Read KO E TOH TAPU KATOA TONGA Loma 13 Bible Online

Loma 13 - KO E TOH TAPU KATOA TONGA bible

Loma 13

¹KE anganofo ‘a e tangata kotoa pē ki he ngaahi pule ‘oku mā‘olunga: he ‘oku ‘ikai ha pule, ka ‘oku mei he ‘Otua pē; pea ko e ngaahi pule ‘oku ‘i ai ni, ko e fokotu‘u ‘e he ‘Otua.

²Ko ia, ‘ilonga ‘a ia ‘oku angatu‘u ki he pule, ko ‘ene tu‘u ia ki he tu‘utu‘uni ‘a e ‘Otua: pea ko e me‘a ‘e ma‘u ai ‘e he kau angatu‘u, ko hanau tautea.

³He tala‘ehai ‘oku nofo ‘a e kau pule mo‘o fakailifia ‘o ngāue lelei, ka ko ngāue kovi pē. Pea kapau ko ho loto ke ‘oua na‘a ai ha‘o manavahē ki he pule, pe‘i fai lelei, pea te ke toki ma‘u ha fakamālō mei ai:

⁴he ko e sevāniti ia ‘a e ‘Otua ma‘ao lelei. Ka ‘o kapau te ke fai kovi, ke ke manavahē mu‘a; he tala‘ehai ko e va‘inga ‘ene to‘o ‘a e heletā; he ko e sevāniti ia ‘a e ‘Otua ke fai ‘ene houhau kia faikovi.

⁵Ko ia, kuo pau ke mou anganofo, ‘o ‘ikai telia ‘a e houhau pē, kae telia ‘a konisēnisi foki.

⁶Seuke, ko hono ‘uhinga foki ia ‘oku mou tukuhau ai: he ko e kau fai ‘o e ngāue tapu ‘a e ‘Otua ‘a kinautolu, pea ‘oku nau nofo pē ki he me‘a ko ia.

⁷Ko ia, mou fai kiate kinautolu kotoa pē ‘a e me‘a ‘oku totonu: ‘a e tukuhau kiate ia ‘oku ‘a‘ana ‘a e tukuhau; ‘a e tute kiate ia ‘oku ‘a‘ana ‘a e tute; ‘a e manavahē kiate ia ‘oku ‘a‘ana ‘a e manavahē‘ia; ‘a e faka‘apa‘apa kiate ia ‘oku ‘a‘ana ‘a e faka‘apa‘apa‘ia.

⁸‘Oua na‘a ai hamou mo‘ua ki ha ni‘ihi, ngata pē ‘i he mo‘ua ke ‘ofa ki ai: he ko ia ‘oku ne ‘ofa ki he taha, kuo ne ‘osiki ‘a e Lao.

⁹He ko e ngaahi lea, ‘Oua te ke tono fefine, ‘Oua te ke fakapō, ‘Oua te ke kaiha‘a, ‘Oua te ke mānumanu, mo e hā fua ha fekau ‘oku toe, ‘oku fālute ‘e he folofola ni, Te ke ‘ofa ki ho kaungā‘api ‘o hangē ko ho‘o ‘ofa kiate koe.

¹⁰Tala‘ehai ‘oku fai ‘e ‘ofa ha kovi ki hono kaungā‘api; ‘āua, tā ko e ‘ofa ko e koto ‘osiki ia ‘o e Lao.

¹¹Ke ‘āsili ho‘omou fai ko ho‘omou ‘ilo ki he laka ‘a e kuonga: ko e taimi ‘eni ke mou ‘ā leva mei he mohe; he ‘oku ofi ‘eni hotau fakamo‘ui ‘i he taimi na‘a tau fua tui ai.

¹²Kuo faka‘a‘au atu ‘a e pō, pea kuo ofi ‘a e ‘aho: ko ia, ke tau hu‘ihu‘i ‘a e ngaahi ngāue ‘o e po‘uli, ka tau ‘ai ‘a e mahafu ‘o e maama.

¹³Tau fai ‘a e laka ‘o e ‘aho, ‘o anga māopo: ‘o ‘oua ‘e fai ‘aki ‘a e fa‘a kātoanga kai mo e fa‘a konā, pe ko e fai fe‘auaki mo e pau‘u fakalielia, pe ko e fetu‘usi mo e meheka.

¹⁴Ka mou ‘ai mu‘a ‘a e ‘Eiki ko Sīsū Kalaisi; pea ‘oua na‘a tokonaki ki he kakano ke kanoni ‘ene ngaahi holi.