Read KO E TOH TAPU KATOA TONGA ‘Apositoló 28 Bible Online

‘Apositoló 28 - KO E TOH TAPU KATOA TONGA bible

‘Apositoló 28

¹PEA kuo mau hao mai leva, pea mau ‘ilo tā ko e hingoa ‘o e motu ko Mēlita.

²Pea ko e me‘a kehe ‘a e angalelei ‘a e kau pāpeliane: he na‘a nau tafu afi, ‘o ‘ave kimautolu kotoa pē ki ai, koe‘uhi ko e ‘uha na‘e tō, mo e momoko.

³Pea kuo okooko ‘e Paula ha ‘ū popohango, ‘o ne ‘ai ki he afi, na‘e totolo mai mei he māfana ha ngata fekai, ‘o u‘u ‘i hono nima.

⁴Pea ‘i he mamata ‘a e kau pāpeliane ki he manu ‘oku tāupe ‘i hono nima, na‘a nau fepehē‘aki, ‘Āua, ko e siana ni ko e tangata fakapō, pea neongo kuo ne hao mei he tahi, ka na‘e ‘ikai tuku ia ‘e Nunu‘a ke mo‘ui.

⁵Ka ka tupe‘i ‘e ia ‘a e manu ki he afi, ‘o ‘ikai te ne ongo‘i ha kovi.

⁶Ka ko kinautolu, na‘a nau ‘amanaki ‘e toe si‘i pea ne fepulopulasi, pe tō fakafokifā ‘o pekia: ka kuo fuoloa ‘enau tatali, pea nau vakai ‘oku ‘ikai ha me‘a ‘e hoko kiate ia, pea na‘e liliu honau loto, ‘o nau pehē ko e ‘otua ia.

⁷Pea na‘e tu‘u ‘i he feitu‘u ko ia ‘a e potu fonua ‘o e pule ‘o e motu, ko hono hingoa ko Popilio; ‘a ia na‘a ne tali kimautolu, ‘o ne tauhi lelei ‘i hono ‘api ‘i he ‘aho ‘e tolu.

⁸Pea tā ‘oku toka ‘a e tamai ‘a Popilio, kuo puke ‘i he mofi mo e tu‘utu‘utoto. Pea ‘alu ‘a Paula kiate ia, ‘o ne hūfia, ‘o ne hilifaki hono nima ki ai ‘o fakamo‘ui.

⁹Pea hili ia, pea ha‘u ‘a e kakai kehe ‘o e motu na‘e mahaki, pea na‘e fakamo‘ui kinautolu:

¹⁰‘a ia na‘e lahi ‘enau tokanga‘i kimautolu; pea ‘i he‘emau folau, na‘a nau fakaheka ha ngaahi me‘a ma‘amau tokonaki.

¹¹Pea kuo hili ha māhina ‘e tolu, pea mau folau ‘i ha vaka, ‘a ia ne hūfanga ‘i he motu ‘i he fa‘ahita‘u afā; ko e vaka ‘Ālekisānitia, pea ko hono hingoa, Ko e ongo ‘Otua Māhanga.

¹²Pea mau tau ki Sulakusa, ‘o mau ‘aho tolu ai.

¹³Pea mau fākahua mei ai ‘i he potu ko ia, ‘o mau hoko ki Lesio: pea hili ‘a e ‘aho ‘e taha na‘e tonga ‘a e matangi, pea mau a‘u ki Piuteolai ‘i hono ‘aho ua:

¹⁴pea mau ‘ilo ai ha ni‘ihi ‘i he kāinga, pea na‘a nau kole ke mau nofo mo kinautolu ‘o ‘aho fitu: pea hili ia na‘a mau ‘alu ki Loma.

¹⁵Pea kuo ma‘u talanoa ‘e he kāinga ‘o e potu ko ia kiate kimautolu, ‘o nau fononga mei ai ‘o a‘u ki ‘Apiai Folo mo Faletolu ke fakafetaulaki kiate kimautolu: pea ‘i he fe‘iloaki ‘a Paula mo kinautolu, na‘a ne fai ‘ene fakafeta‘i ki he ‘Otua, mo ne ma‘u ai ha to‘a.

¹⁶Pea ‘i he‘emau hū ki Loma, na‘e fakangofua kia Paula ke nofo ‘i hano fale ‘o‘ona, fakataha mo ha sōtia ke le‘ohi ia.

¹⁷Pea hili ‘a e ‘aho ‘e tolu, na‘a ne fekau ke fakataha mai ‘a e kau tu‘ukimu‘a ‘o e kakai Siu: pea ‘i he‘enau kātoa mai, na‘a ne lea kiate kinautolu ‘o pehē, Kāinga Matāpule, ko au ‘eni na‘e ‘ave pōpula mei Selusalema, ‘o tuku ki he kakai Loma, kae tala‘ehai na‘a ku fai ha kovi ki hotau fa‘ahinga, pe ki he‘etau ngaahi anga tukufakaholo.

¹⁸Pea ko e fa‘ahinga ko ia, hili ‘enau fakamaau au, na‘a nau pehē ke tukuange, koe‘uhi na‘e ‘ikai ha‘aku hiamatea.

¹⁹Ka ‘i he lea ‘a e kakai Siu ke ta‘ofi, na‘e pau ke u unga kia Sisa; ka na‘e ‘ikai ko e pehē ‘oku ‘i ai ha‘aku me‘a ke talatalaaki‘i ai hoku kakai.

²⁰Pea ko hono ‘uhinga ia na‘a ku ui mai ai kimoutolu, ke tau fe‘iloaki, pea koe‘uhi ke u lēlea atu; pea ‘āsili, he ko e me‘a ‘oku ‘amanakia ‘e ‘Isileli, ko ia ia ‘oku ou kahoa‘aki ai ‘a e seini ni.

²¹Pea nau tali kiate ia, Ko e me‘a kiate kimautolu, kuo ‘ikai te mau ma‘u tohi mei Siutea kiate koe; pea kuo ‘ikai ha taha ‘i he kāinga ‘e ha‘u mo hao ongoongokovi, pe ai ha‘ane talanoa ‘e kau kovi kiate koe.

²²Ka ‘oku mau pehē, na‘e mei taau ke mau fanongo tonu ‘iate koe pe ko e hā ho‘o ngaahi ‘ulungālau; he ko e me‘a ki he fa‘ahi ko ia, ko e me‘a pē ‘oku mau ‘ilo ki ai, hono lau‘i ‘i he potu kotoa pē.

²³Pea nau kotofa ha ‘aho kiate ia, pea nau omi ‘o tokolahi ange ki hono ‘apitanga; pea ne fakamatala mo talatonu kiate kinautolu ‘a e Pule‘anga ‘o e ‘Otua, ‘o ne ‘ahi‘ahi fakatui‘i ki he ngaahi me‘a ‘oku kau kia Sīsū, ‘o tefito ‘ene lea ki he Lao ‘a Mōsese mo e Tohi Palōfita fakatou‘osi; ‘o ne fai mei he hengihengi ki he po‘uli.

²⁴Pea na‘e tui ha ni‘ihi ki he‘ene fakamatala, ka ko e ni‘ihi na‘e ‘ikai.

²⁵Pea ‘i he‘enau loto kehekehe ko ia, na‘a nau tutuku: ka ‘i he te‘eki ke nau ‘alu, na‘e fai ‘e Paula ‘ene fo‘i lea ko eni, He hala ā ‘a e folofola ‘a e Laumālie Mā‘oni‘oni ki ho‘omou ngaahi kui ‘i he palōfita ko ‘Aisea,

²⁶‘o pehē, ‘Alu ki he kakai ko ia, mo ke pehē, Te mou mātu‘aki fanongo, Kae ‘ikai ongo‘i; Pea te mou mātu‘aki sio, Kae ‘ikai ‘ilo‘i.

²⁷He kuo fangapesi ‘a e loto ‘o e kakai ni, Pea ongongata‘a honau telinga, Pea ko honau mata kuo nau tāpuni; Na‘a ‘iloange te nau sio ‘aki honau mata, Pea fanongo ‘aki honau telinga, Pea ‘ilo ‘aki honau loto, ‘O nau tafoki, Ka u fakamo‘ui ‘a kinautolu.

²⁸Ko ia, ko e me‘a pē ko eni ke mou ‘ilo ki ai, kuo fekau ma‘a e Senitaile foki ‘a e me‘a ni, ‘a e fakamo‘ui‘anga ni ‘a e ‘Otua: ‘io, pea ko kinautolu te nau tokanga ki ai foki.

²⁹Pea hili ‘ene lea‘aki ‘a e ngaahi lea ni, na‘e mahu‘i atu ‘a e kau Siu, ‘o lahi ‘enau fakakikihi fakaekinautolu pē.[40]

³⁰Pea na‘a ne nofo ‘i ha fale na‘a ne totongi ki ai ‘e ia, ko e ta‘u ‘e ua kātoa; pea na‘e ‘ilonga ‘a kinautolu ‘e ‘alu ange na‘a nau fe‘iloaki mo ia.

³¹Pea ne malanga‘aki ‘a e Pule‘anga ‘o e ‘Otua, ‘o ne ako‘aki ‘a e ngaahi me‘a ‘oku kau ki he ‘Eiki ko Sisu Kalaisi, ‘o ne mātu‘aki fai mālohi, ‘o ‘ikai ta‘ofia.