Read KO E TOH TAPU KATOA TONGA Sioné 3 Bible Online

Sioné 3 - KO E TOH TAPU KATOA TONGA bible

Sioné 3

¹PEA na‘e ai ha tangata ‘i he kau Fālesi, ko Nikotimasi hono hingoa, ko ha taha ia ‘o e hou‘eiki Siu:

²pea ha‘u po‘uli kiate ia ‘a e matāpule ko ia, ‘o ne pehē ki ai, Lāpai, ‘oku mau ‘ilo kuo ke hoko mai mei he ‘Otua ko hamau faiako: he tala‘ehai ‘e lava ‘e ha toko taha ha ngaahi fu‘u mana pehē, hangē ko ia ‘oku ke fai, ka ‘i he kau mo ia ‘a e ‘Otua.

³Pea tali ‘e Sīsū, ‘o ne folofola kiate ia, Ko au ē, ko au ē, ‘oku ou tala atu, ‘Ilonga ‘a ia ‘e ‘ikai fanau‘i fo‘ou mei ‘olunga,[5] ‘e ‘ikai te ne lava ke mamata ki he Pule‘anga ‘o e ‘Otua.

⁴Pea lea ‘a Nikotimasi kiate ia, ‘O lava fēfē ke fanau‘i ha tangata ka kuo motu‘a? te ne lava koā ke toe hū ki he manava ‘o ‘ene fa‘ē, ‘o fanau‘i?

⁵Pea tali ‘e Sīsū, Ko au ē, ko au ē, ‘oku ou tali kiate koe, Kapau ‘e ‘ikai fanau‘i ha taha ‘i he vai mo e Laumālie, ‘e ‘ikai te ne lava ke hū ki he Pule‘anga ‘o e ‘Otua.

⁶Ko e me‘a kuo fanau‘i mei he kakano ko e kakano ia; pea ko e me‘a kuo fanau‘i mei he Laumālie ko e laumālie ia,

⁷‘oua te ke ofo ‘i he‘eku pehē atu, Kuo pau ke mou fanau‘i fo‘ou mei ‘olunga.[6]

⁸Ko e ma‘ili ‘a e matangi ‘oku fāinoa pē, ko ‘ene fa‘iteliha pē; pea ‘oku ke ongo‘i ‘ene mumuhu, ka ‘oku ‘ikai te ke ‘ilo pē ko e ha‘u mei fē, pe ‘oku ‘alu ki fē: ko e anga ia ‘o ia kotoa pē kuo fanau‘i mei he Laumālie.

⁹Pea tali ‘e Nikotimasi ‘o ne pehē ki ai, ‘O lava fēfē ‘a e ngaahi me‘a pehē ni?

¹⁰Pea tali ‘e Sīsū ‘o ne pehē ki ai, Ko koe ko e Faiako ‘o ‘Isileli, pea ‘oku ‘ikai te ke ‘ilo koā ‘a e ngaahi me‘a ni?

¹¹Ko au ē, ko au ē, ‘oku ou tala atu, ‘Oku mau lea‘aki ‘a e ngaahi me‘a ‘oku mau lāu‘ilo ki ai, pea ‘oku mau fakahā ‘a e ngaahi me‘a kuo mau mamata ki ai; pea oku ‘ikai te mou tali ‘emau fakamatala.

¹²Kapau kuo u tala kiate kimoutolu ‘a e ngaahi me‘a ‘oku ‘i māmani, ka ‘oku ‘ikai te mou tui, pea mou tui fēfē, ‘o kapau te u tala kiate kimoutolu ‘a e ngaahi me‘a ‘oku ‘i he langi?

¹³Pea kuo te‘eki ke ‘alu hake ha toko taha ‘o hū ki langi, ngata pē ‘iate ia na‘e ‘alu hifo mei he langi, ko e Fanautama ‘a Tangata.[7]

¹⁴Pea hangē na‘e hiki ki ‘olunga ‘e Mōsese ‘a e ngata ‘i he toafa, pehē foki kuo pau ke hiki ki ‘olunga ‘a e Fanautama ‘a Tangata;

¹⁵koe‘uhi ko ia kotoa pē ‘oku tui ke ne ma‘u ‘iate ia ‘a e mo‘ui ta‘engata.

¹⁶He na‘e ‘ofa pehē ‘a e ‘Otua ki māmani, ko ia na‘a ne foaki hono ‘Alo tofu-pē-taha-ne-fakatupu, koe‘uhi ko ia kotoa pē ‘oku tui pīkitai kiate ia ke ‘oua na‘a ‘auha, kae ma‘u ‘a e mo‘ui ta‘engata.

¹⁷He tala‘ehai na‘e fekau ‘e he ‘Otua ‘a e ‘Alo ki māmani ke fakamaau? ‘a māmani; ka koe‘uhi ke mo‘ui ‘a māmani ‘iate ia.

¹⁸Ko ia ‘oku tui pīkitai kiate ia ‘oku ‘ikai ke fakamaau? ia; ka ko ia ‘oku ‘ikai ke tui, kuo ‘osi fakamaau? ia; koe‘uhi kuo ‘ikai te ne tui ki he huafa ‘o e ‘Alo tofu-pē-taha-na‘e-fakatupu ‘e he ‘Otua.

¹⁹Pea ko eni ia ‘a e fakamaau: kuo hoko mai ‘a e maama ki māmani, pea ‘ofa ‘a e kakai ki he po‘uli ‘o ‘ikai ki he maama; he ko ‘enau ngaahi ngāue na‘e kovi.

²⁰He ‘ilonga ‘a ia ‘oku ngāue kovi ‘oku ne fehi‘a ki he maama, pea ‘oku ‘ikai te ne ha‘u ki he maama, na‘a ‘ilonga ‘ene ngaahi ngāue.

²¹Ka ko ia ‘oku ne feia ‘a e mo‘oni ‘oku ne ha‘u ki he maama, koe‘uhi ke e‘a ‘ene ngaahi ngāue, he kuo fai ia ‘i he ‘Otua.

²²Hili ia na‘e ha‘u ‘a Sīsū mo ‘ene kau ako ki he fonua ko Siutea, pea ne nofo ai mo kinautolu, ‘o fai papitaiso.

²³Pea na‘e ‘i ai foki ‘a Sione, ‘oku ne fai papitaiso ‘i ‘Ēnoni ‘o ofi ki Sēlemi, koe‘uhi na‘e lahi ‘a e ngaahi vai ‘i he potu ko ia; pea na‘e ‘alu ange ‘a e kakai, ‘o nau papitaiso ai,

²⁴he kuo te‘eki lī ‘a Sione ki he pilīsone.

²⁵Ko ia na‘e tupu ai ha fakakikihi ‘a e kau ako ‘a Sione pea mo ha motu‘a faka-Siu,[8] ‘o kau ki he fai fakama‘a.

²⁶Pea nau omi kia Sione, ‘o nau pehē ki ai, Lāpai, ko e toko taha ko ia na‘e ‘iate koe ‘i Tu‘a-Soatani, ‘a ia kuo ke fakahaa‘ia, ‘ē, ‘oku fai papitaiso ia, pea ‘oku tafe taha ‘a e kakai kiate ia.

²⁷Pea tali ‘a Sione ‘o ne pehē, Tala‘ehai ‘oku ala ma‘u ha me‘a ‘e ha tangata, ka ‘i hono foaki kiate ia mei langi.

²⁸Ko kimoutolu foki te mou fakamo‘oni ki he‘eku pehē, ‘Oku ‘ikai ko au ia ‘a e Mīsaia, ka kuo fekau mai au ke mu‘omu‘a ki he toko taha ko ena.

²⁹Ko ia ‘oku ne ma‘u ‘a e ta‘ahine, ko ia ia ‘a e ‘eikita‘ane; ka ko e moa‘uli ‘a e ‘eikita‘ane, ‘a ia ‘oku ne tu‘u ‘o fakaongo kiate ia, ‘oku ne fiefia — ka ko ha fiefia — ‘i he ongo mai ‘a e le‘o ‘o e ‘eiki ta‘ane: ‘āua, ko e fiefia pē ‘ena ‘oku ‘a‘aku, pea tā kuo kakato.

³⁰Kuo pau ke faka‘a‘au ia ki mu‘a, ka u faka‘a‘au au ki mui.

³¹Ko ia ‘oku ne hoko mai mei ‘olunga ‘oku ne mā‘olunga ‘i he me‘a kotoa pē: ko ia ‘oku tupu mei he māmani ‘oku fakaemāmani ia, pea ‘oku fakaemāmani mo ‘ene lea.

³²Ko ia ‘oku hoko mai mei he langi ‘oku ne fakahā ‘a e me‘a kuo ne mātā, mo ia na‘a ne fanongo ki ai: ka hono tali ‘e ha taha ‘ene fakamatala?

³³‘Ilonga ‘a ia kuo tali ‘ene fakamatala, kuo ne sila‘i ‘ene fakamo‘oni, ‘Oku mo‘oni ‘a e ‘Otua.

³⁴He ko ia ne fekau mai ‘e he ‘Otua, ko e ngaahi folofola ‘a e ‘Otua ia ‘oku ne lea‘aki: he tala‘ehai ‘oku ne fakafuofua ‘ene foaki ‘a e Laumālie ki ai.

³⁵‘Oku ‘ofa ‘a e Tamai ki he ‘Alo, pea kuo ne tuku ‘a e me‘a kotoa pē ki he‘ene fa‘iteliha.

³⁶Ko ia ‘oku ne tui pīkitai ki he ‘Alo ‘oku ne ma‘u ‘a e mo‘ui ta‘engata: ka ko ia ‘oku ‘ikai te ne talangofua ki he ‘Alo ‘e ‘ikai te ne mamata ia ki he mo‘ui; ka ‘oku nofo ma‘u kiate ia ‘e he houhau ‘a e ‘Otua.