Read KO E TOH TAPU KATOA TONGA Sioné 9 Bible Online

Sioné 9 - KO E TOH TAPU KATOA TONGA bible

Sioné 9

¹Pea ‘i he‘ene ‘alu ange, na‘a ne ‘ilo ha tangata na‘e kui, ‘a ia na‘e fanau‘i ‘oku pehē.

²Pea fehu‘i kiate ia ‘e he‘ene kau ako, ‘o pehē, Lāpai, ko hai ne angahala, ‘a e siana ni, pe ko ‘ene mātu‘a, ‘o tupu ai hono fanau‘i kui?

³Pea tali ‘e Sīsū, Na‘e ‘ikai ko e angahala ‘a e siana ni, pe ko ‘ene mātu‘a: ka koe‘uhi ke fakae‘a ‘iate ia ‘a e ngaahi ngāue ‘a e ‘Otua.

⁴Kuo pau ke tau fai ‘a e ngāue ‘a‘ana ma‘ane fekau mai au lolotonga ‘oku ‘aho: ‘oku ‘unu mai ‘a e pō, ‘a ia ‘e ‘ikai lava ai ‘e ha taha ke ngāue.

⁵Ka u ka ‘i māmani, ko e maama au ‘a māmani.

⁶Pea ‘i he‘ene lea pehē, na‘a ne ‘a‘anu ki he kelekele, ‘o ne ngaohi ‘aki ‘a e fāvai ha me‘i pelepela, mo ne pani ‘aki ‘ene pelepela ‘a e ongo fo‘i mata,

⁷‘o ne folofola kiate ia, Mole pē ‘o fufulu ‘i he vai ko Sailoame, (‘a ia ko hono hiki, Ko e fekaua). Ko ia na‘a ne ‘alu ‘o fufulu, ‘o ne ha‘u kuo ‘ā.

⁸Ko ia ko hono ngaahi kaungā ‘api, pea mo e kakai na‘e fa‘a tokanga mu‘a kiate ia, ko e toko taha na‘e mo‘ui kole pē, na‘a nau pehē, ‘Ikai ko e siana ‘eni na‘e nofo hē, ‘o hanganaki kole?

⁹Na‘e pehē ‘e ha ni‘ihi, Ko eni ia; pea pehē ha ni‘ihi, ‘Oku ‘ikai, ka ‘oku ne hangē pē ko ia: ka ka pehē ‘e ia, Ko au ia.

¹⁰Pea nau pehē ange, Na‘e faka‘ā fēfē ho mata?

¹¹Pea tali ‘e ia, Ko e tangata ‘oku ui ko Sīsū, na‘a ne ngaohi ha pelepela, ‘o ne pani ‘aki hoku ongo mata ni, mo ne pehē mai, Mole pē ki Sailoame ‘o fufulu: ko ia na‘a ku ‘alu ‘o fufulu, pea u ‘a hake.

¹²Pea nau pehē ki ai, Kofa‘ā ‘a e tangata ko ia? Pea ne pehē, ‘Oku ‘ikai te u ‘ilo.

¹³Pea nau taki ia ki he kau Fālesi, ‘a e tangata na‘e kui mu‘a.

¹⁴Pea tā ko e Sāpate ‘a e ‘aho ne ngaohi ai ‘e Sīsū ‘a e pelepela, mo ne faka‘ā hono mata.

¹⁵Ko ia na‘e toe fehu‘i kiate ia ‘e he kau Fālesi foki, pe na‘e fēfē ‘ene ‘ā hake. Pea ne pehē kiate kinautolu, Na‘a ne ‘ai ha pelepela ki hoku poko‘i mata ni, pea u fufulu, pea u ‘ā.

¹⁶Pea lea ai ha ni‘ihi ‘o e kau Fālesi, ‘o pehē, Tala‘ehai ko ha tangata ia mei he ‘Otua: he ‘oku ‘ikai te ne tauhi ‘a e Sāpate. Ka ka pehē ‘e ha ni‘ihi, ‘O lava fēfē ‘e ha tangata ‘oku angahala ke fai ha ala mana pehē? Pea na‘e hoko ha mavahevahe ‘iate kinautolu.

¹⁷Pea nau toe lea ai ki he motu‘a na‘e kui, Ko e hā ha‘o poa ‘a‘au ki he tangata na, he‘ene faka‘ā ho mata? Pea ne pehē, Ko e palōfita ia.

¹⁸Ko ia ko ha‘a Siu na‘e ‘ikai te nau tui ne kui ‘a e tangata, pea toe ‘ā, kae‘oua ke nau ui ange ‘a e mātu‘a ‘a e tangata kuo faka‘ā;

¹⁹Mo nau ‘eke kiate kinaua, ‘o pehē, Ko eni ho‘omo tama, ‘a e toko taha ‘oku mo pehē na‘e fanau‘i kui? pea ‘oku fakafēfē ai ‘ene ‘ā ni?

²⁰Pea na‘e tali ‘e he‘ene mātu‘a ‘o na pehē, ‘Oku ma ‘ilo ko e siana ni ko homa ‘uhiki, pea na‘e fanau‘i kui:

²¹ka ‘oku ‘ikai te ma lave‘i pē ko ‘ene ‘ā ni ‘i he hā; pea ‘oku ‘ikai te ma lave‘i ‘e kimaua pē ko hai ne faka‘ā hono mata. Mou ‘eke kiate ia; kuo ne tangata, te ne tali ‘e ia ma‘ana.

²²Na‘e lea pehē ‘ene mātu‘a ko ‘ena manavahē ki ha‘a Siu; he kuo ‘osi tu‘utu‘uni ‘e ha‘a Siu, ka ‘ilonga ha taha te ne fakamo‘oni ko e Mīsaia ‘a Sīsū, ‘e hifo ia mei he falelotu.

²³Ko hono ‘uhinga e ‘o e pehē ‘e he‘ene mātu‘a, Kuo tangata ia: mou fai kiate ia ho‘omou ‘eke.

²⁴Ko ia na‘a nau ui ange ‘a e tangata na‘e kui, ko hono tu‘o ua, ‘o nau pehē ki ai, Ke ke ‘a‘apa ki he ‘Otua: ‘oku mau ‘ilo ‘e kimautolu ko e tangata ni ko e angahala.

²⁵Pea tali ai ‘a e siana, Ko e me‘a ki ha‘ane angahala, ‘oku ‘ikai te u ‘ilo ha me‘a ki ai: ko e me‘a pē taha ‘oku ou ‘ilo, ko e kui au ka ‘oku ou ‘ā ni.

²⁶Pea nau pehē ai kiate ia, Ko e hā ‘a e me‘a na‘a ne fai kiate koe? na‘e fēfē ‘ene faka‘ā ho mata na?

²⁷Pea ne tali kiate kinautolu, Kuo ‘osi ‘eku tala kiate kimoutolu, pea na‘e ‘ikai te mou tokanga: ko e hā ‘oku mou toe fie fanongo ai ki ai? na‘a ‘oku mou fie ului ki he‘ene kau ako ‘a kimoutolu foki?

²⁸Pea nau ngaohi ia, ‘o nau pehē, Ko koe pē ko e ako ‘a e siana na; ka ko kimautolu ko e kau ako ‘a Mōsese.

²⁹‘Oku mau ‘ilo kuo folofola ‘e he ‘Otua kia Mōsese: ka ko e siana na, ‘oku ‘ikai te mau ‘ilo pē ‘oku mei fē ia.

³⁰Pea tali ‘a e tangata, ‘o ne pehē kiate kinautolu, ‘Io, ko ia; tā ko e toki me‘a tofo ‘eni! ‘a e ‘ikai ‘ilo ‘e kimoutolu pē ‘oku mei fē ia; ‘osi, ko eni kuo ne faka‘ā hoku poko‘i mata ni!

³¹‘Oku tau lāu‘ilo, ko e ‘Otua ‘oku ‘ikai te ne tali ha kakai ‘oku angahala: kae ‘ilonga ‘a ia ‘oku ‘a‘apa ki he ‘Otua, mo fai hono finangalo, ‘oku ne talia ha toko taha pehē.

³²Talu mei mu‘a ‘i mu‘a kuo te‘eki ke talanoa‘ia ‘o pehē, kuo faka‘ā ‘e ha taha ‘a e mata ‘o ha toko taha ne fanau‘i kui.

³³Ka ne ‘ikai ko e toko taha ia mei he ‘Otua, ne ‘ikai te ne lava ha momo‘i me‘a.

³⁴Pea nau tali kiate ia, Ko e koto tupu angahala koe, pea ko ho‘o hanga e ‘o ako mai kiate kimautolu? Pea nau kapusi ia ki tua‘ā.

³⁵Pea na‘e fanongo ‘e Sīsū kuo nau kapusi ia ki tua‘ā; pea ne kumi ki ai, ‘o ne pehē ange, ‘Oku ke tui ki he Fanautama ‘a Tangata?

³⁶Pea tali ‘e he siana, Pea ko hai ia, ‘Eiki, ka u tui ki ai?

³⁷Pea folofola ‘a Sīsū, ‘ē, kuo ke mamata kiate ia, pea ko ia ia ‘oku talanoa mo koe.

³⁸Pea pehē ‘e ia, ‘Eiki, ‘oku ou tui pē. Pea ne hū kiate ia.

³⁹Pea folofola ‘e Sīsū, Ko ‘eku ha‘u ‘aku ki māmani, pea iku ai ‘a e fakamaau ki ha tu‘utu‘uni, ‘o pehē, Ke ‘ilonga ‘a kinautolu ‘oku ‘ikai ‘ā ke nau ‘ā; pea ‘ilonga ‘a kinautolu ‘oku ‘ā tokua, pea nau hoko ‘o kui.

⁴⁰Pea fanongo ki he me‘a ko ia ‘e kinautolu ‘o e kau Fālesi na‘e ‘iate ia, pea nau pehē ki ai, Ta ‘apē ‘oku kui mo kimautolu foki, ‘o?

⁴¹Pea folofola ‘a Sīsū kiate kinautolu, Ka ne mou kui, pehē ‘oku ‘ikai ha‘amou angahala: ka ko eni ‘oku mou pehē, ‘Oku mau ‘ā; tā ‘oku nofo ma‘u ho‘omou angahala.