Read KO E TOH TAPU KATOA TONGA ‘Apositoló 27 Bible Online

‘Apositoló 27 - KO E TOH TAPU KATOA TONGA bible

‘Apositoló 27

¹PEA ‘i he tu‘utu‘uni leva ke mau folau ki ‘Ītali, na‘e tuku ‘a Paula mo ha tu‘unga pōpula kehe ki ha Senituliō na‘e hingoa ko Suliasi, ‘a ia na‘e kau ki he vāhenga tau ko ‘Akosito.

²Pea mau heka ki ha vaka ‘Ātalamaito, ‘a ia na‘e teu folau ki he ngaahi feitu‘u ‘o ‘Ēsia, ‘o mau tuku folau atu; pea na‘e ō mo kimautolu ‘a ‘Ālisitako, ko e Masitōnia mei Tesalonaika.

³Pea ko e ‘aho ‘e taha na‘a mau tau ki Saitoni. Pea na‘e angalelei ‘a Suliasi kia Paula, ‘o ne tuku ke ne ‘alu ki hono kau fe‘iloaki ke ma‘u ‘enau ‘ofa.

⁴Pea kuo mau tuku folau mei ai, pea mau ‘alu ‘i he ū ‘o Saipalo, he na‘e tokai ‘a e matangi.

⁵Pea mau folau atu foki ‘i he Tahi ‘o Silisia mo Pamifilia, ‘o mau hoko ki Maila ‘i Līsia.

⁶Pea ‘ilo ai ‘e he senituliō ha vaka ‘Ālekisānitia ko ‘ene folau ki ‘Ītali; ‘o ne fakaheka kimautolu ki ai.

⁷Pea ko e me‘a ‘i he‘ene ‘aho lahi mo ‘emau ngaholo si‘i pē, ‘o ‘ikai meimei ma‘u ‘a Naitusi ko e kovi ‘a e matangi, ko ia na‘a mau folau ‘i he ū ‘o Kēliti ‘o a‘u ki Salemone.

⁸Pea mau toki fakateletele, ka na‘e faingata‘a; ‘o mau hoko ki ha potu na‘e ui ko Taulanga Lelei, ‘a ia ‘oku tu‘u ofi ai ‘a e kolo ko Lāsea.

⁹Pea kuo mole ha taimi lahi, pea matamata tu‘utāmaki ‘eni ‘emau folau, he kuo mahili ‘eni ‘a e ‘aukai,[37] ko ia na‘e tokoni ‘a Paula kiate kinautolu,

¹⁰‘o ne pehē, Kau Matāpule, ‘oku ou vakai ‘oku hangehangē ka fakatu‘utāmaki ‘a e folau ni; pea lahi ‘a e maumau, ‘o ‘ikai ‘o e uta mo e vaka pē, ka ‘o ‘etau mo‘ui foki.

¹¹Ka ko e senituliō, na‘e mamafa ange kiate ia ‘a e lea ‘a e toutai, mo ia na‘e pule ki he vaka, ‘i he lea ‘a Paula.

¹²Kae‘uma‘ā ko e taulanga ia na‘e ‘ikai lelei ke hūfanga ai ‘i he fa‘ahita‘u afā: ko ia, na‘e loto ‘a e tokolahi ke tuku folau mei ai, hei‘ilo te nau lava ke ma‘u ‘a Finisi ke hūfanga ai; ko e taulanga ia ‘o Kēliti ‘oku ū ki he matangi tonga-hihifo mo e tokelau-hihifo.[38]

¹³Pea ‘i he‘ene angiangi mei he Tonga, na‘a nau lau kuo lava ‘enau fakakaukau; ‘o nau fusi taula, ‘o nau fakateletele ‘i Kēliti, ‘o ofi ‘aupito ki ‘uta.

¹⁴Ka kuo te‘eki ke nau loko tō atu, mo e hifo mai mei ‘uta ha matangi hangē ha ‘ahiohio, ‘oku hingoa ko e ‘Eulakulone.

¹⁵Pea ‘i he mo‘ua ai ‘a e vaka, ‘o ‘ikai lava ke fakatauala, na‘a mau tuku, ‘o mau ‘au‘auhia.

¹⁶Pea mau lele ki he ū ‘o ha ki‘i motu na‘e ui ko Kalauta, pea na‘e ‘ikai te mau meimei lava ke ma‘u ‘a e vaka fokotu‘u.

¹⁷Pea kuo fusi leva ia, na‘a mau hanga ‘o ngaohi ‘a e vaka, ‘o tālī. Na‘a mau manavahē foki na‘a mau tūkia ‘i Sītela, ko ia na‘a mau hu‘i ‘a e alangavaka ‘olunga, pea mau toki lepelepaheke.

¹⁸Pea ‘i he‘emau mātu‘aki matangia ‘i he ‘aho ‘e taha,

¹⁹na‘a mau tolo ‘a e uta; pea ‘i hono tolu ‘o e ‘aho na‘a mau hanga ‘e kimautolu ‘o laku ‘a e nāunau ‘o e vaka.

²⁰Pea ‘i he‘ene ‘aho lahi ‘o ‘ikai hā ‘a e la‘ā pe ko e ngaahi fetu‘u, mo e kei falala mālohi ‘a e matangi, na‘e mole ‘aupito ‘emau ‘amanaki ki he mo‘ui.

²¹Kae‘uma‘ā na‘e lahi ‘a e ta‘ekai: kae toki tu‘u ‘a Paula ‘i honau lotolotonga, ‘o ne pehē, Kau Matāpule, na‘a mou mei tuitala kiate au, ‘o ‘oua ‘e tuku folau mei Kēliti, ‘o fenāpasi mo e tu‘utāmaki ni mo e maumau.

²²Ka na‘a mo eni ‘oku ou tokoni atu ke mou fakato‘oto‘a: koe‘uhi ‘e ‘ikai mate hamou toko taha, ka ko e vaka pē.

²³He na‘e tu‘u ofi mai ‘anepō ha ‘āngelo ‘a e ‘Otua, ‘a ‘Ene ‘Afio ‘oku ‘o‘ona au,

²⁴pea ko ia ‘oku ou lotu ki ai, ‘o ne pehē mai, ‘E Paula, ‘oua te ke manavahē; kuo pau te ke tu‘u ‘i he ‘ao ‘o Sisa: pea ko eni, kuo me‘a‘ofa‘aki ‘e he ‘Otua kiate koe ‘a e kakai kotoa pē ‘oku mou folau mo koe.

²⁵Ko ia, ‘a matāpule, mou lototo‘a: he ‘oku ou tui ki he ‘Otua ‘e hoko pē ‘o hangē ko ‘ene folofola mai.

²⁶Ka kuo pau tokua, te tau tūkia ‘i ha motu.

²⁷Pea ‘i hono pō hongofulu mā fā, lolotonga ‘emau pāea holo ‘i he tahi ko ‘Ātalia, ‘iloange, ‘i he tu‘uapō, na‘e mahalo ‘a e kau vaka kuo nau ofi ki ha fonua.

²⁸Pea nau tukutuku, ko e uangokumi: pea nau fai atu si‘i ‘o toe tukutuku, ko e tekumi mā nima.

²⁹Pea mau manavahē na‘a ‘iloange te mau tūkia ‘i ha potu ‘oku hangatāmaki, ko ia na‘a nau lī ha taula ‘e fā mei he taumuli, ‘o nau faka‘amu ke ‘aho.

³⁰Pea ‘ahi‘ahi ‘a e kau vaka ke feholaki mei he vaka, pea nau tukutuku hifo ‘a e vaka fokotu‘u ki he tahi, ‘o lau tokua ko ‘enau ‘alofaki taula ke lī mei he taumu‘a.

³¹Kae lea ‘e Paula ki he senituliō mo e kau sōtia, Kapau ‘e ‘ikai nofo ‘i vaka ‘a e kau siana ni, ‘e ‘ikai lava hamou fakahaofi.

³²Pea hanga leva ‘a e kau sōtia, ‘o tu‘usi ‘a e ngaahi maea ‘o e vaka fokotu‘u, ‘o tuku ia ke tō ‘o mole.

³³Pea hanga ai ‘a Paula ‘o enginaki kinautolu kotoa pē, ‘o a‘u ki he‘ene meimei ‘aho hake, ke nau fai ha tokoni; ‘o ne pehē, Ko e ‘aho e ‘e hongofulu mā fa mo ho‘omou taukotofa ‘o nofo ta‘ekai, ‘o ‘ikai te mou ma‘u ha me‘a.

³⁴Ko ia, ‘oku ou enginaki atu ke mou fai ha kai: pea ‘āsili, he ko e me‘a ia ‘e tokoni ki homou fakahaofi. Tala atu, ‘e ‘ikai mole hamou tu‘oni lou‘ulu ‘e taha.

³⁵Pea ‘i he‘ene lea pehē, na‘a ne ala ki ha mā, ‘o ne fai ha fakafeta‘i ki he ‘Otua ‘i honau ‘ao; pea ne pakipaki ia ‘o kamata kai.

³⁶Pea nau loto lahi ai kotoa, ‘o nau hanga ai ‘e kinautolu ‘o tokoni.

³⁷Pea ko homau lau kātokatoa ‘o e kakai ‘i he vaka, ko e toko uangeau mo e toko fitungofulu mo e toko ono.[39]

³⁸Pea kuo nau mākona, na‘a nau fakama‘ama‘a ‘a e vaka, ‘o tolo ‘a e uite ki tahi.

³⁹Pea ‘i he‘ene ‘aho hake, na‘e ‘ikai te nau ‘ilo pe ko e fonua fē: ka na‘a nau vakai ha kōmaki na‘e ‘one‘one hono pā‘angangalu, pea na‘a nau loto ke fakahake ‘a e vaka ‘i he potu ko ia, ‘o kapau ‘e lava.

⁴⁰Pea nau motuhi ‘a e ngaahi taula ‘o tuku pē ‘i tahi, pea vete fakataha mo ia ‘a e ha‘i ‘o e ongo fohe‘uli, ‘o nau fai lā ‘i he taumu‘a, ‘o nau faka‘uli ki he ‘one‘one.

⁴¹Kae ‘iloange, na‘a nau toloto ‘i ha potu na‘e fetaulaki ai ‘a e tahi ‘e ua, pea nau faka‘oho ai ‘a e vaka; pea pikisia ‘a e taumu‘a ‘o toka ma‘u, ka ka vāea ‘a e taumuli ‘i he mālohi ‘o e peau.

⁴²Pea loto leva ‘a e kau sōtia ke tāmate‘i ‘a e kau pōpula, na‘a kakau ha taha ki ‘uta ‘o hola.

⁴³Ka ko e senituliō, ko e me‘a ‘i he‘ene fie fakahaofi ‘a Paula, na‘a ne ta‘ofi ‘enau fakakaukau ko ia; ‘o ne fekau, ke ‘ilonga ‘a kinautolu ‘oku fa‘a kakau ke nau hopo ki tahi ‘o mu‘omu‘a ki ‘uta:

⁴⁴pea ko e me‘a ki hono toe, ke kakau ha ni‘ihi ‘i he ngaahi fono, pea ko e ni‘ihi ‘i ha me‘a pē mei he vaka. Pea ‘i he fai pehē, na‘a mau hao kotoa pē ki ‘uta.