Read KO E TOH TAPU KATOA TONGA Sioné 7 Bible Online

Sioné 7 - KO E TOH TAPU KATOA TONGA bible

Sioné 7

¹PEA hili ia, na‘e fononga fano ‘a Sīsū ‘i Kāleli: he na‘e ‘ikai te ne loto ke ‘alu holo ‘i Siutea, koe‘uhi na‘e feinga ‘a ha‘a Siu ke tāmate‘i ia.

²Pea faifai pea panaki ‘a e kātoanga ‘a ha‘a Siu, ‘a e kātoanga nofo fale lou‘akau.

³Ko ia na‘e lea ai kiate ia ‘e hono ngaahi tokoua, ‘o pehē, Ke ke hiki mei heni, ‘o mole ki Siutea; koe‘uhi ke mamata ho‘o kau ako foki ki ho‘o ngaahi ngāue na ‘oku ke fai.

⁴He tala‘ehai ‘oku ai ha taha te ne fai fufū ha me‘a; ‘osi, ‘oku ne feinga ke ato, Kapau leva oku ke fai ‘a e ngaahi me‘a ko ia, pe‘i ‘ai ke ke e‘a ki māmani.

⁵He na‘a mo hono ngaahi tokoua na‘e ‘ikai te nau tui pīkitai kiate ia.

⁶Pea lea ai ‘a Sīsū kiate kinautolu, Ko hoku taimi kuo te‘eki hokosia: ka ko homou taimi ‘oku hoko ma‘u pē.

⁷Tala‘ehai ‘e lava ‘e māmani ke fehi‘a kiate kimoutolu: ko au pē ‘oku ne fehi‘a ki ai, koe‘uhi ko au pē ‘oku ou fakahaa‘ia ‘oku kovi ‘ene ngaahi ngāue.

⁸Mou ‘alu hake kimoutolu ki he kātoanga: ‘e ‘ikai te u ‘alu leva[16] ki he kātoanga ni; koe‘uhi kuo te‘eki kakato hoku taimi.

⁹Hili ‘ene lea pehē kiate kinautolu, na‘a ne nofo pē ‘i Kāleli.

¹⁰Ka ‘oka hili ‘a e ‘alu ‘a hono kāinga ki he kātoanga, pea toki ‘alu hake mo ia foki; kae ‘ikai fakae‘a, kae hangē ha ‘alu fufū.

¹¹Ko ia na‘e kumi kiate ia ‘e ha‘a Siu ‘i he kātoanga, ‘o nau pehē, Kofa‘ā ‘a e siana ko ia?

¹²Pea na‘e lahi ‘a e lāutu‘u ‘iate ia ‘a e kakai: na‘e pehē ha ni‘ihi, Ko e tangata lelei ia: ka ka pehē ‘e he ni‘ihi, ‘Oku ‘ikai; ka ‘oku ne takihee‘i ‘a lāuvale.

¹³Ka tala‘ehai na‘e ai ha taha ‘e lea mālohi ‘iate ia, ko ‘enau manavahē ki ha‘a Siu.

¹⁴Pea kuo ‘osi mai hono vaeua ‘o e kātoanga, pea me‘a hake ‘a Sīsū ki he Temipale, ‘o ne faiako ai.

¹⁵Pea ofo ai ‘a ha‘a Siu ‘o nau pehē, ‘Oku ma‘u mei fē ‘e he Siana ni ‘ene poto ‘i he ngaahi tohi, he na‘e ‘ikai te ne ‘i ha ako?

¹⁶Pea tali ai ‘e Sīsū kiate kinautolu, ‘o pehē, Ko ‘eku tokāteline ‘oku ‘ikai ‘a‘aku, ka ‘oku ‘a‘ana na‘a ne fekau mai au.

¹⁷Kapau ko e loto ‘o ha taha ke fai ‘a e finangalo ‘o ‘ene ‘afio, ‘e faifai pea mahino kiate ia ‘eku tokāteline, pe ko e me‘a mei he ‘Otua ia, pe ko au pē ‘oku ou lea ‘iate au.

¹⁸Ko ia ‘oku lea meiate ia pē, ‘oku ne tuli pē ki hono ongoongo ‘o‘ona; ka ko ia ‘oku ne tuli ki he ongoongo ‘o ia na‘a ne fekau mai ia, ko e toko taha ko ia ‘oku mo‘oni, pea ‘oku ‘ikai ha ta‘etotonu ‘i ai.

¹⁹‘Ikai na‘e ‘atu ‘e Mōsese ‘a e Lao kiate kimoutolu, ka tala‘ehai ‘oku tauhi ‘a e Lao ‘e hamou toko taha? Ko e hā ē, ho‘omou tuli ke tāmate‘i au?

²⁰Pea tali ‘a e kakai, ‘Oku ‘iate koe ha tēvolo: ko hai ‘oku tuli ke tāmate‘i koe?

²¹Pea tali ‘e Sīsū, ‘o ne pehē kiate kinautolu, Ko e fo‘i ngāue e ne u fai, pea mou ofo ai kotoa pē.

²²Ko hono ‘uhinga ia na‘e tuku ‘e Mōsese kiate kimoutolu ‘a e kamu; (ka tala‘ehai ko e me‘a ‘a Mōsese ia, ka ko e me‘a mei he‘enau ngaahi kui) pea neongo ko e Sāpate, ka ‘oku mou kamu pē ha tangata.

²³Pea kapau ā ‘oku fai ‘a e kamu ki ha tangata ‘i he ‘aho Sāpate, koe‘uhi ke ‘oua na‘a maumau ‘a e Lao ‘a Mōsese; pea ‘oku mou ‘ita koā kiate au, koe‘uhi ko ‘eku ngaohi ha tangata ke mo‘ui haohaoa ‘i he ‘aho Sāpate?

²⁴‘Oua na‘a mou fakaanga ‘o fai ki he me‘a ‘oku ha kitu‘a; ka mou fakaanga ke totonu.

²⁵Ko ia na‘e lea ha ni‘ihi mei he kakai ‘o Selusalema, ‘Ikai ko eni ia ‘oku nau tuli ke tāmate‘i?

²⁶Pea vakai, ‘oku ne lea mālohi, pea ‘oku ‘ikai te nau momo‘i fai ha lau ki ai. Kuo ha mo‘oni koā ki he hou‘eiki ko e Mīsaia ‘eni, ‘o?

²⁷Ka ko e me‘a ki he siana ni, ‘oku tau lāu‘ilo ‘a e potu ‘oku ne ha‘u mei ai: ka ‘oka hoko mai ‘a e Mīsaia, tala‘ehai ‘e ‘ilo ‘e ha taha, pe ‘oku ne mei fē.

²⁸Ko ia na‘e kalanga ‘a Sīsū ‘i hē, Temipale ‘i he‘ene fai ako, ‘o ne pehē, ‘Oku mo‘oni ‘oku mou ‘ilo au, pea ‘oku mou ‘ilo ‘a e potu ‘oku ou ha‘u mei ai: pea tala‘ehai kuo u ha‘u ‘iate au pē, ka ‘oku ‘i ai ha toko taha, ko e mo‘oni, na‘a ne fekau mai au, ‘a ia ‘oku ‘ikai te mou ‘ilo‘i ‘e kimoutolu.

²⁹‘Oku ou ‘ilo ia ‘e au: he ‘oku ou meiate ia, pea ko ia ia na‘a ne fekau mai au.

³⁰Ko ia na‘a nau feinga ke puke ia: ka na‘e ‘ikai ala mālohi kiate ia ‘e ha taha, koe‘uhi kuo te‘eki hokosia hono taimi.

³¹Pea na‘e tui pīkitai kiate ia ha tokolahi ‘o lāuvale, ‘o nau pehē, Neongo ‘e ha‘u ‘a e Mīsaia, ‘e lahi koā ‘ene mana te ne fai ‘i he fai ‘a e tangata ni?

³²Pea fanongo ‘a e kau Fālesi ki he mumuhu pehē ‘a e kakai kiate ia; pea fekau ‘e he hou‘eiki taula‘eiki mo e kau Fālesi ha kau ‘ōfisa ke puke ia.

³³Ko ia na‘e folofola ai ‘a Sīsū, ‘o pehē, ‘Oku toe si‘i pē ‘eku ‘iate kimoutolu, pea u ‘alu kiate ia na‘a ne fekau mai au.

³⁴Te mou kumi au, ka ‘e ‘ikai te mou ‘ilo au: pea ko e potu ‘oku ou ‘i ai ‘e ‘ikai te mou fa‘a a‘u ki ai.

³⁵Ko ia na‘e fealēlea‘aki ai ‘a ha‘a Siu, Ko e teu ‘alu ki fē ‘a e siana ni, ‘a ia ‘e ‘ikai te mau ‘ilo ai ia? he ‘oku ne teu ‘alu koā ki he koto movete na ko e kau Kalisi, ke ako ‘a e kau Kalisi?

³⁶Ko e hā ‘ene lea ko eni ‘oku ne pehē, Te mou kumi au, ka ‘e ‘ikai te mou ‘ilo au; pea ko e potu ‘oku ou ‘i ai, ‘e ‘ikai te mou fa‘a a‘u ki ai?

³⁷Pea ko eni, ‘i he ‘aho faka‘osi ‘o e kātoanga, hono ‘aho lahi, na‘e hanga ‘a Sīsū ‘o tu‘u, ‘o ne kalanga ‘o pehē, Ka ai ha taha ‘oku fie inua, ke ne ha‘u kiate au ‘o inu.

³⁸‘Ilonga ‘a ia ‘oku tui pīkitai kiate au, pea hangē ko e lau ‘a e Tohitapu, ‘e tafe atu mei hono manava ha ngaahi vaitafe ‘o e vai mo‘ui.[17]

³⁹(Ka na‘e kau ‘ene lea ko ia ki he Laumālie, ‘a ia ka ma‘u ‘e kinautolu na‘e tui pīkitai kiate ia: he kuo te‘eki ai ‘a e Laumālie, koe‘uhi kuo te‘eki fakalāngilangi‘i ‘a Sīsū.)

⁴⁰Pea ko e ni‘ihi ‘o lāuvale, ‘i he‘enau fanongo ki he ngaahi lea ko ia, na‘a nau pehē, Tā ko e mo‘oni, ko eni ia ‘a e Palōfita.[18]

⁴¹Pea pehē ‘e he ni‘ihi, Ko eni ia ‘a e Mīsaia. Ka ka pehē ‘e ha ni‘ihi, He ‘oku ha‘u koā ‘a e Mīsaia mei Kāleli, ‘o?

⁴²‘Ikai ‘oku lau ‘e he Tohitapu, ‘e tupu ‘a e Mīsaia mei he hako ‘o Tēvita, pea te ne ha‘u mei Pētelihema, ko e vilisi na‘e ‘i ai ‘a Tēvita?

⁴³Ko ia na‘e hoko ha mavahevahe ‘i he kakai koe‘uhi ko ia.

⁴⁴Pea na‘e loto honau ni‘ihi ke puke ia; ka tala‘ehai na‘e ‘i ai hanau taha ‘e ala fakamālohi ki ai.

⁴⁵Pea omi ai ‘a e kau ‘ōfisa ki he hou‘eiki taula‘eiki mo e Fālesi; pea me‘a kiate kinautolu ‘a e hou‘eiki ko ia, Ko e hā kuo ‘ikai ai te mou taki mai ia?

⁴⁶Pea tali ‘a e kau ‘ōfisa, ‘Ā, Te‘eki ha tangata ‘e lea hangē ko ia.

⁴⁷Pea tali ‘a e kau Fālesi ki ai, Kuo taki hē mo kimoutolu foki, ‘o?

⁴⁸Hono ai ha taha ‘i he hou‘eiki kuo tui kiate ia, pe ha taha ‘o e kau Fālesi?

⁴⁹Ka ko lāuvale na ta‘e‘ilo ki he Lao, ko e koto mala‘ia kinautolu.

⁵⁰Pea pehē ‘a Nikotimasi kiate kinautolu, (‘a ia na‘e ha‘u kiate ia ‘i mu‘a, ko e toko taha foki ia ‘iate kinautolu),

⁵¹He ko e anga ‘o ‘etau lao ke fakamaau ha tangata, ‘i he te‘eki ke fanongo ki ha‘ane fakamatala, pe mahino ‘a e me‘a kuo ne fai?

⁵²Pea nau tali ‘o pehē ki ai, He ko e Kāleli foki mo koe? Hākule mu‘a ‘o ‘ilo, ‘oku ‘ikai ha palōfita ‘e tupu[19] mei Kāleli.

⁵³Pea nau ‘alu takitaha ki hono ‘api.