Read KO E TOH TAPU KATOA TONGA ‘Apositoló 24 Bible Online

‘Apositoló 24 - KO E TOH TAPU KATOA TONGA bible

‘Apositoló 24

¹PEA hili ‘a e ‘aho ‘e nima na‘e ‘alu hifo ‘a ‘Ananaia ko e Taula‘eiki Lahi; pea ‘alu mo ia ha kau mātu‘a ni‘ihi, mo ha‘ane malanga, ko e motu‘a ko Tētulo; pea nau faka‘ilo ‘a Paula ki he kōvana.

²Pea kuo ui mai ia, pea kamata ‘a Tētulo hono talatalaaki‘i, ‘o pehē, ‘Ē, Filike, Hono nifi ‘a e melino ‘oku mau tofanga ai ni, ko e me‘a ‘i he Feitu‘u na! pea hono nifi ‘a e fiemālie ‘oku ma‘u ‘e he kakai ni ‘i he tauhi poto ‘a e Angi na!

³‘Ē, ‘oku mau ongona ‘i he me‘a kotoa pē mo e potu kotoa pē; pea ‘oku mau mātu‘aki fakafeta‘i.

⁴Ka koe‘uhi na‘a ku fakapiko kiate koe ‘i ha‘aku fuoloa, ko ia ‘oku ou kole ke ke fai ho tau ko e angalelei, ‘o me‘a si‘i mai kiate kimautolu.

⁵Ko eni, kuo mau ‘ilo ‘a e matāpule ni, ko e tangata ‘oku pau‘u pipihi, ko e toko taha ‘oku fakatupu maveuveu ‘i he kakai Siu ‘i māmani kātoa, ko e takimu‘a foki ‘i he fa‘ahi Nāsaleti.

⁶Pea ne ‘ahi‘ahi foki ke maumau ‘a e tapu ‘o e Temipale: pea mau hanga ‘o puke, pea mau mei fakamāu‘i ia ‘o fakatatau ki he‘emau lao.

⁷Ka na‘e ha‘u ‘a e pule ‘o e vāhenga tau ko Līsia kiate kimautolu, ‘o ne hamusi fakamālohi atu ia mei homau nima, ‘o ne fekau ke omi kiate koe hono kau talatalaaki,

⁸he ‘oku faingofua kiate koe ke ‘eke kiate ia ‘i he ngaahi me‘a ko ia, pea te ke toki mea‘i hono mo‘oni ‘o e ngaahi me‘a ‘oku mau talatalaaki‘i ai ia.[35]

⁹Pea na‘e poupou ki ai ‘a e kau Siu foki, ‘o nau taukave ‘oku mo‘oni ‘a e ngaahi me‘a ko ia.

¹⁰Na‘e fai foki ‘e Paula ‘ene tali (he kuo kamo kiate ia ‘a e kōvana ke ne lea), ‘o pehē, ‘Oku te fakamālie‘ia he‘ete tu‘u ke fai ‘ete fakamatala ki he ngaahi me‘a ‘oku kau kia kita, ko ‘ete ‘ilo kuo lahi ta‘u ho‘o nofo ko e fakamaau ‘o e kakai ni.

¹¹He ‘oku faingofua ai kiate koe ke ‘eke ‘o ‘ilo, ‘oku ‘ikai ke lahi ‘i he hongofulu mā ua ‘a e ‘aho kuo mole talu ‘eku ‘alu hake ki Selusalema ke fai ‘eku lotu.

¹²Pea na‘e ‘ikai te nau ‘ilo au ‘oku ou fakakikihi mo ha taha ‘i he Temipale, pe ‘oku ou tātānaki ha kakai ‘i ha falelotu, pe ‘i ha feitu‘u kolo:

¹³pea tala‘ehai te nau lava ke fakamo‘oni ‘i ho ‘ao ki he ngaahi me‘a kuo nau toki talalalaaki‘i ai au.

¹⁴Ka ko e me‘a ni te u fakamo‘oni atu, ‘oku ou fou ‘i he ‘alunga ko ē, ‘a ia kuo nau ui ko e fa‘ahi ‘e taha, ka ko e anga pē ia ‘o ‘eku tauhi ‘a e ‘Otua ‘o homau fa‘ahinga; ‘o u tui pē ki he ngaahi me‘a kotoa pē kuo tohi ‘i he Lao mo e Tohi palōfita.

¹⁵Pea u falala pē ki he ‘Otua ‘e faifai pea hoko ha toetu‘u ‘a e angatonu mo e angahala fakatou‘osi — pea ko e me‘a ia ‘oku tui ki ai ‘e kinautolu ni foki.

¹⁶Pea ko hono ‘uhinga ia ‘oku ou nofo‘aki ngāue ai ‘e au foki, ke tauhi ma‘u hoku konisēnisi ke ta‘emelengatamaki ki he ‘Otua mo e tangata.

¹⁷Pea kuo hili ‘a e ngaahi ta‘u lahi, na‘a ku ha‘u ko e ‘omi ha ngaahi me‘a tokoni, mo ha ngaahi me‘a ‘ofa, ki hoku kakai.

¹⁸Pea lolotonga ‘eku fai ia, mo e ‘ilo au ‘i he Temipale kuo u fai ‘a e fakatapu; pea tala‘ehai na‘e ‘i ai mo au ha fu‘u kakai, ‘uma‘ā ha longoa‘a, ngata pē ‘i he tu‘unga Siu ko ia mei ‘Ēsia, ‘a ia na‘a nau ‘ilo au

¹⁹— ‘a ia na‘e totonu ke nau ‘i ho ‘ao ni ke fai ‘a e talatalaaki, ‘o kapau ‘oku ‘i ai ha‘anau me‘a kiate au.

²⁰Pea ka ‘ikai; pea ke lea pē ‘e kinautolu ni ki ha kovi na‘a nau ‘ilo ‘iate au, lolotonga ‘eku tu‘u ‘i he ‘ao ‘o e Sanetalimi.

²¹Ko e fo‘i lea ni pē ‘apē, ‘a ia na‘a ku kalanga‘aki ‘i he‘eku tu‘u ‘i honau lotolotonga, ‘o pehē, Ko e me‘a ki he toetu‘u ‘a e pekia, ko ia ia ‘oku ‘ekea ai au ‘e kimoutolu he ‘aho ni.

²²Pea na‘e toloi ‘e Filike ‘enau me‘a, he na‘a ne ‘ilo kānokano ‘a e ngaahi me‘a na‘e kau ki he ‘alunga ko ē; ‘o ne pehē, ‘Oua ke hoko hifo ‘a Līsia ko e ‘eikitau, pea u toki fakamaau lelei ho‘omou ngaahi me‘a.

²³Pea ne fekau ‘a e senituliō ke tauhi ia: ke ‘oua foki ‘e fakapōpula‘i fau, pe ta‘ofi ‘a e tokoni kiate ia ‘e hano kāinga.

²⁴Pea hili ‘a e ‘aho ni‘ihi, kuo hoko mai ‘a Filike mo hono uaifi ko Telūsila, ‘a ia ko e ta‘ahine Siu, na‘a ne fekau ke ‘omi ‘a Paula, ‘o ne fanongo ki he‘ene fakamatala ki he lotu kia Kalaisi Sīsū.

²⁵Pea lolotonga ‘ene malanga‘aki ‘a e faitotonu, mo e fakama‘uma‘u kita, mo e fakamaau ‘oku tu‘unuku mai, na‘e tetetete ‘a Filike, ‘o ne tali ‘o pehē, ‘Alu ‘eni; pea ka ai ha faingamālie te u tala ke ke ha‘u.

²⁶Na‘a ne ‘amanaki foki ‘e ‘omi ‘e Paula ha‘ane pa‘anga: ko hono ‘uhinga ia foki na‘a ne toutou ‘omi ai ia, ‘o talanoa mo ia.

²⁷Pea kuo kakato ha ta‘u ‘e ua, pea tuku ‘e Filike hono tu‘unga kia Posio Fesitō: na‘e loto foki ‘a Filike ke fakava‘anganaki hano ‘ofeina ‘e he kakai Siu, ko ia na‘a ne tuku pē ‘a Paula kuo kii‘i.