Read KO E TOH TAPU KATOA TONGA Sioné 5 Bible Online

Sioné 5 - KO E TOH TAPU KATOA TONGA bible

Sioné 5

¹Pea faifai pea ai ha kātoanga ‘a ha‘a Siu; pea fononga hake ‘a Sīsū ki Selusalema.

²Pea ko eni ‘oku tu‘u ‘i Selusalema, ‘o ofi ki he Lepa Sipi, ha lepa ‘e taha,[10] ‘a ia ko e hingoa ‘e taha ‘oku ‘ai ki ai ‘i he lea faka-Hepelū ko Peteseta;[11] ‘oku nima hono fale hala.

³Ko e ngaahi fale hala ko ia na‘e tatoka ai ha fu‘u kakai mahaki, ‘a e kui, ‘a e heke, ‘a e mamatea, ‘o tatali ki he ngaueue ‘a e vai.

⁴He na‘e ‘alu hifo ha ‘āngelo ‘i ha taimi pau ki he lepa, ‘o ue‘i ‘a e vai; pea ko ia ‘e tomu‘a hopo ki he vai hili hono ue‘i, na‘e fakamo‘ui ia mei hono mahaki kotoa pē.[12]

⁵Pea na‘e ai tokua ha tangata ‘i he potu ko ia, kuo tolungofulu mā valu ta‘u ‘ene mahaki‘ia.

⁶Pea ‘i he me‘a ‘a Sīsū ki he toko taha ko ia ‘oku tokoto, mo ne ‘ilo kuo fuoloa ‘e ne pehē, pea ne lea ki ai ‘o pehē, ‘Oku ke loto ke mo‘ui?

⁷Pea tali ki ai ‘a e mahaki, ‘Eiki, ‘oku ‘ikai te u ma‘u si‘aku taha ke lī au ki he lepa, ‘oka ‘iloange ‘e ue‘i ‘a e vai; pea lolotonga ‘ete ‘alu ‘e kita pē, tā ‘oku laka hifo ha taha, ‘o mu‘omu‘a ‘iate au.

⁸Pea folofola ki ai ‘e Sīsū, Tu‘u pē, to‘o ho mohenga na, pea hā‘ele.

⁹Pea mo‘ui leva ‘a e tangata; pea ne to‘o hono mohenga, ‘o ne hā‘ele atu. Pea tā ko e Sāpate ‘a e ‘aho ko ia.

¹⁰Ko ia na‘e lea ai ‘a ha‘a Siu ki he tangata kuo fakamo‘ui, ‘ē, ko e Sāpate ‘eni: pea tala‘ehai ‘oku ngofua ho‘o to‘o mohenga.

¹¹Ka ka tali ‘e ia kiate kinautolu, Ko ia na‘a ne fakamo‘ui au, ko ia ia na‘a ne pehē mai, To‘o ho mohenga, pea hā‘ele.

¹²Pea nau fehu‘i kiate ia, Ko hai ‘a e tangata na‘e pehē kiate koe, To‘o ia ‘o hā‘ele?

¹³Ka ko e tangata kuo faito‘o na‘e ‘ikai te ne ‘ilo pē ko hai ia; he ne laka ange ‘a Sīsū, koe‘uhi na‘e ‘i ai ha fu‘u kakai ‘i he potu ko ia.

¹⁴Faifai pea ‘ilo ia ‘e Sīsū ‘i he Temipale, pea ne me‘a ki ai, Ko eni kuo ke mo‘ui: ‘oua te ke toe angahala, na‘a hoko kiate koe ha me‘a ‘oku kovi ange.

¹⁵Pea ‘alu mei ai ‘a e tangata, ‘o ne fakahā ki ha‘a Siu, ko Sīsū ia ‘a e toko taha na‘e fakamo‘ui ia.

¹⁶Pea ko hono ‘uhinga e ‘o e fakatanga‘i ‘o Sīsū ‘e ha‘a Siu, ko ‘ene fai pehē ‘i he ‘aho Sāpate.

¹⁷Ka ka tali ‘e Sīsū kiate kinautolu, Kuo ngāue ‘a ‘eku Tamai ‘o a‘u ki he taimi ni, pea ‘oku ou ngāue mo au foki.

¹⁸Pea ko hono ‘uhinga e na‘e ‘āsili feinga ai ‘e ha‘a Siu ke tāmate‘i ia, koe‘uhi na‘e ‘ikai ngata ‘i he‘ene maumau Sāpate, ka kuo ne lau foki ‘a e ‘Otua ko ‘ene Tamai mo‘oni, ‘o ne fakatatau ai ia ki he ‘Otua.

¹⁹Ko ia na‘e tali ‘a Sīsū, ‘o ne folofola kiate kinautolu, Ko au ē, ko au ē, ‘oku ou tala atu, ‘Oku ‘ikai lava ‘e he ‘Alo ke fai ‘iate ia ha momo‘i me‘a, ngata pē ‘i he me‘a ‘oku ne vakai ‘oku fai ‘e he Tamai: he ‘ilonga ha me‘a ‘oku fai ‘e he ‘ene ‘Afio, ‘oku pehē pē mo e fai ‘e he ‘Alo ‘a e ngaahi me‘a ko ia.

²⁰He ‘oku ‘ofa ‘a e Tamai ki he ‘Alo, pea ‘oku ne fakahā ki ai ‘a e ngaahi me‘a kotoa pē ‘oku fai ‘e he ‘Ene ‘Afio: pea te ne fakahā ki ai ha ngaahi ngāue ‘oku hulu atu ‘i he ngaahi me‘a ni, koe‘uhi ke mou ofo.

²¹He hangē ā ‘oku fokotu‘u ‘e he Tamai ‘a e kau pekia, mo ne ngaohi ke mo‘ui; pehē foki mo e ‘Alo, ‘oku ne ngaohi ke mo‘ui ‘a kinautolu ‘oku ne loto ki ai.

²²Kae‘uma‘ā ‘oku ‘ikai ke fakamaau ‘e he Tamai ha toko taha, ka kuo ne tuku ‘a e fakamaau kotoa pē ki he ‘Alo:

²³koe‘uhi ke ‘apasia ‘a e kakai kotoa pē ki he ‘Alo, ‘o hangē ko ‘enau ‘apasia ki he Tamai. Ko ia ‘oku ‘ikai ke ‘apasia ki he ‘Alo, ‘oku ‘ikai te ne ‘apasia ki he Tamai na‘a ne fekau mai ia.

²⁴Ko au ē, ko au ē, ‘oku ou tala atu, Ko ia ‘oku ne fanongo ki he‘eku lea, pea tui kiate ia na‘a ne fekau mai au, ‘oku ne ma‘u ‘a e mo‘ui ta‘engata, pea ‘oku ‘ikai te ne a‘u ki he fakamaau; ka kuo ne hiki mei he mate ki he mo‘ui.

²⁵Ko au ē, ko au ē, ‘oku ou tala atu, ‘Oku ‘unu mai ha taimi — ‘io, kuo hoko ni — ‘a ia ‘e fanongo ‘e he kau mate ki he le‘o ‘o e ‘Alo ‘o e ‘Otua: pea ko kinautolu kuo fanongo ki ai te nau mo‘ui.

²⁶He hangē ā ‘oku mo‘ui ‘a e Tamai ‘iate ia pē; pehē foki ‘a ‘ene tuku ki he ‘Alo ke mo‘ui ‘iate ia pē;

²⁷pea kuo ne tuku ke ‘a‘ana ‘a e fai fakamaau, koe‘uhi ko ha fānau tama ‘a tangata ia.

²⁸‘Oua te mou ofo ‘i he me‘a ko ia; he ‘oku ‘unu mai ha taimi, ‘a ia ‘e fanongo ai ki hono le‘o ‘e he kakai kotoa pē

²⁹‘Oku ‘i he ngaahi fa‘itoka, pea te nau ‘alu atu mei ai; ko kinautolu na‘e ngāue lelei, ki he toetu‘u ke mo‘ui, ko kinautolu na‘e fai kovi, ki he toetu‘u ke fakamaau.

³⁰Tala‘ehai ‘oku ou lava ke fai ha momo‘i me‘a ‘iate au pē: ‘oku ou fakamaau ‘o hangē ko ‘eku fanongo: pea ko e fakamaau ‘a‘aku ‘oku totonu; koe‘uhi ‘oku ‘ikai te u tuli ki he loto ‘o‘oku, ka ki he finangalo ‘o ia na‘a ne fekau mai au.

³¹Ka ne ko au ‘oku fakamo‘oni kiate au, tā ‘oku ‘ikai mo‘oni ‘eku fakamo‘oni.

³²Ko e taha kehe ia ‘oku fakamo‘oni kiate au, pea ‘oku ou ‘ilo ‘oku mo‘oni ‘a e fakamo‘oni ‘oku ne fai kiate au.

³³Ko kimoutolu na‘a mou fekau atu kia Sione, pea na‘a ne fakamo‘oni ki he mo‘oni.

³⁴Ka ko au ‘oku ‘ikai te u tali ha fakamo‘oni mei ha tangata: ka neongo ia, ka ‘oku ou lea pehē, koe‘uhi ke mou mo‘ui.

³⁵Ko e toko taha ko ia ko e maama kuo tutu pea ulo: pea ko kimoutolu na‘a mou loto ke hākahaka ‘i hono maama, ‘o fuoloa si‘i.

³⁶Ka ko ‘eku fakamo‘oni ‘a‘aku ko e toko taha ‘oku lahi ‘ia Sione: he ko e ngaahi ngāue na‘e tuku mai ‘e he Tamai ke u lava, ‘io, ‘a e ngaahi ngāue pē ko ē ‘a ia ‘oku ou fai, ‘oku nau fakamo‘oni kiate au, kuo fekau mai au ‘e he Tamai.

³⁷‘Io, ko e Tamai, ‘a ia na‘a ne fekau mai au, kuo fakamo‘oni kiate au ‘e he ‘Ene ‘Afio: ka tala‘ehai kuo ongo hano le‘o kiate kimoutolu ‘i ha taimi, pea tala‘ehai kuo mou mamata ki hano ‘ata.

³⁸Pea na‘a mo ‘ene folofola, tala‘ehai ‘oku mou ma‘u ia ke nofo ma‘u ‘i homou loto: he ko ia na‘e fekau mai ‘e he ‘Ene ‘Afio, ko e toko taha ia ‘oku ‘ikai te mou tui ki ai.

³⁹‘Oku mou hakule ‘a e Tohitapu; koe‘uhi ‘oku mou mahalo ‘oku tu‘u ai ho‘omou ma‘u ‘a e mo‘ui ta‘engata: pea ko ia ia ‘oku fakamo‘oni kiate au.

⁴⁰Ka tala‘ehai ‘oku mou loto ke ha‘u kiate au ke mou ma‘u mo‘ui.

⁴¹Ko e fakahīkihiki‘i ‘e he tangata ‘oku ‘ikai te u tali.

⁴²Ka kuo u ‘ilo‘i kimoutolu, tā ‘oku ‘ikai ‘iate kimoutolu ‘a e ‘ofa ki he ‘Otua.

⁴³Ko au na‘a ku ha‘u ‘i he huafa ‘o ‘eku Tamai; ka tala‘ehai ‘oku mou tali au: kapau ‘e ha‘u ha taha kehe ‘i hono hingoa ‘o‘ona, te mou tali ‘a e toko taha ko ia.

⁴⁴Te mou lava fēfē ke tui, ‘a kimoutolu ‘oku mou tali ‘a e fakahīkihiki‘i ‘oku mou fefai‘aki, ‘o ‘ikai te mou kumi ‘a e fakahīkihiki‘i ‘e he ‘Otua Taha-tofu-pē.

⁴⁵‘Oua te mou pehē, ko au te u talatalaaki‘i kimoutolu ki he Tamai: ‘oku ‘i ai ha toko taha ‘oku ne talatalaaki‘i kimoutolu, ‘a Mōsese, ‘a ‘ia kuo tu‘u ki ai ho‘omou falala.

⁴⁶He ka ne ‘oku mou tui kia Mōsese, pehē ‘oku mou tui kiate au: he ko e tohi ‘a e toko taha ko ia, ko e tohi kiate au.

⁴⁷Ka ‘o kapau ‘oku ‘ikai te mou tui ki he‘ene ngaahi tohi, pea fēfē ai ha‘amou tui ki he‘eku ngaahi lea?