Read KO E TOH TAPU KATOA TONGA ‘Apositoló 11 Bible Online

‘Apositoló 11 - KO E TOH TAPU KATOA TONGA bible

‘Apositoló 11

¹PEA na‘e ongo ki he kau ‘Aposetolo, mo e kāinga kehekehe ‘i Siutea, tā kuo tali ‘e he Senitaile foki ‘a e folofola ‘a e ‘Otua.

²Pea ‘i he ‘alu hake ‘a Pita ki Selusalema, pea ko e fa‘ahinga kamu na‘a nau fakaanga kiate ia,

³‘o nau pehē, Na‘a ke ‘uhi ki ha kau tangata ‘oku ‘ikai kamu, pea ke keinanga mo kinautolu.

⁴Pea hanga ‘a Pita ‘o fakamatala hokohoko kiate kinautolu, ‘o pehē:

⁵Na‘a ku ‘i he kolo ko Siopa, ‘o fai ‘eku lotu; pea ‘āvea hoku loto, ‘o u sio ki ha vīsone, ‘Oku ‘alu hifo ha ‘angame‘a, ‘o hangē hā fu‘u lā, ‘a ia ‘oku tuku hifo mei he langi ‘aki ha hiku‘i maea ‘e fā; pea ne a‘u mai kiate au:

⁶pea ‘i he‘eku sio fakamama‘u ki ai, na‘a ku tokanga‘i ‘o ‘ilo ai ha fanga manu ve‘e fā ‘o e kelekele, kae‘uma‘ā ‘a e manu kaivao, mo e manu totolo, pea mo e fanga manupuna ‘o e ‘atā.

⁷Pea ongo mai foki ha le‘o ‘oku ne pehē mai, Tu‘u, Pita; ‘o tāmate‘i ‘o kai.

⁸Pea u pehē, ‘Ēī, ‘e ‘ikai ha me‘a pehē: he kuo te‘eki si‘i ‘ai ki hoku ngutu ni ha me‘a ‘oku ta‘etaau pe ta‘ema‘a.

⁹Pea hoko mai ‘a e le‘o mei he langi ko hono tu‘o ua, ‘o tali, Ko e ngaahi mea kuo fakama‘a ‘e he ‘Otua, ‘oua te ke pehē ‘e koe ‘oku ta‘etaau.

¹⁰Na‘e fai pehē ‘o tu‘o tolu, pea toe fusi hake kotoa pē ki langi.

¹¹Pea vakai, na‘e tutu‘u mai leva ha tu‘unga tangata ‘e toko tolu ki he ‘api na‘a mau ‘i ai,[14] kuo fekau mai mei Sesalia kiate au.

¹²Pea folofola mai ‘a e Laumālie ke u ō mo kinautolu, ‘o ‘oua ‘e momo‘i tāla‘a. Pea na‘e ō mo au foki ha kāinga ‘e toko ono ‘a e tu‘unga me‘a ni pea mau hū ki he fale ‘o e matāpule:

¹³pea fakamatala ia kiate kimautolu ‘a ‘ene sio ki he ‘āngelo ‘i hono fale, ‘oku ne tu‘u ‘o me‘a mai, Fekau ange ki Siopa ke ‘omi ‘a Saimone, ‘a ia ‘oku hingoa foki ko Pita;

¹⁴pea ‘e fai ‘e ia ‘a e ngaahi fakamatala kiate koe, ‘a ia te ke mo‘ui ai, ‘e koe mo ho fale kotoa.

¹⁵Pea ‘i he‘eku kamata lea, ne hifo ‘a e Laumālie Mā‘oni‘oni kiate kinautolu, ‘o hangē tofu pē ‘ene fai kiate kitautolu ‘i he kamata‘anga.

¹⁶Pea u manatu ki he folofola ‘a e ‘Eiki, ‘a ‘ene pehē, Na‘e papitaiso vai pē ‘e Sione; ka ‘e papitaiso kimoutolu ‘aki ‘a e Laumālie Mā‘oni‘oni.

¹⁷Pea kapau na‘e me‘a‘ofa tatau ‘aki ‘e he ‘Otua kiate kinautolu mo kitautolu ‘i he tui leva ki he ‘Eiki ko Sīsū Kalaisi, ko e taha au koā na‘e kākunga ke ta‘ofi ‘a e ‘Otua?

¹⁸Pea ‘i he‘enau fanongo ki he ngaahi me‘a ko ia, na‘a nau tuku ‘enau lau; ‘o nau fakamālō‘ia ‘a e ‘Otua, ‘o nau pehē, Tā kuo tuku ‘e he ‘Otua ki he Senitaile foki ‘a e fakatomala, koe‘uhi ke nau mo‘ui.

¹⁹Pea ko eni, ko kinautolu na‘e vetekina ‘i he kovi na‘e hoko ‘ia Sitīveni, na‘e a‘u ‘enau ‘alu ki Finisia, mo Saipalo, mo ‘Aniteoke; ka na‘e ‘ikai te nau malanga‘aki ‘a e folofola ki ha ni‘ihi kehe, ngata pē ‘i he kakai Siu.

²⁰Ka na‘e ai honau ni‘ihi ko e kau tangata mei Saipalo mo Sailine, pea ko kinautolu ‘i he‘enau hoko ki ‘Aniteoke na‘a nau lea ki he kakai Kalisi[15] foki, he‘enau malanga‘aki ‘a e ‘Eiki ko Sīsū.

²¹Pea na‘e kau mo kinautolu ‘a e māfimafi ‘o e ‘Eiki; pea na‘e tui ha fu‘u tokolahi, ‘o tafoki ki he ‘Eiki.

²²Pea na‘e pāpātelinga ki he siasi ‘i Selusalema ‘a e talanoa kiate kinautolu, pea na‘a nau tuku atu ‘a Pānepasa ke a‘u ki ‘Aniteoke.

²³Pea ‘i he‘ene lava mai ia, mo vakai ‘a e ‘ofa, tā ‘oku mei he ‘Otua ia, na‘a ne fiefia, pea na‘a ne tokoni kinautolu kotoa pē ke nau nofo ki he ‘Eiki mo e loto pau.

²⁴He ko e tangata lelei ia, pea fonu ‘i he Laumālie Mā‘oni‘oni mo e tui: pea na‘e ului ki he ‘Eiki ha kakai tokolahi.

²⁵Pea ne ‘alu mei ai ki Tāsusi ke kumi ‘a Saula:

²⁶pea ‘i he‘ene ‘ilo ia na‘a ne ‘omi ki ‘Aniteoke. Pea ko ia na‘a na toe nofo fakataha ‘i he siasi ‘o ta‘u kātoa, ‘o na akonekina ha kakai tokolahi: pea hoko ai foki na‘e fuofua ui ‘i ‘Aniteoke ‘a e kau ako ko e kau Kalisitiane.

²⁷‘I he taimi ko ia na‘e ‘alu hifo ha kau palōfita mei Selusalema ki ‘Aniteoke.

²⁸Pea tu‘u honau toko taha na‘e hingoa ko ‘Akapusi, ‘i he hā‘elea ia ‘e he Laumālie, ‘o ne lea fakatātā ki ha fu‘u honge ‘oku ene ke tō ki māmani kātoa: ‘a e honge ko ia na‘e hoko ‘i he kuonga ‘o Kaloti.

²⁹Pea tu‘utu‘uni ‘a e kau ako ke tānaki tokoni, ‘o takitaha ‘omi ha me‘a te ne lava, ke ‘ave ki he kāinga na‘e nofo ‘i Siutea.

³⁰Pea nau fai ia ‘o ‘ave ki he kau faifekau ‘ia Pānepasa mo Saula.