ikai fai ‘e Sīsū ha‘ane momo‘i tali ki ai.

¹⁰Pea me‘a ai ‘a Pailato kiate ia, ‘Oku ‘ikai te ke lea kiate au koā? ‘Oku ‘ikai koā te ke ‘ilo ‘oku ou mafai ke tukuange koe, pea ‘oku ou mafai ke kalusefai koe.

¹¹Pea tali ‘e Sīsū ki ai, ‘E ‘ikai te ke momo‘i mafai ha me‘a kiate au, ‘oka ne ta‘e‘oua hono tuku kiate koe mei ‘olunga: ko ia ‘oku hulu atu ‘a e angahala ‘a‘ana na‘a ne tuku ange au kiate koe.

¹²Pea ‘i he me‘a ko ia na‘e feinga ‘a Pailato ke tuku ange ia: ka ka toutou kalanga pē ‘e ha‘a Siu, ‘o pehē, Kapau te ke tuku ange ‘a e siana ni, tā ‘oku ‘ikai ko e takanga ko e ‘o Sisa: ‘ilonga ‘a ia ‘oku ne lau ko e tu‘i ia ‘oku ne lea pau‘u kia Sisa.

¹³Pea ‘i he fanongo leva ‘a Pailato ki he ngaahi lea ko ia, na‘a ne taki ‘a Sīsū kitu‘a, pea ne nofo hifo ki he nofo‘anga fakamaau ‘i ha potu ‘oku ui ko Falikimaka, ka ‘i he lea faka-Hepelū ko Kāpata.

¹⁴Pea ko e ‘aho Tokonaki ia, ko e Tokonaki he Pāsova: ko hono houa ko e ono nai, mo ne me‘a ai ki ha‘a Siu; Vakai, ko ena homou Tu‘i!

¹⁵Pea fekālanga‘i leva ‘e he fa‘ahinga ko ia, Tafi‘i ia! tafi‘i ia! kalusefai ia. Pea pehē ‘e Pailato kiate kinautolu, Ka u kalusefai koā homou Tu‘i? Pea tali ‘a e hou‘eiki taula‘eiki, ‘Oku ‘ikai hamau tu‘i, ko Sisa pē.

¹⁶Pea ne toki tukuange ia kiate kinautolu ke kalusefai.

¹⁷Ko ia na‘a nau ma‘u ‘a Sīsū. Pea ‘alu atu ia ‘oku ne fua mo‘ona hono kolosi, ‘o ne a‘u ki he potu ‘oku ui koe potu ‘ulupoko, ko hono ui faka-Hepelū ko Kolokota.

¹⁸Pea ko e potu ko ia na‘a nau kalusefai ai ia, pea ai mo ha toko ua, ko e taha mei hē, mo e taha mei hē, kae ‘i loto ‘a Sīsū.

¹⁹Pea na‘e tohi foki ‘e Pailato ha tohi fakamatala, ‘o ne ‘ai ki he funga kolosi; pea na‘e tohi ai ‘o pehē, KO SĪSŪ MEI NĀSALETI KO E TU‘I SIU.

²⁰Pea na‘e lau ‘a e tohi fakamatala ko ia ‘e ha tokolahi ‘o ha‘a Siu, koe‘uhi na‘e ofi ‘a e feitu‘u kolo na‘e kalusefai ai ‘a Sīsū: kae‘uma‘ā na‘e tohi ia ‘i he lea faka-Hepelū mo e lea faka-Loma, mo e lea faka-Kalisi.

²¹Ko ia na‘e lea ai kia Pailato ‘e he hou‘eiki taula‘eiki ‘o ha‘a Siu, ‘o pehē, ‘Oua te ke tohi, ko e Tu‘i Siu; ka ke tohi, Na‘a ne pehē, Ko e Tu‘i Siu au.

²²Ka ka tali ‘e Pailato, Ko ia kuo u tohi, kuo tohi.

²³Pea ko e kau sōtia, hili ‘enau kalusefai ‘a Sīsū, na‘a nau to‘o hono ngaahi kofu, ‘o nau vahefā, ‘o takitaha ‘a e sōtia ‘a e vahe; kae‘uma‘ā hono sote: ka ko e anga ‘o e sote na‘e ‘ikai hano hoko ‘anga, ka na‘e lalanga fua pē mei ‘olunga ‘o fai ki lalo.

²⁴Ko ia na‘a nau fepehē‘aki, ‘ē, ‘oua na‘a tau hae ia, ka tau talotalo ki ai, pe ‘o hai ia — koe‘uhiā ke fakamo‘oni ‘a e folofola na‘e pehē, Na‘a nau tufa kiate kinautolu hoku kofu. Pea nau talotalo ki he‘eku teu. Ko ia na‘e fai ‘a e ngaahi me‘a ko ia ‘e he kau sōtia.

²⁵Pea na‘e tu‘u ‘i he tafa‘aki kolosi ‘o Sīsū ‘a ‘ene fa‘ē, mo e tokoua ‘o ‘ene fa‘ē, ko Mele foki ko e uaifi ‘o Kaliopasi, mo Mele mei Makitala.

²⁶Pea ‘i he vakai ‘e Sīsū ki he‘ene fa‘ē, mo e tu‘u ai ‘a e tama ako na‘a ne ‘ofa ai, na‘a ne folofola ki he‘ene fa‘ē, Fefine, ko ena ho‘o tama!

²⁷Hili ia na‘a ne folofola ki he tama ako, Ko ena ho‘o fa‘ē! Pea mei he taimi ko ia na‘e ‘ave ‘e he tama ako ‘a e fefine ko ia ki hono ‘api ‘o‘ona.

²⁸Pea hili ia, pea ‘i he mea‘i ‘e Sīsū, kuo ‘osi ‘eni ‘a e me‘a kotoa pē ke fakamo‘oni ‘a e Tohitapu, pea ne folofola mai, ‘Oku ou fie inua.

²⁹Pea na‘e tu‘u ai ha ipu kuo pito ‘i he vinika; ko ia na‘a nau humaki ‘i ha va‘a ‘īsope ha oma kuo fonu vinika, ‘o nau ‘ohake ki hono fofonga.

³⁰Pea ‘i he ma‘u leva ‘e Sīsū ‘a e vinika, na‘a ne folofola, KUO ‘OSI, pea ne punou hono fofonga, ‘o ne tukuange hono laumālie.

³¹Pea ko e ‘aho Tokonaki ia; ko ia na‘e feinga ai ‘a ha‘a Siu ke ‘oua na‘a tautau ‘i he kolosi ‘a e ngaahi ‘anga‘anga ‘i he Sāpate: (he ko e ‘aho lahi ‘a e Sāpate ko ia) pea nau kole kia Pailato ke fesi‘i honau va‘e, ‘o ‘ave kinautolu.

³²Ko ia na‘e omi ‘a e kau sōtia, ‘o nau fesi‘i ‘a e kauva‘e ‘o e ‘uluaki, pea mo e siana ‘e taha na‘e kaungā kalusefai mo ia.

³³Ka ‘i he‘enau hoko kia Sīsū, ‘o nau vakai kuo pekia ia, na‘e ‘ikai te nau fesi‘i hono va‘e ‘o‘ona:

³⁴ka ko e toko taha ‘o e kau sōtia na‘a ne hoka‘i hono vakavaka ‘aki hono tao, pea na‘e tafe leva mei ai ha ta‘ata‘a mo ha vai.

³⁵Pea ko ia na‘a ne mamata ai kuo ne fakamo‘oni ki ai, pea ko ‘ene fakamo‘oni ko e mo‘oni ‘o e mo‘oni: pea ‘oku ‘ilo ‘e he toko taha ko ia ‘oku mo‘oni pē ‘ene lau, koe‘uhiā ke mou tui foki.[36]

³⁶He na‘e hoko ‘a e ngaahi me‘a ko ia koe‘uhi ke fakamo‘oni ‘a e potu tohi ‘oku pehē, ‘e ‘ikai maumau ha hui ‘e taha ‘o‘ona.

³⁷Pea ‘oku toe ‘i ai mo e potu tohi ‘e taha ‘oku ne pehē, Te nau mamata kiate ia kuo nau hoka‘i.

³⁸Pea hili ‘a e ngaahi me‘a ko ia, ko Siosifa mei ‘Alematea, ‘a ia ko e ako ‘a Sīsū, na‘a ne kole kia Pailato ke ne ‘ave ‘a e sino ‘o Sīsū; ka na‘a ne fai fufū pē ko ‘ene manavahē ki ha‘a Siu: pea tuku ‘e Pailato ke ne fai. Ko ia na‘a ne ha‘u ‘o ‘ave hono sino.

³⁹Pea ha‘u mo Nikotimasi foki, (‘a ia na‘e ha‘u po‘uli kiate ia ‘i he kamata‘anga pea ne ha‘u mo ia ha koto mula mo e ‘alosi kuo fetuiaki, fe‘unga nai mo e pāuni ‘e teau.

⁴⁰Ko ia na‘a nau to‘o ‘a e sino ‘o Sīsū, ‘o nau takai ia ‘aki ha ngaahi tupenu, fakataha mo e ongo fa‘ahinga ahi ni; he ko e anga ia ‘o e teu pekia ‘a ha‘a Siu ki fa‘itoka.

⁴¹Pea na‘e tu‘u ‘i he potu na‘e kalusefai ai ia ha ngoue tapu; pea na‘e ‘i he ngoue tapu ha fonualoto fo‘ou, ‘a ia kuo te‘eki telio ai ha taha.

⁴²Pea koe‘uhi ko e ‘aho Tokonaki ia ‘o ha‘a Siu, mo e ofi mai ‘a e fonualoto, ko ia na‘a nau telio ai ‘i he potu ko ia ‘a si‘i Sīsū.