Read KO E TOH TAPU KATOA TONGA ‘Apositoló 13 Bible Online

‘Apositoló 13 - KO E TOH TAPU KATOA TONGA bible

‘Apositoló 13

¹PEA na‘e nofo ‘i ‘Aniteoke, ‘i he siasi na‘e tu‘u ai, ha tu‘unga palōfita mo ha tu‘unga akonaki; ‘a ia ko Pānepasa, pea mo Simione na‘e hingoa ko Naika, mo Lūsio mei Sailine; ko Māneno foki, ‘a ia na‘e huhu taha mo Hēlota ko e tu‘i,[18] pea mo Saula.

²Pea lolotonga ‘enau fai ‘enau lotu ki he ‘Eiki, mo nau ‘aukai, na‘e folofola mai ‘a e Laumālie Mā‘oni‘oni, ‘o pehē, vahe‘i mai mu‘a ma‘aku ‘a Pānepasa mo Saula ki he ngāue kuo u tu‘utu‘uni ma‘anaua.

³Pea nau ‘aukai, mo hūfia, mo hilifaki nima kiate kinaua, ‘o nau toki tukuange ke na ō.

⁴Pea ko eni, ‘i he fekau ange kinaua ‘e he Laumālie Mā‘oni‘oni, na‘a na a‘u hifo ki Selusia; pea na folau mei ai ki Saipalo.

⁵Pea na hifo ‘i Salamisi, ‘o na malanga‘aki ‘a e folofola ‘a e ‘Otua ‘i he ngaahi fale lotu ‘o e kakai Siu: pea na‘e ō mo kinaua ‘a Sione mōna tokoni.

⁶Pea kuo ‘osi ‘a e motu ‘i he‘enau ‘alu, na‘a nau a‘u ki Pefosi, ‘o nau ‘ilo ai ha matāpule Siu, ko e maki mo e palōfita loi, ko hono hingoa ko Pāsīsū:

⁷‘a ia ‘oku na nonofo mo Sesio Paula ko e kōvana, ‘a ia ko e ‘eiki loto matala. Pea fekau ‘e he ‘eiki ko ia ke ‘omi ‘a Pānepasa mo Saula, ‘o ne holi ke fanongo ki he folofola ‘a e ‘Otua:

⁸ka ka ‘ahi‘ahi lolomi kinaua ‘e he maki ko ‘Ēlima (he ko hono hingoa ia ‘i he lea ‘e taha), ‘o ne feinga ke ta‘ofi ‘a e Kōvana mei he lotu.

⁹Pea ko Saula, ‘a ia ko hono hingoa foki ‘a Paula, ne fakafonu ia ‘i he Laumālie Mā‘oni‘oni, pea ne sio fakamama‘u ki he tangata,

¹⁰‘o ne pehē, ‘A e siana fonu ngutungutu ‘i he kākā mo e fakaheke, hako ‘o e Tēvolo, ko e fakafili ki he me‘a kotoa pē ‘oku totonu, ‘e ‘ikai tuku koā ho‘o le‘ei ‘a e ngaahi hala ‘o e ‘Eiki, ‘a ia ‘oku totonu?

¹¹Pea ko eni vakai, kuo ala ni ‘a e māfimafi ‘o e ‘Eiki kiate koe; pea te ke kui, ‘o ‘ikai te ke sio ki he maama, ‘o ‘osi hono taimi. Pea na‘e tō leva kiate ia ha nenefu mo ha fakapo‘uli; pea ne tautaufā holo ki ha taha ke takinima ia.

¹²Pea ‘i he vakai ‘e he kōvana ki he me‘a kuo fai, na‘a ne lotu, he‘ene to‘oa ‘i he anga ‘o e ako‘aki ‘o e ‘Eiki.

¹³Pea kuo tuku atu mei Pafosi ‘a e folau ‘a Paula, na‘a nau hoko ki Peaka ‘i Pamifilia: pea na‘e li‘aki kinaua ‘e Sione, ‘o ne foki ki Selusalema.

¹⁴Ka ka fou atu pē kinaua mei Peaka, ‘o na hoko ki ‘Aniteoke, ‘a ia ‘oku ‘i Pisitia; pea ‘i he ‘aho Sāpate na‘a na hū ki he falelotu ‘o nofo hifo.

¹⁵Pea hili ‘a e lau ‘o e Tohi Lao mo e Tohi Palōfita, na‘e fekau mai ‘a e kau pule ‘o e falelotu ke fakahā kiate kinaua, Si‘i ongo matāpule, kapau ‘oku ai ha‘amo tokoni ke fai ki he kakai, pea mo lea mai.

¹⁶Pea tu‘u ‘a Paula, ‘o ne ta‘alo, ‘o ne pehē, ‘A e tu‘unga mātu‘a ‘Isileli, mo e taka ‘apasia mai ki he ‘Otua, mou me‘a mai.

¹⁷Ko e ‘Otua ‘o e kakai ‘Isileli ni na‘a ne fili ma‘ana ‘etau ngaahi kui, ‘o ne pusiaki ‘a e kakai lolotonga ‘enau ‘āunofo ‘i he fonua ko ‘Isipite, ‘o ne taki atu kinautolu mei ai kuo hiki tā hono nima.

¹⁸Pea fuoloa ‘ene fafa[19] kinautolu ‘i he toafa, ko e fāngofulu ta‘u nai.

¹⁹Pea hili ‘ene faka‘auha ha kakai ‘e fitu ‘i he fonua ko Kēnani, na‘a ne vahe ‘a e fonua mo‘onau tofi‘a: ko e fe‘unga ia mo e fāngeau mā nimangofulu ta‘u.

²⁰Pea hili ia na‘a ne tuku honau kau Fakamaau, ‘o a‘u kia Sāmiuela ko e palōfita.

²¹Pea hili ia[20] na‘a nau kole ha tu‘i; pea tuku ‘e he ‘Otua mo‘onautolu ‘a Saula ko e foha ‘o Kisi, ko e matāpule ‘i he matakali ‘o Penisimani, ‘o fāngofulu ta‘u.

²²Pea kuo ne liua ia, pea ne fokotu‘u ‘a Tēvita ke tu‘i kiate kinautolu; ‘a ia na‘a ne folofola ai foki, ‘o fakapapau, Kuo u toki ‘ilo ‘a Tēvita ko e foha ‘o Sese, ko e tangata ia ‘oku ‘ao mo hoku loto, ko e taha ia te ne fai ‘eku ngaahi tu‘utu‘uni kotoa pē.

²³Ko e hako ‘o e toko taha ko ia kuo omi mei ai ‘e he ‘Otua mo‘o ‘Isileli, ‘o hangē ko ‘ene tala‘ofa, ha toko taha ke fai fakamo‘ui, ‘a ia ko Sīsū.

²⁴Ka na‘e tomu‘a malanga‘aki ‘e Sione ki he kakai ‘Isileli kotoa pē ‘a e papitaiso fakatomala, ko e fakamelomelo ‘o ‘ene hā‘ele mai.

²⁵Pea lolotonga ‘a e fai tulikaki ‘e Sione ‘ene fakapuepue, na‘a ne fa‘a pehē, Ko e hā au ‘i ho‘omou lau? ‘Ā, ‘oku ‘ikai ko ia au: ka ko eni, ‘oku hoko mo au ha Toko Taha ‘oku ‘ikai te u taau ke vete hono topuva‘e.

²⁶Kāinga Mātu‘a, ‘a e Hako totonu ‘o ‘Epalahame, mo kimoutolu ‘a e taka ‘apasia mai ki he ‘Otua, ko kitautolu ia kuo fekau mai ki ai ‘a e tala ‘o e mo‘ui‘anga ko ia.

²⁷He ko e kakai ‘oku nofo ‘i Selusalema, mo honau kau pule, ko e me‘a ‘i he ‘ufikaua kiate kinautolu ‘a e toko taha ko ia, mo e ngaahi lea ‘a e kau Palōfita, ‘a ia ‘oku lau ‘i he ngaahi Sāpate hokohoko, kuo nau fakamo‘oni ki he ngaahi palofisai ko ia ‘i he‘enau fakamāumatea ia.

²⁸Pea neongo na‘e ‘ikai te nau ‘ilo ha momo‘i me‘a ‘e taha ‘oku totonu ke ne mate ai, ka nau kole pē kia Pailato ke tāmate‘i ia.

²⁹Pea kuo nau lava leva ‘a e ngaahi me‘a kotoa pē ne tohi ma‘ana, na‘a nau ‘ohifo ia mei he ‘akau, ‘o telio ‘i ha fonualoto.

³⁰Ka ka fokotu‘u ia ‘e he ‘Otua mei he pekia:

³¹pea ne hā ‘i he ngaahi ‘aho lahi ki he kakai ne ‘alu hake mo ia mei Kāleli ki Selusalema, ‘a e fa‘ahinga ‘oku nofo ‘i onopooni, ko ‘ene kau fakamo‘oni ki he kakai ‘Isileli,

³²pea ko kimaua, ‘oku ma ongoongoa atu ‘a e tala lelei, ‘o pehē, Ko e tala ‘ofa na‘e fai ki he‘etau ngaahi kui,

³³kuo fakamo‘oni ia ‘e he ‘Otua ki he‘etau fānau ‘i he‘ene toe fokotu‘u ‘a Sīsū; ‘o hangē foki kuo tohi ‘i hono ua ‘o e Saame: Ko hoku ‘Alo koe, Ko au kuo u fakatupu koe he ‘aho ni.

³⁴Pea ko e me‘a ki he‘ene fokotu‘u ia mei he pekia ke ‘oua na‘a toe kākunga ke foki ki he ‘au‘auha, kuo ne folofola ‘o pehē, Te u tuku kiate kimoutolu ‘a e ngaahi tala‘ofa ne fai kia Tēvita, ‘a ia ‘oku toputapu pea pau.

³⁵Ko ia ‘oku ne pehē ai foki ‘i he Saame ‘e taha, Tala‘ehai te ke tuku ho‘o Toko Taha Toputapu ke ‘ilo ‘a e ‘au‘auha.

³⁶He ko Tēvita, hili ‘ene ngāue ki hano to‘utangata ‘o fakatatau ki he finangalo ‘o e ‘Otua, ne mohe, ‘o ne ului ki he‘ene ngaahi kui, ‘o ne ‘ilo ‘a e ‘au‘auha:

³⁷ka ko e toko taha ko ia na‘e fokotu‘u ‘e he ‘Otua na‘e ‘ikai te ne ‘ilo ‘a e ‘au‘auha.

³⁸Ko ia, ke mahino kiate kimoutolu, kāinga mātu‘a, ko e me‘a ‘i he Toko Taha ko ia ‘oku malanga‘aki ai kiate kimoutolu ‘a e fakamolemole angahala:

³⁹pea ko e ngaahi angahala na‘e ‘ikai lava homou fakatonuhia mei ai ‘i he fai‘aki ‘a e Lao ‘a Mōsese, ka ‘i he Toko Taha ko eni, ‘ilonga ‘a ia ‘oku tui ‘oku ne ma‘u ‘a e fakatonuhia mei he ngaahi me‘a ko ia kotoa pē.

⁴⁰Ko ia, mou tokanga, na‘a hoko atu[21] ‘a e me‘a ne folofola‘aki ‘i he Tohi Palōfita:

⁴¹‘a e kau fakata‘eta‘etoka‘i, mou sio mo ofo mo matafi atu: he ko ‘eku fai ‘eni ha ngāue ‘i homou kuonga, ha ngāue kehe, ‘a ia ‘e ‘ikai te mou tui ki ai, neongo hono ‘a‘au ‘e ha taha, ‘o fakalāutelau.

⁴²Pea ‘i he‘ena hū atu, na‘a nau kole ke toe malanga‘aki ‘a e ngaahi me‘a ko ia kiate kinautolu ‘i he Sāpate kaha‘u.

⁴³Pea ‘i he tutuku ‘a e lotu, ko e tokolahi ‘o e kakai Siu, mo e kakai kuo ului ki he‘enau lotu, na‘a nau muimui kia Paula mo Pānepasa: pea ko kinaua na‘a na fai ‘ena lau kiate kinautolu, ‘o o‘i kinautolu ke nau nofo ma‘u ‘i he ‘ofa ‘a e ‘Otua.

⁴⁴Pea ‘i he Sāpate na‘e hoko, na‘e fakataha ‘a e kolo, ‘o meimei ko hono kotoa, ke fanongo ki he folofola ‘a e ‘Eiki.

⁴⁵Pea ‘i he mamata ‘a e kau Siu ki he ngaahi fu‘u tokolahi, na‘e vevele ‘enau meheka, pea na‘a nau faka‘ikai‘i ‘a e ngaahi fakamatala ‘a Paula, ‘o nau lea kovi.

⁴⁶Pea lea mālohi ai ‘a Paula mo Pānepasa, ‘o na pehē, Na‘e pau ke motu‘a tala ‘a e folofola ‘a e ‘Otua kiate kimoutolu: ka ‘i he ‘iloange kuo mou fakatale‘i ia, pea mou fakamo‘oni ai ‘e kimoutolu ki ho‘omou ta‘etaau mo e mo‘ui ta‘engata, vakai, ko ‘ema hiki ‘eni ki he Senitaile.

⁴⁷He ne pehē homau tu‘utu‘uni ‘e he ‘Eiki, Kuo u fokotu‘u koe ko e maama ‘o e Senitaile, ke ke hoko ko e Mo‘ui‘anga ‘o a‘u ki he ngata‘anga ‘o māmani.

⁴⁸Pea ‘i he fanongo ki ai ‘a e Senitaile na‘a nau fiefia, mo nau fakahīkihiki ‘a e folofola ‘a e ‘Eiki: pea ‘ilonga ‘a kinautolu na‘e tu‘utu‘uni ki he mo‘ui ta‘engata na‘a nau tui.

⁴⁹Pea na‘e ‘ave ‘a e folofola ‘a e ‘Eiki ki he fonua kotoa.

⁵⁰Ka ka o‘i ‘e he kau Siu ‘a e kau fefine ‘eiki kuo tafoki ki he‘enau lotu, pea mo e hou‘eiki ‘o e kolo, pea nau fakalanga ha fakatanga kia Paula mo Pānepasa, ‘o nau kapusi kinaua mei honau feitu‘u.

⁵¹Pea na tūtuu‘i ‘a e efu mei hona va‘e ko e faka‘ilonga kiate kinautolu, ‘o na ō ki ‘Aikoniume.

⁵²Pea ko e me‘a ki he kau ako, na‘e fakafonu kinautolu ‘aki ‘a e fiefia mo e Laumālie Mā‘oni‘oni.