Read KO E TOH TAPU KATOA TONGA ‘Apositoló 22 Bible Online

‘Apositoló 22 - KO E TOH TAPU KATOA TONGA bible

‘Apositoló 22

¹PEA ‘i he‘ene fakangofua ia, na‘e ta‘alo ‘e Paula ki he kakai, ‘oku ne tu‘u mei he tu‘unga taupotu ki ‘olunga. Pea kuo nau fakanonga hifo, na‘a ne lea kiate kinautolu ‘i he lea faka-Hepelū ‘o pehē:

²Kāinga Matāpule mo Hou‘eiki, mou me‘a lelei mai ki he‘eku fakamatala ‘oku fai atu ni. (Pea ‘i he‘enau fanongo ‘oku ne lea kiate kinautolu ‘i he lea faka-Hepelū, na‘e ‘āsili ai ‘enau fakalongo. Pea ne fai atu.)

³Ko au ko e motu‘a Siu. Na‘e fanau‘i au ‘i Tāsusi ‘i Silisia, ka u tupu hake ‘i he kolo ni, ‘o u ta‘utu ‘i he va‘e ‘o Kāmelieli, ‘o u ako ke mamafa ki he ngaahi mingimingi‘i me‘a ‘o e lao ‘a ‘etau ngaahi kui, kae‘uma‘ā na‘a ku mamahi‘i ‘a e ‘Otua, ‘o hangē ko kimoutolu kotoa pē he ‘aho ni.

⁴Pea u fakatanga‘i ‘a e ‘alunga ko ē, ‘o ‘ikai te u nā ‘i he tāmate, pea u ha‘i ‘o fakahū pilīsone ‘a tangata mo fafine fakatou‘osi.

⁵Pea ko ‘eku me‘a ko ia ‘e fakamo‘oni ki ai ‘a e Taula‘eiki Lahi, mo e Fakataha Fakamātu‘a kotoa: ‘a ia na‘a ku ma‘u tohi mei ai foki ki he kāinga ‘i Tāmasikusi, ‘o u ‘alu mo au, ko ‘eku fai ke ha‘i ‘a e kakai foki na‘e nofo ‘i he potu ko ia, ‘o taki mai ki Selusalema ke tautea.

⁶Pea lolotonga ‘eku fononga, ‘o fakaofiofi ki Tāmasikusi; kuo ho‘atā nai; fakafokifā na‘e malama takatakai kiate au ha fu‘u maama mei he langi.

⁷Pea u tō ki lalo, pea u fanongo ki ha le‘o ‘oku pehē mai, ‘E Saula, ‘e Saula, ko e hā ‘oku ke fakatanga‘i ai au? Pea u tali, ‘Ēī, ko hai koe?

⁸Pea folofola mai ‘e ia, Ko au ko Sīsū mei Nāsaleti, ‘a ia ‘oku ke fakatanga‘i.

⁹Pea ko kinautolu na‘e ‘iate au na‘a nau tokanga‘i ‘a e maama, ka na‘e ‘ikai te nau ongo‘i ‘a e le‘o ‘o ia na‘e me‘a mai.

¹⁰Pea u pehē, ‘Eiki, ko e hā te u fai? Pea folofola ‘a e ‘Eiki kiate au, tu‘u pē ‘o ‘alu ki Tāmasikusi; pea ‘e fakahā ai kiate koe ‘a e ngaahi me‘a kuo tu‘utu‘uni ke ke fai.

¹¹Pea ‘i he ‘ikai te u fa‘a fakasiosio, ko e me‘a ‘i he fu‘u ngingila ‘o e maama ko ia, na‘e takinima‘i au ‘e he kakai na‘a mau ō, pea u hoko ki Tāmasikusi.

¹²Pea ko ‘Ananaia, ko e motu‘a lotu na‘e mātu‘aki tauhi ‘a e Lao, pea fakaongolelei ‘e he kakai Siu kotoa pē na‘e nofo ai.

¹³Na‘e ha‘u ia kiate au, pea ne tu‘u mai ‘o ne pehē, ‘Alā Saula, ‘ā hake. Pea u sio hake ‘i he taimi ko ia, ‘o ‘ilo ia.

¹⁴Pea ne pehē, Ko e ‘Otua ‘o ‘etau ngaahi kui na‘a ne sinaki tu‘utu‘uni ke ke ‘ilo hono finangalo, pea ke mamata ki he Toko Taha Angatonu, pea ke fanongo ki ha le‘o mei hono fofonga,

¹⁵koe‘uhi ke ke hoko ko ‘ene fakamo‘oni ki he kakai kotoa pē ‘i he ngaahi me‘a kuo ke mamata mo fanongo ki ai.

¹⁶Pea ko e toe tatali ke hā? Tu‘u pē ke papitaiso koe, ‘o fufulu koe mei ho‘o ngaahi angahala, ‘o takua hono huafa.

¹⁷Pea ‘i he faifai pea u foki ki Selusalema, lolotonga ‘eku lotu ‘i he Temipale, ‘iloange na‘e ‘āvea au.

¹⁸Pea u mamata kiate ia ‘oku ne me‘a mai, Fakato‘oto‘o, pea ‘alu vave mei Selusalema: koe‘uhi ‘e ‘ikai te nau tali ha‘o fakamatala kiate au.

¹⁹Ka u pehē ‘e au, ‘Eiki, ka ko kinautolu ia ‘oku lāu‘ilo, ko au ia na‘a ku fa‘a ‘ai pilīsone, mo haha ‘i he ngaahi falelotu kehekehe, ‘a e kakai ‘oku lotu kiate koe:

²⁰pea ‘i he fai ‘a e lilingi ‘o e toto ‘o ho‘o mā‘ata ko Sitīveni, na‘a ku ‘i ai mo au, ‘o u tu‘u ofi ai ‘o fakava‘eva‘e, mo tauhi ‘a e kofu ‘o e kakai na‘e fakapoongi ia.

²¹Pea ne folofola mai kiate au, ‘Alu pē: he ko au te u tuku atu koe ke ‘alu ki he mama‘o, ke fai ‘eku fekau ki he Senitaile.

²²Pea na‘a nau fakafanongo kiate ia ‘o a‘u ki he lea ko ia, pea nau toki ‘ioho, Tafi‘i mei māmani ‘a e siana kehe na: he na‘e hala hono tuku ke mo‘ui.

²³Pea ‘i he‘enau kaikaila, mo tupe‘i honau kofu, mo fakapuna efu ki ‘olunga,

²⁴na‘e fekau ‘e he ‘eikitau ke hūfaki ia ki he taua, ‘o ne pehē ke ‘eke taa‘i ia; koe‘uhi ke ne ‘ilo pe ko e hā hono ‘uhinga ‘o ‘enau ‘ioho pehē ki ai.

²⁵Pea kuo nau ha‘i punou ia ke fai hono kau‘imaea, na‘e pehē ‘e Paula ki he senituliō na‘e tu‘u ai, ‘Oku ngofua koā ke mou kau‘imaea ha tangata Loma, kae‘uma‘ā ha toko taha kuo te‘eki fakamaau?

²⁶Pea ‘i he fanongo ki ai ‘a e senituliō, na‘a ne ‘alu ‘o tala ki he ‘eikitau, ‘o pehē, Ko e hā ‘a e me‘a ‘oku ke pehē ke fai? He ko e siana ni ko e Loma.

²⁷Pea ha‘u ‘a e ‘eikitau, ‘o lea kiate ia, Tala mai, ko e Loma koe?

²⁸Pea pehē ‘e ia, Ko ē. Pea tali ‘a e ‘eikitau, Na‘a mo au ne u totongi lahi ke u kau ki he kolo ko ia. Pea pehē ‘e Paula, Ka ko au na‘a ku tupu pehē foki.

²⁹Pea tuaiekemo ‘a e hiki meiate ia ‘a e kakai na‘e fai ke ‘eke ia: ‘io, pea ko e ‘eikitau foki na‘a ne manavahē ‘i he‘ene ‘ilo ko e Loma ia, pea kuo ne ha‘i fakamo‘omo‘oni ia.