Read KO E TOH TAPU KATOA TONGA ‘Apositoló 17 Bible Online

‘Apositoló 17 - KO E TOH TAPU KATOA TONGA bible

‘Apositoló 17

¹PEA nau fou atu ‘i ‘Amifipoli mo ‘Apolonia, ‘o nau hoko ki Tesalonaika, ‘a ia na‘e tu‘u ai ha falelotu ‘o e kakai Siu:

²pea hū ki ai ‘a Paula, ‘o hangē ko ene fa‘a fai, ‘o kau mo kinautolu; pea ko e Sāpate ‘e tolu na‘a ne fai fakakikihi mo kinautolu mei he Tohitapu,

³‘o ne faka‘uhinga mo fokotu‘u, ‘o pehē, Na‘e pau ke feia ‘a e Mīsaia, pea ke toetu‘u mei he pekia; mo ‘eni foki, Ko eni ‘a e Mīsaia ko ia, ‘a Sīsū ‘oku ou malanga‘aki kiate kimoutolu.

⁴Pea na‘e ai honau ni‘ihi na‘e tui, pea na‘e fakahoko kinautolu kia Paula mo Sailosi; pehē foki mo e fu‘u tokolahi ‘o e kau Kalisi kuo lotu faka-Siu, mo e tokotokolahi ‘o e kau fefine tu‘ukimu‘a.

⁵Pea meheka ai ‘a e kau Siu, ‘o nau ‘ave ha kau siana pau‘u na‘e tutu‘u noa pē ‘i he mala‘e fakatau, ‘o nau tānaki ha fu‘u kakai, mo veuveuki ‘a e kolo, pea nau ‘ohofia ‘a e ‘api ‘o Sēsoni, ‘o nau kumi ‘a kinaua ke nau taki atu ki he Fakataha-‘a-kakai.

⁶Pea ‘i he ‘ikai te nau ‘ilo kinaua, na‘a nau toho ‘a Sēsoni mo e ni‘ihi ‘o e kāinga ki he kau pule kolo, ‘o nau kalanga, Ko e kau siana ko ia, ‘a ia kuo nau fakaangatu‘u ‘a māmani, kuo nau ha‘u ki heni foki.

⁷Pea kuo fakaafe kinautolu ‘e Sēsoni: pea ko e kau siana ko ia ‘oku nau paetaku kotoa pē ki he ngaahi tu‘utu‘uni ‘a Sisa, he‘enau pehē, ‘oku tu‘i ha taha kehe, ko Sīsū tokua.

⁸Pea nau fakahoha‘a ‘a e kakai mo e kau pule kolo ‘i he‘enau tala ha ngaahi me‘a pehē.

⁹Ko ia, na‘a nau ‘eke ha pa‘anga talifaki meia Sēsoni mo e kāinga, ‘o nau toki tukuange kinautolu.

¹⁰Pea hanga leva ‘e he kāinga, ‘o nau ‘atu po‘uli ‘a Paula mo Sailosi ki Pēlea: pea ‘i he‘enau hoko ki ai, pea ō ai pē kinaua ki he falelotu ‘o e kakai Siu.

¹¹Pea na‘e anga faka‘ei‘eiki ange ‘a e kakai ni ‘iate kinautolu ‘i Tesalonaika, he na‘a nau tali loto lelei ‘aupito ‘a e folofola, ‘o nau kumi ‘i he Tohitapu ‘i he ‘aho kotoa pē ‘a e mo‘oni ‘o e ngaahi me‘a ko ia.

¹²Ko ia, na‘e tokolahi honau kakai na‘e tui, pea tokotokolahi mo e hou‘eiki fafine ‘o e kakai Kalisi, pea mo e kau tangata.

¹³Ka ‘i he ‘ilo ‘a e kau Siu mei Tesalonaika kuo malanga‘aki ‘i Pēlea foki ‘a e folofola ‘a e ‘Otua ‘e Paula, na‘a nau omi, ‘o nau o‘i mo fakahoha‘asi ‘a e kakai ‘i he potu ko ia.

¹⁴Pea na‘e toki hanga ‘e he kāinga, ‘o tuku atu leva ‘a Paula ke ‘alu atu ki tahi: ka ka nofo ai pē ‘a Sailosi mo Tīmote fakatou‘osi.

¹⁵Pea ko kinautolu na‘e ‘ave ‘a Paula na‘a nau a‘utaki ia ki ‘Atenisi: pea kuo nau ma‘u ‘ene fekau kia Sailosi mo Tīmote ke fai hona tūkuingata ke vave mai, pea nau toki ō.

¹⁶Pea lolotonga na‘e talitali ‘e Paula kiate kinaua ‘i ‘Atenisi, na‘e ‘ita hono laumālie ‘o‘ona ‘i he‘ene vakai kuo tamapua‘ia ‘a e kolo.

¹⁷Ko ia, na‘a ne talanoa fakakikihi ‘i he fale lotu mo e kau Siu, mo e kakai kuo tafoki mai, pea ‘i he mala‘e fakatau na‘a ne fai ‘i he ‘aho kotoa pē kiate kinautolu te nau fe‘iloaki.

¹⁸Pea na‘e ai ha ni‘ihi ‘o e fa‘ahinga ‘Epikulio, mo e fa‘ahinga Sitoiko, ko e kau filōsefa, na‘a nau fepaki mo ia. Pea pehē ‘e ha ni‘ihi, Ko e hā nai ‘a e ‘uhinga ‘o e lau ‘a e siana pālau ni? Pea ko e ni‘ihi na‘a nau pehē, ‘Oku ne matamata ko e toko taha fokotu‘u ‘otua fo‘ou: ko hono ‘uhinga, ko ‘ene malanga‘aki ‘a Sīsū mo e Toetu‘u.[25]

¹⁹Pea nau puke ia, ‘o taki ki ‘Aleopeiko, ‘o nau pehē, ‘E ngofua koā ke mau ‘ilo pe ko e hā ‘a e tokāteline fo‘ou ni, ‘a ‘eni ‘oku ke lea‘aki?

²⁰He ‘oku ke ‘omi ki homau telinga ha ngaahi me‘a ‘oku matamata kehe: ko ia ‘oku mau fie‘ilo pe ko e hā ‘a e ‘uhinga ‘o e ngaahi me‘a ko ia.

²¹(He ko e kau ‘Ātenisi kotoa pē, mo e muli na‘e ‘āunofo ai, na‘e ‘ikai te nau fai ha me‘a kehe, ka ko e nofo pē ke lau me‘a fo‘ofo‘ou, pe ke fanongo me‘a pehē.)

²²Pea kuo tu‘u ‘a Paula ‘i he loto ‘Aleopeiko, pea ne pehē, ‘A matāpule ‘Ātenisi, ‘oku hā kiate au ‘i he me‘a kehekehe ‘oku ou sio ki ai, tā ko e kakai kimoutolu ‘oku matamata hulu atu ‘i he tauhi fa‘ahikehe.

²³He lolotonga ‘eku ‘alu fano, ‘o u tokanga‘i ‘a e ngaahi me‘a ‘oku mou lotu ki ai, ne u ‘ilo foki ha ‘ōlita ‘a ia na‘e tohi ai ‘a e lea ni, MO‘O HA ‘OTUA TE‘EKI ‘ILOA. Pea ko e Me‘a ‘oku mou lotu ta‘e‘ilo ki ai, ko eni ia ‘oku ou fakahā ni kiate kimoutolu.

²⁴Ko e ‘Otua na‘a ne ngaohi ‘a e ‘univeesi, mo e me‘a kehekehe ‘oku ‘i ai, ko e toko taha ia ko e ‘Eiki ‘o e langi mo māmani; ko ia ‘oku ‘ikai te ne ‘afio ‘i ha ngaahi temipale kuo ngaohi ‘e he nima.

²⁵‘Uma‘ā hano tauhi ‘e he nima ‘o e tangata, ko e pehē ‘oku ne masiva ‘i ha me‘a — ‘a ‘Ene ‘Afio koā, ‘a ia ‘oku ‘a‘ana ‘a e foaki mai kiate kitautolu fuli pē ‘a e mo‘ui, mo e mānava, mo e me‘a kotoa pē!

²⁶Na‘a ne o‘i foki ‘a e ngaahi fa‘ahinga kakai ‘a ia ‘oku nau tupunga taha kotoa pē, ke nau nofo‘ia ‘a e funga kotoa ‘o māmani; he ne ne fakafuofua ‘a e ngaahi kuonga na‘e tu‘utu‘uni ki he‘enau nofo, mo honau ngaahi kau‘ā;

²⁷koe‘uhi ke nau kumi ki he ‘Otua, hei‘ilo te nau fāfā ia ‘o ‘ilo‘i, ka tala‘ehai ‘oku ne mama‘o mei hatau toko taha.

²⁸He ‘oku ‘iate ia ‘etau mo‘ui, mo ‘etau ngāue, mo ‘etau ‘i ai; ‘o hangē foki ko e lau ‘a e ni‘ihi ‘o e kau maau ‘oku ‘iate kimoutolu ‘o pehē, He ko Hono hako foki ‘a kitautolu.

²⁹Pea kapau leva ko e hako ‘o e ‘Otua ‘a kitautolu, tala‘ehai ‘oku totonu ‘etau lau ‘a ‘Ene ‘Afio ‘oku tatau mo ha konga koula, pe siliva, pe maka, ha me‘a kuo tongitongi, ko e ngāue mo e fakakaukau ‘a ha tangata.

³⁰Pea neongo ‘ene fakata‘eta‘e‘afio‘i ‘e he ‘Otua ‘a e ngaahi kuonga ‘o e tu‘uvale, ka ‘i onopooni ‘oku ne fekau ki he kakai kotoa pē ‘i he potu kotoa pē ke nau fakatomala:

³¹koe‘uhi kuo ne kotofa ha ‘aho, ‘a ia ‘oku ne teu fakamaau ai ‘a māmani, ‘o ‘au‘autotonu, ‘o fakafai ‘i he tangata kuo ne polo‘i; ‘o ne tuku mo‘o e kakai kotoa pē ha tu‘unga ki he‘enau tui ‘i he‘ene fokotu‘u ‘a e toko taha ko ia mei he pekia.

³²Pea ‘i he‘enau fanongo ki he lau toetu‘u ‘a e pekia, na‘e luma ha ni‘ihi: kae pehē ‘e ha ni‘ihi, ‘Oua ke mau toe fanongo kiate koe ‘i he me‘a ko ia ‘i ha taimi ange.

³³Na‘e pehē ‘a e ‘alu atu ‘a Paula mei honau ha‘oha‘onga.

³⁴Ka na‘e ai ha kau matāpule na‘e piki kiate ia, ‘o nau lotu: ko honau taha ko Taionisio, ‘a ia na‘a ne kau ki he ha‘a ‘Aleopeiko, pea mo ha fefine na‘e hingoa ko Temaleti, mo e ni‘ihi kehe.