Read KO E TOH TAPU KATOA TONGA ‘Apositoló 23 Bible Online

‘Apositoló 23 - KO E TOH TAPU KATOA TONGA bible

‘Apositoló 23

¹PEA ‘i he ‘aho ‘e taha, ko e me‘a ‘i he‘ene fie ‘ilo pe ko e hā nai ‘a e me‘a ‘oku talatalaaki‘i ai ia ‘e he kakai Siu, ko ia na‘a ne vete ange ia, ‘o ne fekau ke fakataha ‘a e hou‘eiki taula‘eiki, mo e Sanetalimi kātoa, pea ne ‘ohifo ‘a Paula ‘o fokotu‘u ‘i honau ‘ao.

²Pea sio fakamama‘u ‘a Paula ki he Sanetalimi, ‘o ne toki pehē, ‘A Kāinga Matāpule, ko au ‘eni ‘oku ‘ata‘atā ‘aupito hoku konisēnisi; he kuo u fai ‘eku ngāue fakafonua ki he ‘Otua, ‘o a‘u ki he ‘aho ni.

³Pea fekau ‘e he Taula‘eiki Lahi ko ‘Ānanaia kiate kinautolu na‘e tu‘u ofi ai, ke nau taa‘i hono ngutu.

⁴Pea pehē leva ‘e Paula kiate ia, ‘a e ‘a vali hina, ‘e taa‘i koe ‘e he ‘Otua: ko ho‘o nofo na ke fakamaau au ‘o fakatatau ki he Lao, ka ke fekau ke taa‘i au, ‘a ia ‘oku tapu ‘i he Lao!

⁵Pea ko kinautolu na‘e tu‘u ofi mai na‘a nau pehē, ‘Oku pehē koā ho‘o ngaohi ‘a e Taula‘eiki Lahi ‘a e ‘Otua? Pea tali ‘e Paula, ‘Ā, na‘e ‘ikai te u ‘ilo, kāinga, ko e Taula‘eiki Lahi ia; he kuo tohi, ‘E ‘ikai te ke lea kovi ki he pule ‘o ho kakai.

⁶Pea ‘i he ‘ilo ‘e Paula, ko e potu ‘e taha ko e kau Sātusi, pea ko e potu ‘e taha ko e kau Fālesi, na‘a ne hanga ‘o kalanga ‘i he lotolotonga ‘o e Sanetalimi, ‘o pehē, Kāinga Matāpule, ko au ko e Fālesi, ko e hako‘i Fālesi: ko e me‘a ‘oku tau ‘amanakia, ‘io, ‘a e toetu‘u ‘a e pekia, ko ia ‘oku ‘ekea ai au.

⁷Pea ‘i he‘ene lea pehē, na‘e hoko ai ‘o fetu‘usi ‘a e kau Fālesi mo e kau Sātusi: pea mavahe ua ‘a e fakataha.

⁸He ‘oku lau ‘a e ha‘a Sātusi, tokua ‘oku ‘ikai ha toetu‘u, pe ha ‘āngelo, pe ha laumālie: ka ‘oku tui ‘a e ha‘a Fālesi ‘oku ‘i ai fakatou‘osi.

⁹Pea na‘e hoko ha fu‘u vālau: pea tutu‘u hake ha ni‘ihi ‘o e kau sikalaipe na‘e kau ki he fa‘ahi Fālesi, ‘o nau taukave ‘o pehē, ‘Oku ‘ikai te mau ‘ilo ha kovi ‘i he tangata ni: pea na‘a kuo lea kiate ia ha laumālie pe ha ‘āngelo.

¹⁰Pea ‘i he fākalalahi ‘a e fetu‘usi na‘e manavahē ‘a e ‘eikitau na‘a haeua ‘a Paula ‘e kinautolu, pea na‘a ne fekau ‘a e tau ke ‘alu hifo, ‘o ‘ave fakamālohi mei honau lotolotonga, pea ke nau taki foki ki he taua.

¹¹Pea ‘i he pō ko ia na‘e tu‘u mai ‘a e ‘Eiki, ‘o ne folofola kiate ia, ‘o pehē, ‘Oua te ke lotosi‘i: he hangē ko ho‘o talatalatonu ‘i Selusalema ‘a e ngaahi me‘a ‘oku kau kiate au, pehē foki kuo pau te ke fakamatala ‘i Loma.

¹²Pea kuo ‘aho hake, na‘e fai ha puleaki ‘e ha kakai Siu, ‘o nau tuki faka‘aungafa kinautolu, ‘e ‘ikai te nau kai pe inu kae‘oua ke nau tāmate‘i ‘a Paula.

¹³Pea na‘e hulu atu ‘i he toko fāngofulu ‘a e kakai na‘a nau fai ‘a e fuakava ko ia.

¹⁴Pea na‘e ‘alu ‘a e fa‘ahinga ko ia ki he hou‘eiki taula‘eiki, mo e kau mātu‘a, ‘o nau pehē, Kuo mau mātu‘aki tuki faka‘aungafa kimautolu, ‘e ‘ikai te mau mama ha me‘a kae‘oua ke mau tāmate‘i ‘a Paula.

¹⁵Pea ko eni, ke ‘amoutolu mo e Sanetalimi ‘a e fakahā ki he ‘eikitau, ke ne ‘ohifo ia kiate kimoutolu, ‘o hangē ko ha‘amou fie ‘eke ke mahu‘ingamālie ‘a e ngaahi me‘a ‘oku kau kiate ia: pea ko kimautolu, ‘i he te‘eki ke ne ofi mai, te mau ‘i ai ke fakapoongi ia.

¹⁶Ka ka fanongo ‘a e ‘ilamutu ‘o Paula ki he malumu, ‘o ne ‘alu ange ‘o hū ki he taua, ‘o tala kia Paula.

¹⁷Pea ui ange ‘e Paula ha taha ‘o e kau senituliō, ‘o ne pehē, Ke ke ‘ave ‘a e talavou ni ki he ‘eikitau: he ‘oku ‘i ai ha‘ane me‘a ke fakahā ki ai.

¹⁸Ko ia na‘a ne ‘ave ia, ‘o taki ki he ‘eikitau, ‘o ne pehē, Ko e pōpula ko Paula na‘a ne ui ange au, ‘o kole ke u ‘omi ‘a e tama ni kiate koe; he ‘oku ‘i ai ha‘ane lea ke fai atu.

¹⁹Pea puke hono nima ‘e he ‘eikitau, ‘o ‘ave fakaekinaua, ‘o ne fehu‘i, Ko e hā ‘a e me‘a ‘oku ke fie fakahā mai, ē?

²⁰Pea ne pehē, Kuo fa‘ufa‘ufono ‘a e kau Siu ke tala kiate koe, ke ke ‘ofa ‘o ‘ohifo ‘a Paula ‘apongipongi ki he Sanetalimi, ‘o hangē ‘oku nau fie ‘eke ke mahu‘ingamālie ‘a e me‘a ‘oku kau kiate ia.

²¹Ko ia, ‘oua te ke tui kiate kinautolu: he ‘oku toka malumu kiate ia hanau kau tangata ‘e toko fāngofulu tupu, ko e fa‘ahinga kuo tuki faka‘aungafa kinautolu, ‘e ‘ikai te nau kai pe inu kae‘oua ke nau fakapoongi ia: pea kuo nau ‘osi teuteu, ‘o talitali pē ki ha‘o tali ‘enau kole.

²²Pea tukuange ‘e he ‘eikitau ‘a e tama, ‘o ne fekau ki ai, ‘Oua te ke tala ki ha taha kuo ke faka‘ilo ‘a e me‘a ni kiate au.

²³Pea ne ui ange ha toko ua ‘o e kau senituliō, ‘o ne pehē, Teuteu mai ki hono tolu ‘o e houa po‘uli ha kau sōtia ‘e toko uangeau ke ‘alu ki Sesalia, mo ha kau heka hoosi ‘e toko fitungofulu, mo ha kau to‘o tao pē ‘e toko uangeau.

²⁴Pea ‘omai foki ha fanga manu, koe‘uhi ke nau fakaheka ai ‘a Paula, ‘o a‘utaki lelei kia Filike ko e kōvana.

²⁵Na‘a ne fai foki ha tohi, ‘a ia na‘e fou pehē:

²⁶“Ko au Kaloti Līsia kia Filike ko e ‘Eiki Kōvana, ‘ofa atu.”

²⁷“Ko e matāpule ko eni ne puke ‘e he kau Siu, pea na‘e toe si‘i pea fakapoongi ia ‘e kinautolu: ka u ha‘u mo ‘eku tau, ‘o fakahaofi, he kuo u ‘ilo ko e Loma ia.”

²⁸“Pea ‘i he‘eku fie‘ilo foki ‘a e ‘uhinga ‘o ‘enau fakahopo ia, ko ia na‘a ku ‘ohifo ia ki he Sanetalimi ‘onautolu:

²⁹pea u ‘ilo, tā kuo fakahopo ia ‘i ha koto me‘a pē ‘oku kau ki he‘enau lao, ka ‘oku ‘ikai ha me‘a ‘i he talatalaaki ‘oku taau ke ne mate ai, pe nofo pilīsone.”

³⁰“Pea ‘i he faka‘ilo mai kiate au kuo puleaki‘i ha me‘a ke fai ki he matāpule ni, na‘a ku tuku leva ia kiate koe, pea u fekau foki ki he kau tukuaki ke nau fai ‘enau lea kiate koe.” “‘ofa atu.”

³¹Ko ia ko e kau tau na‘a nau ‘ave ‘a Paula, ‘o hangē ko honau tu‘utu‘uni, ‘o nau taki po‘uli ia ki ‘Anitepeta.

³²Pea ‘i he ‘aho ‘e taha na‘a nau tuku ‘a e kau heka hoosi ke ‘alu mo ia, ka nau foki kinautolu ki he taua:

³³pea ko e fa‘ahinga ko ia na‘a nau hoko ki Sesalia, ‘o nau ‘ave ‘a e tohi ki he kōvana, ‘o nau tuku foki ‘a Paula ki ai.

³⁴Pea kuo ne lau ia, na‘a ne fehu‘i pe ko e fē hono vahefonua. Pea ‘i he‘ene ‘ilo ko e toko taha mei Silisia.

³⁵Na‘a ne pehē, Te u fakamāu‘i ho‘o me‘a ‘oka toki hoko mai ho kau tukuaki. Pea ne fekau ke tauhi ia ‘i he palasi ‘o Hēlota.