Read KO E TOH TAPU KATOA TONGA Loma 3 Bible Online

Loma 3 - KO E TOH TAPU KATOA TONGA bible

Loma 3

¹PEA ka ‘oku pehē, pea ‘oku hulu atu ‘a e Siu ‘i he hā? ‘io, ko e hā hano ‘aonga ‘o e kamu?

²‘Oku lahi ‘ene hulu atu ‘i he me‘a kotoa pē. Ko hono me‘a lahi ko e tu‘anaki kinautolu, ‘o tuku ki ai ‘a e ngaahi fo‘i folofola ‘a e ‘Otua —

³‘O hā tokua? Ko ia ai pē ‘a e ta‘etui ‘a e ni‘ihi, ka ko e motu ‘enau tui ko e me‘a ia koā ke motuhi ai ‘a e fai ‘a e ‘Otua ki he‘ene lea, ‘ō?

⁴Molekemama‘o! Tau tuku mu‘a ‘oku mo‘oni pē ‘a e ‘Otua, kae loi ‘a e kakai kotoa pē: ‘o hangē ko ia kuo tohi, Koe‘uhi ke hā tonuhia ho‘o ngaahi folofola, Pea ke ke ikuna ‘oka anga‘ia.

⁵Ka ‘o kapau ko ‘etau fai hala ko e me‘a ia kuo e‘a ai ‘a e faitotonu ‘a e ‘Otua, pea ta fēfē ai? Te ta lau ‘oku hala ‘a e ‘Otua he‘ene fai houhau ai, ‘ō? (Ko si‘eku lau fakaetangata pē.)

⁶Molekemama‘o! he ka ne pehē, pea lava fēfē ‘e he ‘Otua ke fakamaau ‘a māmani?

⁷‘Io, kapau kuo e‘a ‘a e mo‘oni ‘a e ‘Otua, ‘o fakautuutu ai hono ongoongolelei, ko e me‘a tokua ‘i he‘ete loi, pea ko e hā ‘oku kei anga‘i ai kita foki, ‘o pehē kuo u fai angahala?

⁸Pea ko e hā ai ‘oku ‘ikai te tau fai kovi mu‘a, kae tupu ‘a e lelei? ‘o hangē ko homau lau‘ikovi ‘oku fai, mo e taukave ‘e he ni‘ihi, tokua ‘oku pehē ‘emau lea. Tonuhekina pē ‘a e tuku ke tautea ha me‘a pehē.

⁹Pea kuo ta fēfē ē? Kuo ta fokotu‘u hata pā, ‘ō? ‘Oku ‘ikai ‘aupito.[3] ‘Āua, na‘a mau fakamo‘oni ‘anenai, ‘oku mo‘ua kotoa pē ‘i he angahala ‘a e Siu mo e Kalisi fakatou‘osi.

¹⁰Pea ‘oku hoa mo ia ‘a e me‘a kuo tohi, ‘Oku ‘ikai ‘aupito ha faitotonu; ‘Oku ‘ikai ‘aupito ha taha.

¹¹‘Oku ‘ikai ha fai fakapotopoto, ‘Oku ‘ikai ha taha ‘oku kumi ki he ‘Otua.

¹²Kuo nau afe kotoa pē; Kuo nau hoko ko e koto ‘auha kotoa pē: ‘Oku ‘ikai ha taha ‘oku angalelei, ‘Oku ‘ikai ‘aupito ha taha.

¹³Ko e fonualoto matangaki honau kia; Ko e ngāue ‘a honau ‘elelo ko e fakahekeheke; Kuo fufū ‘i honau loungutu ‘a e me‘a kona ‘o e ngata.

¹⁴Ko e koto kapekape ‘a honau ngutu, mo e koto fakamahu.

¹⁵‘Oku nau ve‘evave ke lilingi toto.

¹⁶‘Oku ‘i honau ngaahi hala ‘a e maumau mo e fakamamahi.

¹⁷Pea ko e hala ‘o e melino kuo ‘ikai te nau ‘ilo ki ai.

¹⁸Pea ‘oku ‘ikai hā ki honau mata ‘a e ngeia ‘o e ‘Otua.

¹⁹Pea ko eni, ‘oku tau lāu‘ilo, ‘ilonga ha fakamatala ‘a e Lao, ko e fai pē ki he kakai ‘oku kau ki he Lao; ko e fai ke tāpuni ai ‘a e ngutu kotoa pē, pea ke hoko ‘o halaia ki he ‘Otua ‘a māmani kātoa.

²⁰Koe‘uhiā ko e me‘a ki he ngaahi ngāue fakalao, ‘e tu‘u mola ai ‘a e kakano kotoa pē ‘i hono ‘ao, ‘o ‘ikai hanau fakatonuhia mei ai: he ko e me‘a ‘oku fou mei he Lao, ko e faka‘ilo angahala pē.

²¹Ka ‘i onopooni kuo fakae‘a ha fakatonuhia mei he ‘Otua, ‘a ia ‘oku ta‘ekau ai ‘a e lao, ka ‘oku ‘i ai ha lau ki ai ‘i he Lao mo e Tohi palōfita.

²²‘Io, ko e fakatonuhia mei he ‘Otua ‘oku fou mai ‘i he tui kia Sīsū Kalaisi ki he kakai kotoa pē ‘oku tui.

²³He ‘oku ‘ikai ha fai kehekehe; he kuo fai angahala kotoa pē pea ‘oku ‘ikai te nau a‘usia ‘a e hōifua ‘a e ‘Otua;

²⁴ka nau ma‘u foaki pē ‘a e fakatonuhia ‘i he‘ene ‘ofa pē ‘a‘ana, ko e me‘a ‘i he totongi huhu‘i ‘a ia kuo ‘ia Kalaisi Sīsū.

²⁵‘a e Toko Taha ko ia na‘e faka‘ali‘ali ‘e he ‘Otua ko e me‘a fakatupu hōifua; ko e hōifua tu‘unga ‘i hono ta‘ata‘a,[4] pea founga ‘i he tui; ko e faka‘ali‘ali ‘e he ‘Otua ma‘a ‘Ene ‘Afio, ke hā ai ‘ene faitotonu, koe‘uhiā na‘e laka ‘i he ngaahi angahala langaimu‘a, ko e me‘a ‘i he fai fakatofutofu ‘a e ‘Otua;

²⁶‘io, koe‘uhi ke hā ai ‘ene faitotonu ‘i he kuonga ko eni, ke fakatou hā ‘oku ne faitotonu mo ne fai fakatonuhia kiate ia ‘oku ‘i he tui kia Sīsū.

²⁷Pea ko e fē ‘eni ‘a e pōlepole na? Kuo tāpuni ‘a e matapā ki ai. Ko e hā ‘a e anga ‘o e lao ‘oku pehe‘i ai? Ko ha lao ngāue koā? ‘Ikai, ka ko ha lao tui.

²⁸He ‘oku mau pehē, ‘oku fakatonuhia ha tangata ‘aki ‘a e tui, ‘ata‘atā mei he ngaahi ngāue fakalao.

²⁹‘Io, ko e ‘Otua ko e ‘Otua ‘o e Siu pē koā? ‘Ikai ko e ‘Otua ‘o e Senitaile foki? ‘Io, ko e ‘Otua ia ‘o e Senitaile foki.

³⁰‘O kapau ā ‘oku taha tofu pē ‘a e ‘Otua, ‘a ia te ne fakatonuhia si‘i kamu mei he tui, pea mo si‘i ta‘ekamu ko e me‘a ‘i he‘ene tui.