Read KO E TOH TAPU KATOA TONGA ‘Apositoló 4 Bible Online

‘Apositoló 4 - KO E TOH TAPU KATOA TONGA bible

‘Apositoló 4

¹PEA lolotonga ‘ena lea ki he kakai, na‘e tu‘u mai kiate kinaua ‘a e kau taula‘eiki,[4] mo e ‘eikitau ‘o e Temipale, mo e kau Sātusi,

²ko ‘enau mamahi ‘i he‘ena ako‘i ‘a e kakai, mo ‘ena malanga‘aki ‘ia Sīsū ‘a e toetu‘u mei he pekia.

³Pea nau puke kinaua, ‘o tuku ki he pilīsone ki he ‘apongipongi, he kuo efiafi.

⁴Ka na‘e tui ha tokolahi ‘iate kinautolu na‘e fanongo ki he malanga; pea na‘e hoko ‘o toko nima afe nai ‘a e lau ‘o e kau tangata.

⁵Pea pongipongi hake na‘e fai ‘enau fakataha ‘i Selusalema ‘a honau kau pule, mo e kau mātu‘a, mo e kau sikalaipe.

⁶Kae‘uma‘ā ‘a ‘Ānasi ko e Taula‘eiki Lahi, mo Kaiafasi, mo Sione, mo ‘Ālekisānita, mo kinautolu na‘e kau ki he ha‘a Taula‘eiki Lahi.

⁷Pea nau fokotu‘u kinaua ‘i honau ha‘oha‘onga, ‘o nau fehu‘i, Ko e fa‘ahinga ivi fē, mo e fa‘ahinga hingoa fē, kuo mo fai‘aki ‘a e me‘a ni?

⁸Na‘e toki fakafonu ‘a Pita ‘i he Laumālie Mā‘oni‘oni, ‘o ne pehē kiate kinautolu, ‘A Hou‘eiki ‘Isileli, mo e Ka u Mātu‘a.

⁹Kapau ‘oku ‘ekea kimaua he ‘aho ni ‘i he ngāue lelei ne fai ki he tangata mahaki, pe kuo fakamo‘ui ‘a e siana ni ‘i he hā:

¹⁰ke mahino mu‘a kiate kimoutolu kotoa pē, mo e kakai ‘Isileli fuli pē, ko e huafa pē ‘o Sīsū Kalaisi mei Nāsaleti, ‘a ia na‘a mou kalusefai, ‘a ia na‘e fokotu‘u ‘e he ‘Otua mei he pekia, ko e toko taha ko ia ‘oku tu‘u mei ai ‘a e siana ni ‘i homou ‘ao kuo mo‘ui.

¹¹Ko e toko taha ko ia, ko e maka na‘e ta‘etoka‘i ‘e kimoutolu tufunga ‘a ē kuo hoko ko e maka lahi ‘o e tuliki.

¹²‘Io, pea ‘oku ‘ikai ke tu‘u ‘i ha taha kehe ‘a e fakamo‘ui; he tala‘ehai ‘oku ‘i ai mo ha hingoa kehe ‘i he lalo langi kuo fokotu‘u ‘i he lotolotonga ‘o e kakai, ‘a ia kuo tu‘utu‘uni ke tau mo‘ui ai.

¹³Pea ‘i he‘enau tokanga‘i ‘a e ta‘emālū‘ia ‘a Pita mo Sione, kae‘uma‘ā ‘enau ‘ilo ko e ongo me‘a ta‘ekolisi kinaua, pea ta‘ema‘u tu‘unga, na‘a nau ofo; pea nau vakai vakai, tā ko e ongo me‘a na‘e fa‘a ‘ia Sīsū.

¹⁴Ko ena foki ‘a e tangata na‘e fakamo‘ui ‘oku ne tu‘u mo kinaua; pea ‘ikai leva ha‘anau momo‘i me‘a ke tali ‘aki.

¹⁵Pea nau fekau ke na hū kitu‘a mei he Sanetalimi, ‘o nau felāuaki ‘o pehē,

¹⁶Ko e hā ‘atautolu ai ‘e fai ki he ongo me‘a ni? He ko e hoko ‘iate kinaua ha mana mo‘oni, ko e me‘a ia ‘oku e‘a ki he nofo Selusalema kotoa pē, pea tala‘ehai te tau lava ke faka‘ikai‘i.

¹⁷Ka koe‘uhi ke ‘oua na‘a toe taha atu hono mafola ki he kakai, tau fakamana‘i kinaua, ke ‘oua ‘aupito te na momo‘i lau ki he hingoa ni ‘i ha‘ana talanoa ki ha taha.

¹⁸Pea nau ui ange kinaua, ‘o nau fakahā ke ‘oua te na momo‘i pu‘aki ‘a e hingoa ‘o Sīsū, ‘uma‘ā ha ako‘aki.

¹⁹Ka ka tali ‘e Pita mo Sione, ‘o pehē kiate kinautolu, Mou me‘a lelei pē ki ai, pe ko e fē ‘oku totonu ‘i he finangalo ‘o e ‘Otua, ‘a ‘ema talangofua kiate kimoutolu, pe ki He‘ene ‘Afio.

²⁰He ‘e ‘ikai te ma fa‘a tuku ‘ema lea ki he ngaahi me‘a na‘a ma sio ki ai mo fanongoa.

²¹Pea nau toe taha ange ‘enau fakamana‘i kinaua, ‘o nau toki tuku ange, ko e ‘ikai te nau ‘ilo pe te nau tautea fēfē kinaua telia ‘a e kakai: he na‘e fakahīkihiki‘i kotoa pē ‘e kinautolu ‘a e ‘Otua ‘i he me‘a kuo hoko.

²²He na‘e fāngofulu tupu ‘a e ta‘u ‘o e tangata, ‘a ia kuo fai ki ai ‘a e mana fakamo‘ui.

²³Pea ‘i he tuku ange kinaua, na‘a na ō ki honau kakai, ‘o na ongoongoa ‘a e ngaahi lea kehekehe kuo fai ‘e he hou‘eiki taula‘eiki mo e kau mātu‘a kiate kinaua.

²⁴Pea ‘i he‘enau fanongo ki ai, pea nau ofa‘aki lototaha ‘enau lea ki he ‘Otua, ‘o nau pehē, ‘Ēī, ko koe ne ngaohi ‘a e langi, mo e fonua, mo e tahi, mo e ngaahi me‘a kehekehe ‘oku ‘i ai.

²⁵Ko koe ne folofola mai ‘i he Laumālie Mā‘oni‘oni, mo e fofonga ‘o ‘emau kui ko Tēvita, ko ho‘o sevāniti, ‘o pehē, Ko e hā ‘oku futefute ai ‘a Senitaile, Mo fakakaukau mūnoa ‘a e ngaahi matakali?

²⁶He tu‘u mai ‘a e ngaahi tu‘i ‘o māmani, Pea fakatahataha ‘a e hou‘eiki Ke puleaki‘i ‘a e ‘Eiki, Pea mo ‘ene Pani.

²⁷He ‘oku mo‘oni na‘e fakataha ‘i he kolo ni ‘a Hēlota mo Ponitō Pailato fakatou‘osi, kae‘uma‘ā ‘a Senitaile mo e ngaahi fa‘ahinga ‘Isileli, ke nau fai ha me‘a ki ho‘o Sevāniti Tapu ko Sīsū, ‘a ia na‘a ke pani;

²⁸ke lava ka ko e ngaahi me‘a na‘e mu‘aki tālanga‘i ‘e ho‘o Māfimafi mo ho‘o Poto, pea ‘i he me‘a ko eni,

²⁹‘Eiki, ke ke me‘a ki he‘enau ngaahi fakamana, pea tuku ki ho‘o kau tamaio‘eiki, ke ‘oua ‘aupito te mau mālū‘ia ‘i he‘emau malanga‘aki ho‘o folofola,

³⁰‘i ho‘o mafao mai ho nima ke faito‘o, pea ke hoko ‘a e ngaahi me‘a mana mo fakaofo ‘i he huafa ‘o ho‘o Sevāniti Tapu ko Sīsū.

³¹Pea lolotonga ‘enau hū, na‘e ngalulululu ‘a e potu ‘oku nau fakataha ai; pea na‘e fakafonu ‘a kinautolu kātokatoa ‘i he Laumālie Mā‘oni‘oni: pea na‘a nau malanga‘aki ‘a e folofola ‘a e ‘Otua ‘o ta‘emālū‘ia.

³²Pea ko kinautolu kātokatoa kuo tui, na‘a nau uouongataha, mo lototaha; ‘io, na‘e ‘ikai ha taha te ne lau ‘ene me‘a pē ha taha ‘o e ngaahi me‘a ‘oku ‘iate ia: ka na‘a nau mātu‘aki me‘a taha pē.

³³Pea na‘e tu‘u kaukaua ‘aupito ‘a e kau ‘Aposetolo, he‘enau fakamo‘oni ki he toetu‘u ‘a e ‘Eiki ko Sīsū Kalaisi: ‘io, pea na‘e nofo‘ia kinautolu kotoa pē ‘e ha kelesi lahi.

³⁴He tala‘ehai na‘e ai si‘anau toko taha ‘e masiva: he ‘ilonga kinautolu na‘e ma‘u ‘api mo e fale na‘a nau fakatau atu ia; pea na‘e toutou ‘omi ‘a e pa‘anga ‘o e ngaahi me‘a kuo fakatau,

³⁵‘o tuku atu ki he va‘e ‘o e kau ‘Aposetolo: pea ‘ilonga ha taha na‘e masiva na‘e ‘ange mei ai ha me‘a, ‘o fakatatau ki he‘ene masiva.

³⁶Pea na‘e ai ha motu‘a Līvaite na‘e tupu ‘i Saipalo, ko Siosifa ia, ka na‘e fakahingoa ko Pānepasa ‘e he kau ‘Aposetolo, (‘a ia ko hono hiki, Ko e foha ‘o Leaongo).

³⁷Na‘e fakatau ‘e ia ha ngoue‘anga na‘e ‘iate ia, ‘o ne ‘omi hono pa‘anga, ‘o tuku atu ki he va‘e ‘o e kau ‘Aposetolo.