Read KO E TOH TAPU KATOA TONGA Sioné 6 Bible Online

Sioné 6 - KO E TOH TAPU KATOA TONGA bible

Sioné 6

¹PEA faifai pea ‘alu mei ai ‘a Sīsū ki he kauvai ‘o e Tahi ‘o Kāleli, ‘a ia ko e Tahi ‘o Taipiliō.

²Pea na‘e muimui tu‘u kiate ia ha fu‘u kakai lahi, koe‘uhi ko ‘enau mamata ki he ngaahi mana na‘a ne fai kiate kinautolu na‘e mahaki.

³Pea ‘alu hake ‘a Sīsū ki he mo‘unga, ‘o ne nofo hifo ai mo ‘ene kau ako.

⁴Pea na‘e panaki ‘a e Pāsova, ko e kātoanga ‘a ha‘a Siu.

⁵Pea hanga hake ai ‘a Sīsū ‘o ne vakai, tā ko e fu‘u kakai ‘ena ‘oku ha‘u kiate ia; pea ne pehē kia Filipe, Te tau fakatau mei fē ha mā mo kai ‘a e kakai na?

⁶Ka ko ‘ene lea pehē ko ‘ene ‘ahi‘ahi‘i ia: he na‘e mea‘i ‘e he ‘Ene ‘Afio ‘a e me‘a ‘oku ne ‘amanaki fai.

⁷Pea tali ‘e Filipe ki ai, Neongo ‘e onongeau‘i tēnali[13] ha mā, ka ‘e ‘ikai fe‘unga ke nau taki taha to‘o ha me‘a si‘i.

⁸Pea lea kiate ia ha toko taha ‘o ‘ene kau ako, ko ‘Anitelū ko e tokoua ‘o Saimone Pita, ‘o pehē,

⁹‘Oku ‘i ai ha tamasi‘i ‘i heni, ‘oku ne ma‘u ha fo‘i mā pa‘ale ‘e nima, mo ha mata‘i ika ‘e ua: ka ko e hā ‘a e me‘a ko ia ki ha tokolahi pehē?

¹⁰Pea me‘a mai ‘a Sīsū, Fekau ke tākoto ‘a e kakai. Pea na‘e musie‘ia ‘a e potu ko ia. Ko ia na‘e tākoto ai ‘a e kau tangata: na‘e fe‘unga nai hono lau mo e toko nima afe.

¹¹Pea to‘o ai ‘e Sīsū ‘a e ngaahi fo‘i mā; pea ne fai ha fakafeta‘i, ‘o ne toki tufa kiate kinautolu ‘oku tākoto; pea pehē foki mo ‘ene ‘atu mei he ongo ika, ‘o fai pē ki he‘enau tangi.

¹²Pea kuo nau fu‘u mākona, pea ne pehē ki he‘ene kau ako, Mou tānaki ‘a e ngaahi mapakipaki‘i mā ‘oku toe, ke ‘oua na‘a maumau ha me‘a.

¹³Ko ia na‘a nau tātānaki, pea nau fakapito ha kato fakahunga ‘e hongofulu mā ua ‘i he ngaahi konga mei he fo‘i mā pa‘ale ‘e nima, ‘a ia na‘e toe ‘iate kinautolu na‘e kai.

¹⁴Ko ia ‘i he vakai ‘a e kakai ki he mana kuo ne fai, na‘a nau pehē, Ko eni mo‘oni ia ‘a e palōfita[14] ka ha‘u ki māmani.

¹⁵Ko ia ‘i he mea‘i ‘e Sīsū, ‘oku nau teu ke ha‘u ‘o ‘ave fakamālohi ia, ‘o fakanofo ke tu‘i, pea ne toe ‘alu hake ki he mo‘unga ‘e ia toko taha.

¹⁶Pea kuo efiafi, na‘e ‘alu hifo ‘ene kau ako ki tahi,

¹⁷pea nau heka ki ha vaka, ‘o nau kamata ‘alu ki he kauvai ki Kāpaneume. Pea ko eni kuo po‘uli, pea kuo te‘eki a‘u mai kiate kinautolu ‘a Sīsū.

¹⁸Na‘e hou foki ‘a e tahi, ko e me‘a ‘i he fu‘u matangi kuo tō.

¹⁹Pea kuo nau ‘a‘alo ‘i he maile ‘e tolu pē fā, pea nau vakai ‘a Sīsū ‘oku ne hā‘ele ‘i he fukahi tahi, pea ‘oku ne fakaofiofi mai ki he vaka: pea nau manavahē.

²⁰Ka ka lea ia kiate kinautolu, ‘o ne pehē, Ko au pē: ‘oua ‘e manavahē.

²¹Pea nau loto leva ke ma‘u ia ki he vaka: pea ‘iloange ne tau leva ‘a e vaka ki he fonua ‘oku nau ‘alu ki ai.

²²Pongipongi hake, ko e kakai na‘e tutu‘u ‘i he kauvai na‘a nau vakai ‘oku taha tofu pē ‘a e ki‘i vaka ‘i he potu ko ia, pea na‘e ‘ikai heka vaka ‘a Sīsū mo ‘ene kau ako, ka na‘e ‘alu ‘a e kau ako pē:

²³(Ka na‘e ‘i ai ha fanga ki‘i vaka na‘e omi mei Taipiliō, ‘o nau tau ofi ki he potu na‘a nau kai ai ‘a e mā hili hono fakafeta‘ia ‘e he ‘Eiki)

²⁴Ko ia ‘i he ‘ilo ‘e he kakai, tā ‘oku ‘ikai ‘i he feitu‘u ko ia ‘a Sīsū, pe ko ‘ene kau ako, na‘a nau heka foki kinautolu ki he ngaahi ki‘i vaka, ‘o nau ‘alu ki Kāpaneume, ko e kumi ‘o Sīsū.

²⁵Pea ‘i he‘enau ‘ilo ia ‘i he kauvai, na‘a nau pehē ki ai, Lāpai, na‘a ke ha‘u fakakū ki heni?

²⁶Pea tali ‘a Sīsū, ‘o ne folofola kiate kinautolu, Ko au ē, ko au ē, ‘oku ou tala atu, Ko ho‘omou kumi kiate au, ‘oku ‘ikai koe‘uhi ne mou sio faka‘ilonga, ka koe‘uhi na‘a mou kai ‘i he ngaahi fo‘i mā, ‘o mou mākona ai.

²⁷Mou ngāue, kae ‘ikai ki he kai ‘oku mole, ka ki he kai ‘oku tolonga, ‘o iku ki he mo‘ui ta‘engata, ‘a ia ‘e ‘atu kiate kimoutolu ‘e he Fanautama ‘a Tangata: he ko e toko taha ko ia kuo sila‘i ‘e he Tamai, ‘e he ‘Otua.

²⁸Pea nau pehē ai kiate ia, Ko e hā tū te mau fai, ka mau feia ‘a e ngaahi ngāue mei he ‘Otua?

²⁹Pea tali ‘e Sīsū ‘o ne pehē kiate kinautolu, Ko eni ia ‘a e ngāue mei he ‘Otua, ke mou tui pīkitai kiate ia ne fekau mai ‘e he ‘Ene ‘Afio.

³⁰Pea nau pehē ai kiate ia, Pea ko e hā ia ha me‘a ‘oku ke fai mo‘o faka‘ilonga, ke mau mamata ki ai ‘o tui kiate koe? ko e hā ho‘o ngāue ‘oku fai?

³¹Ko ‘etau ngaahi kui na‘a nau kai ‘a e mana ‘i he Toafa: ‘o hangē ko ia kuo tohi, Na‘a ne foaki kiate kinautolu ke kai, ha mā mei he langi.

³²Pea folofola ai ‘a Sīsū kiate kinautolu, Ko au ē, ko au ē, ‘oku ou tala atu, Na‘e ‘ikai ko Mōsese na‘a ne foaki kiate kimoutolu ‘a e mā mei he langi;[15] ka ko ‘eku Tamai ‘oku ne foaki kiate kimoutolu ‘a e mā mei he langi, ‘a e mā mo‘onia.

³³He ko e mā ‘a e ‘Otua, ko ia ia ‘oku ‘alu hifo mei he langi, ‘o ne foaki mo‘ui ki māmani.

³⁴Ko ia na‘a nau pehē ai kiate ia, ‘Eiki, foaki mai kiate kimautolu ‘a e mā ko ia ma‘u ai pē.

³⁵Pea folofola ‘a Sīsū kiate kinautolu, Ko au pē ko e Mā ‘o e Mo‘ui: ko ia ‘oku ha‘u kiate au ‘e ‘ikai ‘aupito te ne fiekaia; pea ko ia ‘oku tui pīkitai kiate au, ‘e ‘ikai ‘aupito te ne fie inua ha taimi.

³⁶Ka na‘a ku tala kiate kimoutolu, Kuo mou mamata foki kiate au, kae ‘ikai tui.

³⁷Ko e koto me‘a kātoa ‘oku foaki ‘e he Tamai kiate au ‘e ha‘u kiate au; pea ko ia ‘oku fotu mai kiate au, ‘e ‘ikai ‘aupito te u kapusi.

³⁸Koe‘uhi kuo u ‘alu hifo mei he langi, ‘o ‘ikai ke u fai ‘a e loto ‘o‘oku, ka ko e finangalo ‘o ia na‘a ne fekau mai au.

³⁹Pea ko eni ia ‘a e finangalo ‘o ia na‘a ne fekau mai au, koe‘uhi ko e me‘a kātoa kuo ne foaki mai, ke ‘oua na‘a ku tuku ke mole hano me‘a ‘e taha, kaekehe ke u fokotu‘u ia ‘i he ‘aho fakamui.

⁴⁰He ko eni ia ‘a e finangalo ‘a ‘eku Tamai, ke ‘ilonga ‘a ia ‘oku ne siofia ‘a e ‘Alo, mo tui pīkitai kiate ia, ke ne ma‘u ‘a e mo‘ui ta‘engata; ka u fokotu‘u ia ‘e au ‘i he ‘aho fakamui.

⁴¹Ko ia na‘e lāutu‘u ai ‘a ha‘a Siu kiate ia, koe‘uhi ko ‘ene pehē, Ko au pē ko e mā na‘e ‘alu hifo mei he langi.

⁴²Pea nau pehē, ‘Ikai ko Sīsū ‘eni, ko e foha ‘o Siosifa, ‘a ia ‘oku tau lāu‘ilo ‘ene tamai mo ‘ene fa‘ē? pea fēfē ai ‘ene lea ni, ‘o pehē, Kuo u ‘alu hifo mei he langi?

⁴³Pea tali ‘e Sīsū ‘o ne pehē kiate kinautolu, ‘Oua te mou felāutu‘u‘aki.

⁴⁴‘Oku ‘ikai lava ‘e ha taha ke ha‘u kiate au, ka ‘i he tohoaki ia ‘e he Tamai na‘a ne fekau mai au: pea ko au te u fokotu‘u ‘a e toko taha ko ia ‘i he ‘aho fakamui.

⁴⁵Kuo tohi ‘i he Tohi palōfita, Pea te nau hoko kotoa pē ko e kau akonekina ‘e he ‘Otua. ‘Ilonga ‘a ia kuo fanongo mei he Tamai, pea kuo akonekina, ‘oku ne ha‘u kiate au.

⁴⁶‘Oku ‘ikai ko e pehē kuo mātā ‘a e Tamai ‘e ha taha, ngata pē ‘i he toko taha ko ia ‘oku mei he ‘Otua: kuo mātā ‘a e Tamai ‘e he toko taha ko ia.

⁴⁷Ko au ē, ko au ē, ‘oku ou tala atu, Ko ia ‘oku tui ‘oku ne ma‘u ‘a e mo‘ui ta‘engata.

⁴⁸Ko au pē ko e mā ‘o e mo‘ui.

⁴⁹Ko ‘amou ngaahi kui na‘a nau kai ‘i he Toafa ‘a e mana, pea nau mate pē.

⁵⁰Ko eni ia ‘a e mā ‘oku ‘alu hifo mei he langi, ‘a ia ‘oku ha‘u ke kai ai ha taha ‘o ‘oua ‘e mate.

⁵¹Ko au pē ko e Mā ‘oku Mo‘ui, ‘a ia ne ‘alu hifo mei he langi: kapau ‘e kai ‘e ha taha mei he mā ko eni te ne mo‘ui pē ‘o ta‘engata: pea ko e mā foki te u ‘atu ko hoku kakano ia, koe‘uhiā ko e mo‘ui ‘a māmani.

⁵²Ko ia na‘e fekīhiaki ai ‘a ha‘a Siu, ‘o pehē, ‘O lava fēfē ‘a e siana ni ke tuku mai hono kakano ke kai?

⁵³Ko ia na‘e me‘a ai ‘a Sīsū kiate kinautolu, Ko au ē, ko au ē, ‘oku ou tala atu, Kapau kuo ‘ikai te mou kai ‘a e kakano ‘o e Fanautama ‘a Tangata, mo inu hono ta‘ata‘a, ‘oku ‘ikai te mou ma‘u mo‘ui ‘iate kimoutolu.

⁵⁴Ko ia ‘oku ne keina hoku kakano, mo inu hoku toto, ‘oku ne ma‘u ‘a e mo‘ui ta‘engata; pea te u fokotu‘u ia ‘i he ‘aho fakamui.

⁵⁵He ko hoku kakano ko ha kai mo‘oni ia, pea ko hoku toto ko ha inu mo‘oni.

⁵⁶Ko ia ‘oku ne keina hoku kakano, mo inu hoku toto, ‘oku ne nofo ma‘u ‘iate au, mo au ‘iate ia.

⁵⁷Hangē ā ne fekau au ‘e he Tamai ‘oku mo‘ui, mo ‘eku mo‘ui ‘a‘aku koe‘uhi ko e Tamai: pehē, ko ia ‘oku ne keina au, ‘e mo‘ui foki ‘a e toko taha ko ia koe‘uhi ko au.

⁵⁸Ko eni ia ‘a e mā ne ‘alu hifo mei langi: tala‘ehai ‘oku hangē ko e kai ‘amou ngaahi kui, pea nau mate pē. ko ia ‘oku ne keina ‘a e mā ko eni te ne mo‘ui ‘o ta‘engata.

⁵⁹Ko e ngaahi lea ko ia na‘a ne fai ‘i ha‘ane faiako ‘i ha falelotu ‘i Kāpaneume.

⁶⁰Pea ‘i he fanongo ki ai ha tokolahi ‘o ‘ene kau ako, na‘a nau pehē, Ko e lea fefeka ‘eni; ko hai ‘e kātaki ke fanongo kiate ia?

⁶¹Pea ‘i he mea‘i ‘e Sīsū ‘i hono finangalo ‘oku hanu ‘e he‘ene kau ako ‘i he me‘a ko ia, na‘a ne pehē kiate kinautolu, ‘Oku mou tūkia ‘i he me‘a ni koā?

⁶²Huanoa ‘oka mou ka siofia ‘a e Fanautama ‘a Tangata ‘oku ne ‘alu hake ki he potu na‘a ne ‘i ai mu‘a.

⁶³Ko e laumālie pē ‘oku ne ngaohi ke mo‘ui; ko e me‘a ki he kakano ‘oku ‘ikai momo‘i ‘aonga ia: ko e ngaahi lea kuo u fai ‘e au kiate kimoutolu, ko e koto laumālie ia, pea ko e koto mo‘ui.

⁶⁴Ka ‘oku ‘i ai homou ni‘ihi ‘oku ‘ikai ke tui. He na‘e toka mea‘i ‘e Sīsū mei he kamata‘anga ‘a kinautolu ‘oku ‘ikai tui, pea mo ia te ne lavaki‘i ia.

⁶⁵Pea ne pehē, Ko hono ‘uhinga ia na‘a ku lea ai kiate kimoutolu, ‘o pehē, ‘Oku ‘ikai lava ‘e ha taha ke ha‘u kiate au, ka ‘i hono foaki kiate ia ‘e he Tamai.

⁶⁶Pea ‘i he me‘a ko ia na‘e foki ha tokolahi ‘o ‘ene kau ako, ‘o ‘ikai te nau kei ō fano mo ia.

⁶⁷Ko ia na‘e pehē ai ‘a Sīsū ki he kau Hongofulu-mā-ua, Ka ‘e ‘ikai te mou fie ō mo kimoutolu, ‘o?

⁶⁸Pea tali ki ai ‘e Saimone Pita, ‘Eiki, te mau ‘alu kia hai? ‘oku ‘iate koe ‘a e ngaahi lea ‘o e mo‘ui ta‘engata.

⁶⁹Pea kuo loa ‘emau tui, ‘o mau ‘ilo, ko koe ia ‘a e Toko Taha Tapu ‘o e ‘Otua.

⁷⁰Pea tali ‘e Sīsū kiate kinautolu, ‘Ikai kuo u fili ‘e au ‘a kimoutolu, ‘a e kau Hongofulu-mā-ua? Pea na‘a mo kimoutolu ko homou toko taha ko e tēvolo?

⁷¹Ko ‘ene lea pē kia Siutasi, ko e foha ‘o Saimone ‘Isikāliote: he ko ia te ne lavaki‘i ia — ha toko taha ‘o e kau Hongofulu-mā-ua.