Read KO E TOH TAPU KATOA TONGA Loma 16 Bible Online

Loma 16 - KO E TOH TAPU KATOA TONGA bible

Loma 16

¹‘OKU OU fakaongolelei atu ‘a Fīpē, ko si‘otau tokoua lotu, pea ko e fefine akonaki foki ‘i he siasi ‘i Senikelea:

²ke mou tali lelei ia ‘i he ‘Eiki, ‘a ia ‘oku taau mo e kau lotu ke fai; pea ka ai ha me‘a te ne fiema‘u ai ha‘amou tokoni, pea mou poupou ai ia: he ko e toko taha ia kuo ne taukapo‘i ‘a e me‘a ‘a e tokolahi, pea mo au foki.

³Tala hoku ‘ofa kia Pīsila mo ‘Akuila, ko si‘i ongo kaungā ngaue ‘o‘oku ‘i he ngāue ‘a Kalaisi Sīsū:

⁴ko e ongo me‘a ia na‘a na fakalalango ho‘onaua u‘a ke fakahaofi ‘eku mo‘ui. Tala‘ehai ko au pē ‘oku fakafeta‘i kiate kinaua, ka ‘oku pehē mo e ngaahi siasi kotoa ‘o Senitaile.

⁵Tala hoku ‘ofa foki ki he siasi ‘oku ‘i hona fale.

⁶Tala hoku ‘ofa ki si‘oku ‘ofa‘anga ko ‘Epaineto, ‘a ia ko e polopolo ‘o ‘Ēsia kia Kalaisi. Tala hoku ‘ofa kia Mele; ko e fefine ia na‘e lahi ‘ene fakaongosia ma‘amoutolu.

⁷Tala hoku ‘ofa kia ‘Anitalonaika mo Siunia,[20] ko si‘i ongo kāinga ‘o‘oku, mo si‘i ongo kaunga-nofo-pilīsone mo au; ko e ongo me‘a ia ‘oku tokangaekina ‘i he ha‘oha‘onga ‘o e kau ‘Aposetolo, pea na‘a na tomu‘a Kalisitiane ‘iate au.

⁸Tala hoku ‘ofa kia ‘Amipeleasi, ko si‘oku ‘ofa‘anga ‘i he lotu.

⁹Tala hoku ofa kia ‘Uapane, ko e kaungā ngaue ‘otaua ‘i he ngāue ‘a Kalaisi; pea ki si‘oku ‘ofa‘anga ko Sītaki.

¹⁰Tala hoku ‘ofa ki si‘i ‘Āpeli, ko e tangata kuo ‘osi-‘a-sivi ‘i he ngāue ‘a e ‘Eiki. Tala hoku ‘ofa kiate kinautolu ‘oku ‘i he ‘api ‘o ‘Alisitopulo.

¹¹Tala hoku ‘ofa ki si‘oku kāinga ko Hēlotioni. Tala hoku ‘ofa kiate kinautolu ‘oku ‘i he ‘api ‘o Nāsiso, ‘a kinautolu kuo lotu.

¹²Tala hoku ‘ofa kia Talaifina mo Talaifosa, ‘a ia ‘oku na fakafitefita‘a ‘i he ngāue ‘a e ‘Eiki. Tala hoku ‘ofa kia Pēsisi, ko si‘i fefine ‘ofeina; ko e toko taha ia kuo lahi ‘ene fakafitefita‘a ‘i he ngāue ‘a e ‘Eiki.

¹³Tala hoku ‘ofa kia Lūfusi, ko e tangata taungafili ‘i he lotu; pea ki he‘ene fa‘ē, ‘a ia ko si‘eku fa‘ē foki.

¹⁴Tala hoku ‘ofa kia ‘Asinikalaito, mo Felekoni, mo Heamesi, mo Patalopa, mo Heamasi, mo e kāinga ‘oku nofo mo kinautolu.

¹⁵Tala hoku ‘ofa kia Filoloko mo Siulia, kia Nīlio foki mo hono tuofefine mo ‘Olimipa, pea ki he kāinga lotu kotoa pē ‘oku nofo mo kinautolu.

¹⁶Mou fefekita‘aki ‘aki ha ‘uma tapu. ‘Oku ‘ofa atu ‘a e ngaahi siasi kotoa pē ‘o Kalaisi.

¹⁷Ka ‘oku te enginaki atu, kāinga, ke mou vakai ‘a kinautolu ‘oku fakatupu ‘a e ngaahi fakavahavaha‘a mo e ngaahi tūkia‘anga ‘a ia ‘oku fehālaaki mo e tokāteline na‘a mou ako ai; pea mou faka‘ehi‘ehi meiate kinautolu.

¹⁸He ko e fa‘ahinga ko ia ‘oku ‘ikai te nau ngāue ki hotau ‘Eiki ko Kalaisi, ka ki ho‘onautolu kete pē; pea ko e me‘a he‘enau lea momole‘olunga, mo ‘enau ngutu melie, ‘oku nau kākaa‘i ‘a e loto ‘o e kakai ‘oku fo‘ou ki he kovi.

¹⁹Seuke, ko e me‘a ki ho‘omou talangofua, kuo pavake hono ongoongo ki he kakai kotoa pē: ko ia ‘oku te fiefia ‘iate kimoutolu: ka ‘oku te loto ke mou poto ki he fai lelei, kae vale ki he fai kovi.

²⁰Pea ko e ‘Otua, ‘a ia ‘oku ‘a ‘Ene ‘Afio ‘a e fakamelino, ‘e vave ‘ene laiki ‘a Sētane ‘i homou lalo va‘e. Ko e kelesi ‘a hotau ‘Eiki ko Sīsū, ‘ofa ke ‘iate kimoutolu ia![21]

²¹‘Oku ‘ofa atu ‘a Tīmote, ko si‘oku kaungā ngāue, kae‘uma‘ā si‘oku kāinga ko Lūsio, mo Sēsoni, mo Sosipeta.

²²‘Oku ou ‘ofa atu ‘i he ‘Eiki ‘e au Teasio na‘a ku tohi ‘a e ‘ipiseli ni.

²³‘Oku ‘ofa atu ‘a Keio, ‘a ia ‘oku ne tauhi kiate au, pea ki he siasi kātoa. ‘Oku ‘ofa atu ‘a ‘Elasito ko e sētuata fakakolo; pea mo si‘i kāinga ko Kuato.

²⁴Ko e kelesi ‘a hotau ‘Eiki ko Sīsū Kalaisi ke ‘iate kimoutolu kotoa. ‘Ēmeni.[22]

²⁵Pea ko ‘Ene ‘Afio, ‘a ia ‘oku ne mafai ke poupou kimoutolu ‘i ho‘omou fou ‘i he ‘alunga ‘o ‘eku Kōsipeli, mo e me‘a kuo fanongonongo ‘e Sīsū Kalaisi; ‘io, ‘i he ‘alunga ‘o ha tala mei he Ta‘ehāmai, ko e tala ‘o ha misiteli ne fufū mei he ngaahi kuonga ‘o ‘ītāniti ka kuo fakae‘a ‘i onopooni.

²⁶Pea fakahā ‘i he ngaahi tohi palofisai; ‘o fakatatau ki he tu‘utu‘uni ‘a e ‘Otua ‘o ‘ītāniti, koe‘uhi ke ai ha tuitala ki he lotu ‘i he fa‘ahinga fuli pē.

²⁷— ‘io, ‘a ‘Ene ‘Afio ‘oku hā ‘ia Kalaisi Sīsū, ko e ‘Otua ‘oku ‘a‘ana toko taha ‘a e poto — ‘ē, ke ‘o ‘Ene ‘Afio ‘a e Kolōlia ‘o lauikuonga! ‘Ēmeni.[23]