Read KO E TOH TAPU KATOA TONGA ‘Apositoló 21 Bible Online

‘Apositoló 21 - KO E TOH TAPU KATOA TONGA bible

‘Apositoló 21

¹PEA kuo mau matanga meiate kinautolu, ‘o tuku folau atu, na‘a mau lele ‘o a‘u ki Kō, he na‘e angimui ‘a e matangi; pea ko e ‘aho na‘a na feholoi na‘a mau hoko ki Lota, pea mau fai mei ai ki Patala:

²pea ‘i he‘emau ‘ilo ai ha vaka na‘e teu ke folau ki Finisia, ‘o faka‘atā ‘i he vaha, pea mau heka ai ‘o folau.

³Pea kuo kite ‘a Saipalo, na‘a mau tuku ia ki to‘ohema, ‘o mau tau mu‘a ki Sīlia, ‘o mau hoko ki Taia: he ko e potu ia na‘e tu‘utu‘uni ke hifo ai ‘a e uta ‘a e vaka ni.

⁴Ka ko kimautolu na‘a mau kumi ‘a e kau ako, ‘o mau nofo hifo ai ‘o ‘aho fitu: pea ko e kau ako ko ia na‘a nau toutou tala kia Paula ‘i he‘enau Laumālie‘ia, ke ‘oua te ne ‘alu ange ki Selusalema.

⁵Pea ‘i he faifai pea kakato ‘a e ngaahi ‘aho ko ia, na‘a mau ‘alu atu mei he fale, ‘o kamata fononga; pea moimoi‘i kimautolu ‘e he kau ako kātoa mo honau ngaahi uaifi mo e fānau ki he tua‘ā kolo: pea mau tū‘ulutui ‘i he matātahi ‘o hū.

⁶Pea kuo mau fetatau‘aki, pea heka kimautolu ki vaka; ka ka foki kinautolu ki ‘api.

⁷Pea mau hoko hifo mei Taia ki Tolimeasi, pea toki ngata ai ‘emau folau; pea mau ‘alu ‘o fe‘iloaki mo e kāinga, ‘o mau nofo mo kinautolu ‘i he ‘aho ‘e taha.

⁸Pea pongipongi hake, pea mau ‘alu atu ‘o hoko ki Sesalia: ‘o mau hū ki he fale ‘o Filipe ko e ‘Evangeliō, ‘a ia na‘a ne kau ki he Toko Fitu; ‘o mau nonofo mo ia.

⁹Pea ko e toko taha ko ia na‘e ‘i ai hono ‘ōfefine ‘e toko fā, ko e kau ta‘ahine na‘e fa‘a palofisai.

¹⁰Pea ‘i he‘emau nofo ai ‘o ‘aho lahi, na‘e hoko hifo mei Siutea ha palōfita na‘e hingoa ko ‘Akapusi.

¹¹Pea ne ha‘u kiate kimautolu, ‘o ne to‘o ‘a e no‘o ‘o Paula, ‘o ne ha‘i ‘aki hono va‘e mo hono nima ‘o‘ona, ‘o ne pehē, Ko eni ia ‘a e folofola ‘a e Laumālie Mā‘oni ‘oni, Ko e tangata ‘oku ‘o‘ona ‘a e no‘o ni, ‘e pehē ni hono ha‘i ‘i Selusalema ‘e he kakai Siu, pea te nau tukuange ki he Senitaile.

¹²Pea ‘i he‘emau fanongo ki he me‘a ko ia, na‘a mau kole, ‘e kimautolu mo e kakai ‘o e potu, ke ‘oua te ne ‘alu hake ki Selusalema.

¹³Toki tali ‘a Paula, ‘o ne pehē, Ko e hā ia ‘oku mou fai, ho‘omou tangi mo e fakavaivai‘i hoku loto? he kuo ‘osi ‘eku teu, ‘o ‘ikai ki he ha‘isia pē, ka ki he mate tāmate‘i foki ‘i Selusalema, koe‘uhi ko e huafa ‘o e ‘Eiki ko Sīsū.

¹⁴Pea ‘i he ‘ikai lava hono fakaloto‘i, na‘a mau tuku, ‘o mau pehē, Ke fai pē ‘a e finangalo ‘o e ‘Eiki.

¹⁵Pea hili ‘a e ngaahi ‘aho ko ia na‘a mau fakamā‘opo‘opo ‘emau ngaahi me‘a, ‘o mau ‘alu hake ki Selusalema.

¹⁶Pea na‘e fononga mo kimautolu ha ni‘ihi ‘o e kau ako mei Sesalia, ‘a ia na‘a nau ‘omi kimautolu kia Manasoni, ‘a ia te mau ‘āunofo ki ai;[33] ko e motu‘a Saipalo ia, ko e toko taha ‘i he ‘uluaki kau ako.

¹⁷Pea kuo mau hoko ki Selusalema, na‘e tali fiefia kimautolu ‘e he kāinga.

¹⁸Pea ‘i he ‘aho na‘a na hoko, na‘e hū ‘a Paula mo kimautolu kia Sēmisi; pea ‘oku nofo ai foki ‘a e kau faifekau kotoa pē.

¹⁹Pea kuo ne fetapa kiate kinautolu, na‘a ne ‘a‘au fakalāutelau ‘a e ngaahi me‘a kuo fai ‘e he ‘Eiki ki he Senitaile ‘i he‘ene ngāue.

²⁰Pea ‘i he hili ‘enau fanongo ki ai, na‘a nau tuku kolōlia ki he ‘Otua. Na‘a nau pehē foki kiate ia, ‘Alā, ‘oku ke vakai koā hono nifi ‘a e ngaahi mano ‘o e kakai Siu kuo lotu; pea ‘oku nau mamahi‘i kotoa pē tokua ‘a e Lao:

²¹pea kuo talafono‘aki koe kiate kinautolu, ‘o pehē tokua ‘oku ke enginaki ‘a e kau Siu kotoa pē ‘oku nofo Senitaile ke nau hiki mei he lao ‘a Mōsese, ‘o ke pehē ke ‘oua te nau kamu ‘enau fānau, pe fou ‘i he ngaahi tu‘utu‘uni.

²²Pea fēfē ai? kuo pau ke fakataha mai ha fu‘u kakai, he te nau fanongo kuo ke ha‘u.

²³Ko ia, ke ke fai ‘a e me‘a ni ‘oku mau tala atu: ‘Oku ‘i ai ha kau tangata heni ‘e toko fā ‘oku ‘i ai ‘enau tuku mo‘ui.

²⁴‘Alu koe mo kinautolu, ‘o mou fakatapu fakataha, pea ke totongi ‘e koe ma‘anautolu, koe‘uhi ke lava ‘a ‘enau tele ‘ulu;[34] pea ‘e toki ‘ilo kotoa pē, tā ko e launoa ‘a e ngaahi me‘a na‘e talafono‘aki ai koe; kaekehe ‘oku ke fou founga, pea ‘oku ke tauhi ‘e koe ‘a e Lao.

²⁵Ka ko e me‘a ki he Senitaile kuo lotu, kuo mau tohi ‘o tu‘utu‘uni ke nau ngata pē ‘i he faka‘ehi‘ehi mei he me‘a kuo ‘oatu ki he ‘aitoli, pea mei he toto, mo e manu kuo sisina, mo e fe‘auaki.

²⁶Pea na‘e toki ‘ave ‘e Paula ‘a e kau tangata, pea ‘i he ‘aho na‘a na hoko, hili ‘ene fakakau ia ki he‘enau tapu, na‘a ne hū ki he Temipale ke fakaongo ‘a e faka‘osi ‘o e taimi ‘o e tapu, kae fai ‘a e feilaulau koe‘uhi ko kinautolu takitaha.

²⁷Pea ‘i he mei ‘osi ‘a e ‘aho ‘e fitu, na‘e fakatokanga‘i ia ‘i he Temipale ‘e he kau Siu mei ‘Ēsia; pea na‘a nau ue‘i ‘a e kakai kotoa, ‘o nau ala fakamālohi kiate ia, ‘o nau kalanga,

²⁸‘A Matāpule ‘Isileli, mou tokoni mai! Ko e siana ni ko e tangata ‘oku ne talakaa‘i ‘a e kakai tapu, mo e Lao, mo e potu ni, ‘i he‘ene ako ki he kakai ‘i he potu kotoa pē: ‘io, pea kuo ne fakahū foki ha kau Kalisi ki he Temipale, pea kuo ne maumau ‘a e tapu ‘o e Potu Tapu ni.

²⁹(Ko hono ‘uhinga, he kuo nau mamata mu‘a kia Talofima ko e tangata ‘Efesō, ‘oku na ō mo ia ‘i he kolo, pea nau mahalo kuo fakahū ia ‘e Paula ki he Temipale.)

³⁰Na‘e ngāue ai foki ‘a e kolo kotoa, pea felelele‘i mai ‘a e kakai: ‘o nau puke ‘a Paula, ‘o toho ia kitu‘a ‘i he Temipale: pea na‘e tāpuni leva ‘a e ngaahi matapā.

³¹Na‘a nau feinga foki ke tāmate‘i ia, kae lolotonga ia na‘e ‘ohake hono tala ki he ‘eiki ‘o e vāhenga tau, ‘o pehē tokua, kuo maveuveu ‘a Selusalema kātoa.

³²Pea ne ‘alu leva mo ia ha kau tau mo ha tu‘unga senituliō, ‘o ne lele hifo kiate kinautolu: pea ‘i he‘enau sio ki he ‘eikitau mo e kau tau, na‘a nau tuku ‘enau haha ‘a Paula.

³³Pea ‘i he a‘u mai leva ‘a e ‘eikitau, na‘a ne puke ia, ‘o ne fekau ke ha‘i ‘aki ha seini ‘e ua; ‘o ne kamata ‘eke pe ko hai ia, pea ko e hā ‘a e me‘a kuo ne fai.

³⁴Pea kalanga‘aki ‘e he ni‘ihi ‘i he kakai ‘a ē, pea ko e ni‘ihi ko ē: pea ‘i he ‘ikai te ne lava ke ‘ilo pau ko e me‘a ‘i he longoa‘a, na‘a ne fekau ke taki ia ki he taua.

³⁵Pea ‘i he‘ene hoko ki he ngaahi tu‘unga, ‘iloange na‘e hīkisia ia ‘e he kau tau ko e me‘a ‘i he fai mālohi ‘a e kakai.

³⁶He na‘e tulimui ‘a e fu‘u fakataha, ‘o nau kalanga, Tafi‘i ‘a e siana na!

³⁷Pea ‘i he‘enau fai ke hūfaki ia ki he taua, na‘e pehē ‘e Paula ki he ‘eikitau, ‘E ngofua ‘eku lea si‘i atu? Pea pehē ‘e ia, ‘Oku ke ‘ilo koā ‘a e lea faka-Kalisi?

³⁸Tā ‘oku ‘ikai ko e motu‘a ‘Isipite koe, ‘a ia na‘a ne fakatupu angatu‘u ‘i he ngaahi ‘aho kuo hili, mo ne taki atu ki he toafa ‘a e kau Tāmate fufū ‘e toko fā afe.

³⁹Pea pehē ‘e Paula, ‘Ā, ko e tangata Siu au mei Tāsusi ‘i Silisia, pea tala‘ehai ko e kolo ta‘e‘iloa ia ‘oku ou kau ki ai: ko ia ‘oku ou kole ke ke tuku ke u lea ki he kakai.