Read KO E TOH TAPU KATOA TONGA Loma 2 Bible Online

Loma 2 - KO E TOH TAPU KATOA TONGA bible

Loma 2

¹KO ia ai, ‘oku ‘ikai hao hao‘anga ‘o‘ou, ‘a e tangata fua pē ‘oku fakaanga; he ko ho‘o anga‘i ‘a e fa‘ahinga ko ē ‘i he me‘a ko ia, ‘oku ke anga‘i foki koe; he ‘oku ke fai ‘a e ngaahi me‘a pē ko ia ‘e koe ‘oku fakaanga.

²Ka ‘oku tau ‘ilo ko e fakamaau ‘a e ‘Otua ki he fa‘ahinga fai me‘a pehē, ‘oku totonu.

³Pea ko eni koā ho‘o fakakaukau, ‘a koe, siana, ‘oku ke anga‘i ‘a e kakai fai me‘a pehē; ‘osi, ‘oku ke fai pehē mo koe? ko ho‘o pehē, te ke ‘ata‘atā koe mei he fakamonū ‘a e ‘Otua?

⁴Ka na‘a ko ho‘o ta‘etoka‘i ‘a e koloa na ko ‘ene anga‘ofa, kae‘uma‘ā ‘ene fakatofutofu mo anga mokomoko; ‘o ‘ikai te ke ‘ilo, ko e anga‘ofa ‘a e ‘Otua ‘oku ne fai ha taki ki he fakatomala?

⁵Ka ke fai‘aki ho loto fefeka mo ta‘efakatomala na, ‘o ke fokotu‘u houhau ma‘au, ‘oka hoko mai ‘a e ‘aho fai houhau mo fakae‘a ‘a e fakamaau ‘au‘autotonu ‘a e ‘Otua:

⁶‘a ‘Ene ‘Afio te ne ‘atu ki he tangata takitaha, ‘o fakatatau ki he‘ene ngāue.

⁷‘Ilonga kinautolu kuo kītaki ‘a e fai lelei, ‘o fou ai ‘enau ngāue ki he lāngilangi‘ia mo e fakamālō mo e ta‘efa‘a‘auha, te ne ‘atu ki ai ‘a e mo‘ui ta‘engata:

⁸ka ko kinautolu ‘oku mo‘ui ma‘anautolu, pea ‘oku ‘ikai te nau muitala ki he mo‘oni, ka nau muitala pē ki he ta‘etotonu, ‘e tō kiate kinautolu ‘a e tuputāmaki mo e houhau,

⁹‘a e fakamamahi mo e holitu‘u; ‘io, ‘e tō ki he mo‘ui ‘a e tangata takitaha ‘oku fai ‘a e kovi; ‘o mu‘a ki he Siu, ka ki he Kalisi foki:

¹⁰ka ‘e tō ‘a e lāngilangi‘ia mo e fakamālō mo e tu‘umālie mo‘onautolu takitaha ‘oku ngāue lelei; ‘o mu‘a ki he Siu, ka ki he Kalisi foki.

¹¹He ‘oku ‘ikai ha filifilimānako ‘i he ‘Otua.

¹²He ‘ilonga kinautolu na‘e fai angahala ta‘e te nau ma‘u ha lao, pea ‘e ‘ikai kau ha lao ‘i honau faka‘auha; ka ‘ilonga kinautolu na‘e fai angahala kuo nau ma‘u ha lao, pea ‘e fakamaau kinautolu ‘aki ‘a e lao.

¹³He tala‘ehai ko e kau fanongo lao ia ‘oku tonuhia ‘i he ‘ao ‘o e ‘Otua, ka ko e kau fai ki he lao ko kinautolu pē ‘e fakatonuhia.

¹⁴(He ko e Senitaile, ‘a e kakai ‘oku ‘ikai te nau ma‘u lao, ‘oka ai ha‘anau fai fakaenatula pē ‘a e ngaahi me‘a ‘oku ‘i he Lao, neongo ‘oku ‘ikai te nau ma‘u lao ka ko e lao pē ‘a kinautolu ma‘anautolu:

¹⁵he ko e fa‘ahinga ia ‘oku hā ‘i he‘enau anga kuo tohi ‘i honau loto ‘a e ngāue fakalao; ai mo e fakamo‘oni foki ‘e honau konisēnisi, mo ‘enau fevakai‘aki ‘a ‘enau tō‘onga, ‘o nau fakahalaia, ‘io, mo fakatonuhia foki.)

¹⁶‘Io, ‘ilonga ‘a e kakai ‘oku fai ki he lao, ‘e toki fakatonuhia kinautolu ‘i he ‘aho ‘e fakamaau ai ‘e he ‘Otua ‘a e ngaahi me‘a fufū ‘a e kakai, ‘o hangē ko e Kōsipeli ‘oku ou malanga‘aki, ‘o fai ‘ia Kalaisi Sīsū.

¹⁷Ka ‘o kapau ko e toko taha koe ‘oku lau ko e Siu, mo ke fuataki ha lao, mo ke vīkiviki ‘i he ‘Otua,

¹⁸‘o ke ‘ilo hono finangalo totonu, mo ke sivi ‘o ‘ilo ‘a e ngaahi me‘a ‘oku lelei lahi, ko ho akonekina ai pē mei he Lao;

¹⁹pea ‘oku ke falala ko e toko taha koe ke takihala ki he kakai kui, ke fakamaama ki he kakai ‘oku nofo he po‘uli,

²⁰ke hīnoi‘i ‘a e kakai ‘oku ta‘eloto, ke ako ‘a e kakai kei tamaiki, koe‘uhi tokua, kuo ke ma‘u ‘i he Lao ‘a e poto mo e mo‘oni kuo ‘ai sino —

²¹Pea ka kuo pehē, pea ko e tangata koe ‘oku ke akonekina ‘a e kakai kehe, kae ‘ikai fai ha ako kiate koe, ‘ō? Ko e toko taha koe ‘oku ke fanongonongo ke ‘oua na‘a kaiha‘a, ka ke kaiha‘a ‘e koe?

²²Ka e toko taha koe ‘oku ke pehē ke ‘oua na‘a tono fefine, ka ke tono fefine ‘e koe? Ko e toko taha koe ‘oku ke fakalili‘a ki he ‘aitoli, ka ke kaiha‘a pē mei he fale ‘aitoli, ‘ō?

²³‘Ā, ‘a koe ‘oku ke pōlepole ‘i ha lao, ‘oku ke fakaongokovi ‘a e ‘Otua ‘aki ho‘o maumau‘i ‘a e Lao:

²⁴he ‘oku lau‘ikovi ‘a e huafa ‘o e ‘Otua ‘i he Senitaile ko e me‘a ‘iate kimoutolu: ‘o hangē ko e folofola.

²⁵‘Io, ‘oku mo‘oni pē ko e me‘a ‘aonga kiate koe ‘a e kamu, ‘o kapau te ke fai ki he Lao. Ka ‘o kapau ko e maumau lao koe, kuo hoko ho‘o kamu ko e ta‘ekamu.

²⁶‘Āua, pea neongo ko si‘i ta‘ekamu, ka ‘o kapau te ne tauhi ‘a e ngaahi tu‘utu‘uni ‘a e Lao, ‘ikai ‘e lau ‘ene ta‘ekamu ko e kamu?

²⁷‘Io, ko ia ‘oku ne ‘osiki ‘a e Lao, neongo ‘oku ne ta‘ekamu ko si‘ene fakaenatula pē, ka te ne fakahalaia koe, ‘a koe ‘oku ke maumau lao neongo ho‘o ma‘u tohi mo e kamu.

²⁸He tala‘ehai ko e Siu mo‘oni ia ‘oku Siu ‘i tu‘a pē; pea tala‘ehai ko e kamu mo‘oni ia ‘oku ha pē ‘i tu‘a, ‘i he kakano:

²⁹kaekehe, ko e Siu mo‘oni ia ‘oku Siu ‘i loto, pea ko e kamu mo‘oni ‘a e kamu ‘o e loto, ‘a ia ‘oku tu‘unga ‘i ha laumālie ‘o ‘ikai ‘i ha tohi; ‘a ia ko hono fakamālō ‘oku ‘ikai mei he tangata ka mei he ‘Otua.