Read KO E TOH TAPU KATOA TONGA Loma 15 Bible Online

Loma 15 - KO E TOH TAPU KATOA TONGA bible

Loma 15

¹PEA ko eni, ko kitaua ‘oku ta makalohi, ko hota fatongia ke fua ‘a e ngaahi vaivai‘anga ‘o e kakai ‘oku ‘ikai ke mālohi, ‘o ‘oua ‘e fai ‘a ia pē ‘oku ‘ao mo kitaua.

²‘Ē, ta takitaha fai ‘a e me‘a ‘e ‘ao mo hota kaungā‘api, ‘a e me‘a ‘e ‘aonga ki hono langa hake.

³He ko Kalaisi foki na‘e ‘ikai te ne fai ‘a e me‘a na‘e ‘ao mo ia; ka ko ‘ene nofo na‘e hangē ko ia na‘e tohi, Ko e ngaahi manuki ‘a e kakai ‘oku manuki‘i koe, na‘e tō kiate au.

⁴He ‘ilonga ha me‘a na‘e tohi mu‘a na‘e tohi mo‘otau akonekina; koe‘uhi ko e me‘a ‘i he fakakātaki mo e poupou ‘oku fai ‘e he folofola ke tau ma‘u ai ‘a e ‘amanaki lelei.

⁵Pea ko eni, ko e ‘Otua ‘oku ‘a ‘Ene ‘Afio ‘a e fakakātaki mo e poupou, ‘ofa ke ne ‘atu ke hu‘ufataha homou loto ‘i ho‘omou feangai, ‘o fai ‘i he funga ‘o e anga ‘o Kalaisi Sīsū:

⁶koe‘uhi ke loto taha mo ngutu taha ho‘omou fakamālō‘ia ‘a e ‘Otua, ko e Tamai ‘a hotau ‘Eiki ko Sīsū Kalaisi.

⁷Ko ia mou fefakakau‘aki kimoutolu, ‘o hangē foki kuo fakakau mai kimoutolu ‘e Kalaisi, koe‘uhi ke ongoongolelei ai ‘a e ‘Otua.

⁸He ‘oku ou pehē, kuo hoko ‘a Kalaisi ko e sevāniti ‘o ha‘a Kamu, koe‘uhi ko e mo‘oni ‘a e ‘Otua, ke ma‘uma‘uluta ai ‘a e ngaahi palōmesi na‘e fai ki he‘enau ngaahi kui:

⁹ka ke fakamālō‘ia ‘a e ‘Otua ‘e Senitaile, koe‘uhi ko ‘ene meesi; ‘o hangē ko ia kuo tohi, ‘o pehē, Ko ia ai, te u fakahīkihiki‘i koe ‘i he Senitaile, pea u hiva‘aki ho huafa.

¹⁰Pea ko e potu ‘e taha ‘oku pehē, Mou fiefia, ‘a e Senitaile, fakataha mo ho‘ona kakai.

¹¹Pea ko e potu folofola ‘e taha ‘oku pehē, Mou tuku kolōlia ki he ‘Eiki, ‘a Senitaile kotoa pē, ‘Io, ke fakahīkihiki‘i ia ‘e he ngaahi kakai fuli pē.

¹²Pea ‘i he potu folofola ‘e taha ‘oku pehē ‘e ‘Aisea, ‘E ‘i ai ‘a e huli ‘o Sese; ‘io, ko e toko taha kuo tu‘u ke pule‘i ‘a Senitaile: pea ‘e ‘amanaki ‘a Senitaile ‘iate ia.

¹³Pea ko eni, ko e ‘Otua ‘oku ‘a ‘Ene ‘Afio ‘a e faka‘amanaki, ‘ofa ke ne fakafonu kimoutolu ‘aki ha fu‘u fiefia mo melino ‘i ho‘omou tui; koe‘uhi ke mou tupulekina ‘i he ‘amanaki lelei, ‘i he ngāue ‘a e Laumālie Mā‘oni‘oni.

¹⁴Pea ko eni, si‘oku kāinga, ‘oku ou mātu‘aki tui ‘e au foki, ho e koto fai lelei kimoutolu foki, ko e koto pōtopoto‘i kimoutolu, mo mou lava foki ke fevaloki‘aki ‘a kimoutolu.

¹⁵Ka neongo ia ka ‘oku māmālohi pē ‘eku tohi atu ‘i he potu ni‘ihi, ko si‘eku fakamanatu kimoutolu; pea na‘a ku fai foki koe‘uhi ko e kelesi ne tuku mai he ‘Otua.

¹⁶Ke u hoko ko e faifekau ‘a Kalaisi Sīsū ki he Senitaile; ‘o u ngāue ‘i he Kōsipeli ‘a e ‘Otua ‘o hangē ko ha taula‘eiki, koe‘uhi ke hoko ‘a e ‘oatu ‘o e Senitaile ko e feilaulau te ne hōifua ai, hono fakamā‘oni‘oni‘i ‘e he Laumālie Mā‘oni‘oni.

¹⁷Ko ia, ‘oku ou lava ke pōlepole ‘ia Kalaisi Sīsū ‘i he ngaahi me‘a ‘oku kau ki he ‘Otua.

¹⁸Seuke, tala‘ehai te u kākunga ke lea ki ha me‘a ‘a ia na‘e ‘ikai ngāue‘aki au ‘e Kalaisi ‘i hono lava, ‘i he‘ene fakatalangofua ‘a e Senitaile:

¹⁹ka teu lea pē ki he me‘a kuo ne fai‘aki au ki ai, ‘i he lea mo e ngāue, ‘o tu‘u ‘i he ivi ‘o e ngaahi mana, mo e ngaahi me‘a fakaofo, pea ‘i he ivi ‘o e Laumālie Mā‘oni‘oni; ko ia, kuo ‘osiki ‘a e Kōsipeli ‘o Kalaisi mei Selusalema mo e feitu‘u ko ia, ‘o a‘u ki ‘Ililikumi.

²⁰Ka na‘e pehē ‘eku fai; na‘a ku tokanga ke ‘oua na‘a ku malanga‘aki ‘a e Kōsipeli ‘i he ngaahi potu kuo hu‘ekina ai ‘a e huafa ‘o Kalaisi, telia na‘a ku langa ‘i ha tu‘unga kuo ‘ai ‘e ha taha kehe.

²¹Ka na‘a ku tokanga ke fai ‘o hangē ko e me‘a ‘i he folofola, Ko kinautolu na‘e ‘ikai te nau ma‘u ha ongoongo kiate ia Te nau sio; Ko kinautolu kuo te‘eki ke nau fanongo kiate ia Te nau ‘ilo.

²²Ko ia ai, foki, na‘e fa‘a ta‘ofi ai ‘eku ‘alu atu kiate kimoutolu.

²³Ka ‘i he taimi ni ‘oku ‘ikai kei toe haku feitu‘u ‘i he ngaahi potu ko eni; pea kuo lahi ta‘u mo ‘eku holi ke ‘a‘ahi kiate kimoutolu ‘i he fai ‘o ha‘aku fononga ki Sēpeni:

²⁴he ‘oku ou ‘amanaki ke fe‘iloaki mo kimoutolu ‘i he‘eku ‘asi atu, pea ke ai haku moimoi‘i meiate kimoutolu ki he potu ko ia, ‘oka hili ‘eku ma‘u si‘a fiemālie meiate kimoutolu.

²⁵Ka ko ‘eku ‘alu ‘eni ki Selusalema, ko ‘eku ‘ave tokoni ki he kakai lotu.

²⁶He kuo hā lelei ki Masitōnia mo ‘Akeia ke fai ha tānaki tokoni ma‘a e kau lotu ‘i Selusalema ‘oku masiva.

²⁷‘Io, kuo hā lelei kiate kinautolu; kae‘uma‘ā ‘oku nau mo‘ua ki he fa‘ahinga ko ia. He kapau kuo ‘inasi ‘a Senitaile ‘i he me‘a fakalaumālie ‘o e fa‘ahinga ko ia, pea ‘oku nau mo‘ua ai ke fai ha fatongia kiate kinautolu ‘i he me‘a fakasino.

²⁸Pea ko ia, ka ‘osi ‘eku fai ia, mo ‘eku sila‘i ‘a e fua ni kiate kinautolu, pea te u foki ‘o ‘alu atu ‘iate kimoutolu ki Sēpeni.

²⁹Pea ‘oku ou ongona, ka u ka ‘alu atu, te u ‘alu atu kuo ‘iate au hono kātoa ‘o e tāpuaki faka-Kalaisi.

³⁰Pea ko eni, ‘oku ou kole atu, kāinga, ‘i hotau ‘Eiki ko Sīsū Kalaisi, pea ‘i he ‘ofa ‘oku mei he Laumālie, ke mou kau mo au ‘i ho‘omou ngaahi lotu, ‘i he fefa‘uhi mo e ‘Otua ‘i hoku hūfia.

³¹Koe‘uhi ke u hao meiate kinautolu ‘i Siutea ‘oku talangata‘a; pea ke tali lelei ‘e he kau lotu ‘a ‘eku ngāue ni ‘oku ‘ave ki Selusalema.

³²Koe‘uhi ke u hoko fiefia atu kiate kimoutolu, ‘oka finangalo ki ai ‘a e ‘Otua, ‘o tau fefakafiemālie‘aki.

³³Pea ko e ‘Otua ‘oku ‘a ‘Ene ‘Afio ‘a e fakamelino, ‘ofa ke ne ‘iate kimoutolu fuli pē! ‘Ēmeni.