Read KO E TOH TAPU KATOA TONGA Loma 11 Bible Online

Loma 11 - KO E TOH TAPU KATOA TONGA bible

Loma 11

¹PEA ‘oua leva. Kuo li‘aki koā ‘e he ‘Otua hono kakai? Molekemama‘o! He ko au foki ko e tangata ‘Isileli, ko e toko taha ‘i he hako ‘o ‘Epalahame, ko ha ha‘a Penisimani.

²Kuo ‘ikai li‘aki ‘e he ‘Otua hono kakai, ‘a e kakai na‘a ne toka mea‘i. Tā ‘oku ‘ikai te mou ‘ilo ‘apē ki he lau ‘a e Tohitapu ‘i he vahe ‘oku kau kia ‘Ilaisiā? ‘A ‘ene hū ki he ‘Otua he‘ene talatalaaki‘i ‘a ha‘a ‘Isileli, ‘o pehē,

³‘Eiki, kuo nau tāmate‘i ho‘o kau palōfita; kuo nau holoki ho ngaahi ‘ōlita; pea ko au toko taha pē ‘oku toe; pea ‘oku nau kumi kiate au ke tāmate‘i.

⁴Ka na‘e fēfē ‘a e folofola na‘e fai kiate ia? Kuo u fakatoe ma‘aku ha kau tangata ‘e toko fitu afe, ‘a ia kuo te‘eki ha‘anau momo‘i tū‘ulutui kia Peali.

⁵Pea ko ia, ‘oku pehē foki ‘i he taimi ko eni, ‘oku ‘i ai ha toenga kuo fakatoe, ko e me‘a ‘i he fili ‘oku fai ‘ofa pē.

⁶Pea kapau ‘oku fai ‘ofa pē, pea tā ‘oku ‘ikai kei tefito ki he ngāue: he ka ne pehē, tā ko e ‘ofa ko ia ‘oku ‘ikai kei ko e ‘ofa.

⁷Pea kuo tā fēfē ‘eni? ‘Ē, ko e me‘a na‘e kumi ki ai ‘e ha‘a ‘Isileli kuo ‘ikai te nau hokosi ia; ka kuo hokosi ‘e si‘i ha‘a Fili, ka ko hono toe kuo fakafefeka.

⁸‘O tatau tofu pē mo ia kuo tohi, Kuo tuku kiate kinautolu ‘e he ‘Otua ha laumālie fakaongonoa, ha ngaahi mata ‘e ‘ikai te nau sio ‘aki, mo e ngaahi telinga ‘e ‘ikai te nau fanongo ‘aki: pea ‘oku kei pehē ‘o a‘u ki he ‘aho ni.

⁹‘Oku me‘a foki ‘e Tēvita, ‘o pehē, Tuku ke hoko ‘enau keinanga ko e hele puna; Ko e kupenga, mo e tauhele, mo e nunu‘a:

¹⁰Tuku ke fakapo‘uli honau mata, Ke ‘oua te nau mamata, Pea ‘ai ke ngaope ma‘u pē honau tu‘a.

¹¹Kae ‘oua koā. Na‘e tu‘utu‘uni ‘enau tūkia koe‘uhi ke nau tō ‘aupito? Molekemama‘o! Ka ko e me‘a ‘i he‘enau hinga kuo hoko ai ‘a e fakamo‘ui ki he Senitaile, koe‘uhi ke fua‘a ‘a e fa‘ahinga ko ē.

¹²Pea ko eni, kapau ko ‘enau hinga ko e fakakoloa ‘o māmani, pea ko honau fakamasiva ko e fakakoloa ‘o e Senitaile, huanoa ha me‘a ‘e ma‘u mei honau fakakakato.

¹³Ka ko ‘eku lea ma‘amoutolu ‘a e Senitaile. Pea ko ia, ‘i he‘eku nofo ko e ‘aposetolo ‘o e Senitaile, ‘oku ou fakahīkihiki‘i hoku lakanga.

¹⁴Hei‘ilo te u fakatupu ha fua‘a ‘i na‘i‘oku sino na, ‘o u fakamo‘ui ai hanau ni‘ihi.

¹⁵He kapau na‘e hoa mo honau li‘aki ‘a e fakalelei ‘o māmani, pea ko e hā tū ha me‘a ‘e hoa mo honau toe ma‘u mai? Ko ha mo‘ui tofu pē mei he mate.

¹⁶He kapau na‘e tapu ki he ‘Eiki ‘a e polopolo ‘o e takaonga mā, ‘oku tapu mo e takaonga: pea kapau ‘oku tapu ki he ‘Eiki ‘a e tefito, ‘oku tapu mo e ngaahi va‘a.

¹⁷Pea neongo na‘e tu‘usi ha va‘a ni‘ihi, pea ‘omi koe ko e ‘ōlive vao, ‘o hunuki ki he ngaahi va‘a; pea ke ‘inasi fakataha mo kinautolu ‘i he tefito, ‘a ia ‘oku mei ai ‘a e mā‘ui‘ui ‘o e ‘ōlive —

¹⁸‘io, neongo ia kae ‘oua te ke luki he ngaahi va‘a na: pea neongo ho‘o luki, tala‘ehai ko koe ‘oku ke tu‘u ‘aki ‘a e tefito, ka ko e tefito ‘oku ne tu‘u ‘aki koe.

¹⁹Pea te ke pehē nai, Ka na‘e tu‘usi ‘a e ngaahi va‘a, koe‘uhi ke hunuki kita.

²⁰Ka na‘e fai: na‘e tu‘usi kinautolu ko ‘enau ta‘etui, pea ‘oku ke tu‘u koe ko ho‘o tui, ‘Ē, ‘oua te ke anga hiki, ka ke manavasi‘i.

²¹He kapau na‘e ‘ikai ma‘ema‘ekina ‘e he ‘Otua ‘a e ngaahi va‘a totonu, pea tala‘ehai te ne mamae kiate koe.

²²Uē! vakai ā ‘a e angalelei mo e fai māsila ‘a e ‘Otua; ko e fai māsila ‘a ‘Ene ‘Afio kiate kinautolu na‘e hinga, ka ko e fai ‘ofa kiate koe, ‘o kapau te ke nofo ma‘u ‘i he‘ene fai ‘ofa: he kapau ‘e ‘ikai, ‘e tā mo koe foki.

²³‘Io, pea ko e fa‘ahinga ‘e taha foki, kapau ‘e ‘ikai te nau nofo ma‘u ‘i he‘enau ta‘etui, ‘e hunuki kinautolu: he ‘oku mafai ‘e he ‘Otua hanau toe hunuki.

²⁴Seuke, kapau na‘e tu‘usi koe mei ha ‘ōlive ‘a ia ko hono anga ko e tupu vao pē, pea ‘omi ‘o hunuki ki ha ‘ōlive tō, ‘a ia na‘e ‘ikai ko ho anga ke tu‘u ai, huanoa hano lava ke hunuki ‘a e fa‘ahinga ko ē ki honau sino‘i ‘ōlive ‘onautolu, he ko honau anga totonu.

²⁵He ‘oku ou loto, kāinga, ke ‘oua na‘a puli ‘a e misiteli ko eni meiate kimoutolu, koe‘uhi ke ‘oua te mou ‘afungi. Ko eni kuo tō ki ha‘a ‘Isileli, (kae ‘ikai ki honau kotoa) ‘a e fakafefeka; pea ‘e pehē pē kae‘oua ke hū mai hono kotoa ‘o Senitaile.

²⁶Pea ka pehē, pea ‘e toki fakamo‘ui ‘a ‘Isileli kotoa: ‘o hangē ko e me‘a kuo tohi, ‘E ha‘u mei Saione ‘a e Huhu‘i, pea te ne ‘ave ‘a e faka‘otuamate mei ha‘a Sēkope.

²⁷Pea ko e fai ia ‘eku fuakava mo kinautolu, ‘a ‘eku ‘ave ‘enau hia.

²⁸‘Oku mo‘oni ‘i he sio faka-Kōsipeli, ‘oku ne fili ‘aki kinautolu koe‘uhiā ko kimoutolu; ka ‘i he sio faka-e-tu‘utu‘uni-fili, tā ‘oku nau ‘ofeina koe‘uhi ko ‘enau ngaahi kui.

²⁹He ko e ngaahi me‘a‘ofa ‘a e ‘Otua, mo ‘ene tu‘utu‘uni lakanga, ‘oku ‘ikai liliu.

³⁰He hangē na‘a mou talangata‘a mu‘a ki he ‘Otua, ka kuo mou ma‘u meesi ‘eni ‘i he talangata‘a ‘anautolu.

³¹Pehē foki, kuo talangata‘a ‘eni ‘a e fa‘ahinga ko ē, koe‘uhiā, ko e me‘a ‘i ho‘omou ma‘u meesi, pea faifai pea nau ma‘u meesi[17] mo kinautolu.

³²He kuo loki ‘e he ‘Otua ‘a e kakai kotoa pē ki he talangata‘a, koe‘uhiā ke ne fai meesi ki he kakai kotoa.

³³‘Oiauē! ‘Ene kilukilua ‘a e koloa mo e poto mo e ‘ilome‘a ‘a e ‘Otua! hono ‘ikai ta‘emahakulea ‘ene ngaahi tu‘utu‘uni, mo ta‘emafakatotoloa hono ngaahi founga!

³⁴He hono ai ha taha kuo ne lave‘i ‘a e finangalo ‘o e ‘Eiki, pe ha taha kuo fale‘i ia,

³⁵pe ha taha na‘a ne ‘ange mu‘a ha me‘a ki ai, ka ne toe totongi?

³⁶Seuke, ‘oku tefito ki he ‘Ene ‘Afio, pea fou ‘i He‘ene ‘Afio, pea iku ki he ‘Ene ‘Afio, ‘a e me‘a fuli pē. Ke ‘o ‘Ene ‘Afio ‘a e kolōlia ‘o lauikuonga! ‘Ēmeni.