Read KO E TOH TAPU KATOA TONGA ‘Apositoló 14 Bible Online

‘Apositoló 14 - KO E TOH TAPU KATOA TONGA bible

‘Apositoló 14

¹PEA lolotonga ‘ena ‘i ‘Aikoniume, na‘a na hū fakataha ki he falelotu ‘o e Kakai Siu: pea na‘e pehē ‘ena malanga, ko ia na‘e tui ai ha fu‘u tokolahi ‘o e kakai Siu mo e kakai Kalisi fakatou‘osi.

²Ka ko e kau Siu na‘e ‘ikai tui, na‘a nau o‘i mo fakakovi‘i ‘a e loto ‘o e kau Senitaile ke tu‘u ki he kāinga lotu.

³Pea ko ia na‘e fuoloa ‘ena nofo ai, ‘o na malanga mālohi ko ‘ena falala ki he ‘Eiki; ‘a ia na‘a ne poupou ‘a e tala ‘o ‘ene ‘alo‘ofa, he‘ene tuku ke hoko ‘i he‘ena ngāue ‘a e ngaahi me‘a mana mo fakaofo.

⁴Pea na‘e mavahe ua ‘a e kakai ‘o e kolo, pea kau ha ni‘ihi mo ha‘a Siu, ka ko e ni‘ihi mo e ongo ‘aposetolo.

⁵Pea ‘i he fai ke ‘ohofi kinaua ‘e he kau Senitaile, kae‘uma‘ā ‘e ha‘a Siu mo honau kau pule, koe‘uhi ke ngaohikovi‘i mo tolongi kinaua,

⁶na‘a na sinaki ‘ilo ki ai, ‘o na feholaki ki he ngaahi kolo ‘o Lākonia, ‘a Līsita mo Teape mo e feitu‘u ko ia:

⁷pea nau nofo ‘o malanga‘aki ‘a e Kōsipeli ‘i he potu ko ia.

⁸Pea na‘e ai ha tangata ‘i Līsita tokua, na‘e ve‘e mate, kuo heke ta‘utu mei hono fanau‘i, ‘o ‘ikai si‘i te ne momo‘i ha‘ele.

⁹Pea na‘e fa‘a fanongo malanga ‘e he toko taha ko ia ‘ia Paula; pea ‘i he sio fakamama‘u ‘a Paula kiate ia, mo ne vakai ‘oku ne tui ‘e lava hono fakamo‘ui,

¹⁰na‘a ne ‘ai ‘ene fu‘u lea, ‘o ne pehē, Tu‘u ‘aki ho va‘e, ‘o kēvekeva tonu. Pea hopo hake ia ‘o ha‘ele.

¹¹Pea ‘i he mamata ‘a e kakai ki he me‘a kuo fai ‘e Paula, na‘a nau hiki tuē, ‘o nau kalanga faka-Lākonia mai, Kuo hifo fakatangata mai ha ongo ‘otua!

¹²Pea nau ui ‘a Pānepasa ko Siupita, pea ko Paula ko Meakuli, he ko ia ia na‘e takimu‘a ‘i he lea.

¹³Pea ko e taula ‘o Siupita, ko e ‘otua na‘e ‘afio ‘i he matanikolo, na‘a ne ‘omi, ‘e ia mo e kakai, ha fanga pulu mo e ngaahi tuinga kakala ki he ngaahi matapā ‘o e fale hū‘anga, ko ‘enau fai ke feilaulau kiate kinaua.

¹⁴Pea ‘i he ongo mai ‘a e me‘a ki he ongo ‘aposetolo ko Pānepasa mo Paula, na‘a na hae hifo hona kofu, ‘o na ‘oho atu mei he fale ki he kakai, ‘o na kalanga,

¹⁵‘o pehē, ‘A matāpule, ko e hā ‘oku mou fai pehē ai? He ‘oku ma alāanga mo kimoutolu, ko e ongo tangata pē; ‘o ma tala atu ‘a e fekau lelei, ke mou tafoki mei he ngaahi ‘otua noa ni ki he ‘Otua Mo‘ui, ‘a ia na‘a ne ngaohi ‘a e langi mo e fonua mo e tahi, mo e ngaahi me‘a kehekehe ‘oku ‘i ai.

¹⁶Mo‘oni ‘i he ngaahi kuonga mu‘a na‘a ne tuku ai pē ‘a e kakai kehekehe ke nau fou ‘i he ngaahi founga ‘onautolu.

¹⁷Ka na‘a mo ia, ka tala‘ehai na‘a ne nofo ta‘eha faka‘ilonga; he na‘a ne ngāue ‘aonga, ‘o ne ‘atu kiate kimoutolu mei langi ‘a e ngaahi ‘uha, mo e ngaahi ta‘u mahu, ‘o ne ‘ai ke fonu ngutungutu homou loto ‘i he me‘a tokoni mo e fakafiefia.

¹⁸Pea na‘a mo ‘ena lea pehē, na‘e ‘ikai ke meimei lava ‘ena ta‘ofi ‘a e kakai mei he fai feilaulau kiate kinaua.

¹⁹Ka na‘e hoko hifo ha tu‘unga Siu mei ‘Aniteoke mo ‘Aikoniume, ‘o nau fakahinga ‘a e kakai kiate kinautolu; pea nau tolongi ‘a Paula, ‘o nau toho kitua‘ā kolo ko ‘enau mahalo kuo ne pekia.

²⁰Pea lolotonga ‘a e tu‘u takai kiate ia ‘e he kau ako, na‘a ne tu‘u hake ‘o hū ki he kolo: pea pongipongi hake na‘a na ō atu mei ai mo Pānepasa ki Teape.

²¹Pea hili ‘ena malanga‘aki ‘a e Kōsipeli ‘i he kolo ko ia, mo fakaului ha tokolahi ki he kau ako, na‘a na foki ki Līsita mo ‘Aikoniume mo ‘Aniteoke,

²²‘o na poupou ‘a e loto ‘o e kau ako, ‘o na tokoni kinautolu ke nau nofo ma‘u ‘i he lotu, ‘o na pehē foki, Ko ‘etau hū ki he Pule‘anga ‘o e ‘Otua, kuo pau ke tau fou ‘i he ngaahi mamahi lahi.

²³Pea ‘i he siasi kotoa pē na‘a na fili ‘i he hikinima ha kau faifekau ma‘anautolu; pea na fai ha hūfia faka‘aukai, ‘o na toki tuku kinautolu ki he ‘Eiki kuo nau tui ki ai.

²⁴Pea na ‘asi atu ‘i Pisitia, ‘o na hoko ki Pamifilia:

²⁵pea hili ‘ena malanga‘aki ‘a e folofola ‘i Peaka, na‘a na hifo ki ‘Atalaia:

²⁶pea na folau mei ai ki ‘Aniteoke, ‘a ia ko e potu ne fua tukuange ai kinaua ki he ‘ofa ‘a e ‘Eiki, ke na fai ‘a e ngāue kuo na ‘osi ni.

²⁷Pea ‘i he‘ena lava ki ai na‘a na fakataha ‘a e siasi, ‘o na fakamatala ki he ngaahi fu‘u me‘a kuo fai ‘e he ‘Otua ‘i he‘ene kau mo kinaua, pea mo ‘ene fakaava ki he Senitaile ha matapā ki he lotu.

²⁸Pea na nofo ai mo e kau ako, ‘o fuofuoloa.