Read KO E TOH TAPU KATOA TONGA Sioné 8 Bible Online

Sioné 8 - KO E TOH TAPU KATOA TONGA bible

Sioné 8

¹KA ka ‘alu ‘a Sīsū ki he mo‘unga ko ‘Ōlive.

²Pea ne toe uhu ki he Temipale, pea tātānaki mai kiate ia ‘a e kakai kotoa; pea ne nofo hifo ‘o ako kinautolu.

³Pea taki mai ‘e he kau sikalaipe mo e kau Fālesi ha fefine, na‘e mo‘ua ‘ene angahala: pea nau fokotu‘u ia ‘i he ha‘oha‘onga.

⁴Pea toki lea kiate ia ‘e he kau taula‘eiki, ko ‘enau tauhele ia, hei‘ilo te nau ma‘u ai ha me‘a mōno talatalaaki‘i, ‘o nau pehē, Tangata‘eiki, ko e fefine ni na‘e mātu‘aki puke he‘ene tono tangata.

⁵Pea ko Mōsese na‘a ne tu‘utu‘uni ‘i he Lao, ke tolomaka‘i ‘a e fa‘ahinga pehē: ka ko e hā ho‘o lau ‘A‘au ki ai?

⁶Ka ka punou hifo ‘a Sīsū, ‘o ne kamata tohi ‘i he kelekele ‘aki hono tuhu.

⁷Ka ‘i he‘enau nafui ‘enau fehu‘i, na‘a ne mālanga hake, ‘o ne folofola kiate kinautolu, Ko ia ‘iate kimoutolu ‘oku ‘ata‘atā mei he angahala, ke ‘a‘ana ‘a e fuofua tolo ki he fefine.

⁸Pea ne toe punou, ‘o tohi ‘i he kelekele ‘aki hono tuhu.

⁹Ka ka hūhū taha ki tu‘a ‘a ha‘a Siu, ‘o fua fai mei he mātu‘a, kae ‘oua ke nau ‘osi ki tu‘a: pea na‘e toe ‘a Sīsū toko taha, pea mo e fefine na‘e kei tu‘u ‘i he ha‘oha‘onga.

¹⁰Pea malanga hake ‘a Sīsū, ‘o ne pehē ki he fefine, Kofa‘ā kinautolu? Kuo ‘ikai ha taha te ne fakamāu‘i koe?

¹¹Pea pehē ange ‘e he fefine, ‘Eiki, ‘oku ‘ikai. Pea me‘a ‘e ia, Pea ‘e ‘ikai te u fakamāu‘i koe ‘e au: ‘alu ā; hili ‘eni ‘oua te ke toe fai angahala.[20]

¹²Pea toe folofola ‘a Sīsū kiate kinautolu, ‘o pehē, Ko au pē ko e Maama ‘o Māmani: ko ia ‘oku ne muimui kiate au, ‘e ‘ikai ‘aupito te ne fononga ‘i he po‘uli, ka te ne ma‘u ‘a e maama ‘o e mo‘ui.

¹³Ko ia na‘e lea ai ‘a e kau Fālesi kiate ia, ‘Oku ke fakamo‘oni koe ‘e koe; ta ko ho‘o fakamo‘oni ‘oku ‘ikai mo‘oni.

¹⁴Pea tali ‘e Sīsū ‘o me‘a kiate kinautolu, Neongo ‘oku ou fakamo‘oni au ‘e au, ka ‘oku mo‘oni pē ‘eku fakamo‘oni: koe‘uhi ‘oku ou ‘ilo ‘a e potu na‘a ku ha‘u mei ai, mo e potu ‘oku ou ‘alu ki ai; ka ko kimoutolu, ‘oku ‘ikai te mou ‘ilo pē ‘oku ou ha‘u mei fē, pe ‘alu ki fē.

¹⁵‘Oku mou fakaanga fakakakano pē ‘e kimoutolu; ka ko au ‘oku ‘ikai te u anga‘i ha taha.

¹⁶Pea neongo foki ‘oku ou fakaanga, ka ‘oku totonu ‘eku fakaanga: koe‘uhi ‘oku ‘ikai te u toko taha, ka ‘oku ma toko ua mo e Tamai na‘a ne fekau mai au.

¹⁷Pea kuo tohi foki ‘i ho‘omou lao, kapau ko e fakamo‘oni ‘a ha ongo tangata, pea tā ‘oku mo‘oni.

¹⁸Ko au pē ha taha ‘oku fakamo‘oni kiate au, pea ‘oku fakamo‘oni kiate au ‘e he Tamai na‘a ne fekau mai au.

¹⁹Ko ia na‘a nau pehē kiate ia, Kofa‘ā ia ho‘o tamai na? Pea tali ‘e Sīsū, ‘Oku ‘ikai te mou ‘ilo au, pea ‘oku ‘ikai te mou ‘ilo ‘eku Tamai: ka ne mou ‘ilo au, pehē ne mou ‘ilo mo ‘eku Tamai foki.

²⁰Ko e ngaahi lea ko ia na‘a ne fai ‘i he potu ‘o e seifi, ‘i he‘ene faiako ‘i he Temipale: pea na‘e ‘ikai puke ia ‘e ha taha; koe‘uhi kuo te‘eki hokosia hono taimi.

²¹Pea na‘a ne toe me‘a kiate kinautolu, ‘Oku ou ‘alu au, pea te mou kumi au, pea te mou mate ‘i ho‘omou angahala: ko e potu ‘oku ou ‘alu ki ai, ‘e ‘ikai te mou lava ke a‘u ki ai ‘e kimoutolu.

²²Ko ia na‘e lea ai ‘a ha‘a Siu He te ne tāmate‘i ‘e ia ia, ‘a ia, ‘oku ne pehē ai, Ko e potu ‘oku ou ‘alu ki ai, ‘e ‘ikai te mou lava ke a‘u ki ai ‘e kimoutolu?

²³Pea ne pehē kiate kinautolu, Ko kimoutolu ‘oku mou mei lalo: ko au ‘oku ou mei ‘olunga: ko kimoutolu ‘oku mou ‘o e maama ko eni: ‘oku ‘ikai te u ‘o e maama ko eni au.

²⁴Ko ia na‘a ku pehē ai kiate kimoutolu, Te mou mate ‘i ho‘omou ngaahi angahala: he kapau ‘e ‘ikai te mou tui ko au ia, te mou mate ‘i ho‘omou ngaahi angahala.

²⁵Ko ia na‘a nau pehē ai kiate ia, Ko hai tū koe? Pea folofola ‘a Sīsū kiate kinautolu, ‘Ā, ko e hā ‘oku ou momo‘i talanoa ai mo kimoutolu?[21]

²⁶‘Oku lahi pē ‘eku me‘a ke lea ki ai, mo ‘eku fakaanga ke fai ‘iate kimoutolu — ka neongo ia, ka ‘oku mo‘oni ‘a ia ne fekau mai au; pea ko e ngaahi me‘a kuo u fanongo meiate ia, ‘oku ou tala ia ki māmani.

²⁷Na‘e ‘ikai mahino kiate kinautolu, ko ‘ene lea kiate kinautolu ‘i he Tamai.

²⁸Ko ia na‘e folofola ai ‘a Sīsū, ‘Oka mou ka hiki ki ‘olunga ‘a e Fanautama ‘a Tangata, ‘e toki mahino kiate kimoutolu, ko au ia, mo e ‘ikai te u momo‘i fai ha me‘a ‘iate au; kae hangē tofu pē hoku ako ‘e he Tamai, ‘oku pehē ‘eku tala ‘a e ngaahi me‘a ko eni.

²⁹Pea ko ia na‘a ne fekau mai au ‘oku ne ‘iate au: na‘e ‘ikai te ne tuku au ke tuēnoa; koe‘uhi ‘oku ou fai ma‘u ai pē ‘a e ngaahi me‘a ‘oku ne hōhō‘ia ai.

³⁰‘I he‘ene lea pehē, na‘e ai ha tokolahi na‘e tui pīkitai kiate ia.

³¹Pea lea ai ‘a Sīsū kiate kinautolu ‘o ha‘a Siu kuo tui kiate ia, Kapau te mou nofo ma‘u ‘i he‘eku akonaki, ko ‘eku kau ako mo‘oni kimoutolu;

³²pea ‘e faifai pea mahino kiate kimoutolu ‘a e mo‘oni, pea ‘e fakatau‘atāina ‘a kimoutolu ‘e he mo‘oni.

³³Pea nau tali ai kiate ia, Ko e hako ‘o ‘Epalahame kimautolu, pea kuo te‘eki ke mau pōpula ki ha taha ‘i ha taimi: pea fēfē ai ho‘o lau na, ‘o pehē, ‘e faifai pea mou tau‘atāina?

³⁴Pea tali ‘e Sīsū kiate kinautolu, Ko au ē, ko au ē, ‘oku ou tala atu, ‘Ilonga ‘a ia ‘oku fai angahala, ko e pōpula ia ‘a angahala.

³⁵Pea ko e pōpula ‘oku ‘ikai te ne nofo ‘i he fale ‘o ta‘engata: ko e ‘Alo pē ‘oku nofo ‘o ta‘engata.

³⁶Ko ia kapau ‘e fakatau‘atāina kimoutolu ‘e he ‘Alo, te mou toki tau‘atāina mo‘oni.

³⁷‘Oku ou ‘ilo pē ko e hako ‘o ‘Epalahame kimoutolu; ka neongo ia, ka ‘oku mou feinga ke tāmate‘i au, koe‘uhi ‘oku ‘ikai ke lalaka atu ‘a ‘eku akonaki ‘i homou loto.

³⁸Ko au ‘oku ou tala atu ‘a e ngaahi me‘a kuo u mamata ki ai ‘i he‘eku ‘i he Tamai: ko ia foki mou fai ‘e kimoutolu ‘a e ngaahi me‘a ne mou fanongo mei he Tamai.

³⁹Pea nau tali ‘o pehē ki ai, Ko ‘emau tamai ko ‘Epalahame ia. Pea lea ‘a Sīsū kiate kinautolu, Kapau ko e fānau ‘a ‘Epalahame kimoutolu, pe‘i mou fai[22] ‘a e ngaahi ngāue ‘a ‘Epalahame.

⁴⁰Ka vakai, ‘oku mou feinga ke tāmate‘i au, ‘a au ko e tangata kuo u tala kiate kimoutolu ‘a e mo‘oni, ‘a ia na‘a ku fanongo ki ai mei he ‘Otua: tala‘ehai ne fai ‘e ‘Epalahame ha me‘a pehē.

⁴¹Ka ko kimoutolu ‘oku mou fai tu‘u ‘a e ngaahi ngāue ‘a ho‘omou Tamai. Pea nau pehē ki ai, Tala‘ehai kuo mau tupu fe‘auaki kimautolu; ‘oku taha pē ‘emau tamai, ko e ‘Otua.

⁴²Pea folofola ‘a Sīsū kiate kinautolu, Ka ne ko ho‘omou tamai ‘a e ‘Otua, pehē te mou ‘ofa kiate au: he ko e ‘Otua na‘a ku ha‘u mei ai, pea ‘oku ou ‘i heni ai; ‘io, ko ‘eku ha‘u foki na‘e ‘ikai ‘iate au, ka na‘e fekau mai au ‘e he ‘Ene ‘Afio.

⁴³Ko e hā ‘oku ‘ikai ai te mou ‘ilo hoku le‘o? koe‘uhiā ‘oku ‘ikai te mou fa‘a tali ‘eku akonaki.

⁴⁴Ko e tamai kuo mou tupu mei ai ko e Tēvolo, pea ko e ngaahi manako ‘o ho‘omou tamai ‘oku mou loto ke fai, Ko e toko taha ko ia ko e tāmate-tangata mei he kamata‘anga, pea na‘e ‘ikai te ne tu‘unga ki he mo‘oni, koe‘uhiā ‘oku ‘ikai ha mo‘oni ‘iate ia. ‘oka lea loi hamou toko taha, ko ‘ene lea‘aki mei hono fa‘ahinga: he ko e loi ia, pea pehē mo ‘ene tamai.

⁴⁵Ka koe‘uhi ko ‘eku lea‘aki ‘a e mo‘oni, ko ia ai ‘oku ‘ikai te mou tui kiate au.

⁴⁶Ko hai ‘iate kimoutolu ‘oku ne mafakamo‘oni ha‘aku momo‘i angahala pea kapau ‘oku ou lea mo‘oni, ko e hā ‘oku ‘ikai ai te mou tui kiate au?

⁴⁷Ko ia kuo ‘o e ‘Otua, ‘oku ne tali ‘a e ngaahi folofola ‘a e ‘Otua: ko hono ‘uhinga ē ‘oku ‘ikai ai te mou tali, koe‘uhi ‘oku ‘ikai ‘o e ‘Otua ‘a kimoutolu.

⁴⁸Pea tali ‘e ha‘a Siu, ‘o nau pehē ki ai, Hono ‘ikai mo‘oni ‘a e lea ‘oku mau fai, ‘o pehē, Ko e Samēlia koe, mo e ‘iate koe ha tēvolo?

⁴⁹Pea tali ‘a Sīsū, Ko au ‘oku ‘ikai te u tēvoloa; kaekehe, ‘oku ou faka‘apa‘apa‘ia ‘eku Tamai, pea ko kimoutolu pē ‘oku mou fakalielia‘i au.

⁵⁰Ka ko au ‘oku ‘ikai te u feinga‘i ‘a e ongoongo ‘o‘oku: ‘oku ‘i ai ha toko taha ‘oku ne feinga‘i ia, pea ‘oku ne fakamaau ‘a e me‘a.

⁵¹Ko au ē, ko au ē, ‘oku ou tala atu, Kapau kuo tauhi ‘eku lea ‘e ha taha, ‘e ‘ikai ‘aupito te ne mamata ki he mate ‘o ta‘engata.

⁵²Pea lea ai kiate ia ‘a ha‘a Siu, ‘āua; kuo mau ‘ilo ‘eni ‘oku ‘iate koe ha tēvolo. Ko ‘Epalahame na‘a ne pekia, pea mo e kau Palōfita; pea ko eni ‘oku ke pehē ‘e koe, Kapau kuo tauhi ‘eku lea ‘e ha taha, ‘e ‘ikai ‘aupito te ne kamata ‘a e mate, ‘o ta‘engata.

⁵³He ‘oku ke lahi koā ‘i he‘etau tamai ko ‘Epalahame? ka kuo pekia ia, pea kuo pekia mo e kau Palōfita: ‘oku ke lau ko hai koe?

⁵⁴Pea tali ‘e Sīsū, Kapau te u fakahīkihiki‘i au ‘e au, ko e launoa hoku ongoongo; ko ‘eku Tamai ia ‘oku ne fakahīkihiki‘i au, ‘a ‘Ene ‘Afio ‘a ia ‘oku mou pehē, ko homou ‘Otua ia:

⁵⁵ka tala‘ehai kuo mou ‘ilo‘i ia; ka ko au ‘oku ou lāu‘ilo ia; ‘io, kapau te u pehē ‘oku ‘ikai te u ‘ilo ia, tā te u tatau mo kimoutolu, ko e loi: ka ‘oku ou lāu‘ilo pē ‘a ‘Ene ‘afio, pea ‘oku ou tauhi ‘ene folofola.

⁵⁶Ko ‘Epalahame ko ho‘omou tamai, na‘a ne hākailangitau ‘i he‘ene ‘ilo te ne mamata ki hoku ‘aho: pea na‘a ne mamata ki ai, ‘o ne fiefia.

⁵⁷Pea lea ‘e ha‘a Siu, ‘Ā, kuo te‘eki ke ke nimangofulu ta‘u, pea kuo ke mamata koā kia ‘Epalahame?[23]

⁵⁸Pea folofola ‘a Sīsū kiate kinautolu, Ko au ē, ko au ē, ‘oku ou tala atu, Te‘eki ke fanau‘i ‘a ‘Epalahame, ‘oku ou ‘i ai pē.

⁵⁹Pea nau to‘o maka ai ke pe‘ehi kiate ia: ka fufū pē ‘e Sīsū ia, ‘o ne ‘alu atu mei he Temipale.