Read KO E TOH TAPU KATOA TONGA Sioné 20 Bible Online

Sioné 20 - KO E TOH TAPU KATOA TONGA bible

Sioné 20

¹KA ‘i he ‘uluaki ‘aho ‘o e uike, Na‘e ha‘u hengihengi ‘a Mele mei Makitala ki he fonualoto, ‘oku kei po‘uli, pea ‘i he‘ene vakai, tā kuo to‘o ‘a e maka mei he fonualoto.

²Pea ne lele ai ‘o ‘alu kia Saimone Pita, pea ki he ako ‘e taha ‘a ia na‘e ‘ofa ai ‘a Sīsū, pea ne pehē kiate kinaua, Kuo nau ‘ave ‘a e ‘Eiki mei he fonualoto, pea ‘oku ‘ikai te mau ‘ilo pē kuo nau tuku ia ki fē.

³Pea ‘alu atu ai kitu‘a ‘a Pita mo e ako ‘e taha, ‘o na kamata ō ki he fonualoto.

⁴Pea kamata lele ‘a e ongo me‘a ko ia fakataha; pea vave ‘a e lele ‘a e ako ko ia ‘e taha ‘ia Pita, ‘o ne tomu‘a hoko ki he fonualoto.

⁵Pea ne punou, ‘o ne vakai, tā ‘oku tuku ai ‘a e ngaahi tupenu; ka na‘e ‘ikai te ne hū ki ai ‘e ia.

⁶Ka ka muimui atu ai pē ‘a Saimone Pita, pea faifai pea ne a‘u ‘o ne hū ki he fonualoto, ‘o ne mo‘uvakaia ‘a e ngaahi tupenu ‘oku tuku na;

⁷mo e holoholo, ‘a ia na‘e ‘ai ki hono fofonga, kuo ‘ikai tuku fakataha mo e ngaahi tupenu, ka ‘oku fatufatu kehe, ‘o tuku ki ha potu ‘e taha.

⁸Pea toki hū ki ai mo e ako ko ia ‘e taha, ‘a ia na‘e tomu‘a a‘u ki he fonualoto, pea ne sio ki ai ‘o tui.

⁹He na‘a mo ‘eni, kuo te‘eki ke mahino kiate kinautolu ‘a e folofola, ‘o pehē, Kuo pau ke ne toe tu‘u mei he pekia.

¹⁰Pea toe foki ‘a e ongo ako ki ‘api.

¹¹Ka ka tu‘u pē ‘a Mele ‘i he tu‘a fonualoto, ‘o tangi: pea ‘i he‘ene tangi, ‘iloange na‘a ne punou ke sio, ki he fonualoto.

¹²Pea ne vakai ki ha ongo ‘āngelo kofu hinehina ‘oku na nofo ai, ko e taha mei ‘ulu, mo e taha mei va‘e, ‘i he potu na‘e toka ai ‘a e sino ‘o Sīsū.

¹³Pea lea ‘e he ongo me‘a kiate ia, ‘o pehē, ‘e fefine, ko e hā ‘oku ke tangi ai? Pea ne pehē kiate kinaua, Kuo nau ‘ave si‘oku ‘eiki, pea ‘oku ‘ikai te u ‘ilo pē kuo nau tuku ia ‘i fē?

¹⁴Pea ‘i he‘ene lea pehē na‘a ne tafoki ki mui, ‘o ne vakai kia Sīsū ‘oku tu‘u mai, ka na‘e ‘ikai te ne ‘ilo ko Sīsū ia.

¹⁵Pea na‘e me‘a mai ‘a Sīsū kiate ia, ‘e fefine, ko e hā ‘oku ke tangi ai? ko hai ‘oku ke kumi ki ai? Pea mahalo ‘e ia ko e tauhi ngoue ia, ‘o ne pehē ki ai, ‘Eiki, kapau ko koe kuo ke ‘ave ia, tala mai ‘a e potu kuo ke tuku ia ki ai, pea te u ‘ave ia ‘e au.

¹⁶Folofola ‘a Sīsū ki ai, Mele! Pea tafoki ange ‘a e fefine, ‘o ne pehē kiate ia ‘i he lea faka-Hepelū, Lāponai! (‘a ia ‘oku tatau mo e pehē, Si‘i Tangata‘eiki!)

¹⁷Pea folofola ‘a Sīsū kiate ia, ‘Oua na‘a ala kiate au, he kuo te‘eki ke u ‘alu hake ki he Tamai: ka ke ‘alu ki si‘oku ngaahi tokoua, ‘o lea ki ai ‘o pehē, Ko ‘eku ‘alu hake ‘eni ki he‘eku Tamai pea ko ho‘omou Tamai, pea ki hoku ‘Otua pea ko homou ‘Otua.

¹⁸Pea ‘alu ‘a Mele mei Makitala, ‘o ne tala ki he kau ako, ‘o pehē, Kuo u mamata ki he ‘Eiki: mo ne fakahā, Kuo ne folofola pehē mo pehē kiate au.

¹⁹Pea ‘i he‘ene efiafi ‘i he ‘aho ko ia, ‘a e ‘uluaki ‘aho ‘o e uike, pea kuo tāpuni ‘a e ngaahi matapā ‘o e fale na‘e nofo ai ‘a e kau ako, ko ‘enau manavahē ki ha‘a Siu, na‘e ha‘u ‘a Sīsū, ‘o tu‘u ki honau lotolotonga, ‘o ne folofola kiate kinautolu, Si‘oto‘ofa atu!

²⁰Pea ‘i he‘ene lea pehē, na‘a ne faka‘ali‘ali kiate kinautolu hono ongo nima mo hono vakavaka. Pea na‘e fiefia ‘a e kau ako ‘i he‘enau mamata ki he ‘eiki.

²¹Pea ne toe folofola ai kiate kinautolu, Si‘oto‘ofa atu: hangē ne fekau mai au ‘e he Tamai, pehē ‘oku ou tuku atu kimoutolu ‘e au.

²²Pea ‘i he‘ene lea pehē, na‘a ne hō kiate kinautolu, ‘o ne folofola, Mou ma‘u Laumālie Mā‘oni‘oni ā.

²³Kapau te mou fakamolemole ‘a e hia ‘a e ni‘ihi, kuo fakamolemole; kapau te mou tuku ‘a e hia ‘a ha ni‘ihi, kuo tuku pē.

²⁴Ka ko Tōmasi, ko e toko taha ‘i he kau Hongofulumāua, ‘a ia ‘oku ui ko Titimasi, na‘e ‘ikai te ne nofo mo kinautolu ‘i he ha‘u ‘a Sīsū.

²⁵Ko ia na‘e lea kiate ia ‘e he kau ako ni‘ihi, ‘o pehē, Kuo mau mamata ki he ‘Eiki. Ka ka pehē ‘e ia kiate kinautolu, Ka ‘ikai te u sio ‘i hono ongo nima ki he mata fa‘o, ‘o u velo hoku tuhu ni ki he mata fa‘o, mo velo hoku nima ki hono vakavaka, ‘e ‘ikai ‘aupito te u tui.

²⁶Pea hili ‘a e ‘aho ‘e valu, na‘e toe nofo ‘i loto fale ‘ene kau ako, pea ne ‘iate kinautolu ‘a Tōmasi. Ha‘u pē ‘a Sīsū, kuo tāpuni ‘a e ngaahi matapā, ‘o ne tu‘u ki honau lotolotonga, ‘o ne pehē, Si‘oto‘ofa atu!

²⁷Pea na‘a ne toki pehē kia Tōmasi, ‘ai mai ho tuhu na, ‘o vakai hoku ongo nima ni; pea ‘ai mai ho nima na, ‘o velo ki hoku vakavaka ni: pea ‘oua te ke hoko ko e ta‘etui, ka ko e tui.

²⁸Tali ‘a Tōmasi, ‘o ne pehē ki ai, Ko hoku ‘Eiki pē, mo hoku ‘Otua!

²⁹Pea folofola ki ai ‘a Sīsū, ‘o pehē, Kuo ke tui koā koe‘uhi kuo ke mamata kiate au? monū‘ia ā ka ko kinautolu ne ‘ikai mamata, ka nau tui pē.

³⁰Pea na‘e lahi foki mo e ngaahi ngāue mana ne feia ‘e Sīsū ‘i he ‘ao ‘o e kau ako, ‘a ia kuo ‘ikai tohi ‘i he tohi ni:

³¹ka kuo tohi ‘eni koe‘uhi ke mou tui[37] KO SĪSŪ KO E MĪSAIA IA, KO E ‘ALO ‘O E ‘OTUA: pea ‘i ho‘omou tui ke mou ma‘u mo‘ui ‘i hono HUAFA.