Read KO E TOH TAPU KATOA TONGA Sioné 4 Bible Online

Sioné 4 - KO E TOH TAPU KATOA TONGA bible

Sioné 4

¹PEA ko ia, ‘i he mea‘i leva ‘e he ‘Eiki kuo fanongo ‘e he kau Fālesi, Tokua ‘oku fakaului mo papitaiso ‘e Sīsū ha kau ako, ‘o hulu atu ‘i ha‘a Sione;

²(Ka tala‘ehai na‘e fai papitaiso ‘e Sīsū ‘e ia, ka ko ‘ene kau ako pē)

³Ko ia na‘a ne tuku pē ‘a Siutea, ‘o ne toe ‘alu mei ai ki Kāleli.

⁴Pea na‘e pau ke ne ‘asi atu ‘i loto Samēlia.

⁵Pea ne hoko ai ki ha kolo ‘o Samēlia, ‘a ia na‘e ui ko Saika, ‘o ofi ki he potu fonua na‘e foaki ‘e Sēkope kia Siosifa ko hono foha.

⁶Pea na‘e tu‘u ‘i he potu ko ia ha vai, ko e vaikeli ‘o Sēkope. Pea ko eni, kuo hela ‘a Sīsū ‘i he fononga, pea ne ta‘utu leva ki he ngutu vai; ko hono taimi na‘e fe‘unga nai mo e ono.

⁷‘Iloange na‘e ha‘u ha fefine, ko e Samēlia, ke ‘utu vai: pea pehē ‘e Sīsū ki ai, ‘ē, mai si‘aku inu:

⁸(He ko ‘ene kau ako kuo ‘alu ange ki he kolo ke fakatau me‘akai.)

⁹Pea lea ai ‘a e fefine Samēlia kiate ia, Ko e toe tala inu hā e kiate au, ka ko e Siu koe, pea ko e fefine Samēlia kita? he tala‘ehai ‘oku ‘uhi ha Siu ki ha Samēlia.[9]

¹⁰Pea tali ‘e Sīsū ‘o ne me‘a ki ai, Ka ne ke ‘ilo ‘a e me‘a‘ofa ‘a e ‘Otua, pea ka ne ke ‘ilo pe ko hai ia ‘oku ne pehē atu, ‘Omi haku inu; pehē ko koe ne ke fai ‘a e kole kiate ia, pea kuo ne ‘atu ha vai mo‘ui.

¹¹Pea lea ai ‘a e fefine kiate ia, ‘Eiki, ‘oku ‘ikai ha‘o me‘a ke ‘utu ‘aki, pea ‘oku loloto ‘a e luo; pea mei fē ai ho‘o ma‘u ‘a e vai mo‘ui na?

¹²He ko e lahi koā koe ‘i he‘etau kui ko Sēkope, ‘a ia na‘a ne tuku mai kiate kimautolu ‘a e vai ni, pea na‘e inu mei ai ‘e ia, mo hono ngaahi foha, pea mo ‘ene fanga manu?

¹³Pea tali ‘e Sīsū, ‘o ne me‘a kiate ia, ‘Ā, ko ia kotoa pē ‘oku inu mei he vai ko ena te ne toe fie inua:

¹⁴ka ‘ilonga ‘a ia te ne inu mei he vai te u ‘atu ‘e au, ‘e ‘ikai ‘aupito te ne toe fie inua ‘o ta‘engata; ka ko e vai te u ‘atu kiate ia ‘e au te ne tupu ‘i loto ‘i he toko taha ko ia, ko e matavai mapunopuna hake, ‘o iku ki he mo‘ui ta‘engata.

¹⁵Pea lea ‘a e fefine kiate ia, ‘Eiki, foaki mai ‘a e vai ko ia kiate au, koe‘uhi ke ‘oua na‘a ku fie inua, pe ongosia mai ki heni ke ‘utu.

¹⁶Pea me‘a ‘e ia ki ai, ‘Alu ‘o ui mai ho husepāniti, pea ha‘u ki heni.

¹⁷Pea tali ‘a e fefine ‘o pehē, ‘Oku ‘ikai si‘aku husepāniti.

¹⁸Pea pehē ange ‘e Sīsū, ‘Oku mo‘oni pē ho‘o lea na, ‘Oku ‘ikai te u ma‘u husepāniti: he na‘a ke ma‘u ha husepāniti ‘e toko nima; pea ko e tangata ‘oku ke ma‘u ni ‘oku ‘ikai ko ho husepāniti: ko e mo‘oni ho‘o lau ko ia.

¹⁹Pea lea ki ai ‘a e fefine, ‘Eiki, tā ‘oku ou vakai ko e palōfita koe.

²⁰Ko ‘emau ngaahi kui na‘a nau fai ‘enau lotu ‘i he mo‘unga ni; ka ko kimoutolu ‘oku mou pehē, ko Selusalema pē ‘a e potu ‘oku totonu ke fai ai ‘a e lotu.

²¹Pea lea ki ai ‘a Sīsū, ‘e fefine, tui mai kiate au, ‘oku ‘unu mai ha taimi, ‘a ia ‘e ‘ikai te mou fai ‘i he mo‘unga ni, pe ‘i Selusalema, ho‘omou lotu ki he Tamai.

²²Ko kimoutolu ‘oku mou lotu ki he me‘a ‘oku ‘ikai te mou ‘ilo ki ai: ‘oku mau lotu kimautolu ki he me‘a ‘oku mau lāu‘ilo‘i: he ‘oku mei he kakai Siu ‘a e fakamo‘ui.

²³Ka ne ongo ia, ka ‘oku ‘unu mai ha taimi — ‘io, kuo hoko ni — ‘a ia ko e kakai ‘oku lotu mo‘oni te nau fai ‘i laumālie mo fai ‘i mo‘oni ‘enau lotu ki he Tamai: he ko e Tamai foki ‘oku ne kumi ‘a e fa‘ahinga ko ia, ‘a kinautolu ‘oku mātu‘aki lotu kiate ia.

²⁴Ko e ‘Otua ko e laumālie: pea ko kinautolu ‘e hū kiate ia, kuo pau ke nau fai ‘i laumālie pea fai ‘i mo‘oni ‘enau hū.

²⁵Pea lea ‘a e fefine ki ai, ‘Oku ou ‘ilo ‘oku ha‘u ‘a e Mīsaia; (‘a ia ‘oku ui ko Kalaisi) ka toki ha‘u ‘a e toko taha ko ia te ne fakahā kiate kimautolu ‘a e me‘a kotoa pē kotoa pē.

²⁶Pea folofola ai ‘a Sīsū kiate ia, Ko au ia ‘oku lea kiate koe.

²⁷Pea fe‘unga mo ia mo e omi ‘ene kau ako, ‘o nau ofo ‘i he‘ene talanoa mo ha fefine; kae molekemama‘o hanau taha te ne pehē, Ko e hā ‘a e me‘a ‘oku ke fiema‘u? pē, Ko e hā ‘oku ke talanoa ai mo e fefine?

²⁸Pea tuku ai ‘e he fefine ‘ene ‘angavai, ‘o ne ‘alu mei ai ki he kolo, ‘o ne pehē ki he kakai,

²⁹Omi ange, ‘o mamata ki he tangata kuo ne tala mai ‘a e me‘a kotoa kuo u fai: ‘oku ‘ikai nai ko e Mīsaia ‘eni, ‘e?

³⁰Pea nau ‘alu atu mei he kolo, ‘o nau kamata laka mai kiate ia.

³¹Lolotonga ia na‘e kole kiate ia ‘e he kau ako, ‘o pehē, Lāpai, ke ke tokoni mu‘a.

³²Ka ka pehē ‘e ia kiate kinautolu, ‘Oku ai ‘eku kai ‘oku ‘ikai te mou ‘ilo ki ai.

³³Pea fepehē‘aki ai ‘a e kau ako, Ka tala‘ehai kuo ‘omi ‘e ha taha ha‘ane me‘akai, ‘inē?

³⁴Pea pehē ‘e Sīsū kiate kinautolu, Ko ‘eku me‘akai ē, ko e tuli ke fai ‘a e finangalo ‘o ia na‘a ne fekau mai au, pea ke faka‘osi ha‘ana ngāue.

³⁵‘Ikai ‘oku mou lau, ‘Oku toe fā ‘a e māhina, pea hoko ‘a e ututa‘u. ‘Ā, ka u tala atu Mou hanga hake mu‘a ki he ngaahi ngoue na: vakai, kuo fisi hina ia ki he ututa‘u.

³⁶Pea na‘a mo e taimi ni ‘oku ma‘u totongi ‘e ia ‘oku utu, kae‘uma‘ā ‘oku ne tānaki fua ki he mo‘ui ta‘engata: koe‘uhi ke fiefia fakataha, ‘e ia na‘e tō, mo ia na‘e utu.

³⁷He ko ‘ene toki mo‘oni ‘i he me‘a ko eni ‘a e lea ko ē, ‘Oku tō ‘a e tō, kae utu ‘a e utu.

³⁸Na‘a ku fekau atu kimoutolu ‘e au ke utu ‘a e me‘a na‘e ‘ikai te mou fakaongosia ai kimoutolu: ko e kakai kehe na‘a nau fakaongosia ai, pea kuo mou ma‘u ‘e kimoutolu honau kakava.

³⁹Pea ko eni, na‘e ai ha tokolahi mei ha kolo ko ia na‘a nau tui pīkitai kiate ia, ‘a e kakai Samēlia, ko e me‘a ‘i he lea ‘a e fefine, he‘ene fakahā, Kuo ne tala mai ‘a e me‘a kotoa pē ne u fai.

⁴⁰Ko ia ‘i he a‘u ange ‘a e kau Samēlia, na‘a nau kole kiate ia ke ne nofo hifo mo kinautolu; pea ne nofo ‘i he potu ko ia ‘o ‘aho ua.

⁴¹Pea tokolahi ange noa pē ‘a e kakai na‘e tui ko e me‘a ‘i he‘ene folofola ‘a‘ana;

⁴²pea nau pehē ki he fefine, ‘Oku ‘ikai te mau kei tui koe‘uhi pē ko ho‘o talanoa na‘e fai; he kuo mau fanongo tonu ki ai ‘e kimautolu, pea ‘oku mau ‘ilo, ko eni mo‘oni ia ‘a e Fakamo‘ui ‘o māmani.

⁴³Pea hili ‘a e ‘aho ko ia ‘e ua na‘a ne hiki mei he potu ko ia ki Kāleli.

⁴⁴He ko Sīsū na‘a ne tala ‘e ia, ‘oku ‘ikai faka‘apa‘apa‘ia ha palōfita ‘i hono fonua ‘o‘ona.

⁴⁵Ko ia ‘i he‘ene hoko ki Kāleli, na‘e tali ia ‘e he kakai Kāleli; he kuo nau mamata ki he ngaahi fu‘u me‘a ne ne fai ‘i Selusalema ‘i he kātoanga: he ko kinautolu foki na‘a nau ‘alu ki he kātoanga.

⁴⁶Pea ne toe ha‘u ai ki Kena ‘i Kāleli, ‘a e potu na‘a ne liliu ai ‘a e vai ke uaine. Pea na‘e ai ha mu‘a ‘a e Tu‘i, ‘a ia kuo puke si‘ono foha ‘i Kāpaneume.

⁴⁷Pea ‘i he fanongo ‘a e matāpule ko ia, tā kuo ha‘u ‘a Sīsū mei Siutea ki Kāleli, pea ne ‘alu ange ki ai, ‘o ne kole ke ne me‘a hifo ‘o faito‘o si‘ono foha: he ‘oku ne fakatau ke pekia.

⁴⁸Pea me‘a ai ‘a Sīsū kiate ia, ‘Ā, kapau ‘e ‘ikai te mou mamata ki he ngaahi faka‘ilonga, mo e ngaahi me‘a fakaofo, tā ‘e ‘ikai si‘i te mou tui.

⁴⁹Pea lea kiate ia ‘e he mu‘a ‘a e Tu‘i, ‘Eiki, ke ke me‘a hifo mu‘a, na‘a pekia si‘oku ‘uhiki.

⁵⁰Pea folofola ‘a Sīsū ki ai, ‘alu pē; kuo mo‘ui ho foha. Pea tui ‘a e matāpule ki he folofola kuo fai ‘e Sīsū, pea ne ‘alu.

⁵¹Pea lolotonga ‘ene kei fononga hifo, mo e fakafetaulaki mai ‘e he‘ene kau tamaio‘eiki, ‘o nau pehē, tokua kuo mo‘ui ‘ene tamasi‘i.

⁵²Pea ne fehu‘i ai kiate kinautolu ki he houa na‘a ne kamata lelei ai. Pea nau tali kiate ia, Na‘e mahu‘i ‘a e mofi meiate ia ‘i he fitu ‘aneafi.

⁵³Pea ‘ilo leva ‘e he tamai, tā na‘e ‘i he houa pē ko ia, ‘a ia na‘e folofola ai ‘a Sīsū kiate ia ‘o pehē, Kuo mo‘ui ho foha: pea ne lotu, ‘e ia mo hono fāmili kātoa.

⁵⁴Ko e toe fai mana ‘eni ‘e Sīsū ko hono tu‘o ua, ‘i he‘ene ha‘u mei Siutea ki Kāleli.