Read KO E TOH TAPU KATOA TONGA ‘Apositoló 6 Bible Online

‘Apositoló 6 - KO E TOH TAPU KATOA TONGA bible

‘Apositoló 6

¹KA ‘i he kuonga ko ia, ‘a ia na‘e fakatokolahi ai ki he kau ako, na‘e hoko ha lāunga ‘i he kau ‘Elinisito ki he kau Hepelū, koe‘uhi na‘e ta‘etokanga‘i ‘a e kau uitou ‘onautolu ‘i he tufa tokoni na‘e fai ‘i he ‘aho kotoa pē.

²Pea fakataha ‘e he kau Hongofulumāua ‘a e kau ako kātoa, ‘o nau pehē, ‘Oku ‘ikai te mau loto ke tuku li‘aki ‘a e folofola ‘a e ‘Otua ka mau nofo ke fai ‘a e tufa ‘i he ngaahi tēpile.

³Ko ia, kāinga, ke mou fili ha toko fitu meiate kimoutolu, ha kau tangata kuo fakaongo lelei mai, ‘o mātu‘aki fakalaumālie mo poto, pea te mau fakanofo kinautolu ki he ngāue ko ia.

⁴Ka ko kimautolu, te mau faka‘utumauku ‘a e fai ‘o e hūfia, mo e tufa ‘o e folofola.

⁵Pea na‘e hā lelei ‘a e lea ko ia ki he fakataha kotoa: pea nau fili ‘a Sitīveni, ko e tangata na‘e fonu ‘i he tui mo e Laumālie Mā‘oni‘oni, pea mo Filipe, mo Pōkolo, mo Naikano, mo Taimoni, mo Pāmina, pea mo Nīkola ko e motu‘a ‘Aniteoke ne tafoki ‘o lotu faka-Siu.

⁶Pea nau fokotu‘u kinautolu ‘i he ‘ao ‘o e kau ‘Aposetolo; pea hili ‘enau lotu na‘a nau hilifaki nima kiate kinautolu.

⁷Pea na‘e tupu ma‘u pē ‘a e folofola ‘a e ‘Otua; pea fakatokolahi ‘aupito ‘a e lau ‘o e kau ako ‘i Selusalema; kae‘uma‘ā ko e fu‘u tokolahi ‘o e kau taula‘eiki na‘a nau fakavaivai‘i kinautolu ‘o tui.

⁸Pea ko Sitīveni, na‘a ne fai ‘i he lotolotonga ‘o e kakai ‘a e ngaahi ngāue fakaofo, mo e ngaahi faka‘ilonga na‘e mamafa, he‘ene fonu kelesi mo mafai ‘aupito.

⁹Ka na‘e tu‘u hake ha ni‘ihi na‘e kau ki he falelotu na‘e ui ko e falelotu ‘o e kau Lipataine,[5] mo e kau Sailine, mo e kau ‘Ālekisānitia, mo e ni‘ihi ‘i he kakai mei Silisia mo ‘Ēsia, ‘o nau fakakikihi mo Sitīveni.

¹⁰Ka na‘e ‘ikai te nau lava ke tali ‘a e poto mo e fakalaumālie ‘o ‘ene lea.

¹¹Pea nau toki fale‘i ha kau tangata ke nau lau‘i ia, ‘o pehē, Na‘a mau fanongo ki he‘ene laukovi kia Mōsese pea mo e ‘Otua.

¹²Pea na‘a nau o‘i ‘a e kakai, kae‘uma‘ā ‘a e kau mātu‘a, mo e kau sikalaipe; pea nau toki mo‘utāmakia ia, ‘o puke, ‘o taki ki he Sanetalimi.

¹³Na‘a nau ‘omi foki ha kau fakamo‘oni loi, ‘a ia na‘a nau pehē, Ko e tangata ni ‘oku ‘ikai ke ava ‘ene tuki ‘a e Fale Tapu mo e Lao:

¹⁴he kuo mau fanongo ki he‘ene pehē, tokua ko Sīsū, ko e siana mei Nāsaleti, te ne vete ‘a e potu ko ia, pea fakakehe ‘a e ngaahi tu‘utu‘uni na‘e tuku ‘e Mōsese kiate kitautolu.

¹⁵Pea sio fakamama‘u kiate ia ‘a e kakai kotoa pē na‘e nofo ‘i he Sanetalimi, pea tā ko hono fofonga na‘e hangē ko e fofonga ‘o ha ‘āngelo.