Read KO E TOH TAPU KATOA TONGA Loma 14 Bible Online

Loma 14 - KO E TOH TAPU KATOA TONGA bible

Loma 14

¹PEA ko eni, ka ai ha taha ‘oku tui vaivai, mou fakakaukau mai pē; tapu ‘a e anga‘i ‘o ‘ene ngaahi fakakaukau.

²‘Oku mālohi ‘a e tui ‘a ha taha ke kai ‘a e me‘a kotoa pē: ka ko si‘i vaivai ‘oku kai hamu pē.

³Ko ia ‘oku ne kai noa pē, ke ‘oua te ne fakasīkaka‘i ‘a si‘i kai faka‘ehi‘ehi; pea ko si‘i kai faka‘ehi‘ehi, ke ‘oua te ne anga‘i ‘a ia ‘oku kai noa pē: he kuo fakakau mai pē ‘e he ‘Otua.

⁴Ko hai tū koe ke ke anga‘i ‘a e tamaio‘eiki ‘a ha taha kehe? ‘Oku ‘i he‘ene ‘eiki ‘a‘ana ha‘ane tu‘u pe hinga. ‘Ā, te ne tu‘u pē; he ‘oku mafai ‘e he‘ene ‘Eiki ke poupou ia.

⁵Ko Me‘a, ‘oku mamafa kiate ia ha ‘aho ‘e taha ‘i he ‘aho ‘e taha: ka ko Me‘a, ‘oku tatau kiate ia ‘a e ‘aho kotoa pē, ‘Ē, ke takitaha ‘ai ke pau ‘ene fakakaukau ‘a‘ana.

⁶Ko ia ‘oku ne tokanga‘i ‘a e ‘aho, ‘oku ne tokanga ki ai koe‘uhi ko e ‘Eiki; pea ko ia ‘oku ne kai noa pē, ‘oku ne kai koe‘uhi ko e ‘Eiki, he ‘oku ne fai ai ‘a e fakafeta‘i ki he ‘Otua: pea ko ia ‘oku ne kai faka‘ehi‘ehi, ‘oku ne kai pehē koe‘uhi ko e ‘Eiki, ‘o ne fai pē ‘ene fakafeta‘i ki he ‘Otua.

⁷He tala‘ehai ‘oku ‘i ai hatau toko taha ‘oku mo‘ui ma‘ana; pea tala‘ehai ‘oku ‘i ai hatau toko taha ‘oku pekia ma‘ana pē.

⁸He kapau ‘oku tau mo‘ui, ‘oku tau mo‘ui ma‘a e ‘Eiki; pea kapau ‘oku tau pekia, ‘oku tau pekia ma‘a e ‘Eiki: ko ia, pe ‘oku tau mo‘ui, pe ‘oku tau pekia, ko e me‘a ‘a e ‘Eiki pē ‘a kitautolu.

⁹Seuke, ko e me‘a ko ia na‘e pekia ki ai ‘a Kalaisi, mo toe mo‘ui, koe‘uhiā ke ne ‘Eiki ki he pekia mo e mo‘ui fakatou‘osi.

¹⁰Pea ko koe na, ko e hā ‘oku ke anga‘i ai ho tokoua na? ‘Io, mo koe na, ko e hā ‘oku ke ta‘etoka‘i ai ho tokoua na? he te tau hopo kotoa pē ‘i he fakamāu‘anga ‘o e ‘Otua.

¹¹He kuo tohi, Kuo folofola ‘a e ‘Eiki, Tangi ‘eku mo‘ui! ko e tui kotoa pē ‘e tū‘ulutui kiate au, pea ko e ‘elelo kotoa pē te ne fai ‘ene vete ki he ‘Otua.

¹²‘Āua, pea tā te tau takitaha fai ha fakamatala ki he ‘Otua ma‘ata.

¹³Pea kapau ko ia, pea ‘oua na‘a tau toe fefakaanga‘aki; ka ko eni pē e me‘a ke mou fifili ki ai mu‘a, ke ‘oua te mou ‘ai ha tūkia‘anga, pe ha tauhele, ke mo‘ua ai ho tokoua.

¹⁴‘Oku ou ongona mo mātu‘aki tui, he‘ete tu‘u ‘i he ‘Eiki ko Sīsū, ‘oku ‘ikai ha me‘a ‘e taha ‘oku tapu ‘iate ia pē. Ka ko eni pē, ‘ilonga ‘a ia ‘oku lau ‘oku tapu ha me‘a, pea ‘oku tapu leva ia ki he toko taha ko ia.

¹⁵Seuke, kapau ko ha me‘akai pē ia ‘oku mamahi ai ho tokoua na, tā ‘oka ‘ikai te ke kei fou ‘i he ‘ofa. ‘Oua te ke maumau ‘aki ho‘o kai, si‘i toko taha ko ia ne pekia ki ai ‘a Kalaisi.

¹⁶Ko ia, ‘oua na‘a tuku ke lau‘ikovia ‘a ho‘omou lelei na:

¹⁷he ko e Pule‘anga ‘o e ‘Otua ‘oku ‘ikai ko ha kai mo ha inu, ka ko e mā‘oni‘oni mo e melino mo e fiefia, ‘i he Laumālie Mā‘oni‘oni.

¹⁸He ko ia ‘oku ne fai‘aki ia ‘ene tauhi kia Kalaisi, ‘oku hōifua ai ‘a e ‘Otua, pea ma‘a‘ia ai ‘a e kakai.

¹⁹‘Āua, pea kapau ko ia, pea tau nofo[19] ki he ngaahi me‘a ‘oku kau ke fakamelino, mo e ngaahi me‘a ‘oku kau ki he‘etau fefai‘aki hotau langa hake.

²⁰‘Oua pē te ke holoki ‘a e ngāue ‘a e ‘Otua koe‘uhi pē ko ha me‘akai. ‘Oku ngofua ‘a e me‘a kotoa pē, ka ‘oku kovi pē ki he tangata ‘oku ne kai mo tūkia.

²¹Ko hono lelei ke ‘oua na‘a ke kai kakano, pe inu uaine, pe ko e hā fua ha me‘a ‘oku tūkia ai ho tokoua.

²²Pea ko e me‘a kiate koe mo e tui kuo ke a‘usia, fai‘aki ia fakaekoe pē, ‘i ho‘omo feangai mo e ‘Otua. Ha monū‘ia ā ka ko ia ‘oku ‘ikai ke tāla‘a hono loto ‘i he fai ‘o e me‘a kuo ne tuku ‘oku totonu.

²³Ka ko ia ‘oku ne kei tāla‘a ‘i ha me‘a, kapau te ne hanga ‘o kai ia, kuo halaia leva, koe‘uhi na‘e ‘ikai tefito ki he tui ‘ene fai: ‘Io, ‘ilonga ha me‘a ‘oku ‘ikai fai mei he tui ko e angahala ia.