Read KO E TOH TAPU KATOA TONGA ‘Apositoló 12 Bible Online

‘Apositoló 12 - KO E TOH TAPU KATOA TONGA bible

‘Apositoló 12

¹PEA lolotonga ia ne ala ‘e he Tu‘i ko Hēlota[16] ki ha ni‘ihi ‘i he siasi ke ngaohikovi‘i:

²pea na‘a ne tāmate‘i heletā ‘a Sēmisi ko e ta‘okete ‘o Sione.

³Pea ‘i he‘ene vakai ‘oku lelei‘ia ai ‘a e kakai Siu, na‘a ne mōia atu ‘o puke mo Pita, pea ko e ngaahi ‘aho ia ‘o e tapu lēvani.

⁴Pea kuo ne ma‘u ia, na‘a ne ‘ai pilīsone, ‘o ne tuku hono le‘ohi ki ha hoa ‘e fā, ‘o taki toko fā ‘a e sōtia ki he hoa; ‘o ne tu‘utu‘uni ke ‘oua ke hili ‘a e Pāsova pea ne toki taki atu ia, ‘o fokotu‘u ‘i he ‘ao ‘o e kakai.

⁵Ko ia, na‘e le‘ohi pē ‘a si‘i Pita ‘i he pilīsone; ka na‘e ai ha hūfia na‘e fai tōtōaki ki he ‘Otua ‘e he siasi koe‘uhi ko ia.

⁶Pea ‘i he hoko ki he pō kae taki atu pongipongi ia ‘e Hēlota, na‘e mohe ‘a Pita ‘i he vaha‘a ‘o ha ongo sōtia, kuo kii‘i ‘aki ha seini ‘e ua, pea tutu‘u ‘a e ongo le‘o ‘i he tu‘a matapā ‘o tauhi ‘a e pilīsone.

⁷Mo e ‘iloange na‘e tu‘u mai ha ‘āngelo ‘a e ‘Eiki, pea malama mai ha maama ‘i he loki; pea na‘a ne taa‘i ‘a e vakavaka ‘o Pita, ‘o ne langa‘i hake, ‘o ne pehē, Tu‘u ke vave. Pea na‘e ngangana mei hono ongo nima ‘a e ongo seini na‘e ha‘i ‘aki ia.

⁸Pea me‘a ‘a e ‘āngelo kiate ia, ‘Ai ho no‘o, pea fakama‘u ho teka. Pea ne fai. Pea pehē mai ‘e ia, Kahoa ho pulupulu, ‘o muimui mai.

⁹Pea ne hū atu ‘o muimui ki ai; pea na‘e ‘ikai te ne ‘ilo ko e mo‘oni ‘a e me‘a ‘oku fai ‘e he ‘āngelo, ka ne mahalo ko e vīsone ‘oku ne mamata ki ai.

¹⁰Pea kuo na tuku ki mui ‘a e ‘uluaki le‘o mo hono ua, pea na a‘u ki he matapā ukamea, ‘a ia ko e hū‘anga mei kolo; pea mato‘o ia kiate kinaua ‘iate ia pē: pea kuo na hū kitu‘a na‘a na laka atu, ‘o ‘osi mai ha hala ‘e taha; pea toki mole ‘a e ‘āngelo meiate ia.

¹¹Pea ‘i he matala ‘a e loto ‘o Pita, na‘a ne pehē, Tā ‘oku toki e‘a ni kiate au, kuo fekau mo‘oni ‘e he ‘Eiki ‘ene ‘āngelo, pea kuo ne hamusi au mei he nima ‘o Hēlota, mo e fu‘u ‘amanaki ‘a e kakai Siu.

¹²Pea ‘i he o‘o kiate ia ‘a e me‘a, na‘a ne ‘alu ki he fale ‘o Mele ko e fa‘ē ‘a Sione (ko hono hingoa ‘e taha ko Ma‘ake), ‘a ia na‘e lolotonga ‘i ai ha tokolahi kuo fakataha ke hūfia.

¹³Pea ‘i he‘ene tukituki ki he matapā ‘o e fale hū‘anga, na‘e ha‘u ha kaunanga na‘e hingoa ko Lota ke fehu‘i.

¹⁴Pea ‘i he‘ene ‘ilo ko e le‘o ‘o Pita, na‘e pehē ‘ene fiefia na‘e ‘ikai te ne to‘o ‘a e matapā, ka ka lele ia ki loto fale, ‘o fakahā ‘oku tu‘u ‘a Pita ‘i he matapā.

¹⁵Pea nau pehē kiate ia, ‘Oku ke sesele. Ka ka taukave pē ‘a e ta‘ahine, ko ia pē. Pea nau pehē, Tā ko hono ‘āngelo ia.

¹⁶Ka ka hanganaki pē ‘a Pita ‘ene tukituki: pea ‘i he‘enau to‘o ‘a e matapā, ‘o ‘ilo ia, na‘a nau fakatumutumu.

¹⁷Pea ta‘alo atu ‘e ia ke nau fakalongo pē, ‘o ne fakamatala kiate kinautolu ‘a hono fakahaofi ia ‘e he ‘Eiki mei he pilīsone. Na‘a ne pehē foki, Mou tala ‘a e me‘a kia Sēmisi mo e kāinga. Pea ne hū atu ‘o ‘alu ki ha potu kehe.

¹⁸Pea ‘i he‘ene ‘aho hake, ko e me‘a ngei ‘a e puputu‘u ‘a e kau tau, ‘Oiauē! kuo hā ‘a Pita?

¹⁹Pea kuo kumi ‘a Hēlota kiate ia, ‘o ‘ikai ‘ilo, na‘a ne ‘eke ‘a e kau le‘o, ‘o fekau ke taki atu ‘o tāmate‘i. Pea ne ‘alu hifo mei Siutea ki Sesalia, ‘o nofo si‘i ai.

²⁰Pea ko e taimi ko ia na‘e fai ai hono tuputāmaki ki he kakai ‘o Taia mo Saitoni: ka na‘a nau kautaha ‘o ha‘u kiate ia, pea nau fakaloto‘i ‘a Palasito ko e tauhi ‘o e fale mohe ‘o e Tu‘i mo‘onau fotufotuaki, ‘o nau kole ke fakalelei; koe‘uhi na‘e kai ‘utungaki honau fonua mei he fonua ‘o e Tu‘i.

²¹Pea ‘i he hokosia ‘a e ‘aho na‘e kotofa, na‘e ‘ai ‘e Hēlota ha kofu fakatu‘i, ‘o ne nofo ‘i he taloni, ‘o ne fai ha fu‘u malanga kiate kinautolu ‘i he ‘ao ‘o e kakai.

²²Pea kalanga ‘a e kakai, Ko e folofola ‘a ha ‘Otua, ‘o ‘ikai ko ha tangata.

²³Pea te‘ia leva ia ‘e ha ‘āngelo ‘a e ‘Eiki, ko e ‘inanga ‘o e ‘ikai te ne tuku ‘a e kolōlia ki he ‘Otua: pea na‘e keina ia ‘e he ponu, ‘o ne hala.

²⁴Ka ko e folofola ‘a e ‘Otua na‘e tuputupu ma‘u pē, ‘o fakatokolahi.

²⁵Pea ko Pānepasa mo Saula na‘a na foki mei[17] Selusalema ‘i he ‘osi ‘ena fekau, ‘o na ‘ave ‘a Sione, ‘a ia na‘e fakahingoa ko Ma‘ake.