Read KO E TOH TAPU KATOA TONGA Sioné 21 Bible Online

Sioné 21 - KO E TOH TAPU KATOA TONGA bible

Sioné 21

¹HILI ‘a e ngaahi me‘a ko ia, na‘a ne toe fakahā ia ki he kau ako ‘i he Tahi ‘o Taipiliō: pea ko eni ‘a e anga ‘o ‘ene fai.

²Na‘e ‘i ai fakataha ‘a Saimone Pita, mo Tōmasi ‘a ia ‘oku ui ko Titimasi, mo Nātaniela ‘a e tama mei Kena ‘i Kāleli, mo e ongo foha ‘o Sēpeti, pea mo ha toko ua kehe ‘o ‘ene kau ako.

³Pea lea kiate kinautolu ‘a Saimone Pita, Te u ‘alu au ‘o toutai. Pea nau pehē kiate ia, Te tau ō foki mo koe. Pea nau ‘alu atu ‘o heka vaka; pea ko e pō ko ia na‘e ‘ikai te nau momo‘i ma‘u ha me‘a.

⁴Pea ‘i he‘ene hengihengi hake, na‘e tu‘u ‘a Sīsū ‘i he matātahi: ka na‘e ‘ikai ‘aupito ‘ilo ‘e he kau ako ko Sīsū ia.

⁵Pea lea ‘a Sīsū kiate kinautolu, Tamaiki, ‘oku ai ha‘amou kiki? Pea nau tali ki ai, ‘Oku ‘ikai.

⁶Pea pehē ‘e ia kiate kinautolu, ‘a‘au ‘a e kupenga ki he mata‘u ‘o e vaka, pea te mou ola. Pea nau ‘a‘au ai, pea ‘ikai ai ke nau matoho ‘eni, koe‘uhi ko e lahi ‘o e ika.

⁷Ko ia na‘e pehē kia Pita ‘e he ako ko ia na‘e ‘ofa ai ‘a Sīsū, Ko e ‘Eiki pē. Pea ko Saimone — ‘a Maka foki — ‘i he‘ene fanongo leva ko e ‘eiki ia, na‘a ne nono‘o hono kofu, (he na‘e vala pē ‘o ne hopo ki tahi.

⁸Ka ka omi ‘a e kau ako kehe ‘i he ki‘i vaka; (he na‘e ‘ikai te nau loko mama‘o mo ‘uta, fe‘unga nai mo ha kiupite ‘e uangeau ‘o nau taulani mai ‘a e kupenga mo e ika.

⁹Pea ‘i he‘enau hifo ai ki ‘uta, na‘a nau vakai ki ha afi malala ‘oku tu‘u ai, mo ha mata‘i ika kuo fakaheka ki ai, mo ha fo‘i mā.

¹⁰Pea me‘a ‘e Sīsū kiate kinautolu, Mou ‘omi ha ni‘ihi mei ho‘omou ika kuo mou toki ma‘u ni.

¹¹Pea heka ki vaka ‘a Saimone Pita, ‘o ne toho ‘a e kupenga ki ‘uta, kuo fonu ‘i he ngaahi ika lalahi, ko hono lau ko e ika ‘e teau mo e ika ‘e nimangofulu mo e ika ‘e tolu: pea neongo hono lahi, ka na‘e ‘ikai mahae ‘a e kupenga.

¹²Pea me‘a ‘a Sīsū kiate kinautolu, Mou omi ‘o fai ho‘omou pelekifasi. Pea na‘e ‘ikai ha taha ‘i he kau ako ‘e fakato‘oto‘a ke huhū ange kiate ia, ‘o pehē, Ko hai tū koe? He na‘a nau ‘ilo ko e ‘Eiki ia.

¹³Pea me‘a mai ‘a Sīsū, ‘o ne to‘o ‘a e fo‘i mā, ‘o ‘ange kiate kinautolu, pea pehē foki mo e mata‘i ika.

¹⁴Ko hano tu‘o tolu ‘eni ‘o ‘ene ha ‘a Sīsū ki he kau ako, hili ‘ene toetu‘u mei he pekia.

¹⁵Pea kuo fai leva ‘enau pelekifasi, pea me‘a ‘e Sīsū kia Saimone Pita, Saimone, foha ‘o Sione, ‘oku ke ‘ofa kiate au ‘o lahi ‘i ha‘anautolu ni? Pea ne pehē ki ai, ‘Io, ‘Eiki; ‘oku ke mea‘i ‘oku ou ‘ofa mo‘oni kiate koe. Pea ne folofola ki ai, Fafanga si‘eku fanga lami.

¹⁶Pea ne toe me‘a kiate ia, ko hono tu‘o ua, Saimone, foha ‘o Sione, ‘oku ke ‘ofa kiate au? Pea ne pehē kiate ia, ‘Io, ‘Eiki; ‘oku ke mea‘i ‘oku ou ‘ofa mo‘oni kiate koe. Pea ne folofola ki ai, Tauhi ‘eku fanga sipi.

¹⁷Pea ne me‘a kiate ia, ko hono tu‘o tolu, Saimone, foha ‘o Sione, ‘oku ke ‘ofa mo‘oni kiate au? Pea mamahi ‘a Pita ‘i he tu‘o tolu ‘ene pehē mai, ‘Oku ke ‘ofa kiate au? Pea ne pehē ange, ‘Eiki, ‘oku ke ‘afio‘i ‘a e me‘a kotoa pē; ‘oku ke mea‘i ‘oku ou ‘ofa mo‘oni kiate koe. Pea folofola ‘a Sīsū kiate ia, Ke ke fafanga si‘eku fanga sipi.

¹⁸Ko au ē, ko au ē, ‘oku ou tala atu, ‘I ho‘o talavou na‘a ke ‘ai ‘e koe ho no‘o, pea ke ‘eve‘eva ki ha potu pē te ke loto ki ai; ka ‘oka ke ka motu‘a, te ke mafao atu ho ongo nima, kae nono‘o koe ‘e ha taha kehe, pea te ne fua koe ki ha potu ‘oku ‘ikai te ke loto ki ai.

¹⁹Na‘a ne lea pehē, ko ‘ene fakatatau atu ‘a e anga ‘o e mate‘anga te ne fakaongoongolelei ai ‘a e ‘Otua. Pea hili ‘ene lea ko ia, na‘a ne folofola kiate ia, Muimui mai kiate au. Ko Sīsū mo e Toko taha Na‘á ne ‘Ofa Taha ai He‘ene Kau Akó.

²⁰Pea tafoki ange ‘a Pita, ‘o ne vakai ki he ako na‘e ofa ai ‘a Sīsū ‘oku ne muimui mai, (‘a e toko taha ko ia ne tokoto foki ‘i he kai, ‘o faaki ki hono fatafata, mo pehē kiate ia, ‘Eiki, ko hai ia ho lavaki?),

²¹ko ia, ‘i he mamata ‘e Pita ki he toko taha ko ia, na‘a ne pehē kia Sīsū, ‘Eiki, ka ko e hā ‘a e tangata ni ia?

²²Pea folofola kiate ia ‘e Sīsū, Kapau ko hoku loto ke nofo pē ia kae‘oua ke u ha‘u, ka he ‘oku ke kau ai? fai pē ho‘o muimui ‘au kiate au.

²³Ko ia na‘e, mafola ki he kāinga ‘a e tala ko eni, tokua ‘e ‘ikai pekia ‘a e ako ko ia: kae tala‘ehai ko e folofola ‘a Sīsū kiate ia na‘e pehē, ‘e ‘ikai te ne mate; ka ko eni pē, Kapau ko hoku loto ke nofo pē ia kae‘oua ke u ha‘u, ka he ‘oku ke kau ai?

²⁴Ko eni ia ‘a e ako ‘oku ne fakamo‘oni ki he ngaahi me‘a ni, pea na‘a ne tohi ‘a e ngaahi me‘a ko ia: pea ‘oku mau ‘ilo ‘oku mo‘oni ‘ene fakamo‘oni.

²⁵Pea ‘oku ‘i ai mo e ngaahi me‘a lahi ne fai ‘e Sīsū; ‘a ia ka ne tohi takitaha, ‘oku te pehē, na‘a mo māmani ‘e ‘ikai hao ai ‘a e ngaahi tohi ‘e fai.