Read KO E TOH TAPU KATOA TONGA Loma 10 Bible Online

Loma 10 - KO E TOH TAPU KATOA TONGA bible

Loma 10

¹KĀINGA, ko e feinga ‘a hoku loto, pea ko ‘eku kole ki he ‘Otua ‘i he fa‘ahinga ko ia, ke nau mo‘ui.

²He ‘oku ou fakamo‘oni pē, ‘oku ‘i ai ha‘anau mamahi‘i ‘a e ‘Otua, ka ‘oku ‘ikai fou ‘i he ‘ilo totonu.

³He ko e me‘a ‘i he ‘ikai te nau ‘ilo ki he mā‘oni‘oni ‘oku mei he ‘Otua, ka nau feinga pē ke tu‘u ‘a e mā‘oni‘oni fakaekinautolu, ko ia na‘e ‘ikai ai te nau fakavaivai ki he mā‘oni‘oni ‘oku mei he ‘Otua.

⁴He ko Kalaisi ko e fakangata ia ‘o e lao, kae mā‘oni‘oni ‘a e tangata kotoa pē ‘oku tui.

⁵He ‘oku tohi ‘e Mōsese, Ko e me‘a ki he mā‘oni‘oni ‘oku mei he Lao, ko e tangata kuo fai ia te ne mo‘ui ai.

⁶Ka ko eni ‘a e lau ‘a e mā‘oni‘oni ‘oku mei he tui, ‘Oua te ke pehē ‘i ho loto, Ko hai tū ‘e ‘alu hake ki he langi? ‘A ia ko e pehē ke ‘ohifo ‘a Kalaisi:

⁷pe, Ko hai tū te ne ‘alu hifo ki lolofonua? ‘A ia ko e pehē ke ‘ohake ‘a Kalaisi mei he pekia.

⁸Ka ko e hā ‘ene tala? ‘A ‘eni, ‘Oku ofi pē kiate koe ‘a e folofola, ‘oku ‘i ho ngutu, pea ‘i ho loto; ‘a ia ko e pehē ko e folofola tui ‘oku mau fanongonongo.

⁹Koe‘uhi, kapau te ke fakahā ‘aki ho ngutu, ko e ‘Eiki ‘a Sīsū, pea ke tui ‘aki ho loto kuo fokotu‘u ia ‘e he ‘Otua mei he pekia, ‘e fakamo‘ui koe.

¹⁰He ‘oku fai ‘a e tui ‘aki ‘a e loto ke ma‘u ‘a e fakatonuhia, ka ‘oku fai ‘a e fakahā ‘aki ‘a e ngutu ke ma‘u ‘a e fakamo‘ui.

¹¹He ‘oku pehē ‘e he Tohi, ‘ilonga pē ‘a ia ‘e tui kiate ia, ‘e ‘ikai fakamaa‘i ia.

¹²He ‘oku ‘ikai ha fai kehekehe ki he Siu mo e Kalisi: he ‘oku taha ai pē ‘a e ‘Eiki ‘o e kakai kotoa pē, pea mohu me‘a ma‘a e kakai kotoa pē ‘oku tautapa kiate ia.

¹³He ‘ilonga ‘a ia ‘e tautapa ki he huafa ‘o e ‘Eiki ‘e fakamo‘ui.

¹⁴Ka te nau lava fēfē ke tautapa ki ha toko taha ‘oku te‘eki ke nau tui ki ai? Pea te nau lava fēfē ke tui ki ha toko taha kuo te‘eki ke nau fanongo ki ai? pea fēfē ha‘anau fanongo ‘oka ‘ikai ha taha ke malanga?

¹⁵Pea malanga fēfē ha ni‘ihi ‘o kapau ‘e ‘ikai fekau atu kinautolu? ‘o hangē ko ia kuo tohi, Hono ‘ikai faka‘ofo‘ofa si‘i va‘e ‘o e kakai ‘oku ongoongo mai ha ngaahi me‘a lelei!

¹⁶Kae tala‘ehai na‘e tuitala kotoa pē ki he ongoongolelei ko ia. He ‘oku pehē ‘e ‘Aisea, ‘Eiki, ko hai kuo ne tui ki he ongoongo kuo ne fanongo ai meiate kimautolu?

¹⁷Tā ‘oku tupu ‘a e tui mei he fanongo, pea ‘oku fai ‘a e fanongo ko e ‘i ai ha folofola ‘a Kalaisi.

¹⁸‘Oua koā. Na‘a kuo ‘ikai te nau fanongoa, ‘Isa, kuo ongo atu honau le‘o ki he fonua kotoa: Mo ‘enau ngaahi lea ki he ngata‘anga ‘o māmani.

¹⁹‘Oua koā. Na‘a kuo ‘ikai lave‘i ‘e ‘Isileli ‘a e me‘a ko ia. ‘Ā, ‘oku lea leva ‘a Mōsese ki ai, ‘o pehē, Te u fakafua‘a‘i kimoutolu ‘aki ha ‘ata‘i kakai; Te u fakatupu ho‘omou ‘ita ‘aki ha kakai ta‘e‘atamai.

²⁰Pea ‘oku mātu‘aki lea ‘asi ‘a ‘Aisea, he‘ene pehē, Kuo ‘iloa au ‘e kinautolu na‘e ‘ikai kumi mai; Kuo u e‘a ki ha kakai na‘e ‘ikai ‘eke mai.

²¹Ka ‘i he‘ene lau ki ha‘a ‘Isileli ‘oku ne pehē, ‘Oku ‘osi atu e ‘aho mo e ta‘alo hoku nima ni Ki ha kakai talangata‘a mo fakafisi mai.